Mmutakiheke Yehova, Muluku Onnilipiha
“Attottopeliwe Muluku, . . . yoowo t’oninlipiha moohaawani mwahu mothene”.—2 AKORINTO 1:3, 4, Waataana wa Naanaano.
1. Nuumala Adamu ni Eva omurukunuwela Muluku, Yehova aalipinhe sai ni waavaha nlipelelo apinaatamu?
YEHOVA ti Muluku onnilipiha. Owo aahipaka eyo hata okathi yoole apinaatamu yaatthenke aya akhala oohimalela. Tthiri, moohipisa nuumala Adamu ni Eva omurukunuwela Muluku, Owo aahipaka eprofesia, yeeyo nuumala wiiwexexiwa yaarowa waalipihaka ni waavaha nlipelelo apinaatamu yaarowa oyariwaka muhoolo mwaya. Eprofesia eyo eri Maphattuwelo 3:15 ni enileiherya wira Satana Diabo ni miteko sawe sotheene sinrowa opwetexiwa.—1 Yohani 3:8; Wisupulula 12:9.
YEHOVA AAHAALIPIHA ARUMEYI AWE A KHALAI
2. Yehova aamulipinhe sai Nowe?
2 Nkahaya muupuwele moota Yehova aamulipinhe awe murumeyi awe Nowe. Atthu yaakhala okathi wa Nowe yaanirupihana moohiloka ni yaari ootakhala. Masi Nowe ni Maphattuwelo 6:4, 5, 11; Yuda 6) Nto Yehova aahimulipiha Nowe wira ovikaniheke omukokhorela Yena ni opakeke itthu sooloka. (Maphattuwelo 6:9) Yehova aahimuleela Nowe wira aarowa opwetexa olumwenku ole wootakhala ni aahimutthokiherya etthu Nowe aatthuneya awe opaka wira oopowe ni emusi awe. (Maphattuwelo 6:13-18) Tthiri Yehova aahimulipiha vanceene Nowe.
emusi awe paahi ti yaamukokhorela Yehova. Eyo yanwerya omukhulumula Nowe. (3. Yehova aamulipinhe sai Yoxuwa? (Nwehe elatarato yoopacerya.)
3 Muhoolo mwaya, Yehova aahimulipiha murumeyi awe Yoxuwa yoowo aarowa okhalana muritti muulupale. Owo aarowa waakeliha Elapo Yooleiheriwa atthu a Muluku ni aarowa waaxintta anakhotto ootupa a maloko yaakhala elapo ele. Yehova aanisuwela wira Yoxuwa aamoova, tivonto aamulenle awe Moise wira: “Munvahe soruma sanyu Yoxuwa, mmulipihe murima wira akhalane nthiti: tthiri ti yowo onrowa olapuwa Yordani, àholelaka atthu ala; ti yowo-tho onrowa wakilathiha mulaponi munònanyu”. (Otumererya 3:28) Nave, Yehova aahimulipiha Yoxuwa ohimyaka wira: “Ti miyo kinorumani: mwilipiheke, mukhalane nthiti. Muhithukumeleké, nnákhala muhoveké, okhala wira Apwiya Muluku anyu anokhala ni nyuwo mapuro othene anrowanyu okhalaka”. (Yoxuwa 1:1, 9) Yoxuwa oonenle sai moolumo ala oolipiha?
4, 5. (a) Yehova aalipinhe sai arumeyi awe a khalai? (b) Moota xeeni Yehova aamulipinhe awe Mwanawe?
4 Nave Yehova aanaalipiha atthu awe ntoko egrupu. Mwa ntakiheryo, Yehova aahisuwela wira okathi aYuda yaari aya ipottha oBabilonia, yaahaana olipihiwa. Nto aahaavaha masu oolipiha a eprofesia ela eni: “Muhové! Miyo kiri ni nyuwo. Muhivelavelé! Miyo ki Muluku anyu. Miyo kinnolipihani: kinnokhaliheryani. Ayo! Kinnovarelani ni ntata naka: kinniwakihani, kinniwòpolani”. (Yesaya 41:10) Muhoolo mwaya, Yehova aahaalipiha maKristau a eseekulu yoopacerya. Nave olelo-va onninlipiha.—Mmusome 2 aKorinto 1:3, 4.
5 Nave-tho Yehova aahimulipiha Mwanawe. Nuumala Yesu obatiziwa, owo aahiiwa nsu naakhuma wiirimu nriki: “Ola mwan’aka onimphentexaka: miyo kosiveliwa ni yowo”. (Matheyo 3:17) Munniwerya woona moota masu ala yaamulipinhe aya Yesu okathi aari awe valaponi?
YESU AANAALIPIHA ATTHU AKINA
6. Moota xeeni nlikanyiho na Yesu na musurukhu ninnilipiha aya?
6 Yesu aanimutakiha Tiithi awe vaavo aalipiha awe akina wira aroromeleyeke. Owo aahipaka eyo nlikanyiho nawe na musurukhu aahiiso italento. Nlikanyiho nna owo aahimmye wira Pwiya aahimuleela khula murumeyi oororomeleya wira: “Varera siso, murumeyi òrumeya ni òroromeleya. Nyuwo muroromeleiye n’itthu sikhani, kinowinnyeryani itthu sinjene. Murwé, mutteliweke murima vamosá ni pwiy’anyu!” (Matheyo 25:21, 23) Tthiri, masu ala yaahaalipiha awiixutti awe ovikaniha omurumeela Yehova moororomeleya!
Yesu aahimulipiha Pedru ni aahinvaha eparakha ya waalipiha akina
7. Yesu aalipinhe sai arummwa awe, vanceenexa Pedru?
7 Hata arummwa ale yaamakela onyakulihana Luka 22:24-26) Ikwaha sinceene, Pedru aanivonya ni aanimunyoonyiha Yesu. (Matheyo 16:21-23; 26:31-35, 75) Masi Yesu khaamunyanyanle Pedru. Ohiya-vo, Yesu aahimulipiha Pedru ni aahinvaha eparakha ya waalipiha akina.—Yohani 21:16.
voohimya sa ole aari muulupalexa, okathi wotheene, Yesu aanaapixerya murima. Yesu aahaatumererya okhala oowiiyeviha ni waarumeela atthu akina, ohiya ophavela orumeeliwa. (OLIPIHIWA WA ATTHU A KHALAI
8. Ezekiya aalipinhe sai ahooleli a anakhotto ni atthu a oYuda?
8 Hata Yesu ohinatthi orwa valaponi ovaha ntakiheryo, arumeyi a Yehova yaanisuwela otthuneya waya waalipiha akina. Nkahaya mmuupuwele Ezekiya! Okathi Asiria yaaphavela aya waatuphela atthu a oYerusalemu, Ezekiya aahaathukumanya ahooleli a anakhotto ni atthu akina wira aalipihe. Nto awo “yahilipihiwa ni molumo Èzekiya”.—Mmusome 2 Wahala 32:6-8.
9. Yobi onniixuttiha exeeni voohimya sa waalipiha akina?
9 Nave Yobi onniniixuttiha etthu voohimya sa waalipiha akina. Nnaamwi Yobi aatthuneya olipihiwa, owo aahiwiixuttiha atthu akina moota woomulipiha mutthu. Yobi aahaaleela alopwana yaarwiiye omulipiha wira aari yena aaphavela waalipiha, aarowa olavulaka moolumo oolipiha yaarowa owiiriha okhala saana ohiya waakhulumula. (Yobi 16:1-5) Nuumala-vo, Yobi aahilipihiwa ni Elihu ni Yehova.—Yobi 33:24, 25; 36:1, 11; 42:7, 10.
10, 11. (a) Xeeni mwaana a Yefte aatthuneya awe olipihiwa? (b) Olelo-va, tani anitthuneya olipihiwa?
10 Nave mwaana mwaamuthiyana a Yefte aanitthuneya olipihiwa. Tiithi awe aari Mphuki ni aarowa owana ni atthu a wAmoni. Owo aahimmanela natiri Yehova wira axintta ekhotto, mutthu oopacerya okhuma vate vawe orowaka omwaakhela aamunvahererya Yehova wira arumeeleke otabernaakulu. Nto aIsarayeli yaahixintta ekhotto, ni okathi aatthika awe mutthu oopacerya okhuma etthoko ya Yefte aari mwanawe mwaamuthiyana mmoseene. Nto murima wa Yefte waahiphweeya. Masi aahimmaliherya natiri awe vaavo aamuroihale awe mwanawe wira arumeeleke otabernaakulu okumi awe wotheene.—Makhulupale 11:30-35.
11 Hata Yefte yanvila opaka eyo, nave yaari etthu yootepa ovila wira mwanawe opake. Masi, mwaana ole aahaakhulela opaka ele tiithi awe aaleihenrye awe. (Makhulupale 11:36, 37) Eyo yaataphulela wira khaarowa otheliwa nnakhala waayara anamwane. Vano nsina na emusi ele nammala-mala. Nto aanitthuneya olipihiwa. Biibiliya onihimya wira: “Siso atthu a Isarayeli yahilimaleliha wahiya axithiyan’aya orowa khula eyakha omunlela mwan’awe Yefte muGalaadi, mpakha mahiku maxexé”. (Makhulupale 11:39, 40) Mwaana a Yefte onninuupuxerya maKristau anithanla ohithela aahiiso ohitheliwa olelo-va, aphavelaka onvarela muteko munceene Yehova. Niireke ninnaalipiha ni waattottopela anna awo?—1 aKorinto 7:32-35.
ARUMMWA YAANAALIPIHA ANNAYA
12, 13. Pedru aalipinhe sai annawe?
12 Ohiyu Yesu aarowa awe wiiviwa, aahimuleela murummwa Pedru wira: “Simoni, nyuwo Simoni! Mwiwe: Satana òvekela wira awehereryeni, ntoko sinveriwaya mele. Nto miyo kiholompelani nyuwo, Simoni, wira wamini wanyu ohihononeyé. Vano nyuwo, mwahokolowela wa miyo, mwalipihe axinn’inyu”.—Luka 22:31, 32.
Ipaphelo sa arummwa saahaalipiha maKristau a eseekulu yoopacerya ni sinninlipiha olelo-va (Nwehe ittima 12-17)
13 Pedru aari eriyari ya anna yaahoolela muloko wa eKristau eseekulu yoopacerya. (aGalasia 2:9) Miteko sawe seiyo sooniherya olipa murima, saahaalipiha anna nihiku na Pentekoositi orowa ohoolo. Nuumala orumeela iyaakha sinceene, Pedru aahaalepela annawe wira: “Miyo kiholepelani epaphelo ela yamukhani, . . . Kimphavela wotumereryani ni wosuwelihani wira oreriwa w’ekhweli onvahiwanyu ni Muluku ti nno. Mulipiheryeke oreriwa wene wenno”. (1 Pedru 5:12) Epaphelo ya Pedru yaahaalipiha maKristau a okathi ole. Nave enninlipiha olelo-va, vaavo ninlipelela ahu wiiraneya wa anatiri a Yehova.—2 Pedru 3:13.
14, 15. Moota xeeni iliivuru sa mBiibiliyani silempwale ni murummwa Yohani sinnilipiha aya?
14 Nave murummwa Yohani aari eriyari ya anna yaahoolela muloko wa eKristau eseekulu Yohani 13:34, 35.
yoopacerya. Owo oolepa Evangelyo yoovara murima ya muteko woolaleerya wa Yesu. Okhuma khalai, eliivuru ela ya mBiibiliyani ehaalipiha maKristau ni enninlipiha olelo-va. Mwa ntakiheryo, evangelyo ya Yohani ninnisoma moolumo a Yesu voohimya sa ophenta, mukhalelo onaasuwanyeiha atthareli eekeekhai a Kristu.—Mmusome15 Nave-tho ipaphelo tthaaru Yohani olempe awe, sookhalana ikeekhai suulupale. Okathi ninkhulumuwa ahu mwaha wa soovonya sahu, ninnihakalala osoma wira mukuttho wowoopola wa Yesu ‘onninreriha, ottipihaka sottheka sahu sothene’. (1 Yohani 1:7) Nave akhala wira ninniivaha nthowa, nnoolipa akhala wira nnoosoma masu ani: “Muluku ti mulupale ovikana murim’ahu”. (1 Yohani 3:20) Yohani paahi tolempe wira “Muluku ophentá”. (1 Yohani 4:8, 16) Epaphelo awe ya nenli ni ya neeraru onnaattottopela maKristau anivikaniha ‘wettela ekekhai’.—2 Yohani 4; 3 Yohani 3, 4.
16, 17. Murummwa Paulo aalipinhe sai maKristau a eseekulu yoopacerya?
16 Murummwa Paulo ntakiheryo noolokexa na mutthu aalipiha annawe. Moohipisa nuumala Yesu wiiviwa, arummwa anceene yaakhala oYerusalemu, opuro naakhala aya nikhuuru noolamulela. (Miteko 8:14; 15:2) MaKristau yaakhala oYudeya, yahaalaleerya voohimya sa Kristu, atthu yaakupali wira Muluku ori mmosa. Masi, munepa wootteela waahimwiiriha Paulo waalaleerya atthu a oGresia, oRoma ni atthu akina yaakokhorela amuluku anceene.—aGalasia 2:7-9; 1 Timótheyo 2:7.
17 Paulo aahilaleerya ilapo seiyo olelo-va sinisuweliwa okhala oTurquia, oGresia ni wItália. Owo aahaalaleerya atthu yahaakhanle aYuda yaakhala mapuro awo ni aahipaka miloko. Masi maKristau ale masya yaanixanka vanceene. Maana atthu a elapo aya yaanaalupattha, tivonto yaanitthuneya olipihiwa. (1 aTesalonika 2:14) Mwakha 50 EC, Paulo aahilepela muloko musya wa oTesalonika epaphelo yoolipiha, oriki: “Mahiku othene ninnimuxukhuru Muluku mwaha wa nyuwo othene, niwupuwelakani mmalompeloni mwahu. . . . ninnupuwela vohihiyererya wira munnittharihela wamini wanyu ni miteko sorera, ni wira munniphentana muhawelanaka ni wira munnikhalela nthiti”. (1 aTesalonika 1:2, 3) Nave, Paulo aahaavekela wira alipihaneke mukina ni mukhwaawe oriki: “Mulipihaneke murima, mukhaliheryaneke ntoko sinìranyu vano”.—1 aTesalonika 5:11.
NIKHUURU NOOLAMULELA NINNINLIPIHA
18. Moota xeeni nikhuuru noolamulela na eseekulu yoopacerya naamulipinhe aya Filipi?
18 Eseekulu yoopacerya, Yehova aahirumeela nikhuuru noolamulela wira naalipiheke maKristau otheene, waahela muhina ale yaahoolela mmulokoni. Nuumala Filipi waalaleerya aSamariya voohimya sa Kristu, nikhuuru noolamulela naahimukhaliherya. Maana naahaaruma atthu anli, Pedru ni Yohani wira yaavekelele maKristau ale masya yaawo yaakhenle munepa wootteela. (Miteko 8:5, 14-17) Tthiri Filipi, anna ni arokora ale asya yaahilipa vanceene mwaha wa okhaliheriwa ni nikhuuru noolamulela!
19. MaKristau a eseekulu yoopacerya yoonenle sai nuumala osoma epaphelo ya nikhuuru noolamulela?
19 Muhoolo mwaya, nikhuuru noolamulela naanitthuneya opaka yoothanla yuulupale. Niireke maKristau yahaakhanle aYuda yaahaana winnuwihiwa ntoko aYuda yannuwihiwa aya, moovarihana ni Nlamulo na Moise? (Miteko 15:1, 2) Nuumala nikhuuru noolamulela ovekela munepa wootteela ni otokosa Soolempwa, yaahoona wira ale yahaakhanle aYuda khiyaatthuneya winnuwihiwa. Nto yaahilepa epaphelo atthokiheryaka yoothanla aya ni waaruma anna wira aroihe mmilokoni. Vaavo maKristau yaasomme aya epaphelo ele, “atthu othene yahitteliwa murima mwaha wa molumo òhakalaliha”.—Miteko 15:27-32.
20. (a) Moota xeeni Nikhuuru Noolamulela ninnilipiha aya? (b) Nikoho xeeni ninrowa ahu waakhula mwaha onittharelana?
20 Olelo-va, Nikhuuru Noolamulela na Anamoona a Yehova ninnaalipiha maBethelita, mapioneero a vameekhaaya, mamisionaario, axitokweene a esirkwiitu, ale anteka Ipa sa Omwene ni otheene ahu. Tthiri, ntoko maKristau a eseekulu yoopacerya, hiyo ninnihakalala vanceene mwaha woolipihiwa! Nave, wira naakhaliherye ale ahiiye ekeekhai wira atthikele wa Yehova, mwaakha wa 2015 Nikhuuru Noolamulela nookumiherya ebroxura eni: Muhokolowele wa Yehova. Masi niireke waalipiha akina muritti wa ale anihoolela paahi? Mwaha onittharelana onrowa waakhula nikoho nna.