IYAAKHA vakhaani sivinre, Diana yoowo orina iyaakha sinivikana 80, khisaareere omphwanya mixankiho. Iyawe yoowo, aakhala empa ankhapeleliwa atthu oowuuluvala ni aawereiwa eretta eniihaniwa Alzheimer, aahikhwa. Nave anaawe anli axilopwana ahookhwa ni aahikhalana kanser a vanipeleni. Masi okathi wotheene anna yanweha aya Diana omithukumanoni aahiiso olaleeryaka, owo aanihakalala vanceene.

John ooviriha iyaakha sinivikana 43 ori ene mutokweene a esirkwiitu. Aanisiveliwa yoothanleliwa awe, nto khuupuwela ovara muteko mukina. Masi, aahaana ohiya okhala mutokweene a esirkwiitu wira amukhapeleleke mmusi awe aawereiwa. Nto vaavo anna ni arokora animusuwela John yanweha aya wasembeleyani aahiiso okongresuni, annoona wira khiivo eturukeyale. Nlelo owo onnihakalala.

Diana ni John, awenrye sai ovikaniha ohakalala? Vanweryaneya sai mutthu ohakalala ohaawaka? Mutthu onrowa ovikaniha sai ohakalala hata ohiyaka yoothanleliwa yaamusivela? Biibiliya onnaakhula makoho awo. Owo onihimya so: “Anaxariya annitthapela miteko s’Apwiya”. (Esalimo 64:11) Nnimwiiwexexa ekeekhai eyo akhala wira nnoosuwela etthu eniphwanyiha ohakalala ohinimala.

Sookhala itthu sikina siniphwanyiha ohakalala. Mwa ntakiheryo, nkahaya muupuwele ohakalala aniphwanya aya ale anrowa othelana. Nave mmuupuwele mutthu orina mmusi ovahiwe muteko musya mmutthenkesoni mwa Yehova. Itthu iyo sotheene sinniphwanyiha ohakalala okhala wira sinikhuma wa Yehova. Owo oonivaha eparakha ya othelana, waayara anamwane ni muteko woovara mmutthenkesoni mwawe.​—Maphattuwelo 2:18, 22; Esalimo 127:3; 1 Timótheyo 3:1.

Masi itthu sikina sinniphwanyiha ohakalala, pooti okhala sa okathi vakhaani. Mooriipiha murima, ole othelanne ahu pooti oniraruwela aahiiso okhwa. (Ezekiyeli 24:18; Hoseya 3:1) Nave anamwane pooti ohiwiiwelela anamuyari aya aahiiso Yehova, nave pooti woomoliwa mmulokoni. Mwa ntakiheryo, anaawe profeta Samuweli yaahikhwa mwaha woowi khiyaamukokhorela Yehova moophwanelela. Nave Davidi ni emusi awe  aahihaawa vanceene mwaha woowi aahiraruwa ni Bathi-Xeba. (1 Samuweli 8:1-3; 2 Samuweli 12:11) Sanikhumelela itthu ntoko iyo, hiyo khaninhakalala masi ninniriipiwa murima ni woona owereya vanceene.

Moolikanasa, pooti wira khaninwerya ovikaniha ovara muteko wa Muluku wa okathi wotheene mwaha woowereiwa, orowa omukhapelela mmusi ahu oniwereiwa aahiiso mwaha wa marukunuxo anikhumelela mmutthenkesoni. Atthu anceene ahin’ye yoothanleliwa aya ahimmye wira aapweteiwa muteko waahakalaliha vanceene.

Nto vannikhweya woona wira mathowa makina anniiriha ohakalala ta mahiku vakhaani. Niireke yookhala etthu enniphwanyiha ohakalala ohinimala hata nikumanaka mixankiho? Aayo yookhala. Maana Samuweli, Davidi ni atthu akina khiyaapweteiwale ohakalala waya vaavo yaarina aya mixankiho.

Okhala wene Yesu mutthu oohakalala. Ohinatthi orwa valaponi, Biibiliya onihimya wira Yesu ‘anitteliwa murima okhala vamaithoni vawe [Yehova] okathi p’ukathi’. (Miruku 8:30) Masi nuumala orwa valaponi, Yesu aahikumana mixankiho sinceene. Hata vaari siiso, Yesu aanisiveliwa opaka yootthuna ya Tiithi awe. (Yohani 4:34) Ankhi okathi ole wookiserya ahaareere awe woona owereya? Biibiliya onihimya wira Yesu aahitteeliwa “murima, ntoko saphwanelawe: nto ahivilela wiviwa” vamwirini va nihaaxeryo. (aHéberi 12:2) Ninniixutta itthu piili Yesu aahimmye awe wira sinniphwanyiha ohakalala wekeekhai.

Okathi omosa, awiixutti 70 yaahihokolowela wa Yesu nuumala olaleerya. Awo yaahihakalala vanceene mwaha wa itthu sotheene yaapanke aya ni woomola malaikha ootakhala. Masi Yesu aahaaleela wira: “Muhitteliwé murima mwaha wo wiweleliwa ni malaikha òtakhala: mutteliweke murima, okhala wira masin’anyu àlempwa wirimu”. (Luka 10:1-9, 17, 20) Tthiri okhalana waataana wooloka ni Yehova etthu yootepa otthuneya ni enniphwanyiha ohakalala ovikana muteko wa vameekhaaya mmutthenkesoni mwa Yehova.

Okathi mmosa Yesu iixuttihaka muttitthi, muthiyana mmosa muYuda aahitikinihiwa ni soowiixuttiha sa Yesu, nto muthiyana ole aahimuleela Yesu  wira: Ooyanreni ooreeriwa. Masi Yesu aahimwaakhula oriki: “Òreriwa toko t’ale anìwa molumo a Muluku, enettela”. (Luka 11:27, 28) Waayara anamwane pooti onihakalaliha. Masi etthu enniphwanyiha ohakalala ohinimala omwiiwelela ni okhalana waataana wooloka ni Yehova.

Nave ninnihakalala osuwela wira Yehova onnisiveliwa ni hiyo. Nto, nnaamwi mixankiho sihinihakalalihaka, iyo khasinwerya onaakha ohakalala wahu. Tthiri vaavo ninvikaniha ahu ororomeleya okathi wa mixankiho, ohakalala wahu onootepa wunnuwa. (aRoma 5:3-5) Nave-tho, Yehova onnaavaha munepa awe wootteela ale animuroromela, nto otteeliwa murima oniirela mpantta yoowiima ya munepa wootteela. (aGalasia 5:22) Eyo enninikhaliherya woona nthowa naya Esalimo 64:11 enihimya aya wira: “Anaxariya annitthapela miteko s’Apwiya”.

Nave ennooniherya nthowa naya Diana ni John yaavikaninhe aya ohakalala hata saakhumelenle mixankiho. Diana oni: “Miyo kimmuroromela Yehova ntoko mwaana onimuroromela awe tiithi awe”. Nave onincererya oriki: “Kinoona wira onnikireeliha, maana kinnivikaniha olaleerya moohakalala”. Exeeni emukhalihenrye John ovikaniha ohakalala ni oluttuweliwa olaleerya hata ohiyale ene yoothanleliwa yaamusivela? Owo onihimya so: “Okhuma mwaakha wa 1998, kaathanliwe aka osomiha Exikola Eniixuttiha Orummwa, kaahipacerya omusoma Biibiliya ovikana khalai”. Vaahimukhweela owo ni mwaarawe opaka marukunuxo awo, okhala wira aahiivahererya ovara khula etthu Yehova aarowa awe onvaha. John onincererya oriki: “Naahipaka eyo moohithanana”.

Atthu anceene ahoona wira Esalimo 64:11 enihimya ekeekhai. Mwa ntakiheryo, nkahaya moone ele ahimmye aya anamathelana yaawo yaavirinhe iyaakha sinivikana 30 arumeelaka eBetheli ya wEstados Unidos. Awo yaahithanleliwa orowa okhala mapioneero a vameekhaaya. Nto anihimya wira: “Mutthu apweteiwa etthu yaamusivela, owo onniriipiwa murima”. Nave anincererya ariki: “Masi oriipiwa wanyu murima onoovira”. Moohipisa nuumala orowa opuro yaathanleliwa aya, yaahipacerya olaleerya ni muloko. Nave ahimmye wira: “Naahivekela voohimya sa itthu saanixankiha. Nto nuumala woona wira mavekelo ahu yahaakhuliwa, eyo yaahinlipiha ni onihakalaliha. Moohipisa anna anceene a muloko ahu yaahipacerya okhala mapioneero. Nave naanaasomiha Biibiliya atthu anli yaawo yaarowa vahoolo”.

Tthiri khivanikhweya ohakalala okathi wotheene. Onookhala okathi ninrowa ahu oriipiwaka murima. Masi moolumo a Yehova ari Esalimo 64:11 anninlipiha vanceene. Nnaamwi okathi mukina nikhulumuwaka, nikupaliki wira navikaniha ororomeleya hata sinikhumelelaka mixankiho nnoowerya ‘otthapa’ ni Yehova. Nave ninnilipelela okathi Yehova onrowa awe oruuha “irimu isyá n’ilapo esyá”. Okathi owo, atthu otheene anrowa okhala oohittheka ni anrowa “otthapa n’upuha wohimala”, maana Yehova onrowa opaka itthu iyo sotheene.​—Yesaya 65:17, 18.

Nkahaya muupuwele moota onrowa aya okhala woohakalaliha. Ninrowa okhalana ekumi yooloka ni ikuru sinceene khula nihiku. Khula etthu yaanixankiha khalai khenrowa onriipiha murima. Yehova ooleiherya wira “itthu sa khalai khasinupuweliwa-tho, itthu sivinre sinoliyaliwa khuluwi”. Nave amusi ahu akhwiiye anoohihimuxiwa, nto okathi owo ninrowa otthapaka ntoko anamuyari awe mwaaruusi aarina iyaakha 12 yoowo aahihimuxiwe ni Yesu. Anamuyari awe “yaahitikinihiwa vanci-ene”. (Marko 5:42, Waataana wa Naanaano) Tthiri elapo esya, atthu otheene valaponi anrowa okhala anaxariya ni anrowa ‘otthapaka’ ni Yehova mahiku otheene.