Mwaha ovinre, nihoona itthu Yesu aahimmye awe wira saamwiiraneya. Itthu iyo sinnooniherya wira Omwene wa Muluku wootikitheriwa wiirimu ni Yesu Kristu tori Mwene a Omwene wa Muluku.

Biibiliya onnitthokiherya wira moohipisa nuumala okhalihiwa Mwene, Yesu aahimoomola wiirimu Satana ni malaikha awe ootakhala. Nto vano, awo ari valaponi, eyo ti etthu eniiriha mixankiho otepaka valaponi okhuma mwaakha wa 1914.—Wisupulula 12:7, 9.

Nnaamwi itthu sootakhala sikhumelelaka molumwenkuni, Yesu ntoko Mwene a Omwene wa Muluku onnipaka itthu sinaakhaliherya atthu olumwenku wotheene. Ntoko Yesu aahimmye awe wira yaamukhumelela, atthu anceene anniixutta ni ovarihela muteko malakiheryo a mBiibiliyani mwaha woowi anniixuttihiwa Biibiliya. (Yesaya 2:2-4) Imilyau sinceene sa atthu ahiixutta moota wookhalana etthoko yoohakalala ni okhalana moonelo wooloka voohimya sa ovara muteko ni ohikhala ipottha sa mihakhu. Atthu anniixutta moota wookhalana okumi woohakalaliha niinaano-va ni okhala atthu Muluku onaaphavela awe okhala Mparayiisu valaponi alamuleliwaka ni Omwene awe.

Yesu onnilamulela wiirimu. Masi nlelo valaponi ikuvernu sa apinaatamu ti sinilamulela. Tivonto, Muluku omulenle awe Yesu wira: “Nyuwo munrowa wawerya awanan’inyu”. (Esalimo 110:2) Moohipisa, Yesu onrowa waapwetexa awanani awe otheene ni owoopola atthu otheene animwiiwelela Muluku ni murima wotheene.

Waphiya okathi owo, Omwene wa Muluku onrowa:

• Opwetexa etiini yoowootha. Itiini sotheene siniixuttiha itthu sowoothiwa ni sinaakumiherya mixankiho apinaatamu sinoopwetexiwa. Okhala wira etiini yoowootha ennipaka itampi sinceene, Biibiliya onnilikanyiha etiini eyo ni muthiyana namararuwa. Opwetexiwa wa etiini yoowootha onrowa waatikiniha atthu anceene.—Wisupulula 17:15, 16.

• Opwetexa ikuvernu sa apinaatamu. Omwene wa Muluku onoopwetexa ikuvernu sotheene sa apinaatamu.—Wisupulula 19:15, 17, 18.

• Atthu otheene ootakhala anoopwetexiwa. Exeeni enrowa owiiraneela atthu yaale anipaka itthu sootakhala ni ahiniphavela omwiiwelela Muluku? Biibiliya onihimya so: “Atthu òtakhala murima anopwetexiwa”.—Miruku 2:22.

• Satana ni malaikha awe ootakhala anoopwetexiwa. Tthiri Satana ni malaikha awe ootakhala khanrowa ‘owototha-tho atthu’.—Wisupulula 20:3, 10.

Masi, niireke sookhala itthu sooloka sinrowa owiiraneela atthu ale aniiwelela ni anitthara malakiheryo a Omwene wa Muluku?

Ntoko Mwene a Omwene wa Muluku, Yesu onoopaka itthu sinceene waavikana anamalamulela aapinaatamu. Nave Yesu onrowa okhaliheriwaka ni atthu 144.000 athanliwe valaponi wira yalamuleleke ni Yesu wiirimu. (Wisupulula 5:9, 10; 14:1, 3) Owo onimwiimananiha wira yiiraneye yootthuna ya Muluku valaponi. Nto Omwene wa Muluku onrowa:

• Omaliha iretta ni okhwa. Biibiliya onihimya wira: “Khavo-tho onkela ohimya wira: ‘Miyo ki muretta’” ni “khunrowa okhala-tho okhwa”.—Yesaya 33:24; Wisupulula 21:4.

• Onooruuha murettele ni ovareleleya wekeekhai. “Atthu anyu othene . . . animwetta ni murettele mulupale” ni “khula mutthu onokhala ni murettele vamuttutthini wa mimanka sawe, mukhitte mwa mikhaju sawe: khavo onrowa wavelaveliha”.—Yesaya 54:13; Mikeya 4:4.

• Atthu otheene anookhalana muteko woohakalaliha. “Atthu aka animolya mihokorokho sihawenlyaya. Awo khanvara-tho muteko mahala”.—Yesaya 65:22, 23.

• Omaliha mixankiho sa makhalelo a elapo. “Etakhwa n’itthaya yowuma etthapeke: othako otteliweke murima, ophuwaka ithutu”.—Yesaya 35:1.

• Owiixuttiha atthu etthu anireerela aya opaka wira akhaleke mahiku otheene. “Ekumi yohimala t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”.—Yohani 17:3.

Muluku oniphavela wira mphwanye mareeliho awo. (Yesaya 48:18) Mwaha onittharelana, ninrowa woona etthu mukhanle anyu oopaka wira mukhalane nlipelelo na muhoolo noohakalaliha.