Ntoko Yesu aahimmye awe khalai, ihapari sooreera sa Omwene wa Muluku sinnilaleiwa elapo yotheene. (Matheyo 24:14) Eliivuru ya Daniyeli enihimya wira Omwene owo eguvernu ya Muluku. Ekapiitulu 2 ya eliivuru eyo, yookhalana eprofesia enilavula sa okhumelela wa iguvernu sa apinaatamu, okhuma eguvernu ya Babilonia mpakha ya mahiku ala. Elavulaka sa itthu sinrowa wiiraneya muhoolo, eversiikulu 44 enihimya so:

“Muluku a wirimu onokumiherya omwene ohinrowa omala, nnákhala oweriwa n’umwene mukina. Omwene owo onohonona n’upwetexa omwene wothene wa mulaponi, numalá onrowa okhalaka wa mahiku othene”.

Eprofesia ela ni sikina sa mBiibiliyani, sinnooniherya wira Omwene wa Muluku onrowa orantteliha iguvernu sotheene sa apinaatamu, ni onookumiherya murettele ni wiiwanana mulaponi motheene. Ninrowa okhalaka sai okathi owo? Nwehe itthu kamosa-kamosa sinrowa wiiraneya.

• KHASINROWA-THO OKHALA IKHOTTO

  Esalimo 46:10: “[Apwiya] àmaliha ekhotto mulaponi mothene: ahintakasa miyura ni mavaka èkhotto, ni àhonona ni moro iyuma sothene s’ekhotto”.

  Nkahaya muupuwele moota olumwenku ola waarowa aya okhala vaakhanle wira musurukhu wotheene oniyeehiwa wira sipakiwe ikapwitthi onnirumeeliwa mwa inamuna sikina sinikumiherya mireerelo. Omwene wa Muluku onoopaka marukunuxo awo.

• KHASINROWA-THO OKHALA IRETTA

  Yesaya 33:24: “Mw’atthu ankhala mmuttettheni khavo-tho onkela ohimya wira: ‘Miyo ki muretta’”.

  Nkahaya muupuwele olumwenku ohinrowa okhala mutthu oniwereiwa murima, câncro, malária, wala eretta ekina. Ixipitaali ni mirette khasinrowa-tho okhala. Atthu otheene anrowa okhalana ekumi yoomalela.

• KHENROWA-THO OTHOWA YOOLYA

  Esalimo 72:16: “Mmatta mothene muruwerye solya sinjene: mattumuxa esareye ipyó”.

  Etthaya enooruweryaka eyoolya yinceene enrowa waaphiyeryaka atthu otheene. Etala ni wootta mwaha woothowa yoolya sinoomala.

• KHUNROWA OKHALA-THO WOONA OWEREYA, ORIIPIWA MURIMA NNAKHALA OKHWA

  Wisupulula 21:4: “[Muluku] onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho, nnákhala ohawa. Tthiri olumwenku wa khalai wovira”.

  Eyo enitaphulela wira atthu anrowa okhalaka ni  okumi woomalela, mahiku otheene mparayiisu elapo yeela ya vathi! Eyo ti etthu Yehova Muluku, Mpattuxa ahu oophenta, oleihenrye awe.

Niireke itthu iya siromoliwe vasulu-va sinimwiiraneya tthiri? Nnaamwi atthu anceene yaakhulelaka wira okumi wooloka Biibiliya onilaiherya awe ti wooreera, masi atthu awo anoona wira eyo khenikhala-khala yiiraneyaka. Awo pooti wuupuwelaka siiso maana khuuvo pinaatamu otonko okhalana okumi ntoko owo, oniwerya onitthokiherya saana.

Apinaatamu annihaawa vanceene okhuma khalai mwaha wa etampi aravihiwe aya ni annookhwa, tivonto vannaavila okupali marukunuxo awo. Awo anoona wira okumi ti yoola paahi. Masi ola khahiyo okumi Yehova Muluku, Mpattuxa ahu oniphavela awe wira nikhalaneke.

Muluku oniphavela wira nikupaliki itthu oleihenrye awe. Tivonto onihimya awe so: “Molumo ankhuma mwano mwaka khantthikela-tho wa miyo ehivanre muteko aya, ehirale itthu sintthunaka, ehimalihenrye sarumalyaka”.​—Yesaya 55:11.

Biibiliya onnimuhimya Yehova okhala Muluku “òhòtha”. (Tito 1:2) Nto okhala wira ooleiherya itthu iya sotheene sooreera, nihaana wiikoha so: Vanniweryaneya tthiri apinaatamu okhalana okumi woohimala mparayiisu, elapo yeela ya vathi? Nipakeke exeeni wira naakhele eparakha eyo? Myaha sinittharelana sa erevista yeela sinnaakhula makoho awo.