Moohipisa, nuumala ekuvernu ya Muluku opacerya olamulela valaponi, atthu otheene anrowa okhalaka moohakalala, mowiiraana ni anookhalana muteko woohakalaliha. Muluku oomuthanla Yesu Kristu wira olamuleleke elapo yotheene. Olelo-va, anamalamulela khanaathokorerya ni waakhapelela saana atthu anaalamulela aya. Masi okathi wotheene, Yesu onrowa opakaka itthu sinaaphwanyiha mireerelo atthu onrowa awe waalamulelaka. Owo onrowa olamulelaka moophenta, onrowa okhala ooreera murima ni Mwene oomoriwa ikharari.—Yesaya 11:4.

Elapo esya atthu khanrowa okawanyeya mwaha wa elapo wala nloko naya. Apinaatamu otheene anrowa okhala oowiiraana. (Wiisuupulula 7:9, 10) Atthu otheene anrowa okhalaka valaponi anomphentaka Muluku ni atthu akina. Nave awo anrowa ovaraka mowiiraana wira yiirihe elapo okhala eparayiisu ntoko Muluku aaphavela awe.—Esalimo 115:16.

Vaavo Omwene wa Muluku onrowa aya olamulelaka, makhalelo valaponi anooturukeya. Maana Mpattuxa ahu onrowa okasoopaka makhalelo a okathi wira akhale ooloka ni sihikhumeleleke ihasara sa ephattu. (Esalimo 24:1, 2) Okathi aari awe valaponi, orumeelaka ikuru aavahiwe awe ni Muluku, Yesu aahimmaaliha munamukhaya. (Marko 4:39, 41) Eyo enooniherya wira okathi Kristu onrowa awe olamulelaka, khuuvo mutthu onrowa woovaka ihasara sa ephattu. Nave okathi Omwene wa Muluku onrowa aya olamulelaka, apinaatamu anookhalana murettele ni inama. Nave-tho apinaatamu khanrowa ohonona elapo.—Hoseya 2:18.

Khula mutthu onookhalana ekumi yooloka. Nave khuuvo mutthu onrowa owereiwaka, wuuluvala nnakhala okhwa. (Yesaya 35:5, 6) Apinaatamu anrowa okhalana makhalelo ooloka a elapo ntoko Adamu ni Eva yaarina aya ojardim wa wEdeni. Ntoko ejardim ya wEdeni, elapo esya enooruweryaka yoolya ni atthu otheene valaponi anookhalana yoolya yinceene. (Maphattuwelo 2:9) Nave ntoko aIsarayeli, yaawo yaari nloko noothanliwa na Muluku, atthu otheene anrowa okhalaka Mparayiisu ‘anokhalana yolya yinjene’.—Onamukuttho 26:4, 5.

Okathi Omwene wa Muluku onrowa aya olamulelaka elapo yotheene, atthu otheene anookhalana murettele ni anrowa othokoreryanaka mwa xariya ni oreerelana murima. Okathi owo khasinrowa okhala ikhotto, opuheriwa okhulupale ni atthu otheene anookhalana ele aniphavela aya. Biibiliya onihimya so: “Khula mutthu onokhala ni murettele vamuttutthini wa mimanka sawe, mukhitte mwa mikhaju sawe: khavo onrowa wavelaveliha”. —Mikeya 4:3, 4.

Atthu otheene anookhalana ipa saya ni khanrowa woovaka woomoliwa. Nave ninrowa ottottelaka mureerelo muteko ahu. Biibiliya onihimya wira atthu anrowa okhalaka elapo esya ya Muluku “khanvara-tho muteko mahala”.—Yesaya 65:21-23.

Biibiliya onihimya so: “Atthu othene a mulaponi anosareya osuwela w’Apwiya”. (Yesaya 11:9) Atthu anrowa okhalaka elapo esya alamuleliwaka ni Omwene wa Muluku, anrowa wiixuttihiwaka ankhili a Mpattuxa ahu Yehova ni itthu opattunxe awe. Awo khanrowa orumeelaka osuwela waya wira apake ikapwitthi wala waakumiherya mixankiho apinaatamu akina. (Yesaya 2:4) Ohiya-vo, awo animwiixutta okhala ni murettele mukina ni mukhwaawe ni okhapelela elapo.—Esalimo 37:11.

Muluku oolokiherya oratteene elapo wira nihakalaleke khula nihiku. Owo oniphavela wira apinaatamu akhaleke valaponi mahiku otheene. (Esalimo 37:29; Yesaya 45:18) Wira opake eyo, Muluku onrowa ‘omaliha khuluwí okhwa’. (Yesaya 25:8) Nave Biibiliya onihimya wira “khunrowa-tho okhala okhwa, nnakhala oriipiwa murima, wala wunla, hata woona owereya”. (Wiisuupulula 21:4) Muluku onimwaavaha eparakha ya okhala moohimala atthu otheene akhale ale anrowa woopowa okathi onrowa awe opwetexa olumwenku ola wootakhala wala ale anrowa ohihimuxiwa elapo esya.—Yohani 5:28, 29; Miteko 24:15.

 Olelo-va, imilyau sinceene sa atthu anniixuttihiwa wira yakhaleke elapo esya alamuleliwaka ni Omwene wa Muluku. Hata ari ene anatampi, awo anniimananiha okhala atthu Muluku onaaphavela awe wira yakhaleke elapo esya. Moota xeeni? Awo annimusuwela Yehova Muluku ni ole omurumme awe, Yesu Kristu.—Yohani 17:3.

Nwehe itthu sikina sinrowa wookhaliheryani woopowa okathi olumwenku ola wootakhala onrowa aya opwetexiwa wira mwakhaleke elapo yooloka. Nvekele osomihiwa Biibiliya ni Anamoona a Yehova, wala mmurumeele Curso da Bíblia on-line, esaiti jw.org.