LUZIA, OORAKALA MWETTO AWE WOOTHIYANA. Ori ene mwaana aahiphwanya oretta wowaakuva oraveya oniitthaniwa poliomielite, yoowo onihonona muupuwelo ni ottoopare. Vaavo aarina awe iyaakha 16, muthiyana anvarela awe muteko, aahihimya so: “Muluku ohoohukhumuni mwaha wa ohiwiiwelela amaminyu ni waalavuliha moohikhalela”. Nnaamwi sivinre ene iyaakha sinceene, nlelo Luzia onnuupuwela moota masu ale yaamuhomme aya.

OKATHI DAMARIS AASUWENLE AWE WIRA AAHIKHALANA KANSER A MOTTOOPARENI, apapawe yaahimukoha so: “Mwanaka exeeni mpanke anyu, ehalaka wookhumelelani etthu ela? Yookhala etthu yootakhala mpanke anyu. Ti maana aya Muluku onoohukhumu aweni”. Masu ale yaahinwereya vanceene Damaris.

Okhuma khalai apinaatamu anikupali wira Muluku onnaahukhumu atthu ni iretta. Eliivuru Manners and Customs of Bible Lands (Soolema sa khalai sa ilapo aalempwa Biibiliya), enihimya wira eseekulu yoopacerya atthu anceene yaakupali wira “iretta saakumiheriwa ni itampi sa mutthu, nto oretta waamurweela mutthu sintoko ehukhumu mwaha wa etampi aapanke awe”. Eliivuru Medieval Medicine and the Plague, ehimmye wira eriyari ya iyaakha 500 mpakha 1500 Ohinatthi Orwa Kristu, “atthu akina yaakupali wira Muluku onnikumiherya iretta wira aahukhumu atthu mwaha wa itampi saya”. Nto vakhala wira ti siiso, niireke oretta wa Peste Negra yoowo waawiivale atthu imilyau sinceene wEuropa eseekulu 14, waakumiheriwe ni Muluku wira aahukhumu atthu ootakhala? Sootokosa sinooniherya wira sookhala iretta sinikumiheriwa ni axikokho. Nto niireke iretta iyo saalepeliwe ni Muluku? Atthu akina anniikoha so: Muluku onnirumeela iretta wira aahaaxe atthu mwaha wa itampi saya? *

MUTHOKORERYE ELA: Vakhala wira Muluku onnaahukhumu atthu ni iretta, nto xeeni Yesu Mwaana a Muluku, aapenunxe awe aretta? Niireke opaka eyo khahiyo waarowa okhala ovaanyiha exariya ya Muluku? (Matheyo 4:23, 24) Yesu khaakhanle oovaanyiha miteko sa Muluku. Owo aahimmye so: “Miyo kinnìra itthu sinimusivela” ni “kinnetta ntoko Atithi sikirummyaya”.—Yohani 8:29; 14:31.

Biibiliya onihimya wira Yehova Muluku “iphiro sawe sothene ti sa xariya”. (Otumererya 32:4) Mwa ntakiheryo, Owo khaakhanle ookumiherya ehasara ya omora eviyau, ni owiiva atthu oohittheka ophavelaka paahi omuhukhumu mutthu mmosa ori nviyauni mmo! Oromolaka exariya ya Muluku, Abrahamu, yoowo aamwaamini vanceene Muluku aahimmye wira Muluku khokhanle oowiiva “atthu òloka vamosá n’atthu òtakhala”. Iwo waarowa okhala ‘ohuupuwela’ saana. (Maphattuwelo 18:23, 25) Biibiliya onihimya wira “Muluku khivo yotakhala enìrawe”.​—Yobi 34:10-12.

Ohaawa onniphwanya khahiyo ehukhumu ya Muluku mwaha wa etampi nipanke ahu. Yesu aahooniherya saana eyo vaavo owo ni awiixutti awe yaanwenhe aya mulopwana aayariwe ohoonaka. “Awixutti awe yahimukoha wira: Pwiya, ola ahalaka oyariwa ohònene, otthenke t’uvi? Otthenke mmansawe, walá atthenke alipa amuyanre? Yesu ahiwakhula wira: Ola khatthenke, hatá alipa amuyanre khattenke”.—Yohani 9:1-3.

Mwaha wa miyuupuwelo soohiloka suulaanale okathi ole, awiixutti a Yesu yaahitikinihiwa nuumala Yesu ohimya wira mulopwana ole ni anamuyari awe khiyaatthenke etthu yaawiirinhe ohukhummwa. Nto vaavo Yesu ampenunxe awe mulopwana ole aahimalamaliha miyuupuwelo soohiloka soowi ohaawa  ehukhumu ya Muluku. (Yohani 9:6, 7) Olelo-va, atthu aniwereiwa iretta sowoopiha pooti ophwanya nimaaliho mwaha woosuwela wira Muluku khahiyo tonikumiherya ohaawa waya.

Biibiliya onninlipiherya wira:

• “Muluku khanwerya wehereriwa ni sotakhala: yowo mwanene khanimutthekiha mutthu”. (YAKOBO 1:13) Nave itthu “sotakhala” sinaahaaxa apinaatamu okhuma khalai, ohela muhina iretta, woona owereya, ni okhwa moohipisa sinoomala.

• Yesu Kristu ‘ahavoniha [waapenuxa] aretta othene’. (MATHEYO 8:16) Vaavo aapenunxe awe atthu yaawereiwa, Mwaana a Muluku aahooniherya wira muhoolo Omwene wa Muluku onoopaka itthu sinceene sooloka.

• “Owo [Muluku] onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”.​—WISUPULULA 21:3-5.

Okhuma khalai apinaatamu anniikoha so: Xeeni atthu sinaakhumelela aya mixankiho sinceene ni anihaawa aya? Vakhala wira Muluku khahiyo tonikumiherya ohaawa, nto tani tthiri onikumiherya? Makoho ala anrowa wakhuliwa mwaha onittharelana.