1, 2. Yowiiraneya ya Tony, enooniherya sai wira vanniweryaneya opaka marukunuxo?

TONY innuwale ohikhanle ni paapa awe, mwaha woowi ohookhwa. Owo aasoma exikola secundária masi khaasiveliwa. Nave aanuupuwela ohiya osoma ohinatthi omaliha. Wuumalani wa esumana, Tony aamakela orowa oweha iviidiyu ni apatthani awe. Nnaamwi aari mutthu ooreera murima ni ahaalya mirette soohapala, Tony khaarina nlipelelo. Owo khaakupali wira Muluku ookhala. Nihiku nimosa, Tony aahikumana Anamoona a Yehova ni aahaakoha itthu ahaasuwela awe voohimya sa Muluku. Awo yaahinvaha ibroxura piili wira asomeke, A Vida — Teve um Criador? ni A Origem da Vida​—Cinco Perguntas Que Merecem Resposta.

² Nihiku yaatthikenle aya omuxukurya, yamphwannye Tony oturunke ene moonelo awe. Maana, Tony aahisoma ikwaha sinceene ibroxura iye. Nto aahaaleela wira: “Tthiri Muluku ookhala”. Vano aahipacerya osomihiwa Biibiliya, vakhaani-vakhaani, Tony aanipaka marukunuxo. Ohinatthi opacerya omusoma Biibiliya, Tony khaaphwanya inoota sooloka oxikola, masi  vano aaniphwanya! Nto mukhulupale a exikola awe aahitikinihiwa. Owo aahimuleela Tony wira: “Moopaka marukunuxo manceene, maana mookhalana mweettelo wooloka ni inoota sooloka. Kiireke mwaha woomusoma Biibiliya ni Anamoona a Yehova?” Nto Tony aahimwaakhula wira: Aayo, ni aahimuleela itthu iixutta awe. Tony oomaliha exikola secundária, nto vano pioneero ookilaatheya ni murummwa oorumeela. Tthiri vano Tony toohakalala ni ookhalana Tiithi oophenta, Yehova!​—Esalimo 68:6.

3. Miruku xeeni Muluku onaavaha awe amiravo?

³ Yowiiraneya ya Tony enninuupuxerya wira Yehova onnaavaha efaita amiravo. Owo oniphavela wira nyuwo amiravo mukhalane okumi woohakalaliha, tivonto Biibiliya onihimya awe wira: “Muhimuliyaleké Muluku òpattunxeni nlelo muri mmiravo”. (Musuweli 12:1) Opaka eyo khivanikhweya, masi vanniweryaneya. Mukhaliheriwaka ni Muluku, munookhumela saana nlelo muri ene mmiravo ni mwannuwa vale. Wira niiwexexe, ninrowa othokorerya itthu saakhalihenrye aIsarayeli oxintta Elapo Yooleiheriwa ni ele yaamukhalihenrye Davidi omwiiva Goliyathi.

4, 5. Moota aIsarayeli yaaxinttale aya aKaanani ni moota Davidi aamwiivale awe Goliyathi enniixuttiha exeeni? (Nwehe elatarato yoopacerya.)

⁴ Okathi aIsarayeli yaahanle aya vakhaani okela Elapo Yooleiheriwa, malakiheryo xeeni Yehova aavanhe awe? Niireke aalenle wira yahaana okhala anakhotto ootupa aahiiso wiixutta owana ekhotto? Nnaari! (Otumererya 28:1, 2) Yehova aahaaleela wira yaahaana omwiiwelela ni omuroromela. (Yoxuwa 1:7-9) Mmoonelo wa apinaatamu, miruku iyo pooti okhalaka ntoko soohiloka, masi saahaakhaliherya aIsarayeli. Yehova aahaakhaliherya atthu awe waaxintta aKaanani. (Yoxuwa 24:11-13) Ontthuneya waamini wira nimwiiweleleke Muluku, masi okathi wotheene waamini onnimukhaliherya mutthu okhumela saana. Eyo yaahiiraneya khalai ni enniiraneya olelo-va.

⁵ Goliyathi aanisuwela saana owana ekhotto. Owo aarina imeeturu 3 ni ikaruma sawe sa ekhotto saari sowoopiha. (1 Samuweli 17:4-7) Moovirikana ni Goliyathi, Davidi aamwaamini Muluku ni aarina pharansikula paahi. Tthiri mutthu ohirina waamini pooti wuupuwelaka wira waari voololo Davidi orowa owana ni Goliyathi! Masi Goliyathi taari mulolo!​—1 Samuweli 17:48-51.

6. Mwaha ola, ninrowa othokorerya exeeni?

⁶ Mwaha ovinre, noothokorerya itthu xexe sikhanle ooniphwanyiha ohakalala ni okhumela saana mookumini. Nave, nihiixutta wira nihaana okhapelela mukhalelo ahu womunepani, okhalana apatthani animphenta Muluku, soolukama sooloka ni ovaha efaita otaphuwa wahu. Mwaha ola, ninrowa othokorerya itthu sikina sinrowa onikhaliherya opaka itthu sooloka. Wira nipake eyo, nrowe niwehe malakiheryo ari Esalimo 16.

7. (a) Mutthu orina muupuwelo womunepani ompaka exeeni? b) Tani aari “othajiri” wa Davidi, nto opaka eyo waamukhalihenrye sai?

⁷ Mutthu orina muupuwelo womunepani, onnimwaamini Muluku ni oweha itthu ntoko Yehova onoonela awe. Owo onneemererya weettihiwa ni Yehova ni onnimwiiwelela. (1 aKorinto 2:12, 13) Davidi ntakiheryo nooloka na mutthu orina muupuwelo womunepani.  Owo iipale so: “Muluku! Nyuwo mwá othajiri aka”. (Esalimo 16:5) Davidi aanixukhurela “othajiri” wawe, eyo piiyo, waataana wooloka aarina awe ni Muluku ni aahimpaka okhala ntthyawelo nawe. (Esalimo 16:1) Eyo yaahimwiiriha ohimya wira: “Murim’aka onnitteliwa”. Khiivo etthu yaamutteeliha murima Davidi ovikana waataana wawe ni Yehova!​—Musome Esalimo 16:9, 11.

8. Itthu xeeni sikhanle oowoophwanyihani ohakalala?

⁸ Atthu yaale aniphavelasa musurukhu ni opuha paahi, khanihakalala ntoko Davidi. (1 Timótheyo 6:9, 10) Munna a oCanadá ohimmye so: “Ohakalala wekeekhai khonlipa ni itthu mutthu orina awe, masi onlipa ni itthu nninvaha ahu Ole onivanhe itthu sotheene sooreera, Yehova Muluku”. (Yakobo 1:17) Akhala wira munoomurumeela ni omwaamini Yehova, munoophwanya ohakalala wekeekhai. Nto, exeeni ekhanle anyu oopaka wira mulipihe waamini wanyu? Muhaana oviriha okathi munceene muri ene ni Yehova, munnipaka eyo vaavo munimusoma anyu Biibiliya, oweha itthu opattunxe awe ni wuupuwelela mikhalelo sa Yehova ntoko ophenta wawe.​—aRoma 1:20; 5:8.

9. Munrowa weemererya sai weettihiwa ni Nuulumo na Muluku?

⁹ Okathi mukina, Yehova onninooniherya oniphenta wawe onipwapwelaka, ntoko siisaale tiithi oophenta onimpwapwela awe mwanawe. Davidi aanisiveliwa opwapweliwa ni Yehova. Owo aahimmye so: “Kinnatthapela Apwiya ankivaha miruku sorera: hatá ohiyu, ankhili aka annikilopola”. (Esalimo 16:7) Davidi aanuupuwelela muupuwelo wa Yehova ni aaniiriha okhala wawawe. Nave aaneemererya weettihiwa ni muupuwelo wa Muluku, eyo piiyo, weemererya muupuwelo wa Muluku omukhalihaka mutthu ooloka. Vaavo munipaka anyu eyo, omwaamini wanyu Muluku onoolipa, munookhala muKristau ooloka ni munoophavelaka omusiveliha Yehova mahiku otheene. Murokora oniihaniwa Christin ohimmye wira okathi aatokosa awe ni wuupuwelela ele aasoma awe, oona wira itthu iye aalepeliwe yena!

10. Ntoko Yesaya 26:3 onihimya awe, okhalana muupuwelo womunepani onrowa wookhaliheryani sai?

¹⁰ Okhalana muupuwelo womunepani onimookhaliheryani woonaka olumwenku ntoko Yehova onoona awe. Nave onimoovahani osuwela ni ankhili anceene. Nthowa xeeni? Nthowa noowi, Yehova oniphavela wira musuweleke itthu sootepa otthuneya mookumini, mpakeke soothanla sooloka ni okhalana moonelo wooloka voohimya sa muhoolo muhoovaka etthu! (Mmusome Yesaya 26:3.) Munna oniihaniwa Joshua, yoowo onikhala wEstados Unidos ohimmye wira: Omwaattamela Yehova onimookhaliheryani osuwela itthu sootepa otthuneya ni soohitthuneya.

11. Tani yaari apatthani a Davidi?

¹¹ Musome Esalimo 16:3. Davidi aanisuwela moota wowaathanla apatthani ooloka. Apatthani awe yaari atthu yaale yamphenta Yehova ni ‘ànisiveliwa okhala ni yawo’. Nave aahaahimya apatthani awe okhala “atthu animwamini Muluku”, mwaha woowi atthu awo yaaniimananiha otthara malamulo a Yehova. Nasaalimo mukina aarina moonelo mmosaru wa Davidi, aalempe so: “Kinnatàna n’ale othene anottittimihani, yale antthara otthuna wanyu”. (Esalimo 119:63) Ntoko niwenhe ahu mwaha ovinre, nyuwo nave munimwaaphwanya apatthani ooloka eriyari ya atthu animphenta ni omwiiwelela Yehova.  Nto, apatthani anyu ahikhaleke paahi ale munlikana anyu iyaakha.

12. Xeeni Davidi ni Yonathani yaari aya apatthani aalupale?

¹² Davidi khaathanla apatthani awe atthu yaale paahi aarina awe iyaakha imosa-ru. Niireke munnisuwela nsina na mpatthani muulupale a Davidi? Woonasa wene, munimuupuwela Yonathani. Ompatthani wa Davidi ni Yonathani ti ompatthani wootepa oreera ninsoma ahu mBiibiliyani. Masi, niireke mwaanisuwela wira Yonathani aarina iyaakha 30 onvikana Davidi? Nto, exeeni yaawiiriha okhala apatthani aalupale? Mwaha woowi, ompatthani aya waavarihana ni omwaamini waya Muluku. Nave, yaanittittimihana mukina ni mukhwaawe, ovaha efaita mikhalelo sa khula mmosa ntoko olipa murima vaavo yaawana aya ni anyokhani a Muluku.​—1 Samuweli 13:3; 14:13; 17:48-50; 18:1.

13. Munrowa waapaka sai apatthani ooloka? Nvahe ntakiheryo.

¹³ Ntoko Davidi ni Yonathani ‘nnosiveliwaka okhala’ ni apatthani ahu akhala wira awo annimphenta ni omwaamini Yehova. Kiera, yoowo opacenrye khalai omurumeela Yehova, onihimya so: “Apatthani aka ta ilapo soovirikana, yaawo arina ihuweliwo ni soolema soovirikana”. Akhala wira munoomutakiha Kiera, munimoona moota Biibiliya ni munepa wootteela onniiraaniha awe ntoko emusi emosa-ru enimurumeela Yehova olumwenku wotheene.

14. (a) Xeeni munitthuneya anyu okhalana soolukama somunepani? (b) Amiravo akina aahimmye exeeni sa soolukama saya?

¹⁴ Musome Esalimo 16:8. Etthu Davidi oona awe okhala yootepa otthuneya waari omurumeela Yehova. Akhala wira munoomutakiha Davidi, mukhalanaka soolukama sooloka ni omuupuwela Yehova, munoophwanya ohakalala wekeekhai. Munna oniihaniwa Steven ohimmye so: “Soolukama saka somunepani sookiphwanyiha ohakalala wekeekhai, maana sookikhaliherya wunnuwa momunepani”. Mmiravo a wAlemanha yoowo onirumeela elapo ekina ohimmye so: “Nkimphavela othanana kuuluvala vale, mwaha woopaka  itthu sinkiphwanyiha mureerelo aka paahi”. Niireke munoona siiso? Akhala wira ti siiso, mwiimananiheke orumeela itthu sotheene munisuwela anyu wira munvuwihe Yehova ni waakhaliherya atthu. (aGalasia 6:10) Mukhalaneke soolukama somunepani ni munvekeleke Yehova wira ookhaliheryeni ophwanya. Tthiri mukupaliki wira onimwaakhula mavekelo anyu!​—1 Yohani 3:22; 5:14, 15.

15. Soolukama xeeni mukhanle anyu ookhalana? (Nwehe ekaaxa eni: “Soolukama Mukhanle Anyu Ookhalana”.)

¹⁵ Soolukama xeeni mukhanle anyu ookhalana? Munoonela sai weererya ovaha ikomentaario ni moolumo anyu mmithukumanoni? Niireke munnuupuwela okhala pioneero aahiiso orumeela oBetheli? Nave nyuwo pooti wiixutta nttaava nikina wira mwaalaleeryeke ihapari sooreera atthu a nttaava nno. Munna mmosa mmiravo oniihaniwa Barak, yoowo ori muteko wa orummwa wa okathi wotheene ohimmye so: “Osuwela wira khula nihiku kinninvaha Yehova itthu sotheene kirina aka onnikihakalaliha ni kinoona wira khuuvo muteko mukina ori wootepa otthuneya”.

16. Davidi oonela sai malamulo ni malakiheryo a Yehova, ni nthowa xeeni?

¹⁶ Musome Esalimo 16:2, 4. Ntoko niixuntte ahu mwaha ovinre, vaavo ninkhala ahu moovarihana ni malamulo ni malakiheryo a Muluku, ninniphwanya otaphuwa wekeekhai. Nave ninniixutta ophenta itthu sooloka ni onyokha itthu sootakhala. (Amosi 5:15) Davidi aahimmye wira Yehova taari oreera wawe murima. Oreera murima, mukhalelo wootepa otthuneya onimwiiriha mutthu opaka itthu sooloka. Yehova tooreera murima mwa itthu sotheene onipaka awe, nave itthu sotheene sooloka sinikhuma wa Yehova. Davidi aaniimananiha omutakiha Muluku ni ophenta itthu Yehova omphenta awe. Nave aahiixutta onyokha itthu Muluku onihimya awe wira ti sootakhala. Emosa wa itthu iyo, ti waakokhorela amuluku eethiru, weiwo okhanle omukokhorela mutthu aahiiso etthu ohikhanle Yehova. Waakokhorela amuluku eethiru woowiiriha apinaatamu ovuwiha itthu aahiiso mutthu mukina omuhiya Yehova.​—Yesaya 2:8, 9; Wisupulula 4:11.

17, 18. (a) Davidi ohimmye wira okokhorela weethiru onikumiherya exeeni? (b) Olelo-va, exeeni eniwiiriha atthu wuncererya “ohawa [waya] wulupale”?

¹⁷ Khalai, orupihana woohiloka wiirela mpantta okokhorela weethiru. (Hoseya 4:13, 14) Atthu anceene yaanisiveliwa okokhorela iwo, mwaha woowi waasivela orupihana woohiloka. Niireke waanaahakalaliha? Nnaari. Davidi ohimmye wira ale yaakokhorela amuluku eethiru yaaniphwanya “ohawa wulupale”. Nave awo yaanaapaha anaaya wira yaavahe mukuttho amuluku aya eethiru! (Yesaya 57:5) Yehova aaninyokha otakhala waya murima. (Yeremiya 7:31) Vaakhanle wira mwaakhala mahiku ene yaawo, niireke khimwaarowa ohakalala waaweha anamuyari anyu amukokhorelaka Yehova?

¹⁸ Olelo-va, itiini sinceene sinneemererya orupihana woohiloka, ohela muhina orupihana athiyanaru aahiiso alopwanaru. Atthu awo anoona wira arootaphuwa, masi anincererya “ohawa [waya] wulupale”. (1 aKorinto 6:18, 19) Niireke munnoona eyo yiiraneyaka? Nto nyuwo amiravo, munwiriyaneke Tiithi inyu a wiirimu. Mooniherye wira omwiiwelela Muluku, etthu yooloka. Nto musuweleke wira orupihana woohiloka onnikumiherya maxakha. Nave opuha wa okathi vakhaani khonvikana  maxakha munrowa anyu ophwanya. (aGalasia 6:8) Joshua, yoowo nimulavunle ahu wanipacerya, oni: “Nihaana orumeela otaphuwa wahu ntoko nimphavela ahu, masi orumeela moohiloka onnikumiherya maxakha”.

19, 20. Amiravo anrowa ophwanya mareeliho xeeni yamwaamini ni omwiiwelela Yehova?

¹⁹ Yesu aahimmye so: “Nyuwo, mwakhalela nthiti molumo aka, vekekhai munokhala awixutti aka; munosuwela ekekhai, vano ekekhai yeyo enimokhalihani òtaphuwa”. (Yohani 8:31, 32) Ninnimuxukhurela Yehova mwaha woowi oonitaphula opotthiwa ni etiini yoowootha, woova itthu seethiru ni owokiwa. Muhoolo, ninnilipelela “otaphuwa n’uvuwa w’àna a Muluku”. (aRoma 8:21) Nto, munoowerya ophwanya otaphuwa iwo akhala wira munimwiiwelela soowiixuttiha sa Kristu. Mwiira siiso, “munosuwela ekekhai” ohiya paahi wiixutta, masi okhala moovarihana ni ekeekhai eyo!

²⁰ Nyuwo amiravo, nvaheke efaita otaphuwa nvahiwe anyu ni Muluku ni murumeeleke mwa miruku. Eyo enimookhaliheryani opaka soothanla mwa miruku ni okhalana nlipelelo nooloka muhoolo. Munna mmosa mmiravo ohimmye so: “Orumeela otaphuwa wanyu mwa miruku onimookhaliheryani okathi munrowa anyu opakaka soothanla suulupale muhoolo, ntoko ophwanya muteko, othanla akhala wira munoothela aahiiso otheliwa wala oviriha okathi munceene muhithenle aahiiso muhitheliwe”.

21. Munrowa ophwanya sai “ekumi yekekhai”?

²¹ Olumwenku ola wootakhala, ele enihimmwa okhala okumi wooloka ti wa okathi vakhaani. Maana khuuvo mutthu onsuwela ele enrowa omukhumelela. (Yakobo 4:13, 14) Nto etthu yooloka ekhanle anyu oopaka, othanla itthu sinrowa wookhaliheryani ophwanya “ekumi yekekhai”, eyo piiyo, ekumi ehinimala elapo esya. (1 Timótheyo 6:19) Yehova khonimukhanyererya mutthu wira omukokhoreleke. Ola okathi woothanla ele munrowa anyu opaka. Mumpake Yehova okhala “othajiri” wanyu mwiimananihaka omwaattamela khula nihiku ni ovaha efaita itthu sotheene sooloka oovanhaaweni. (Esalimo 103:5) Tthiri mukupaliki wira Yehova onimoovahani ohakalala ohinimala!—Esalimo 16:11.