Astrologia ti enamuna emosa ya waaxerya ehako sirumeeliwaka itheneeri, mweeri ni iplaneta. Vanikupaliwa wira itthu iyo

sinnivara okumi wa apinaatamu valaponi. Atthu anirumeela astrologia anikupali wira mukhalelo wa itheneeri, nsuwa ni iplaneta okathi oniyariwa awe mutthu, onnitthokiherya moota okumi wa mutthu owo onrowa aya okhala muhoolo.

Nnaamwi yoolema eyo epacenrye ene oBabilonia a khalai, nlelo ti yoovuwa. Yootokosa emosa yaapakiwe wEstados Unidos mwaakha wa 2012, atthu anceene yaahimya wira astrologia “oniirela mpantta siensia”, ni atthu ipursento 10 yaahimya wira “ti siensia ene”. Niireke tthiri astrologia siensia? Nnaari. Nrowe niwehe mathowa aya.

• Iplaneta ni itheneeri khasirina ikuru sinaavara apinaatamu, ntoko anihimya aya atthu animusoma astrologia.

• Itthu sa muhoolo sinihimmwa orumeeliwaka astrologia khahiyo sa vameekhaaya.

• Itthu sinipakiwa vano orumeeliwaka astrologia sinivarihana ni yookupali ya khalai yoowi iplaneta sotheene sineetta sirukureryaka elapo ya vathi. Masi ekeekhai ti yoowi iplaneta sotheene sineetta sirukureryaka nsuwa.

• Atthu yaamurumeela astrologia yaanihimya yowiiraneya emosa, masi yaakhumelela mwa inamuna soovirikana.

• Atthu animurumeela astrologia anihimya wira atthu anikawanyeya wa ipantte 12 siniitthaniwa ikanyeryo sa zodíaco. Nto iyo sinivarihana ni nihiku mutthu oyariwe awe. Masi okhala wira elapo ennituruka opuro aya nuuvira wa okathi, nto mahiku yaale yaalikanihiwe ni zodíaco a khula mutthu annivirikana okathi nsuwa ninvira aya opuro ori itheneeri saavahiwe nsina na zodíaco owo.

Atthu anikupali wira ikanyeryo sa zodíaco sinnikhaliherya osuwela mukhalelo wa mutthu. Masi ekeekhai ti yoowi, atthu ayariwe nihiku nimosaru kharina mikhalelo simosaru; nto nihiku mutthu oyariwe awe khaninsuwanyeiha mukhalelo wa mutthu. Nto ohiya omuthokorerya mutthu ntoko siri awe, ale animurumeela astrologia annaathokorerya atthu moovarihana ni itthu sa ethiru. Niireke iwo khahiyo waathanya atthu?

Okhuma khalai, atthu annaaxerya ehako. Anahako a khalai yaanirumeela marupo, masasu, hapa ni itthu sikina siri mmirimani mwa inama wala atthu wira yaaxerye ehako aya. Ohiya-tho vo, akina yaaniwehexexa moota muthupi aathupa awe ipyo wira yaaxerye ehako. Akina yaanirumeela malepa aniphwanyaneya mmakukhuni mwa exa aahiiso ekafe yooxiliwa. Olelo-va, anamunceene anirumeela ehako ya khavacira, aboola oowaarya, osoma matata, makhuva ni inamuna sikina wira “asuwele” itthu sinrowa wiiraneya mookumini mwa mutthu muhoolo. Niireke waaxerya ehako enamuna yoororomeleya ya osuwela itthu sa muhoolo? Nnaari, khahiyo. Nrowe nthokorerye vakhaani mwaha ola.

Ihako khasinivarihana. Anahako anli pooti ohimyaka itthu soovirikana okathi anaaxerya aya ehako emosaru, hata arumeelaka enamuna emosaru ya waaxerya ehako. Nuupuwele so: anahako anli anirumeela enamuna emosaru ya ehako, yakohiwa etthu emosa oowanli aya yaahaana waakhula etthu emosaru, kiira? Masi ikwaha sinceene waakhula waya onnivirikana.

Anahako anirumeela olavilavi. Atthu anaavaanyiha anahako anihimya wira ikaruma iye anirumeela aya khahiyo etthu, aniirela waawokana atthu paahi. Anahako anihimya ehako aya, ohiya mwaha wa ikaruma iyo anirumeela aya, masi aninweha mutthu moota onikhala awe okathi ole, yeereryaka oweha itthu sinimuxankiha, nto nuumala-vo anahimya etthu ene. Mwa ntakiheryo, nahako pooti omukohaka mutthu etthu, nto okathi ene yoowo onninweha moota onilavula awe ni itthu sinilavula awe, moota ethoni awe eri aya, nto oneererya oweha etthu enimuxankiha mutthu ole. Nuumala-vo, atthu annimukupali nahako ole osuwela itthu, variki mwaneene tomukhalihenrye nahako ole osuwela etthu ene. Nto okhuma vaavo, atthu anceene anrowa omakelaka omukupali nahako ole, ni onvaha musurukhu munceene.

Omurumeela astrologia ni waaxerya ehako onitaphulela wira Muluku oolepa itthu sotheene sinrowa oniiraneela muhoolo. Masi niireke ti siiso? Biibiliya onihimya wira hiyo nookhalana otaphuwa woothanla itthu nimphavela ahu okupali aahiiso moota nimphavela ahu weettiha okumi ahu. Nave onihimya wira itthu nnaala ahu olelo, ti seiyo ninrowa ahu ohepha muhoolo.​—Yoxuwa 24:15.

Atthu otheene animukokhorela Muluku aakhalana mathowa maalupale aniwiiriha othanya astrologia ni waaxerya ehako, maana Muluku onnikhoottiha inamuna sotheene sa waaxerya ehako. Biibiliya onihimya so: “Ahikhalé mutthu onrowa . . . waxerya ehako, walá omurava mukhw’awe, walá wakoha amuluku èthiru, nnákhala wakoha majini ni minepa s’alipa-okhowa. Apwiya annanyokha atthu anìra sotakhala seiyo. Mulattu wa sonanara seiyo Apwiya Muluku anyu t’aniwomolelaya atthu a mulaponi munrowanyu okuxa”.​—Otumererya 18:10-12.