Mwaha ovinre noolavula wira Croesus aahiwokiwa ni nahako mmosa a oDelphi. Eyo yaahimwiiriha oxinttiwa okhottoni ni mwene a oPersia. Masi mBiibiliyani yookhala eprofesia yaamulavula mwene a oPersia, yeeyo yiiraneyale moomalela.

Iyaakha 200 mwene Kiro ohinatthi oyariwa, profeta Yesaya aahimuromola wira ti yoowo aarowa otuphela muttetthe wa oBabilonia, ni aahitthokiherya moota eyo yaarowa aya wiiraneya.

Yesaya 44:24, 27, 28: “Apwiya yawo t’anihimya wira . . . ‘Miyo kinnihimerya ephareya wira: Mùmeke. Kinoweleliha màsi a miró sanyu’. Miyo kinnimuhimerya Kiro wira: ‘Nyuwo mwá makampusi aka’. Itthu sothene sinimurumaka, owo onrowa omaliherya: owo onoruma wira oYerusalemu otekiwe-tho, empa ya Muluku etekiwe-tho’”.

MuGriki mmosa onisoma sowiiraneya sa ephattu oniitthaniwa Heródoto, aahimmye wira anakhotto a Kiro yaahihapuxa maasi a muro Eufrates, yoowo waavira eriyari ya epooma ya oBabilonia. Eyo yaahaakhweiherya atoropa a Kiro weetta mmuro mme, akelaka mpooma mwa oBabilonia. Nuumala okuxa epooma ele, Kiro aahaataphula aYuda yaavariwe oBabilonia ni aahiweemererya ohokolowela elapo aya wira yateke-tho muttetthe wa oYerusalemu, yoowo waavinre iyaakha 70 opwexakasiwe ene.

Yesaya 45:1: “Apwiya animuhimerya Kiro, murumeyi aya, wira: ‘Miyo kihothanlani, kihovahani ikuru, wira munyakelase maloko àtthu, wira mmoroxe mavaka n’ikatana sa mamwene, wira mikhora sihuleye oholo wanyu, sojeleke owaleya-tho’”.

Anakhotto a oPersia yaahikela mpooma mwa oBabilonia aviraka mikhora miili suulupale, seiyo yaaphannye aya soohuleya sene. Vaakhanle wira aBabilonia yaahisuwela ele Kiro aapaka awe ota, awo yanwala mikhora sa ixiri sa epooma, seiyo saaviriwa okeliwaka mmuro Eufrates. Masi ntoko niiwale ahu, mikhora iyo khisaawaliwe nnakhala vakhaani.

Ela eprofesia emosa paahi mwa iprofesia sinceene sa mBiibiliyani siiraneyale. * Moovirikana ni apinaatamu yaawo anaaroromela amuluku aya eethiru wira ahimye itthu sinrowa wiiraneya muhoolo, iprofesia sa Biibiliya sinikhuma wa Muluku, yoowo ohimmye so: “Okhuma wopajeryani, miyo kinnilaleya sinrowa wiraneya; okhuma khalai, kinnilaleya sihinatthi okhumelela”.​—Yesaya 46:10.

 Yehova paahi, yoowo ori Muluku eekeekhai, toniwerya ohimya siiso. Nsina nawe nintaphulela wira owo “Onniiriha Okhala”. Nnooniherya owerya wawe osuwela ni opaka itthu sinrowa wiiraneya muhoolo, moovarihana ni otthuna wawe. Eyo enninlipiherya wira itthu sotheene oleihenrye awe sinimwiiraneya tthiri.

Munniphavela osuwela iprofesia sa Biibiliya siniiraneya mahiku ala? Soovira iyaakha sowiiraka 2.000, okhuma vaavale Biibiliya ohimmye awe wira “mahiku òxanka” yaarowa okhumelela “okathi wokiserya”. Okathi wookiserya wa xeeni? Ohiya wa apinaatamu nnakhala wa elapo ela ya vathi, masi okathi wookiserya wa oxanka, ohaaxiwa, ni ohaawa onaaphwanya apinaatamu mwa iyaakha sinceene. Nrowe niwehe iprofesia vakhaani sinthoonyerya wira ninkhala “okathi wokiserya”.

2 Timótheyo 3:1-5: “Musuwelexe wira, okathi wokiserya . . . , atthu anrowa wisupuwelaka mmansaya pahi, anrowa okhala anamilili, anrowa wittottopaka ni wisona. Awo anonveha Muluku, anokhala òhiwìwelela anamuyari aya, òhixukhuru, òhittittimiha itthu sowarya, òhiphenta, òhimoriwa ikharari, òwòtherya akhw’aya, òhisumaliha, òwali, òvirikanya sorera sothene, anamalupattha, òwakuva onanariwa, òsareya wisona, òphavela sopuha, òmuhiya Muluku; antthuna woneyaka ntoko atthu òwamini, nto anokhotta ikuru so wamini weiwo”.

Khamunikupali wira mahiku ala atthu anootepa wooniherya mikhalelo iyo soohiloka? Mooweha wira olelo-va khareere atthu aniisuupuwela mmensaya paahi, oophenta musurukhu ni oowiixinnuwiha? Mooweha wira atthu anootepa ohaavilela akhwaaya ni ohiphavela wiiwanana? Tthiri munniweha wira anamwane anceene khaniwiiwelela anamuyari aya, nave atthu anootepa ophenta soopuha ohiya omphenta Muluku. Khuta nihiku, itthu sinootepa onanara.

Matheyo 24:6, 7: “Munrowa wiwa silavuliwaka ikhotto ni soruma sa ikhotto . . . . Maloko makina anowana ni maloko makhw’aya, elapo enotuphela elapo ekina”.

Vanihimmwa wira okhuma mwaakha wa 1914, ikhotto soowiiva atthu oowiiraka imilyau 100. Nummuru nlo ninnivikana mwaattelo wa atthu otheene anikhala ilapo sinceene. Nto nkahaya muupuwele atthu akavi yinlale ni oriipiwa murima mwaha wa atthu awo yiiviwe. Niireke apinaatamu aapaka etthu eniwerya omaliha ikhotto?

Matheyo 24:7: “Enokhumelela etala”.

Mutthenkeso wa Olumwenku Oniweherya Yoolya ohimmye so: “Olumwenku ola onniruweriwa eyoolya enaaphiyerya atthu otheene, masi atthu oowiiraka imilyau 815 annirupela etala khula nihiku. Nave-tho anamunceene anniphwanya iretta mwaha woohikhalana yoolya yooloka”. Vanihimmwa wira khula mwaakha anamwane aniphiyerya imilyau tthaaru, annookhwa mwaha wa etala.

Luka 21:11: “Sinokhumelela itetere sulupale”.

Khula mwaakha, sinnikhumelela itetere siniphiyerya 50.000. Mwa seiyo, 100 sinnihonona inupa, nto etetere emosa yuulupale ennihonona itthu sinceene. Anamatokosa anihimya wira okhuma mwaakha wa 1975 mpakha 2.000, itetere soowiiva atthu 471.000.

Matheyo 24:14: “Ehapar’ila yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto olumwenk’ula omaleke”.

Olelo-va, Anamoona a Yehova anivikana imilyau 8, annilaleya ihapari sa Omwene wa Muluku, ilapo sinivikana 240, olumwenku wotheene. Awo annilaleya ihapari sooreera ipooma sowaatta atthu, mittetthe soorakamela, mutakhwani ni mmwaako. Nto nuumala Muluku oweha wira muteko owo woophiyerya, ‘olumwenk’ula onomala’. Eyo enitaphulela exeeni? Enitaphulela wira iguvernu sotheene sa apinaatamu sinoomalihiwa, ni enookhumelela eguvernu esya, eyo piiyo, Omwene wa Muluku. Omwene owo onrowa oruuha-ni? Xontte, musome myaha sinttharelana.