NLIPELELO NOOHAKALALIHA! Mpattuxa ahu ooleiherya onivaha okumi ohinimala, elapo yeela ya vathi. Masi anamunceene vannaavila okupali eyo. Awo anihimya so: ‘Khula mutthu onoophiya okathi onrowa awe okhwa. Eyo ti ephattu ahu, oyariwa ni okhwa’. Akina anuupuwela wira pooti okhalana okumi woohimala, masi ohiya elapo yeela ya vathi. Awo anihimya wira okumi woohimala oniphwanyiwa paahi nuumala mutthu okhwa, ni orowa wiirimu. Ankhi nyuwo, munuupuwela sai?

Muhinatthi ohimya muupuwelo anyu, xontte muthokorerye moota Biibiliya onaakhula awe makoho ala mararu anittharelana: Epakeliwo ya pinaatamu enooniherya sai wira owo opakeliwe okhala mahiku otheene? Xeeni Muluku ohalaka opaka elapo ni waapaka apinaatamu? Naakhwa opacenrye sai waakhumelela apinaatamu?

Epakeliwo ya pinaatamu teri etthu yootepexa otikiniha mwa itthu sotheene Muluku opattunxe awe mulaponi. Moota xeeni? Biibiliya onihimya wira Muluku aapanke apinaatamu “aìlattanihaka mwanene”. (Maphattuwelo 1:26, 27) Eyo enitaphulela exeeni? Enitaphulela wira apinaatamu aavahiwa mikhalelo sinlikana ni iye sa Muluku, ntoko ophenta ni exariya.

Ohiya-vo, apinaatamu aavahiwa owerya wuupuwela ni ankhili, ni okhalana mikhalelo sooloka sa omunepani. Ti nthowa naya ninwerya ahu woona oreera itthu sootikiniha Muluku opattunxe awe, ohela muhina itthu ntoko muusika, idesenyu ni ipoesia. Etthu yootepexa otthuneya ti yoowi apinaatamu paahi taniwerya omukokhorela Mpattuxa aya. Nto mikhalelo iyo sa vameekha aya sinnooniherya ovirikana wuulupale okhanle apinaatamu ni inama.

Nkuupuwelani ela: Niireke Muluku aamwaavaha apinaatamu mikhalelo iyo sooloka ni waavaha ikuru sa ovikaniha wooniherya mikhalelo iyo mwa okathi woohimala, vaakhanle wira aapattunxe wira akhaleke iyaakha vakhaani? Muluku ohaavaha apinaatamu mikhalelo iyo sooloka wira akhalaneke okumi wooloka mahiku otheene valaponi vaava.

Masi atthu akina anihimya wira Muluku khaaphavela wira apinaatamu akhalaneke okumi woohimala elapo yeela ya vathi. Awo anihimya wira elapo ela nnoovira, epakeliwe wira yeehereriweke apinaatamu aniphwanelela orowa okhalaka  wiirimu ni Muluku. Vakhala wira ti siiso, weeso Muluku tonikumiherya itthu sotheene sootakhala siri mulaponi, kiira? Nnaari. Muluku khonikumiherya itthu iyo. Mwekeekhai, omutthu awe khonimweemiherya okhala mutakhali. Biibiliya onihimya so: “Iphiro sawe sothene ti sa xariya. Muluku ahu t’ororomeleya: owo khannòtotha. Owo t’àxariya ni t’owòkololowa”.​—Otumererya 32:4.

Biibiliya onnihimya yoolakela ya Muluku opattuxaka elapo ela. Onihimya so: “Erimu ti yawaya Apwiya: vano elapo, Apwiya ahàvaha atthu”. (Esalimo 115:16) Muluku oopattuxa elapo ya vathi wira nikhaleke-mo okathi wotheene, nave oopaka itthu sooreera wira nihakalaleke.​—Maphattuwelo 2:8, 9.

“Erimu ti yawaya Apwiya: vano elapo, Apwiya ahàvaha atthu”.​—Esalimo 115:16

Nave-tho Biibiliya onnihimya nthowa naya Muluku aapattunxe awe apinaatamu. Owo aahaaruma anamathelana oopacerya oriki: “Mwayareke an’inyu, munjerereyeke: musareyeke mulaponi mothene. Mwettiheke elapo yothene . . . n’inama sothene sinetta vathí”. (Maphattuwelo 1:28) Tthiri eyo yaari eparakha yuulupale okhapelela elapo wira ekhale eparayiisu! Nto Adamu, Eva ni anaaya, yaarowa okhalaka mahiku otheene valaponi vaava, ohiya wiirimu.

Nto xeeni apinaatamu anikhwa aya? Biibiliya onihimya wira yoopattuxiwa emosa yomunepani, yoowo onisuweliwa okhala Satana, aaheererya omuhonona palano a Muluku wEedeni. Moota xeeni?

Satana aahaawoka axitiithi ahu oopacerya, Adamu ni Eva, wira amurukunuwele Muluku. Satana aahimootherya Muluku wira anaakhoottiherya Adamu ni Eva etthu yooreera. Aahimmye wira Muluku aanaakhoottiherya awo othanla mootaphuwa etthu yooloka ni yoohiloka. Awo yaahimwiiwelela Satana ni yaahimukhootta Muluku. Nto exeeni yaakhumelenle? Nuuvira okathi, awo yaahikhwa, ntoko Muluku aahimmye awe. Nto awo yaahooceela okhalana okumi woohimala mparayiisu.​—Maphattuwelo 2:17; 3:1-6; 5:5.

Etthu Adamu ni Eva yaapanke aya ehaakumiherya maxakha maalupale apinaatamu mpakha olelo-va. Biibiliya onihimya so: “Mutthu mmosa pahi [Adamu] t’oruhale etampi mulaponi: etamp’iyo yoruha okhwa. Siso okhwa ohaphwanya atthu othene”. (aRoma 5:12) Apinaatamu anikhwa mwaha woowi aarava etampi ya Adamu, ohiya mwaha woowi Muluku olakenle wira nikhweeke.

Orukunuweliwa Muluku wEedeni khohononne yoolakela ya Muluku ni apinaatamu ni elapo ya vathi. Mwaha wa oniphenta wawe ni exariya awe, Muluku oopaka etthu wira onoopole etampi ni okhwa. Murummwa Paulo ohimmye so: “Eparakha Muluku ennivahawe mahala enniphwanyiha ekumi ehinimala, mwa Yesu Kristu Pwiy’ahu”. (aRoma 6:23) Tthiri “Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”. (Yohani 3:16) Mwaha wa wiivahererya wawe ntoko mukuttho, Yesu oowerya woopola itthu sotheene saapweteyale Adamu. *

Moohipisa, enimwiiraneya yooleiherya ya Muluku ya elapo okhala eparayiisu. Nyuwo pooti okhala mparayiisu vakhala wira munoovaha ephoole yoolopola ya Yesu eni: “Nvireke mukhora wophunyeya, mana mukhora mulupale n’iphiro yowokowa t’iye sinroiha worimelani: ale anvira seiyo kharere. Vano, mukhora onkeliha mwekumini ti wophunyeya, ephiro ene ti yorika: vano ale amphwanya ephiro yeyo ari vakhani”. (Matheyo 7:13, 14) Aayo, yoothanla enipaka anyu pooti woophwanyihani okumi woohimala wala okhwa. Nto exeeni enrowa anyu othanla?