1, 2. AHéberi 13:4 onnitumererya opaka exeeni?

OTHEENE ahu ninnimuttittimiha Yehova. Owo onniphwanela ottittimihiwa ni onihimya wira onoonittittimiha. (1 Samuweli 2:30; Miruku 3:9; Wisupulula 4:11) Nave oniphavela wira naattittimiheke atthu akina, ntoko makhulupale a guvernu. (aRoma 12:10; 13:7) Nnaamwi vari siiso, yookhala etthu ekina nintthuneya ahu ottittimiha vanceene, eyo piiyo, ekasamento.

² Murummwa Paulo olempe so: “Othelana ottittimihiweke n’atthu othene: ale athelanne ettittimihaneke, ehiraruweké, okhala wira Muluku onimwaphuka anamuttompe n’anamararuwa”. (aHéberi 13:4) Paulo khahiyo aalavula sa ikasamento sa atthu otheene. Owo aaleela maKristau wira attittimiheke ekasamento aahiiso ethokoreryeke okhala yowaarya. Niireke munoonela siiso ekasamento, otepexa wene akhala wira moothela aahiiso mootheliwa?

3. Voohimya sa ekasamento, Yesu aavanhe miruku xeeni? (Nwehe elatarato yoopacerya.)

³ Akhala wira munnithokorerya ekasamento okhala  yowaarya, nyuwo munnitthara ntakiheryo nooloka na Yesu. Maana owo aanittittimiha ekasamento. Okathi aFarisi yaamukonhe aya voohimya sa omwalana, Yesu aahilavula ele Muluku aahimmye awe sa ekasamento yoopacerya, oriki: “Tivó mulopwana onahiyawe atithi awe n’ame awe, anakhala vamosá ni mwar’awe: òwanli aya enakhala ntoko mutthu mmosaru pahi”. Nave, Yesu aahincererya wira: “Yeyo Muluku ephitanyalyawe, mutthu ahimwalanyihé-tho”.​—Mmusome Marko 10:2-12; Maphattuwelo 2:24.

4. Tiivi yaari yoolakela ya Yehova voohimya sa ekasamento?

⁴ Yesu aanisuwela wira Muluku paahi topanke ekasamento ni aaphavela wira ekhaleke mahiku otheene. Nto vaavo Muluku aapanke awe ekasamento, khaalenle Adamu ni Eva wira amwalaneke. Owo aaphavela wira “òwanli aya” akhaleke oowiiraana mahiku otheene.

5. Okhwa onrukunuxa sai ekasamento?

⁵ Musuweleke wira, nuumala Adamu ottheka, itthu sinceene sooturukeya. Apinaatamu annookhwa, nto eyo ennikumiherya marukunuxo mukasamentoni. Murummwa Paulo aahaatthokiherya maKristau wira okhwa, onnimaliha ekasamento, nto ole ori mukumi pooti othela aahiiso otheliwa.​—aRoma 7:1-3.

6. Nlamulo na Moise ninniixuttiha exeeni sa moota Muluku onoonela awe ekasamento?

⁶ Nlamulo Muluku aavanhe awe aIsarayeli, naanihimya itthu sinceene sa ekasamento. Mwa ntakiheryo, aIsarayeli yaaneemereriwa waathela athiyana anceene. Yoolema eyo yaahikhala Muluku ohinatthi ovaha Nlamulo. Masi, Nlamulo naanaakhapelela athiyana ni anamwane wira ahihaaxiweke. Mwa ntakiheryo, akhala wira mulopwana aanithela epottha ni muhoolo mwaya onamuthela muthiyana mukina, owo ahaana omukhapelela mwaarawe oopacerya. Muluku aaphavela  wira mulopwana owo omukhapeleleke ni onvaha itthu saamuthowa mwaarawe ole oopacerya. (Okhuma 21:9, 10) Olelo-va, hiyo khanintthara Nlamulo na Moise. Masi ninniixuttiha wira Muluku onnithokorerya ekasamento okhala yowaarya. Nto, eyo enninikhaliherya ottittimiha ekasamento.

7, 8. (a) Moovarihana ni Otumererya 24:1, Nlamulo naahimya exeeni sa omwalana? (b) Yehova onoonela sai omwalana?

⁷ Nlamulo naahimya exeeni voohimya sa omwalana? Nnaamwi Yehova aahaaphavela wira anamathelana amwalaneke, Nlamulo na Moise naanimweemererya mulopwana omwalana ni mwaarawe akhala wira oomoonana “etthu enimùliha muru”. (Mmusome Otumererya 24:1.) Nlamulo khinaahimya mooluluwanya etthu ene ‘yamùliha muru’. Masi etthu eyo yahaana okhala yoonyohowa aahiiso mweettelo wowuuliha muru ohiya mixankiho saamukhaani. (Otumererya 23:15) Mooriipiha murima, mahiku a Yesu aYuda anceene yaanimwalana axaaraya mwaha “w’etthu p’itthu”. (Matheyo 19:3) Tthiri khuuvo oniphavela okhalana mweettelo owo.

⁸ Okathi wa profeta Malakhiya, alopwana anceene yaanimwalana axaaraya aphavelaka omuthela mwali ahaamurumeela Yehova. Masi Muluku aahihimya moota onoonela awe omwalana. Owo aahimmye so: “Omwalana onnakiphwela”. (Malakhiya 2:14-16, Biblya Exirima) Muluku khoturunke moota onoonela awe ekasamento, owo aahimmye wira mulopwana onimwaahiya “atithi awe n’ame awe, anakhala vamosá ni mwar’awe: òwanli aya enakhala ntoko mutthu mmosaru pahi”. (Maphattuwelo 2:24) Nave Yesu aahittittimiherya moota Tiithi awe onoonela awe ekasamento, vaavo aahimmye awe so: “Yeyo Muluku ephitanyalyawe mutthu ahimwalanyihé-tho”.​—Matheyo 19:6.

9. Antaphulela exeeni moolumo a Yesu ari Marko 10:11, 12?

⁹ Atthu akina pooti wiikoha so: ‘Kiireke nookhala nthowa nimmweemererya muKristau omwalana wira othele aahiiso otheliwe?’ Nkahaya muupuwele ele Yesu aahimmye awe: “Mulopwana onimwalana ni mwar’awe, anamuthela mukina, onimuraruwela mwar’awe ole òpajerya. Siso-tho muthiyana onimwalana n’iy’awe, anatheliwa ni mulopwana mukina, onoraruwa”. (Marko 10:11, 12; Luka 16:18) Vannooneya wira Yesu aanittittimiha ekasamento ni aaphavela wira atthu akina apakeke etthu emosa-ru. Mulopwana onimwalana ni mwaarawe voohikhala nthowa nooloka onamuthela mukina, onooraruwa. Nave, muthiyana ompaka eyo, onooraruwa. Tivonto, omwalana voohikhala nthowa khommaliha ekasamento. Nlelo Muluku onnaathokorerya atthu awo ntoko “mutthu mmosaru pahi”. Yesu aahihimya-tho wira, mulopwana ommwalana ni mwaarawe voohikhala nthowa, pooti omwiiriha mwaarawe oraruwa. Moota xeeni? Muthiyana omwalaniwe pooti wuupuwelaka wira ohaana otheliwa mwaha  woothoiwa mireerelo sa werutthuni. Ekasamento ntoko eyo enoolikana ni oraruwa.

10. Nthowa xeeni nimosa nimmweemererya muKristau omwalana?

¹⁰ Yesu aahiixuttiha wira nookhala nthowa nimmweemererya mutthu omwalana, oriki: “Miyo kinohimeryani wira: mulopwana onimwalana ni mwar’awe, ohikhanle mwaha w’oraruwa [orupihana woohiloka], anamuthela mukina, onoraruwa”. (Matheyo 19:9, Biblia Solemphwa sa Muluku) Yesu aahihimya etthu emosaru okathi aalavula awe Mwaha awe va Mwaako. (Matheyo 5:31, 32) Owo aahilavula ikwaha piili voohimya sa orupihana woohiloka. Nto orupihana woohiloka onihela muhina, oraruwa, onamuttompe, orupihana athiyanaru aahiiso alopwanaru ni orupiha inama. Mwa ntakiheryo, mulopwana oothela araruwa, mwaarawe pooti othanla omwalana aahiiso nnaari. Akhala wira anoomwalana, Muluku khonrowa waathokoreryaka ntoko mutthu mmosa.

11. Exeeni ekhanle oomwiiriha muKristau ohimwalana hata osuwelaka wira ooraruweliwa?

¹¹ Moone wira Yesu khaahimmye wira akhala wira mutthu mmosa ooraruweliwa ohaana omwalana. Mwa ntakiheryo, muthiyana oraruweliwe, pooti othanla omulevelela iyawe aahiiso nnaari. Nthowa xeeni? Pooti wira muthiyana owo onnivikaniha omphenta ni onniphavela omulevelela iyawe, nave oniphavela wira yiimananiheke olokiherya ekasamento aya. Nave-tho, akhala wira onoomwalana khuhitheliwa, pooti omphwanya mixankiho. Mwa ntakiheryo, niireke onoowerya wiikhapelela voohimya sa itthu sa werutthuni ni orupihana? Niireke khonrowa omphwanya omeekha? Ankhi anamwane, anrowa okhala sai? Niireke onoowerya waahuwa mweekeekhaini? (1 aKorinto 7:14) Nto vannooneya wira, akhala wira ole oraruweliwe onnithanla omwalana pooti omphwanya mixankiho sinceene.

12, 13. (a) Exeeni yiiraneyale ni ekasamento ya Hoseya? (b) Hoseya ni Gomeri yaatthikelanne sai, eyo enniixuttiha exeeni?

¹² Yowiiraneya ya profeta Hoseya enniniixuttiha etthu yuulupale sa moota Yehova onoonela awe ekasamento. Muluku aahimuleela Hoseya orowa omuthela muthiyana iihaniwa Gomeri, yoowo aari “namararuwa” wira oyareliwe anamwane ooraruwiwa. Nto Gomeri ni Hoseya yaahimuyara mwaana mwaamulopwana. (Hoseya 1:2, 3) Muhoolo mwaya, woonasa wene ni mulopwana mukina, Gomeri aahaayara anamwane anli, mulopwana ni muthiyana. Nnaamwi Gomeri aamakela omuraruwela Hoseya, owo aamakela omulevelela. Vano, Gomeri aahimuhiya Hoseya khukhala epottha. Nuuvira okathi, Hoseya aahiliva musurukhu wira omukuxe Gomeri. (Hoseya 3:1, 2) Yehova aahimurumeela Hoseya wira ooniherye moota aamakela awe waalevelela aIsarayeli. Awo yaanimuhiya Yehova anaakokhorela amuluku eethiru. Nto ekasamento ya Hoseya, enniixuttiha exeeni?

¹³ Akhala wira muKristau ooraruwa, ole oraruweliwe ohaana othanla etthu yoopaka. Yesu aahimmye wira ole oraruweliwe pooti omwalana ni omuthela aahiiso otheliwa ni mutthu mukina. Masi, khahiyo etthu yootthekeya ole oraruweliwe olevelela. Moone wira nuumala Gomeri oraruwa, Hoseya aahimulevelela. Muhoolo mwaya, Hoseya aahimutthikela Gomeri khumuleela wira ohimuraruweleke. Hata vaari siiso, waahivira okathi Hoseya ohimurupinhe Gomeri. (Hoseya 3:3) Masi nuuvira okathi, Hoseya aahitthikela  omurupiha Gomeri. Eyo yooniherya wira Muluku aahiweemererya aIsarayeli otthikela wa Yena ni okhalana waataana wooloka. (Hoseya 2:2; 3:3-5) Eyo enniixuttiha exeeni olelo-va? Akhala wira ole oraruweliwe onneemererya orupihana ni ole orarunwe, eyo enooniherya wira oomulevelela. (1 aKorinto 7:3, 5) Owo khonrowa okhalana nthowa nooloka na omwalana. Nto anamathelana awo aahaana wiimananiha othokorerya ekasamento aya ntoko Muluku onthokorerya awe.

14. Moovarihana ni 1 aKorinto 7:10, 11, exeeni ekhanle ookhumelela mukasamentoni?

¹⁴ MaKristau otheene ahaana ottittimiha ekasamento ntoko Yehova ni Yesu anttittimiha aya. Okhala wira na anatampi, ikwaha sikina, atthu akina khanttittimiha ekasamento. (aRoma 7:18-23) Eyo khennitikiniha mwaha woowi maKristau makina a eseekulu yoopacerya, yaahikhalana mixankiho suulupale mukasamentoni mwaya. Murummwa Paulo aahimmye wira “muthiyana otheliwe” ohivalaane ni iyawe. Masi okathi mukina eyo pooti wiiraneya.​—Mmusome 1 aKorinto 7:10, 11.

15, 16. (a) Sakhumelela mixankiho mukasamentoni, anamathelana apakeke exeeni ni nthowa xeeni? (b) Ankhi akhala wira mmosa khonimurumeela Yehova?

¹⁵ Paulo khaahimmye itthu siniwiiriha anamathelana ovalaana. Masi noosuwela wira muxankiho ene khahiyo orooraruwa. Vaakhanle wira ti siiso, muthiyana oraruweliwe aamukhalana mathowa ooloka wira omwalane ni otheliwa ni mutthu mukina. Paulo olempe wira, muthiyana onivalaana ni iyawe “ahitheliweké-tho ni mulopwana mukina: ohiya vo, atthikelane n’iy’awe”. Tivonto, Muluku onniwoona anamathelana awo ntoko mutthu mmosa. Paulo ohimmye wira, hata mixankiho iyo siri ene suulupale, ohikhanle wira arooraruwelana awo ahaana wiimananiha otthikelana ni ophuka mixankiho saya wira avikaniheke okhala vamosa. Awo ahaana waavekela nikhaliheryo axitokweene. Nto axitokweene awo ahimukhaliheryeke mutthu mmosa paahi, masi ahaana waavaha anamathelana awo miruku sinikhuma mBiibiliyani.

¹⁶ Masi, ankhi akhala wira muKristau othelanne ni mutthu ohinimurumeela Yehova? Niireke vanneemereriwa ovalaana sakhumelela mixankiho? Ntoko nihimmye ahu wanipacerya, Biibiliya onihimya wira oraruwa paahi ti nthowa nimmweemererya mutthu omwalana. Masi Biibiliya khonihimya mathowa akhanle oomwiiriha mutthu ovalaana. Paulo olempe so: “Muthiyana obatiziwe atheliwa ni mulopwana ohinamini, vano  iy’awe ola anatthuna okhala poromosa, muthiyan’owo ahimwalané n’iy’awe yowo”. (1 aKorinto 7:12, 13) Malakiheryo ala annivareleya muteko olelo-va.

17, 18. Exeeni eniwiiriha maKristau makina ohivalaana hata akhalanaka mixankiho suulupale?

¹⁷ Pooti wira sookhala itthu soohiloka “mulopwana [owo] ohinamini” onipaka awe ooniheryaka wira khoniphavela “okhala poromosa” ni mwaarawe. Mwa ntakiheryo, pooti wira onnimuhasula mwaarawe, nto muthiyana owo onoona wira avikaniha okhala vamosa onimwiirihiwa ehasara. Nave pooti wira onnikhootta olyiha etthoko awe wala onnimukhoottiherya mwaarawe omurumeela Muluku. Akhala wira ti siiso muthiyana owo muKristau ohaana othanla “okhala poromosa” aahiiso ovalaana. MaKristau arina muxankiho ntoko owo, pooti othanla ohivalaana. Awo ahaana wiimananiha olokiherya ekasamento aya. Exeeni enrowa owiiriha opaka eyo?

¹⁸ Anamathelana anivalaana mwaha wa mixankiho, nlelo Muluku oniwoona ntoko mutthu mmosa ni pooti wira sinimwaakhumelela mixankiho nilavunle ahu. Nave murummwa Paulo oohimya etthu ekina eniwiiriha anamathelana awo ohivalaana, oriki: “Vekekhai, mulopwan’owo ohinamini onnakheliwa ni Muluku mwaha wo wamini wa mwar’awe owo. Siso-tho, muthiyana ohinamini onnakheliwa ni Muluku mwaha wo wamini wa iy’awe owo. Vahakhanle siso, an’inyu yarowa okhala ntoko àna àtthu ohibatiziwa. Nto vano, an’inyu annakheliwa ni Muluku”. (1 aKorinto 7:14) MaKristau manceene annithanla okhala ni ole athelanne aya ohinimurumeela Yehova hata akhalanaka mixankiho suulupale. Awo aahakalala vanceene mwaha woowiimananiha, okhala wira muhoolo mwaya, ole athelanne aya ookhala Namoona a Yehova.​—Mmusome 1 aKorinto 7:16; 1 Pedru 3:1, 2.

19. Xeeni mmulokoni mwa eKristau ahireere aya anamathelana anikhumela saana?

¹⁹ Yesu oovaha miruku voohimya sa omwalana, nto murummwa Paulo oovaha miruku voohimya sa ovalaana. Otheene aya, yaaphavela wira arumeyi a Muluku attittimiheke ekasamento. Olelo-va, olumwenku wotheene mmulokoni mwa eKristau sookhala ikasamento sookhumela saana. Woonasa wene, munnaaweha anamathelana anceene mmulokoni anihakalala. Alopwana annaaphenta axaaraya ni athiyana annaattittimiha vanceene axiiyaya. Otheene aya annooniherya wira ekasamento ehaana ottittimihiwa. Ninnihakalala woona wira imilyau sinceene sa alopwana ni athiyana annooniherya wira moolumo ala a Muluku teekeekhai, ani: “Tivó mulopwana onimwahiya atithi awe n’ame awe, wira aphitane ni mwar’awe: òwanli aya enakhala mutthu mmosá pahi”.​—aÉfeso 5:31, 33.