1. Exeeni onipaka awe mutthu onirukunuxa murima?

 OKATHI nimpaka ahu ethu yoohiloka, nihaana orukunuxa murima. Biibiliya onihimya wiira mutthu onnirukunuxa murima, okathi onithanana awe mwaha wa etthu yoohiloka opanke awe, okathi onittharuwa awe mweettelo awe, nave okathi onilakela awe ohitthikela opaka etampi eyo. — Nwehe Moolumo Ootthokiheriwa ani: “Orukunuxa Murima”.

2. Xeeni ootheene ahu ninreerela ahu osuwela ele enitaphulela aya orukunuxa murima? (Nehemiya 8:9-11)

² Apinaatamu ootheene ahaana osuwela ele enitaphulela aya orukunuxa murima, okhala wiira ootheene ahu ninnittheka khula nihiku. Mwaha wa okhala osuulu wa Adamu ni Eva, ootheene ahu nooravihiwa etampi, nave ninnookhwa. (aRom. 3:23; 5:12) Nto, khuuvo mutthu ohirina etampi. Hata atthu yaarina waamini woolipa, ntoko murummwa Paulo, yaaniwanana etampi. (aRom. 7:21-24) Niireke eyo enitaphulela wiira okathi wootheene nihaana oriipiwaka murima mwaha wa itampi sahu? Nnaari! Yehova toomoriwa ikharari, nave owo oniphavela wiira nihakalaleke. Moone ele yaawiiranenle ayuda yaakhala okathi wa Nehemiya. (Mmusome Nehemiya 8:9-11.) Yehova khaaphavela wiira awo ariipiweke murima mwaha wa itampi saya sa khalai. Masi aaphavela wiira amukokhoreleke atteeliwaka murima. Yehova onnisuwela wiira orukunuxa murima onnikumiherya ohakalala. Tivonto onniixuttiha awe wiira nihaana orukunuxa murima. Nto vakhala wiira nnoottharuwa itampi sahu, nikupaliki wiira Tiithi ahu, yoowo oomoriwa ikharari, onoonilevelela.

3. Mwaha ola ninrowa othokorerya exeeni?

³ Nrowe nithokorerye itthu sikina sinihela muhina orukunuxa murima. Mwaha ola, ninrowa othokorerya itthu tthaaru. Woopaceryani,  ninrowa oweha moota Yehova aawiixuttinhe awe aisarayeli orukunuxa murima. Nuumala-vo, nnimoona moota Yehova onaakhaliherya awe atthu orukunuxa murima. Wookiseryani waya, nnimoona moota Yesu Kristu aawiixuttinhe awe awiixutti awe orukunuxa murima.

MOOTA YEHOVA AAWIIXUTTINHE AWE AISARAYELI ORUKUNUXA MURIMA

4. Yehova aawiixuttinhe sai aisarayeli orukunuxa murima?

⁴ Okathi Yehova aathanlale awe aisarayeli wiira akhale nloko nawe, owo aahipaka nivarihano naawo. Nto, aisarayeli yaahileiherya wiiwelela malamulo awe. Vaakhanle wiira yaamweettela malamulo awe, Yehova aamwaakhapelela ni aamwaareeliha. Olavulaka malamulo awo, Yehova aahaalipiherya aisarayeli oriki: “Molumo ala kinovahakani olelo khorikenleni vahinweryanyu wettela: khanvikana ikuru sanyu”. (Otum. 30:11, 16) Masi, vaakhanle wiira aisarayeli yaamuhiya wiiwelela malamulo awe aahiiiso yaamuthanla waakokhorela amuluku akina, owo aamuhiya waakhapelela. Nto awo yaamuhaawa. Masi eyo khentaphulela wiira Yehova khaatthikela-tho waathokorerya. Awo yanwerya ‘ohokolowela w’Apwiya Muluku aya, yiwelelaka molumo aya’. (Otum. 30:1-3, 17-20) Ni moolumo makina, aisarayeli yanwerya orukunuxa murima. Vaakhanle wiira yaamwiira siiso, Yehova anwaattamela ni aamutthikela waareeliha.

5. Yehova oonihenrye sai khaahiyale atthu awe? (2 Mamwene 17:13, 14)

⁵ Atthu Yehova aathanlale awe, yaahihiya omwiiwelela ikwaha sinceene. Awo yaanikokhorela ilatarato ni yaanipaka itthu sikina sootepa onanara. Nto awo yaahihaawa mwaha wa yeeyo. Masi Yehova khaahiyale waakhaliherya atthu awe wiira atthikele omurumeela. Owo aahaaruma maprofeta awe ikwaha ikwaha sene wiira yaatumererye atthu awe orukunuxa murima ni atthikele wa yena. — Mmusome 2 Mamwene 17:13, 14.

6. Yehova aarumenle sai maprofeta awe, wiira owiixuttihe atthu awe oreerela waya orukunuxa murima? (Nwehe eteseenyo.)

⁶ Ikwaha sinceene Yehova aahaarumeela maprofeta awe wiira aalopole ni aattaruxe atthu awe. Mwa ntakiheryo, Muluku aahimuruma Yeremiya ohimya wiira: “Nyuwo atthu a wIsarayeli, alipa-òhìwelela, mutthikele wa miyo. . . . Nkinrowa-tho woviruwelani. Ayo: miyo k’òmoriwa ikharari: nkinoviruwelani mahiku othene.  Miyo k’Apwiya: nkinotha. Vano mwisuwelihe okhala alipa-òttheka: wona muharukunuwela Apwiya Muluku anyu”. (Yer. 3:12, 13) Yehova aahimuruma Yoweli waaleela atthu wiira: “Muttharuweke ni murim’anyu wothene, . . . muhokolowele wa miyo”. (Yow. 2:12, 13) Yehova aahimuleela Yesaya ohimya wiira: “Mwireriheke, murukunuxe mirima sanyu. Mukumihe oholo waka sonanara simpakanyu: muttharuweke wira sotakhala”. (Yes. 1:16-19) Omurumeelaka Ezekiyeli, Yehova aahihimya wiira: “Tthiri miyo nkinsiveliwa n’ukhwa wa mulipa-òttheka: masi kinnitteliwa murima n’urukunuxa wawe murima: kinnitthuna wira akhaleke. . . . Miyo nkinsiveliwa n’ukhwa wa mutthu. . . . Tivó, murukunuxe murima, wira mukhalane ekumi”. (Ezek. 18:23, 32) Yehova onnihakalala okathi onaaweha awe atthu attharuwaka itampi saya, mwaha woowi oniphavela wiira akhaleke mahiku ootheene. Tivo, owo khonilipelela wiira mutthu opacerye toko orukunuxa murima wiira omukhaliherye. Nrowe noone matakiheryo makina anooniherya eyo.

7. Orumeelaka etthu yiiraneyale ni profeta Hoseya ni mwaarawe, Yehova aawiixuttinhe exeeni atthu awe?

⁷ Nkawehani moota Yehova aawiixuttinhe awe atthu awe, orumeelaka ntakiheryo na Gomeri, mwaarawe profeta Hoseya. Nuumala oraruwa, owo aahimuhiya Hoseya onarowa okhala ni mulopwana mukina. Nto niireke owo khawerya-tho orukunuxa murima? Yehova, yoowo oniweha mirima, aahimuleela Hoseya wiira: “Murowé-tho emara ekina, mwamphente muthiyana orina mwaset’awe, anettela oraruwa. Mumphenteke ntoko Apwiya sinaphenta aya atthu a wIsarayeli, ohiya wira atthu awo anatthara amuluku akina”. (Hos. 3:1; Mir. 16:2) Moone wiira nlelo mwaarawe Hoseya iira opakaka etampi yuulupale. Hata vari siiso, Yehova aahimuleela Hoseya wiira omurowele, omulevelele ni otthikele okhala mwaarawe. Siiso, Yehova aaphavela owooniherya atthu awe wiira nlelo khaanyanyanle. Nnaamwi atthu awo nlelo yaapaka itthu sootakhala, nlelo aanaaphenta. Aanaaruma maprofeta wiira aakhaliherye atthu awo ottharuwa itampi saya ni orukunuxa murima aya. Ntakiheryo nla ninniixuttiha wiira Yehova “tonitokosa mirima sa atthu” ni onimweereya omukhaliherya mutthu nlelo onipaka etampi, wiira orukunuxe murima awe. (Mir. 17:3) Nrowe noone moota Yehova onipaka awe eyo. a

MOOTA YEHOVA ONAAKHALIHERYA AWE ATTHU ORUKUNUXA MURIMA

8. Etthu xeeni Yehova aapanke awe wiira omukhaliherye Kayini orukunuxa murima? (Maphattuwelo 4:3-7) (Nwehe eteseenyo.)

⁸ Kayini aari mwaana oopacerya oyariwa a Adamu ni Eva. Owo aahiravihiwa etampi ni anamuyari awe. Nave Biibiliya onnimuhimya Kayini oriki: “Miteko sawe saari sootakhala”. (1 Yoh. 3:12) Woonasa wene, ti nthowa naya Yehova ‘ahasiveliwawe ni Kayini ni sovaha sawe’, okathi Kayini owo anvahale awe mukuttho. Ohiya oturuka mukhalelo awe, “Kayini ahinanariwa vanjene: owitho wawe wahirwela mannyari”. Nto Yehova aapanke exeeni? Owo aahilavula ni Kayini. (Musome Maphattuwelo 4:3-7.) Moone wiira Yehova aahimulavuliha saana Kayini, omuleela wiira ammureeliha akhala wiira anvaraka itthu sooreera. Nave-tho Yehova aahimulopola Kayini wiira onanariwa wawe wammwiiriha opaka itthu sootakhala. Mooriipiha murima, Kayini aahikhootta wiiwelela. Owo kheemerenrye okhaliheriwa ni Yehova wiira orukunuxe murima awe. Niireke nuumala wiiraneya etthu eyo, Yehova aahihiya weererya waakhaliherya atthu akina oturuka murima aya? Nnaari!

9. Yehova aamukhalihenrye sai Davidi orukunuxa murima awe?

⁹ Yehova aanimphenta vanceene mwene Davidi. Owo aahimuhimya Davidi okhala “mulopwana onihakalaliha murima aka”. (Mit. 13:22) Masi Davidi aahipaka itampi suulupale, ohela  muhina oraruwa ni wiiva. Moovarihana ni Nlamulo na Moise, Davidi aaniphwanela wiiviwa. (Onam. 20:10; Moth. 35:31) Masi Yehova aaniphavela omukhaliherya Davidi wiira orukunuxe murima. Owo aahimuruma profeta awe Natani wiira orowe okumana ni mwene owo, nnaamwi Davidi ahoonihenrye nnakhala vakhaani wiira aaniphavela orukunuxa murima. Natani aahirumeela nlikanyiho wiira omukhaliherye Davidi woona wiira aahipaka itampi suulupale. Vano Davidi aahoona wiira aahimuriipiha murima vanceene Yehova. Nto aahirukunuxa murima. (2 Sam. 12:1-14) b Owo oolepa esaalimu enooniherya moota aariipiwe awe murima mwaha wa etthu aapanke awe. (Esal. 51, muru) Okathi atthu anceene apanke etampi anisoma aya esaalimu ela, anniphwanya nimaaliho ni annirukunuxa murima. Niireke khannihakalala woona wiira Yehova aanimphenta murumeyi awe Davidi ni aahimukhaliherya ottharuwa?

10. Munoonela sai osuwela wiira Yehova onnaapixerya murima apinaatamu ni onnaalevelela?

¹⁰ Yehova onninyokha inamuna sootheene sa itampi. (Esal. 5:4, 5) Masi Yehova onnisuwela wiira ootheene ahu na anatampi. Tivo, okathi ninttheka ahu, owo onniphavela onikhaliherya. Okathi wootheene, Yehova onnaakhaliherya ale apanke itampi suulupale wiira arukunuxe murima aya ni amwaattamele. Ti voolipiha osuwela wiira owo onniphavela onilevelela! Okathi nnuupuwelela ahu opixa murima ni olevelela wa Yehova, eyo enniniiriha ohihiya okhala oororomeleya wa yena ni waakuva orukunuxa murima okathi ninttheka ahu. Vano ninrowa oweha etthu Yesu aalenle awe awiixutti awe, mwaha ola wa orukunuxa murima.

MOOTA YESU AAWIIXUTTINHE AWE AWIIXUTTI AWE ORUKUNUXA MURIMA

11-12. Nlikanyiho xeeni Yesu aarumenle awe wiira oniixuttihe wiira Yehova onniphavela vanceene onilevelela? (Nwehe eteseenyo ya vakaapani.)

¹¹ Iyaakha vakhaani Nuumala Kristu Orwa, Yehova aahimurumeela Yohani Mpatisa ni Yesu Kristu, wiira owiixuttihe atthu woona wiira orukunuxa murima etthu yooreera. — Math. 3:1, 2; 4:17.

¹² Okathi Yesu aari awe mulaponi, aahiwiixuttiha atthu wiira Tiithi awe onniphavela vanceene onilevelela, okathi ninttheka ahu. Enamuna emosa Yesu aapanke awe eyo, waari okathi yoole  aalavunle awe nlikanyiho na mwaana aarimenle. Mwaana owo, aahithanla okhuma vate paapa awe ni aahipaka itthu soonanara. Masi okathi mwaana owo “aapacenrye awe wuupuwela saana”, aahitthikela owaani. Paapa awe aapanke exeeni? Yesu aahimmye wiira mwaana ole “nlelo ori ene ottaiwene, paapa awe aahinweha, ommorela ikharari, onamutthimakela, omukhupaarela, onanvaha epeexo”. Mwaana ole uupuwela wiira paapa awe khaarowa omulevelela. Tivo, aahinvekela paapa awe wiira okhale namuteko a vatthokoni vawe. Masi paapa awe aaniphavela vanceene omulevelela. Aahimwiirela “mwanaka ola”, ni aahimwaakhela vatthokoni vawe. Paapa ole aahimmye wiira: “Owo aahirimeela, vano, oophwanyiwa”. (Luka 15:11-32) Okathi Yesu aari awe wiirimu, ikwaha sinceene aahinweha Tiithi awe aamorelaka ikharari ni aakuvaka waalevelela ale yaarukunuxa murima aya. Mweekeekhai, nlikanyiho nla na mwaana aarimenle Yesu aaromonle awe, ti noolipiha vanceene. Nave ninnooniherya moota Tiithi ahu Yehova, ori awe oomoriwa ikharari.

13-14. Nilavulaka sa opixa murima, exeeni murummwa Pedru aixuntte awe? Nave exeeni aawiixuttinhe awe atthu akina? (Nwehe eteseenyo.)

¹³ Yesu aahimwiixuttiha murummwa Pedru etthu yuulupale, yeeyo enooniherya moota Yehova onaalevelela awe ale anirukunuxa murima. Pedru aanifalyari ikwaha sinceene, masi Yesu aanimulevelela ni murima wootheene. Mwa ntakiheryo, nuumala omukhootta Pwiya awe ikwaha tthaaru, Pedru aahiriipiwa murima vanceene. (Math. 26:34, 35, 69-75) Nuumala Yesu ohihimuxiwa, aahirowa olavulana Pedru ori ene mekhawe. (Luka 24:33, 34; 1 aKor. 15:3-5) Mweekeekhai, Yesu aahisuwela wiira Pedru aahirukunuxa murima awe. Nave, Yesu aaniphavela omooniherya Pedru wiira aahimulevelela. — Munwehe Marko 16:7.

¹⁴ Pedru aahiixutta oratteene ele enitaphulela aya orukunuxa murima ni olevelela. Tivo, aahiwiixuttiha atthu akina etthu aixuttihiwe awe. Ovinre ene okathi vakhaani nuumala efesta ya Pentekoositi, Pedru aahilavula mwaha ohoolo wa ayuda anceene yahaamwaamini Muluku,  otthokiheryaka wiira awo yaahimwiiva Mesiya. Owo aahaatumererya atthu ale, oriki: “Tivo, murukunuxe murima anyu, muturuke mweettelo anyu, wiira Yehova ooleveleleni itampi sanyu ni ooruuheleni mahiku a murettele”. (Mit. 3:14, 15, 17, 19) Pedru aahiixuttiha wiira natampi onnirukunuxa murima attharuwa vale. Eyo enitaphulela wiira owo onnituruka muupuwelo awe ni mweettelo awe woohiloka, onnihiya opaka itthu soohiloka, nave onnipacerya opaka itthu sinimusivela Muluku. Murummwa Pedru aahooniherya wiira Yehova aamwaalevelela ni murima wootheene. Eyo enitaphulela wiira aamuttipiha itampi saya mpakha omala-mala. Nuuvira iyaakha sinceene, Pedru aahaalipiherya makristau oriki: “Yehova . . . onnoopixeryani murima, maana khoniphavela wira mutthu opwetexiwe, nnakhala mmosa. Masi oniphavela wira atthu otheene arukunuxe murima”. (2 Ped. 3:9) Okathi ninttharuwa ahu itampi sahu, hata siri ene suulupale, ti voolipiha osuwela wiira Yehova onoonilevelela ni murima wootheene!

15-16. a) Murummwa Paulo aixuntte sai olevelela? (1 Timootheyo 1:12-15) b) Mwaha onittharelana ninrowa wiixutta exeeni?

¹⁵ Saulo a oTarso aahipaka itthu sinceene soohiloka. Owo aanaalupattha vanceene awiixutti a Yesu Kristu. Makristau manceene yuupuwela wiira Saulo khaarowa orukunuxa murima awe nnakhala vakhaani. Masi Yesu aanisuwela wiira Saulo anwerya oturuka muupuwelo awe ni orukunuxa murima. Yesu ni Tiithi awe, yaahoona wiira Saulo aahikhalana mikhalelo sooreera. Yesu aahihimya wiira: “Miyo koomuthanla mulopwana owo”. (Mit. 9:15) Nave Yesu aahirumeela mwiiriirya wiira omwiirihe Saulo orukunuxa murima. (Mit. 7:58–8:3; 9:1-9, 17-20) Nuumala okhala mukristau, Saulo, yoowo muhoolo mwaya aasuweliwe okhala murummwa Paulo, ikwaha sinceene aahooniherya oxukhurela wawe moota aareereliwe awe murima ni aamoreliwe awe ikharari. (Mmusome 1 Timootheyo 1:12-15.) Paulo aahihimya wiira: “Muluku onnooreerelani murima ookhaliheryakani wira muttharuwe”. — aRom. 2:4.

¹⁶ Ekwaha emosa, Paulo aahiiwa wiira anna a muloko wa oKorinto, yaahimuhiya mmulokoni, mulopwana mmosa aarupihana voohiloka. Nto Paulo aalenle wiira apake exeeni? Etthu Paulo aahimmye awe, enniniixuttiha moota Yehova onooniherya awe ophenta okathi onaattaruxa awe arumeyi awe ni moota onaamorela awe ikharari, okathi anirukunuxa aya murima. Nto nnimwiixutta moota nikhanle ahu oomutakiha Yehova. Mwaha onittharelana, nnimoona ele yaakhumelenle muloko wa oKorinto.