1. Exeeni anamuyari maKristau anireerela aya osuwelexa ehinatthi anaaya obatiziwa?

MUROKORA mmosa oniitthaniwa Blossom Brandt onnihimya etthu yaakhumelenle okathi aaphavela awe obatiziwa, oriki: “Saahivira myeeri sinceene kaaleelaka anamuyari aka wira kaaphavela obatiziwa, nave awo yaanivaanela ni miyo voohimya sa mwaha owo. Anamuyari aka yaaphavela osuwelexa akhala wira tthiri kaanisuwela wira obatiziwa yoothanla yuulupale. Nto nihiku 31 a Dezembro a 1934, naari nihiku na vameekha aya mookumini mwaka”. Nave olelo-va, anamuyari anniphavela waakhaliherya anaaya opaka soothanla mwa miruku. Akhala wira mwaana onnipisa obatiziwa ahikhanle mathowa, eyo pooti ohonona waataana wa mwaana owo ni Yehova. (Yakobo 4:17) Ohinatthi mwanaya obatiziwa, anamuyari a miruku anniimananiha osuwelexa akhala wira owo oolikana tthiri wira okhale mutthareli a Kristu.

2. (a) Muxankiho xeeni axitokweene akina a esirkwiitu awenhe aya? (b) Exeeni ninrowa ahu othokorerya mwaha ola?

 ² Axitokweene akina a esirkwiitu aaweha wira amiravo anceene arina iyaakha okhuma 10 mpakha 20, khanibatiziwa, hata ehuuwaka itthoko sa maKristau. Amiravo awo annirowa omithukumanoni, olaleerya, ni anniixoona okhala Anamoona a Yehova. Hata vari siiso, awo khaniivahererya wa Yehova wira abatiziwe. Okathi mukina, eyo eniiraneya mwaha woowi anamuyari aya anuupuwela wira anaaya nlelo khalikanne wira abatiziwe. Mwaha ola ninrowa othokorerya miyuupuwelo mixexe sinaakhoottiherya anamuyari akina waatumererya anaaya obatiziwa.

3. Exeeni yaaxankiha anamuyari awe Blossom?

³ Anamuyari awe murokora Blossom oromoliwe wanipacerya, yaaniphavelexa osuwela akhala wira tthiri mwanaya aanisuwela wira obatiziwa muritti muulupale. Anamuyari anrowa osuwela sai akhala wira mwanaya oolikana wira iivahererye wa Yehova?

4. Moota xeeni yooruma ya Yesu eri Matheyo 28:19, 20 enaakhaliherya aya anamuyari olelo-va?

⁴ Mmusome Matheyo 28:19, 20. Biibiliya khonihimya iyaakha mutthu onitthuneya awe ophiyeriha wira obatiziwe. Masi ti vooloka anamuyari wuupuwelela saana yootaphulela ya nuulumo noowi ‘owiixuttiha’ anaaya ni yoolukama ya waakhaliherya okhala awiixutti. Nuulumo na eGriki noowi “mwawixuttiheke atthu” nirumeeliwe Matheyo 28:19, nintaphulela omwiixuttiha mutthu ni yoolukama ya omukhaliherya okhala naxikola wala mwiixutti. Mwiixutti tuule oniiwexexa sowiixuttiha sa Yesu ni oneettela. Nto anamuyari ahaana owiixuttiha anaaya okhuma okathi aniyariwa aya, aphavelaka waakhaliherya wiivahererya wa Yehova ni okhala atthareli a Kristu. Ti maana aya anamwane acikhaanixa ahiniphwanela aya obatiziwa. Biibiliya onooniherya wira hata anamwane acikhaani anniwerya wiiwexexa ni osiveliwa ikeekhai sa mBiibiliyani.

5, 6. (a) Yowiiraneya ya Timootheyo ennikhaliherya wuupuwelela exeeni voohimya sa obatizo? (b) Enamuna xeeni yooloka anamuyari a miruku anaakhaliherya aya anaaya?

⁵ Timootheyo aari mwiixutti aalakenle omurumeela Yehova nlelo ori ene mmiravo. Murummwa Paulo aahimmye wira Timootheyo aapacenrye wiixutta ikeekhai sa Nuulumo na Muluku ‘okhuma enamwane awe’. Apapawe Timootheyo khiyaamurumeela Muluku, masi amamawe ni apiipi awe yaahimukhaliherya ophenta Nuulumo na Muluku. Eyo yaahimwiiriha Timootheyo okhalana waamini woolipa. (2 Timótheyo 1:5; 3:14, 15) Okathi aarina awe iyaakha 20, aahiphwanelela waakhela iparakha mmulokoni.—Miteko 16:1-3.

⁶ Anamwane khanlikana. Munnuwelo aya womunepani onnivirikana. Anamwane akina aniiwexexa ikeekhai, annipaka soothanla sa miruku, ni anniphavela obatiziwa, okathi aninnuwa aya. Akina waaniheryasa ahaana wunnuwa vakhaani wira alikanele obatiziwa. Anamuyari a miruku khanaakhanyererya anaaya obatiziwa. Ohiya-vo, awo annaakhaliherya anaaya orowa vahoolo moovarihana ni makhalelo aya. Anamuyari annihakalala anaaya yeettelaka moolumo ari Miruku 27:11. (Musome.) Masi awo ahaana wuupuwelela wira yoolukama aya waakhaliherya anaaya okhala awiixutti. Nto ahaana wiikoha so: ‘Kiireke mwanaka ola ohinnuwa vaniphiyerya awe obatiziwa?’

7. Niireke mutthu ohaana osuwela itthu sotheene sa mBiibiliyani wira ophwanele obatiziwa? Itthu xeeni mutthu onireerela awe osuwela ohinatthi obatiziwa? Mutthokiherye.

⁷ Okathi anamuyari aniwiixuttiha aya anaaya, awo aniphavela waasuweliha saana ekeekhai. Osuwela iwo onowiiriha anamwane awo ophavela wiivahererya wa Muluku. Masi eyo khentaphulela wira mwaana ohaana osuwela sowiixuttiha sotheene sa mBiibiliyani ohinatthi wiivahererya ni obatiziwa. Awiixutti otheene a Kristu ahaana ovikaniha osoma Nuulumo na Muluku hata nuumala obatiziwa. (Mmusome aKolosi 1:9, 10.) Nto Itthu xeeni mutthu onireerela awe osuwela ohinatthi obatiziwa?

8, 9. Exeeni yaamukhumelenle Guarda oFilipi, nave exeeni eniixutta ahu ni yowiiraneya awe?

⁸ Yowiiraneya ya emusi emosa ya khalai pooti waakhaliherya anamuyari olelo-va. (Miteko 16:25-33) Mwaakha wa 50, Paulo aahirowa epooma ya oFilipi, ekwaha awe ya nenli ya omisionaario. Okathi Paulo ni Sila yaari aya elapo ele yaahootheriwa waanyakuliha atthu, ni yaahitthukweliwa mukhatteya. Ohiyu, yaahikhumelela etetere yuulupale mpakha ohula mikhora sotheene sa ekhatteya. Guarda uupuwela wira anamutthukiwa yaahitthyawa, nto aahiphavela wiixiiva. Masi Paulo aahimuhiha. Nuumala-vo, Paulo ni Sila yaahimwiixuttiha Guarda ole ni emusi awe ikeekhai voohimya sa Yesu. Awosa yaahikupali itthu yiixuntte aya voohimya sa Yesu ni yaahoona otthuneya waya omwiiwelela. Ohiyu ene yoole yaahibatiziwa. Ela enniixuttiha exeeni?

⁹ Woonasa wene, khalai Guarda ole aari nakhotto a oRoma. Owo khasuwela Nuulumo na Muluku. Nto wira okhale muKristau, aahaana osuwela sowiixuttiha soopacerya sa mBiibiliyani. Nave aanisuwela itthu Yehova onaavekela awe arumeyi awe opaka ni aaniimananiha wiiwelela sowiixuttiha sa Yesu. Itthu aixuntte awe mwa okathi vakhaani saahimukhalihirya ophavela obatiziwa. Tthiri, owo aahaana ovikaniha wiixutta itthu sikina nuumala obatiziwa. Nto akhala wira mwaninyu ohooleelani wira oniphavela obatiziwa mwaha woowi onnimphenta Yehova ni oniphavela omwiiwelela, exeeni mukhanle anyu oopaka? Woonasa wene nyuwo pooti omuruma orowa olavula ni axitokweene, awo tanrowa osuwela vakhala wira tthiri onniphwanelela obatiziwa. * (Nwehe enoota.) Moolikanasa ni maKristau otheene oobatiziwa, owo ohaana ovikaniha wiixutta voohimya sa Yehova okumi awe wotheene.​—aRoma 11:33, 34.

10, 11. (a) Exeeni anamuyari akina anuupuwela aya? (b) Exeeni enrowa owaakiherya anamwane wira ehootothiwe?

¹⁰ Anamuyari akina anuupuwela wira ti vooloka anaaya obatiziwa nuumala osoma  ixikola suulupale ni ophwanya muteko onaakheliwa musurukhu munceene. Anamuyari awo waaniheryasa aakhalana mathowa ooloka, masi ahaana wiikoha so: ‘Niireke eyo enoomukhaliherya mwanaka okhumela saana tthiri? Niireke ennivarihana ni itthu nniixutta ahu mBiibiliyani? Yehova oniphavela wira nirumeeleke sai ekumi ahu?’​—Mmusome Musuweli 12:1.

¹¹ Vannireerela ohiliyala wira olumwenku ola ni itthu sinipakiwa khasinivarihana ni yootthuna ni miyuupuwelo sa Yehova. (Yakobo 4:7, 8; 1 Yohani 2:15-17; 5:19) Wataana saana ni Yehova tonrowa omukhaliherya mwaana ohootothiwa ni Satana vamosa ni miyuupuwelo sa olumwenku ola wootakhala. Akhala wira anamuyari animwaatumererya anaaya opweha muteko opuro woopacerya, waaniheryasa eyo pooti owiiriha anamwane awo okupaliki wira mihakhu sa olumwenku ola ti sootepa otthuneya ovikana wataana waya ni Yehova. Eyo etthu yowoopiha. Sintoko anamuyari oophenta, niireke munniphavela wira olumwenku ola owiixuttiheke aniinyu itthu sinrowa waahakalaliha? Enamuna emosa paahi ya okhumela saana ni ophwanya ohakalala wekeekhai ti omuhela Yehova nipuro noopacerya mookumini mwahu.​—Musome Esalimo 1:2, 3.

12. Xeeni anamuyari akina anoona aya wira vannireerela mwanaya olipelela wira obatiziwe?

¹² Maama mmosa aahihimya nthowa naya ahaaphavela awe wira mwanawe mwaamuthiyana obatiziwe. Owo onihimya so: “Kinnuuliwa muru ohimya wira etthu yuulupale yaahikiiriha opaka eyo waari ohisiveliwa ni mareheryo a okumihiwa atthu mmulokoni”. Ntoko murokora ole, anamuyari akina anoona wira fataari anaaya ohibatiziwa niinaano ni olipelela wunnuwa wira ehipake etampi yuulupale. (Maphattuwelo 8:21; Miruku 22:15) Anamuyari awo waaniheryasa pooti wuupuwelaka wira vakhala wira mwanaya khonibatiziwa, khonrowa okumihiwa mmulokoni. Masi exeeni vahinreerela aya wuupuwelaka siiso?​—Yakobo 1:22.

13. Akhala wira mutthu khonibatiziwe, niireke eyo entaphulela wira khorina muritti wa Yehova? Mutthokiherye.

 ¹³ Tthiri, anamuyari khaniphavela wira mwanaya obatiziwe ohinatthi olikana wira ovahererye okumi awe wa Yehova. Yaarowa okhala etthu yoohikhalela wuupuwela wira mwaana onikhalana paahi muritti ohoolo wa Muluku nuumala obatiziwa. Tthiri mwaana onipacerya okhalana muritti ohoolo wa Yehova okhuma okathi onisuwela awe moonelo wa Yehova voohimya sa itthu sooloka ni itthu soohiloka. (Mmusome Yakobo 4:17.) Anamuyari a miruku annaatumererya anaaya wira abatiziwe. Nnaamwi ari ene acikhaani, awo anniwiixuttiha anaaya ophenta ele Yehova onihimya awe okhala yooloka ni onyokha ele onihimya awe okhala yoohiloka, ntoko awo aniira aya. (Luka 6:40) Mwaha wa mwaninyu omphenta Yehova eyo enoomukhaliherya osyaka opaka itampi suulupale, okhala wira onrowa ophavelaka opaka itthu Yehova onihimya awe okhala sooloka.​—Yesaya 35:8.

14. Axitokweene anrowa waakhaliherya sai anamuyari?

¹⁴ Axitokweene pooti waakhaliherya anamuyari akhalanaka moonelo wooloka okathi anilavula aya sa soolukama sa muteko wa Yehova. Murokora mmosa ahuupuwela ele Munna Russell aamulenle awe okathi arina awe iyaakha 6. Owo onihimya so: “Naahiviriha minutu 15 nivaanelaka voohimya sa soolukama saka sa omunepani”. Nto exeeni yaakhumelenle? Muhoolo mwaya, murokora ole aahikela opioneero, nave aahiviriha iyaakha sinivikana 70 ovaraka muteko owo wa opioneero! Tthiri, moolumo ooloka ni oolipiha pooti omukhaliherya mutthu okumi awe wotheene. (Miruku 25:11) Nave axitokweene pooti waalattula anamuyari ni anaaya wira yaakhaliherye miteko sa Empa ya Omwene. Awo pooti waavaha anamwane miteko siniwerya aya moovarihana ni iyaakha saya.

15. Anna akina a mmulokoni anrowa waakhaliherya sai amiravo?

¹⁵ Anna akina a mmulokoni anrowa  okhaliherya sai? Awo ahaana waathokorerya amiravo. Mwa ntakiheryo, nyuwo pooti woona wira okhala mmiravo oniimananiha omwaattamela Yehova. Ankhi vakhala wira mwaana ookomentari saana mmithukumanoni, wala okhalana epantta mithukumano sa eriyari ya esumana? Ankhi vakhala wira oomulaleerya mutthu oxikola, wala opaka yoothanla yooloka okathi eehereriwa awe opaka etthu yoohiloka? Okathi eyo eniiraneya aya, muhipiseke omuleela wira oopaka etthu yooloka! Vannireerela okhalana yoolukama ya ovaanela ni amiravo sihinatthi opacerya ni nuumala mithukumano. Okathi onipaka ahu eyo, anamwane awo animoonaka wira anniirela mpantta muloko wala ‘muthukumano muulupale’.​—Esalimo 35:18.

16, 17. (a) Xeeni vari aya vootthuneya anamwane obatiziwa? (b) Ohakalala xeeni anamuyari maKristau aniphwanya aya? (Nwehe elatarato yoopacerya.)

¹⁶ Anamuyari aakhalana eparakha ya owiixuttiha anaaya omphenta Yehova. (Esalimo 127:3; aÉfeso 6:4) WIsarayeli anamwane yaanivahereriwa wa Yehova okathi yaayariwa aya. Masi olelo-va eyo kheniiraneya ni aniihu. Akhala wira anamuyari annimphenta Yehova ni annisiveliwa ekeekhai, eyo khentaphulela wira anaaya anoopakaka eyo. Okhuma nihiku mwaana oniyariwa awe, anamuyari ahaana okhalana yoolukama ya omukhaliherya okhala mwiixutti, wira iivahererye wa Muluku ni obatiziwe. Xeeni eyo eri aya yootthuneya? Mwaha woowi wiivahererya, obatiziwa, ni ovara miteko sa Yehova moororomeleya tonrowa omukhaliherya mwaana owo woopowa okathi wa maxakha maalupale.​—Matheyo 24:13.

¹⁷ Okathi murokora Blossom Brandt aaphavela awe obatiziwa, anamuyari awe yaaphavela osuwelexa akhala wira aanireerela obatiziwa. Vaavo awo yaawenhe aya wira aahilikana, yaahikhaliherya yoothanla awe. Blossom aahitthokiherya etthu apapawe yaapanke aya ohiyu wookiserya owo ohinatthi obatiziwa. Owo onihimya so: “Paapa ahu aahiniruma okokhora ni aahipaka nivekelo. Owo aahimuleela Yehova wira aahihakalala vanceene osuwela wira mwanawe aahipaka yoothanla ya wiivahererya wa Yehova”. Sivinre ene iyaakha sinivikana 60, Blossom aahimmye so: “Tthiri nkinikhala-khala kiliyalaka ohiyu ole!” Nyuwo anamuyari, niireke munnihakalala okathi munaaweha anyu aniinyu yiivahereryaka wa Yehova ni obatiziwa wira ekhale arumeyi awe?