1, 2. (a) Xeeni okhala epottha ni otaphuwa waari aya muxankiho okathi wa murummwa Paulo? (b) Tani Paulo aamuhimmye awe wira Tonikumiherya otaphuwa wekeekhai?

MAKRISTAU a eseekulu yoopacerya yaawo yaakhala Olamulelo wa oRoma, yaari eriyari ya atthu oowiixinnuwiha mwaha wa malamulo aya, maphukeliwo myaha ni otaphuwa yaarina aya. Tthiri, aRoma yaaroromela ipottha wira sivareke miteko soowoma. Waahikhala okathi Olamulelo wa oRoma, eriyari ya atthu araru, mmosa aari awe epottha. Tivonto, okhala epottha aahiiso otaphuwa wanaaxankiha vanceene atthu pure ni maKristau.

² Ikwaha sinceene, murummwa Paulo aahilepa voohimya sa otaphuwa. Masi khaaphavela ophuka muxankiho ole, yoowo atthu anceene yaaphavela aya omala-maliha. Masi Paulo ni maKristau akhwaawe, yaahiimananiha owiixuttiha atthu ihapari sooreera sa Omwene wa Muluku. Nave yaanaakhaliherya woona otthuneya waya mukuttho wowoopola wa Kristu Yesu. Paulo aahaahimeerya maKristau akhwaawe Ole  oniphwanyiha otaphuwa wekeekhai, oriki: “Apwiy’awo ti eroho [munepa]: vavo vankhalaya eroho [munepa wa Yehova], vavo-tho onniphwanyaneya otaphuwa”.​—2 aKorinto 3:17.

3, 4. (a) Itthu xeeni Paulo aahimmye awe iveersu soopacerya ehinatthi 2 aKorinto 3:17? (b) Nihaana opaka exeeni wira niphwanye otaphuwa onikhuma wa Yehova?

³ Epaphelo ya nenli Paulo aalepenle awe aKorinto, aahihimya ele yaamwiiranenle Moise okathi aakhuruwa awe vaMwaako Sinayi nuumala okumana ni nlaikha na Yehova. Owiitho wa Moise wanaatutha atthu! Vaavo aIsarayeli yanweha aya Moise, awo yaanoova. Tivonto Moise aakhuneela awe owiitho wawe ni ekuwo. (Okhuma 34:29, 30, 33; 2 aKorinto 3:7, 13) Paulo aatthokihenrye so: “Masi yarukunuxerya mirima saya Apwiya, ekuwo eyo enokumihiwa”. (2 aKorinto 3:16) Paulo aaphavela ohimya exeeni?

⁴ Mwaha ovinre nihiixutta wira Yehova, Mpattuxa a itthu sotheene torina otaphuwa ohirina mukano. Tivonto, ti vookhalela ohimya wira vaavo vankhala munepa wa Yehova, “vavo-tho onniphwanyaneya otaphuwa”. Masi Paulo aahimmye wira, wira nikhalane otaphuwa iwo nihaana otthikela wa Yehova. Eyo enitaphulela wira nihaana okhalana wataana wooloka ni yena. Okathi aIsarayeli yaari aya mothakoni, yaaweha itthu mmoonelo wa opinaatamu ohiya mmoonelo wa Yehova. Nto eyo yaahiwiiriha wuumiha murima ni muupuwelo aya. Awo yaaphavela orumeela otaphuwa yaarina aya wira apakeke itthu yaaphavela aya.​—aHéberi 3:8-10.

5. (a) Otaphuwa xeeni onikumiheriwa ni munepa wa Yehova? (b) Ninsuwela sai wira hata mutthu otthukweliwe ene mukhatteya pooti okhalana otaphuwa onikhuma wa Yehova? (c) Makoho xeeni ninrowa ahu waakhula?

⁵ Otaphuwa onikumiheriwa ni munepa wa Yehova onnivikana otaphuwa wa okhala epottha. Maana munepa owo onniphwanyiha otaphuwa wuulupale apinaatamu ahinwerya aya, eyo piiyo, onnintaphula okhala epottha ya etampi ni okhwa. Nave onnintaphula okhala epottha ya etiini yoowootha ni soolema saya. (aRoma 6:23; 8:2) Tthiri iwo otaphuwa wuulupale! Hata atthu yaale atthukweliwe mukhatteya pooti ophwanya otaphuwa iwo. (Maphattuwelo 39:20-23) Murokora Nancy Yuen ni Munna Harold King yaahitthukweliwa mukhatteya iyaakha sinceene mwaha wa waamini waya. Hata vaari siiso, awo yaari ootaphuwa. Nyuwo pooti waaweha alavulaka sowiiraneya saya va JW Broadcasting. (Nwehe opuro oni: ENTREVISTAS E CASOS REAIS > SUPORTANDO DIFICULDADES.) Vano nrowe naakhule makoho ala manli. Ninrowa wooniherya sai wira otaphuwa wahu ti wootepa otthuneya? Ninrowa orumeela sai mwa miruku otaphuwa wahu?

6. AIsarayeli yoonihenrye sai wira khiyaaxukhurela otaphuwa yaavahiwa aya ni Yehova?

⁶ Vaavo ninvahiwa ahu etthu yooreera, ninnimuxukhurela ole onivanhe. Masi aIsarayeli  khiyaaxukhurenle otaphuwa yaavahiwa aya ni Yehova. Myeeri vakhaani nuumala Yehova waataphula wEjiitu, awo yaahipacerya wunlela yoolya ni itthu sikina yaarina aya wEjiitu. Awo yaaninlaseya mwaha wa emana, yoolya yeeyo yaavahiwa aya ni Yehova. Mooriipiha murima, awo yaaphavela otthikela wEjiitu! Itthu ntoko ‘ehopa, muxiri, mawuryo, mattuvi, esapola ni alyo’ saari itthu sootepa otthuneya ovikana otaphuwa yaavahiwa aya ni Yehova ni omukokhorela yena. Tivonto Yehova aaviruwenle awe. (Mothakoni 11:5, 6, 10; 14:3, 4) Yowiiraneya ela enniniixuttiha etthu yuulupale.

7. (a) Paulo aavarihenle sai muteko miruku sawe siri 2 aKorinto 6:1? (b) Ninrowa omutakiha sai Paulo?

⁷ Paulo aahaatumererya maKristau otheene wira axukhureleke otaphuwa avahiwa aya ni Yehova omurumeelaka Mwanawe, Yesu Kristu. (Mmusome 2 aKorinto 6:1.) Paulo aari mutthu oohimalela, epottha ya etampi ni okhwa nto eyo yaanimuthananiha. Hata vaari siiso, owo aahimmye so: “Kinnimuxukhuru Muluku, onikòpola mwa Yesu Kristu Pwiy’ahu!” Exeeni yaamwiirinhe olavula siiso? Paulo aahaatthokiherya maKristau akhwaawe wira: “Ekano y’eroho [munepa] ya Muluku, yeyo emphwanyiha ekumi mwa Yesu Kristu, sokòpola mukanoni emphwanyiha etampi n’ukhwa”. (aRoma 7:24, 25; 8:2) Ntoko Paulo, nihikhala-khale nliyalaka wira Yehova oonitaphula okhala epottha ya etampi ni okhwa. Maana mukuttho wowoopola onninikhaliherya omurumeela Muluku ni yowuupuxerya ya murima yooloka, nto eyo enninihakalaliha.​—Esalimo 40:9.

8, 9. (a) Nlopolo xeeni murummwa Pedru onivanhe awe sa moota woorumeela otaphuwa wahu? (b) Moota xeeni mutthu okhanle awe oorumeela otaphuwa wawe moohiloka?

⁸ Khivaniphiyerya ohimya paahi wira ninnimuxukhurela Yehova. Masi nihaana ovaha ephoole wira nihirumeele moohiloka otaphuwa wahu. Mwa ntakiheryo, murummwa Pedru onlopola wira nihirumeeleke  otaphuwa wahu wira nipakeke itthu soohiloka. (Mmusome 1 Pedru 2:16.) Yoolopola ela ennuupuxerya ele yaawiiranenle aIsarayeli mothakoni. Olelo-va, nihaana ovarihela muteko nlopolo nna. Satana ni olumwenku awe onnikumiherya itthu soowara, soolya, soowurya ni sootthekulana. Ale anlaleya itthu iyo anniwooniherya atthu ooreera aphavelaka oniiriha wuupuwela wira nihaana othuma itthu iyo, hata nihirowaka orumeela. Ti vookhweya owokiwa ni olumwenku ola wira nirumeeleke moohiloka otaphuwa wahu.

⁹ Nave, nlopolo na Pedru ninnivareleya muteko myaha suulupale sa mookumini, ntoko osoma ni muteko onthanla ahu. Mwa ntakiheryo, olelo-va, amiravo annikhanyereriwa wiimananiha wira arowe wuniversidade. Atthu anceene anaahimeerya wira akhala wira anoosoma wuniversidade, anoophwanya miteko sooloka, musurukhu munceene ni anoottittimihiwaka. Atthu awo pooti owooniherya itthu wira yaakupalihe wira mutthu osomme wuniversidade onniphwanya musurukhu munceene onvikana ole osomme exikola segundaariya. Nto osoma wuniversidade pooti okhalaka ntoko wootepa otthuneya wa amiravo okathi anipaka aya soothanla saya. Masi exeeni amiravo ni anamuyari aya akhanle aya oowuupuwela?

10. Nihaana wuupuwela exeeni okathi nimpaka ahu soothanla sahu?

¹⁰ Atthu akina anuupuwela wira, okhala wira myaha iyo ti sa mutthu mwaneene, nto ahaana opaka soothanla aniphavela aya akhala wira khasinixankiha yowuupuxerya ya murima aya. Awo pooti wuupuwela so: “Otaphuwa waka onlamuleliwa-ni n’ankhili a mutthu mukina?” (1 aKorinto 10:29) Nnaamwi nrina ene otaphuwa woopaka soothanla sahu voohimya sa osoma ni muteko, nihaana wuupuwela wira otaphuwa wahu wookhalana mukano ni wira soothanla sahu pooti onikumiherya maxakha. Eyo ti etthu yaamwiirinhe Paulo ohimya wira: “Ninniwerya wira sothene sintthunahu, masi khahiyó wira sothene [sinnilipiha]”. (1 aKorinto 10:23) Tivonto, nnaamwi nri ene ootaphuwa opaka soothanla sahu, nihaana ohela muhina yowuupuxerya ya murima ya atthu akina.

11. Exeeni emwiirinhe Yehova ontaphula?

¹¹ Vaavo Pedru anloponle awe wira nihirumeeleke otaphuwa wahu mwa enamuna yoohiloka, owo aahimmye wira enamuna yooloka ya orumeela otaphuwa wahu, okhala “arumeyi a Muluku” aahiiso ipottha sa Muluku. Yehova oomurumeela Yesu wira onoopole okhala ipottha sa etampi ni okhwa. Nto eyo enniniiriha omurumeela Muluku okumi ahu wotheene.

12. Ntakiheryo xeeni Nowe ni emusi awe anivanhe aya?

¹² Enamuna emosa yoorumeela mwa miruku otaphuwa wahu, ti orumeela okathi ahu ni ikuru sahu, wira nimukokhoreleke Yehova ni murima wotheene. Opaka eyo enoonikhaliherya osyaka wira soophavela sahu ni sa olumwenku ola sihikhale sootepa otthuneya mookumini mwahu. (aGalasia 5:16) Nkahaya muupuwele ele Nowe ni emusi awe yaapanke aya. Awo yaakhala olumwenku wootakhala ni woosareya orupihana woohiloka. Masi awo khiyaatthara soophavela sa atthu ale, nnakhala ovara itthu saavara  aya. Nto yaahithanla oluttuweliwa miteko sa Yehova. Nave yaahiteka ekalawa, othukumanya soolya wira alyeeke awo ni inama ni yaanaalopola atthu wira aamoorwa Mutaaseke. Biibiliya onihimya wira Nowe aahiira “sothene sarummwawe ni Muluku”. (Maphattuwelo 6:22) Nto eyo yaahimwiiriha Nowe ni emusi awe woopowa okathi waapwetexiwe aya olumwenku wa mahiku ale.​—aHéberi 11:7.

13. Yehova ni Yesu anrumme opaka exeeni?

¹³ Exeeni Yehova onrumme awe ovara olelo-va? Hiyo noosuwela wira Muluku oomuruma Yesu olaleerya, nto Yesu owo ooniruma muteko owo woolaleerya. (Mmusome Luka 4:18, 19.) Olelo-va, Satana oottiyela miruku sa atthu anceene wira ahooneke wira awo ipottha sa etiini yoowootha, anniphavelasa mihakhu ni olamuleliwa ni epoliitika. (2 aKorinto 4:4) Ntoko Yesu, nookhalana eparakha ya waakhaliherya atthu omusuwela ni omukokhorela Yehova, Muluku ootaphuwa. (Matheyo 28:19, 20) Olaleerya khahiyo muteko wookhweya. Maana ilapo sikina, atthu khaniphavela omusuwela Muluku ni akina anninanariwa okathi nnaalaleerya ahu. Masi okhala wira Yehova ni Yesu tanrumme olaleerya, nto nihaana wiikoha so: ‘Niireke kinnirumeela otaphuwa waka wira kikhaliheryeke vanceene muteko wa Yehova?’

14, 15. Arumeyi anceene a Yehova athanlale opaka exeeni? (Nwehe elatarato yoopacerya.)

¹⁴ Ti voolipiha woona wira arumeyi anceene a Yehova ahoona wira wanikisa wa olumwenku ola ohaattamela, nto aalakela okhweiherya okumi aya wira akhale mapioneero. (1 aKorinto 9:19, 23) Anna akina annikhala mapioneero muttetthe aya, akina annirowa mapuro oothowa anamalaleerya. Iyaakha 5 sivinre, anna anivikana 250.000 yaahipacerya okhala mapioneero, nto olelo-va aakhala mapioneero ookilaatheya anivikana 1.100.000. Ti voohakalaliha woona wira atthu anceene annirumeela otaphuwa waya wira anvuwiheke Yehova mwa enamuna ela!​—Esalimo 110:3.

¹⁵ Exeeni enaakhaliherya orumeela otaphuwa waya mwa miruku? Nrowe nthokorerye ntakiheryo na John ni Judith, yaawo arumenle ilapo sinceene mwa iyaakha 30. Awo atthokihenrye wira vaavo yaapacenrye aya Exikola ya Muteko wa Opioneero wEstados Unidos Dezembro a 1977, anaxikola yaahitumereriwa orowa mittetthe soothowa anamalaleerya. Wira aphwanye yoolukama eyo, John ni Judith yaahikhweeherya okumi awe. Tivo, John aamakela awe oturuka muteko awe. Muhoolo mwaya, yaahirowa olaleerya elapo ekina. Exeeni yaakhalihenrye ovilela mixankiho ntoko wiixutta nttaava nsya ni olimalela makhalelo ni soolema sa elapo eyo? Awo yaahinvekela Yehova aroromelaka wira aamwaakhaliherya. Yoonenle sai omurumeela Yehova iyaakha iye sotheene? John onihimya so: “Kaahisiveliwa vanceene muteko  kanvarela aka Muluku ovikana miteko kaatonko aka ovara. Yehova ookhala mutthu ootepa otthuneya ni eekeekhai mookumini mwaka ntoko tiithi oophenta. Vano kinniiwexexa oratteene masu a Yakobo 4:8 ani: ‘Mmwattameleke Muluku: Muluku onowattamelani’. Nto kihoona wira koophwanya ele yaaphavelaka, eyo piiyo, ohakalala mookumini mwaka”.

16. Moota xeeni anna anceene arumenle aya otaphuwa waya mwa miruku?

¹⁶ Atthu akina ntoko John ni Judith aawerya orumeela ntoko mapioneero okathi munceene. Mwaha woovirikana makhalelo, akina anikhala mapioneero okathi vakhaani paahi. Nave, akina annikhaliherya oteka ipa sa Omwene olumwenku wotheene. Mwa ntakiheryo, anna ni arokora oowiiraka 27.000 aakhaliherya oteka eseedi ya Olumwenku wotheene ya Anamoona a Yehova oWarwick, oNova York. Akina aakhaliherya isumana piili, akina myeeri vakhaani ni akina mwaakha mmosa aahiiso ovikana-vo. Anna ni arokora anceene ahiimananiha wira yakhaliherye oWarwick. Tthiri, anna awo ntakiheryo nooloka na atthu arumenle otaphuwa waya wira anvuwihe ni omuttittimiha Yehova, Muluku ootaphuwa!

17. Nlipeleleke exeeni akhala wira ninnirumeela mwa miruku otaphuwa wahu?

¹⁷ Ninnixukhurela mwaha wa omusuwela Yehova ni okhalana otaphuwa onnikhaliherya omukokhorela. Tivonto, soothanla sahu sooniheryeke wira otaphuwa wahu ti wootepa otthuneya. Ohiya orumeela otaphuwa wahu moohiloka, nrowe nirumeele saana nimukokhorelaka Yehova ni murima ahu wotheene. Niira siiso, nnoophwanya mareeliho Yehova oleihenrye vaavo vanrowa aya wiiraneya eprofesia ela eni: “[Soopattuxiwa] sinrowa wòpoliwa mwakhalihiwaya ipottha, mwapwetexiwaya, wira sikaweliwe otaphuwa n’uvuwa w’àna a Muluku”.​—aRoma 8:21.