1, 2. Xeeni vari aya va miruku onwiriyana Mpattuxa anyu okathi munipaka anyu soothanla? (Nwehe ifootu soopacerya.)

AKHALA WIRA mwa mmiravo, woonasa wene moovahiwa miruku sinceene voohimya sa mukhalelo anyu wa muhoolo. Maprusoore ni atthu anivaha miruku, pooti wooleelani wira orowa wuniversidade ni ophwanya muteko onliviwa musurukhu munceene, onimookhaliheryani othaaciri. Masi Yehova onnoovahani miruku soovirikana niiyo. Nave oniphavela wira mwiimananiheke oxikola wira nweryeke wiikhapelela. (aKolosi 3:23) Nave-tho, onnisuwela wira amiravo ahaana opaka soothanla suulupale sinivarihana ni mukhalelo aya wa muhoolo. Tivonto onaavaha awe malakiheryo anrowa waakhaliherya orumeela okumi aya mwa enamuna enimuhakalaliha Muluku, mahiku ala ookiserya.​—Matheyo 24:14.

² Muupuweleke wira Yehova onnisuwela itthu sotheene. Owo onnisuwela ele enrowa okhumelela muhoolo ni nihiku olumwenku ola onrowa aya omala. (Yesaya 46:10; Matheyo 24: 3, 36) Nave Yehova onnoosuwelani. Owo onnisuwela etthu enrowa woriipihani murima ni etthu enrowa woohakalalihani. Okathi mukina, miruku sa apinaatamu pooti okhalaka ntoko sooloka, masi akhala wira khasinivarihana ni Biibiliya, miruku iyo khahiyo sooloka.​—Miruku 19:21.

3, 4. Owiriyana miruku soohiloka saahapunxe sai Adamu ni Eva vamosa ni osuulu aya?

³ Okhuma khalai, miruku soohiloka sihuulaana. Satana topacenrye waavaha apinaatamu miruku soohiloka. Owo aahaaleela Adamu ni Eva wira yaamuhakalalaka akhala wira yaamweettelaka murima aya. (Maphattuwelo 3:1-6) Vannooneya wira Satana toowiitthuna! Owo aaphavela wira Adamu ni Eva vamosa ni osuulu aya amwiiweleleke ni omukokhorela Satana, ohiya Yehova. Masi Satana khonaavahe etthu yooloka apinaatamu. Maana Yehova paahi taavanhe itthu sotheene yaarina aya. Nave Yehova aahaavaha ejardim yooreera ni irutthu soohittheka wira akhaleke mahiku otheene.

⁴ Mooriipiha murima, Adamu ni Eva khiyaamwiiwelenle Muluku. Nto mwaha woopaka eyo, awo yaahimuhiya ole aavanhe ekumi. Nave eyo yahaakumiherya maxakha. Ntoko siisaale ethutu erukuliwe vamwirini vaya vakhaani-vakhaani ennyaala aya, Adamu ni Eva vakhaani-vakhaani yaahuuluvala mpakha okhwa. Awo anraviha mixankiho iyo sotheene. (aRoma 5:12) Atthu anceene olelo-va, aneettela murima aya ni khaniphavela omwiiwelela Muluku. (aÉfeso 2:1-3) Nto exeeni enikhumelela? Biibiliya onihimya wira “miruku [saya] khasintekeliwa etthu” mwaha woowi sinninvirikanya Yehova.​—Miruku 21:30.

5. Etthu xeeni Yehova aakupali awe?

⁵ Yehova aanikupali wira yaamukhala atthu anceene waahela muhina amiravo yaarowa ophavela omusuwela ni omurumeela. (Esalimo 103:17, 18; 110:3) Tthiri Yehova onnaavaha efaita amiravo awo! Niireke nyuwo mwa mmiravo? Akhala wira ti siiso, munnitthapa mwaha wa itthu sooloka Yehova oovanhaaweni, nto eyo ennincererya ohakalala wanyu. (Musome Esalimo 103:5; Miruku 10:22) Mwaha ola, ninrowa othokorerya itthu xexe, Yehova oovanhaaweni wira muhakalaleke. Itthu sene tiiya: Yoolya yomunepani, apatthani ooloka, soolukama sooloka ni otaphuwa wekeekhai.

6. Xeeni munikhapelela anyu mukhalelo anyu wa omunepani, ni Yehova oovanheni exeeni wira ookhaliheryeni?

⁶ Axinama khanitthuneya okhapelela mukhalelo aya womunepani, niire so, khanitthuneya omusuwela Mpattuxa aya. Masi hiyo nihaana omusuwela. (Matheyo 4:4) Vaavo nninwiriyana ahu Muluku, ninnikhalana osuwela, ankhili ni ohakalala. Yesu aahimmye so: “Òreriwa t’ale ari amasikhini murohoni mwaya”. (Matheyo 5:3) Yehova oonivaha Biibiliya ni onnimurumeela “murumeyi òroromelaya ni ànkhili”, yoowo onnivaha iliivuru sinnikhaliherya olipiha waamini wahu. (Matheyo 24:45) Iliivuru iyo yoolya yomunepani, maana sinnikhaliherya waamini wahu ni olipiha waataana wahu ni Yehova. Tthiri nookhalana yoolya yinceene yomunepani!​—Yesaya 65:13, 14.

7. Yoolya yomunepani enookhaliheryani sai?

⁷ Yoolya yomunepani enimoovahani ankhili, eyo piiyo, wuupuwela oratteene weiwo onrowa wookhapelelani mwa inamuna soovirikana.  (Musome Miruku 2:10-14.) Mwa ntakiheryo, ankhili animookhaliheryani osuwela itthu sowoothiwa, ntoko yowoothiwa yoowi khokhanle Mpattuxa aahiiso wira musurukhu ni itthu sa werutthuni sinimoophwanyihani ohakalala. Nave, ankhili animookhaliheryani osyaka soophavela ni soolema soohasula. Tivonto, mwiimananiheke wira mukhalane ankhili ni wuupuwela oratteene. Nto munimoona wira Yehova onnoophentani ni oniphavela mureerelo anyu.—Esalimo 34:9; Yesaya 48:17, 18.

8. Xeeni munitthuneya anyu nenna va omwaattamela Yehova? Opaka eyo enrowa wookhaliheryani sai muhoolo?

⁸ Moohipisa olumwenku wa Satana onrowa opwetexiwa. Yehova paahi tonrowa owerya onikhapelela ni onivaha itthu sinnithowa ohela muhina yoolya ya khula nihiku. (Habakuki 3:2, 12-19) Nto, ola ti okathi wira nitepeke omwaattamela Yehova ni olipiha omuroromela wahu. (2 Pedru 2:9) Moohicikha ele enrowa okhumelela, akhala wira munoopaka eyo, munimoonaka ntoko Davidi, yoowo aahimmye so: “Okathi p’ukathi kinnona wira Apwiya ari ni miyo: wona yawo annikivarela mono, nkinova etthu”.​—Esalimo 16:8.

9. (a) Ntoko onihimya awe Yohani 6:44, Yehova onipaka exeeni? (b) Etthu xeeni ninsuwela ahu vaavo ninkumana ahu ni Namoona mukina?

⁹ Ekwaha yoopacerya munkumana anyu mutthu ohiixuntte ekeekhai, etthu xeeni munsuwela anyu sa mutthu owo? Woonasa wene, munnisuwela nsina nawe ni mutthu onlikana awe, masi khamunsuwela itthu sinceene sa mutthu owo. Nto eyo ennivirikana ni mutthu iixuntte ekeekhai. Maana moosuwela wira mutthu owo onnimusuwela Yehova. Nave moosuwela wira Yehova ohoona mikhalelo sooloka sa mutthu owo ni oomulattula wiirela mpantta emusi ya atthu animukokhorela. (Mmusome Yohani 6:44.) Moohicikha opuro ni moota mutthu ohuuwale awe, nyuwo munnimusuwela vanceene ni mutthu owo onnoosuwelani!

10, 11. Itthu xeeni atthu a Yehova anlikana aya, ni eyo enookhaliheryani sai?

 ¹⁰ Vaavo munkumana anyu Namoona a Yehova, munnisuwela wira sookhala itthu sinceene munlikana anyu. Hata mulavulaka mattaava oovirikana, munnisuwela wira otheene anyu munlavula nttaava nimosaru neekeekhai. (Sofoniya 3:9) Eyo entaphulela wira oowanli anyu muneettela malamulo mamosa-ru, munnimukupali Muluku, ni murina nlipelelo nimosa-ru na muhoolo. Itthu iyo sinnookhaliheryani ororomelana ni olipiha waataana wanyu weiwo ohinrowa omala.

¹¹ Tivonto, vaavo munimurumeela anyu Yehova, nyuwo pooti ohimyaka wira mookhalana apatthani eekeekhai. Mookhalana apatthani olumwenku wotheene, hata muhitonko okumana! Niireke muhaasuwela atthu akina arina ompatthani ntoko owo waavikana atthu a Yehova?

12. Soolukama xeeni mukhanle anyu oophwanya?

¹² Mmusome Musuweli 11:9–12:1. Niireke sookhala soolukama muniphavela anyu ophwanya? Woonasa wene, moolakela omusoma Biibiliya khula nihiku aahiiso wiilokiherya wira nvaheke ikomentaario sooloka mmithukumanoni. Nave pooti wira muniphavela omurumeela saana Biibiliya mwaalaleeryaka. Munoonela sai vaavo munoona anyu wira munnirowa vahoolo aahiiso mutthu mukina onooleelaweni eyo? Woonasa wene munnihakalala vanceene, mwaha wa ele mpanke anyu! Nthowa xeeni? Mwaha woowi munnisuwela wira mumpaka ele Yehova oniphavela awe ntoko Yesu aapaka awe.​—Esalimo 40:9; Miruku 27:11.

13. Xeeni vari aya vootthuneya omurumeela Muluku voomalela?

¹³ Vaavo muniimananiha anyu omurumeela Yehova, munrowa ovaraka muteko onrowa woohakalalihani ni woophwanyihani nlipelelo nooloka. Paulo aahimmye so: “Tivó, axinn’aka amphentanaka, mukhaleke aKristu òlipa ni òhittikinyeya. Mutepeke okelela oholo mmutekoni mw’Apwiya vohihiyererya, musuwelaka wira wilipiherya wanyu khahiyó w’ethiru vamaithoni v’Apwiya”. (1 aKorinto 15:58) Masi vaavo atthu akina aniimananiha aya othaaciri ni ovuwa olumwenku ola, awo khanihakalala mwekeekhai. Hata aphwanyaka ele yaaphavela aya, nlelo khaniphiyeriwa. (Luka 9:25) Ele yaamwiiranenle Mwene Salomoni enniniixuttiha etthu yuulupale.​—aRoma 15:4.

14. Ele yaamwiiranenle Salomoni, eniwiixuttihani exeeni?

¹⁴ Khuuvo mutthu oothaaciri ni oowerya onvikana Salomoni. Owo aahiihimeerya mmensawe wira: “Haya, kèrerye: kone opuha wothene!” (Musuweli 2:1-10) Tthiri, Salomoni aahiteka ipa soolokexa, ijardim ni iparkhi sootepa oreera ni aanipaka khula etthu aaphavela awe. Niireke aahiphwanya ohakalala wekeekhai? Nnaari. Maana nuumala oweha itthu aapanke awe, owo aahimmye so: “Kihòna wira sothene ti sohiroromeleya, sothene sinlikana ni womola epheyo. Miteko iyo sothene khasimphwanyiha etthu”. (Musuweli 2:11) Niireke ele yaamwiiranenle Salomoni yoowiixuttihani etthu?

15. Xeeni munitthuneya anyu okhalana waamini? Moovarihana ni Esalimo 32:8, waamini onrowa wookhaliheryani sai?

¹⁵ Atthu akina anniixutta etthu nuumala opaka etthu yoohiloka ni waakumiherya mixankiho. Yehova khoniphavela wira eyo yookhumeleleni.  Maana oniphavela wira munwiriyaneke ni mmwiiweleleke. Nto onitthuneya waamini, masi khamunrowa othanana mwaha woopaka soothanla murumeelaka waamini wanyu. Nave Yehova khonikhala-khala oliyalaka ophenta moonihenrye anyu nsina nawe. (aHéberi 6:10) Tivonto, mwiimananiheke wira mukhalane waamini woolipa. Mwiira siiso, munoopaka soothanla sooloka ni munimoona wira Tiithi inyu a wiirimu oniphavela mureerelo anyu.​—Musome Esalimo 32:8.

16. Xeeni ninvaha ahu efaita otaphuwa ni ninrowa orumeela sai mwa miruku?

¹⁶ 2 aKorinto 3:17 onihimya so: “Vavo vankhalaya eroho [munepa wa Yehova], vavo-tho onniphwanyaneya otaphuwa”. Yehova tootaphuwa ni oniphavela wira ni nyuwo mutaphuweke. Masi-tho, oniphavela wira murumeeleke otaphuwa wanyu mwa miruku wira otaphuwa iwo wookhapelelekeni. Woonasa wene, amiravo akhwiinyu waasivela orupihana woohiloka, oweha epornografia, oweetta axooku ootakhala, olya mirette soohapala ni ohapaliwa. Itthu iyo pooti okhalaka ntoko sooloka aahiiso soohakalaliha, masi ikwaha sinceene sinnikumiherya maxakha, ntoko iretta, ihasara aahiiso okhwa. (aGalasia 6:7, 8) Amiravo akina ampaka itthu iyo anuupuwela wira arootaphuwa, masi eyo khahiyo ekeekhai.—Tito 3:3.

17, 18. (a) Moota xeeni omwiiwelela Muluku onniphwanyiha aya otaphuwa wekeekhai? (b) Mwa enamuna xeeni Adamu ni Eva yahaareerana aya otaphuwa waavikana atthu akina olelo-va?

¹⁷ Omwiiwelela Yehova onniniphwanyiha mireerelo, ntoko okumi wooloka ni otaphuwa wekeekhai. (Esalimo 19:8-12) Nto vaavo munirumeela anyu otaphuwa wanyu mwa miruku, eyo piiyo, wiiwelela moomalela malamulo ni malakiheryo a Muluku, nyuwo munnimooniherya Muluku ni anamuyari anyu wira mwa mutthu oororomeleya. Nto, woonasa wene, anamuyari anyu animoororomelakani ni ohitepa wooweha-wehani. Nave Yehova ooleiherya waavaha arumeyi awe oororomeleya otaphuwa wekeekhai, weiwo Biibiliya onihimya awe okhala “otaphuwa n’uvuwa w’àna a Muluku”.—aRoma 8:21.

¹⁸ Yehova aahaavaha otaphuwa iwo Adamu ni Eva. Ejardim ele ya wEdeni, Muluku aakhoottihenrye etthu emosa paahi. Awo yaakhoottiheriwe paahi olya mihokorokho sa mwiri mmosa. (Maphattuwelo 2:9, 17) Niireke nlamulo nne naari noohixariya ni noovila wiiwelela? Nnaari. Nkahaya muupuwele malamulo apinaatamu apanke aya anaakhanyererya atthu akina wiiwelela. Masi Muluku aavanhe Adamu ni Eva nlamulo nimosa paahi.

19. Yehova ni Yesu anniixuttiha exeeni enrowa oniphwanyiha otaphuwa mwekeekhai?

¹⁹ Yehova onninthokorerya mwa miruku. Ohiya onivaha malamulo manceene, moopixa murima onniniixuttiha wiiwelela nlamulo na ophenta. Nave onniniixuttiha okhala moovarihana ni malakiheryo awe ni onyokha itthu sootakhala. (aRoma  12:9) Mwaha Yesu aalavunle awe Vamwaako, aahiiwanyeiha nthowa naya atthu akina anipaka aya itthu sootakhala. (Matheyo 5:27, 28) Elapo esya, ntoko Mwene a Omwene wa Muluku, Yesu onrowa ovikaniha oniixuttiha woona itthu sooloka ni soohiloka ntoko onoona awe. (aHéberi 1:9) Nave, ninrowa okhalana erutthu ni muupuwelo woomalela. Nkahaya muupuwele moota onrowa aya okhala vooloka oheehereriwa opaka itthu soohiloka mwaha woowi ninrowa okhala atthu oohittheka. Nto ninrowa opuhaka “otaphuwa n’uvuwa”, ntoko Yehova oleihenrye awe.

20. (a) Yehova onirumeela sai otaphuwa wawe? (b) Munrowa omutakiha sai?

²⁰ Hata elapo esya, otaphuwa wahu onookhalana mikano. Mwa enamuna xeeni? Okathi wotheene ninrowa omphentaka Muluku ni atthu. Vaavo nneettihiwa ahu ni ophenta, ninnimutakiha Yehova. Nto, nnaamwi Yehova orina ene otaphuwa woomalela, owo oheemererya wira ophenta weettiheke itthu sotheene ompaka awe, ohela muhina moota onnithokorerya awe. (1 Yohani 4:7, 8) Tthiri nnookhala ootaphuwa namutakiha Muluku moomalela.

21. (a) Davidi aamoonela sai Yehova? (b) Mwaha onittharelana, ninrowa othokorerya exeeni?

²¹ Niireke munnixukhurela itthu sotheene Yehova oovanhaaweni? Muupuweleke wira, ohoovahani yoolya yomunepani, apatthani ooloka, nlipelelo na otaphuwa wekeekhai ni itthu sikina sooloka. (Esalimo 103:5) Woonasa wene munnoona ntoko Davidi, yoowo aavekenle oriki: “Nyuwo mokithonyerya ephiro y’ekumi: mukhalaka ni miyo, munnikitteliha murima vanjene; kikhalaka ni nyuwo, kinnipuha mahiku othene”. (Esalimo 16:11) Mwaha onittharelana, ninrowa othokorerya ikeekhai sikina siri Esalimo 16. Iyo sinrowa wookhaliheryani woona moota wookhalana ekumi yooloka!