1. Mixankiho xeeni saaphwannye maKristau a eseekulu yoopacerya?

NUUVIRA mwaaka wa 62 ni ohinatthi ophiya mwaakha 64, murummwa Pedru aahaalepela “anamurwa oPonto ni oGalasia ni oKapadosia ni wAsia ni oBitinia”. (1 Pedru 1:1) Anna awo yaakhuma mapuro oovirikana. Nave yaanixanka “n’uhawa” waaphwanya aahiiso olupatthiwa. Nave-tho yaakhala okathi woovelaveliha. Tivonto, awo yaaniphavela olipihiwa ni olakiheriwa. Pedru aalempe so: “Omala wa itthu sothene ori vakhiviru”. Nto saahala iyaakha vakhaani wira Yerusalemu opwetexiwe. Exeeni yaarowa waakhaliherya maKristau yaakhala ilapo sotheene ovilela okathi owo wooxankiha?​—1 Pedru 4:4, 7, 12.

2, 3. Xeeni Pedru aatumerenrye awe anna waakhelana? (Nwehe elatarato yoopacerya.)

² Pedru aahaatumererya maKristau ale oriki: “Mwakhelaneke vaté vanyu”. (1 Pedru 4:9) Nuulumo na eGriki noowi “owakhela aletto”, nintaphulela “waareerela murima  amalapo”. Masi Pedru aahaatumererya anna ni arokora wira yaakhelaneke ‘vaté vaya’, hata yaasuwelana aahiiso yaavara miteko hoothe. Waakhelana waarowa waakhaliherya sai?

³ Waamulipiha vanceene wataana waya. Ankhi nyuwo? Niireke munnuupuwela moota mwaahakalanle anyu okathi munna aahiiso murokora oolattunlyaweni owannyawe? Nave omulattula mutthu owannyinyu, eyo ennilipiha wataana wanyu, kiira? Owaakhela anna ni arokora onninikhaliherya waasuwela saana. MaKristau yaakhala okathi wa Pedru, yahaana wataana, vanceenexa okathi mixankiho saatepa aya. Nto “okathi [ola] wokiserya”, nihaana opaka etthu emosaru.​—2 Timótheyo 3:1.

4. Makoho xeeni anrowa ahu othokorerya mwaha ola?

⁴ Mwa inamuna xeeni ninrowa ahu waakhelana ‘vaté vahu’? Exeeni eniwerya onooceeliha owaakhela aletto? Ninrowa owerya sai osyaka eyo? Exeeni enrowa onikhaliherya okhala muletto ooloka?

5. Ninrowa wooniherya sai owaakhela aletto okathi wa mithukumano?

⁵ Mmithukumanoni: Yehova ni mutthenkeso awe onnintumererya wira nithukumaneke. Nto nimphavela wira khula mutthu onirweela mithukumano sahu ooneke wira onnaakheliwa saana, otepexa wene ale anampacerya. (aRoma 15:7) Nave awo aletto a Yehova, tivonto nihaana owaakhela saana, nihiwehaka makhalelo aya aahiiso mawarelo aya. (Yakobo 2:1-4) Mwamoona mutthu onnixukurya ori ene mekhawe, pooti omulattula wira okilaathi ni nyuwo? Owo onooxukhurela omukhaliherya wanyu ophwanya soolepa okathi wa mithukumano. Ela enamuna emosa yootepexa oloka ya “owakhela orattene aletto”.—aRoma 12:13.

6. Tani anireerela ahu owaakhela vanceenexa?

⁶ Olya hoothe: Ikwaha sinceene, arumeyi a khalai yaanooniherya owaakhela aletto, yaalattulaka akina vatthokoni vaya wira yalye hoothe. Nto eyo yooniherya wira yaaniphavela murettele ni opatthani. (Maphattuwelo 18:1-8; Makhulupale 13:15; Luka 24:28-30) Tani anireerela ahu owaakhela vanceenexa? Ahaana okhala anna ni arokora a mmulokoni. Vaavo olumwenku ola onitepa aya otakhala, nihaana olipana anna ni arokora, ni okhala apatthani ihu oororomeleya. Mwaakha wa 2011, Nikhuuru Noolamulela naahipaka marukunuxo wira emusi ya oBetheli ya wEstados Unidos epakeke yoosoma ya Owehaweha 18:15h ohiya 18:45h. Nthowa naya? Yaaphavela wira mabethelita aweryeke waakhelana, maana muthukumano owo waarowa omalaka vahinatthi otepa wiila. Ifiliyaali sikina sooturuka okathi wa yoosoma ya Owehaweha. Marukunuxo awo, aakhaliherya emusi ya oBetheli osuwelana saana.

7, 8. Ninrowa wooniherya sai owaakhela anna anrwa olavula myaha muloko ahu?

⁷ Ikwaha sikina anna a miloko sikina, axitokweene a esirkwiitu aahiiso ale anirummwa ni Efiliyaali, annirwa olavula mwaha muloko ahu. Niireke munoowerya ottottela mureerelo okathi owo wira nwaakhele anna awo? (Mmusome 3 Yohani 5-8.) Enamuna emosa ekhanle ahu opaka eyo, ori waalattula owannyihu wira nalye hoothe.

 ⁸ Murokora mmosa a wEstados Unidos, ohimmye so: “Okhuma khalai, miyo ni iyaka onisivela owaakhela owannyihu alipa-oolavula myaha ni axaaraya”. Murokora ole ohoona wira, khula okathi aavaanela awe ni anna awo waamini wawe waanilipa ni aanihakalala vanceene. Owo onihimya wira: “Hiyo khannithanana”.

9, 10. (a) Tani khino akhanle ahu owaakhela vate vahu mookathi munceene? (b) Niireke muhaana okhalana empa yuulupale wira mwaavahe opuro aletto? Nvahe ntakiheryo.

⁹ Aletto aniviriha okathi munceene: Khalai, yaari yoolema waavaha aletto akina opuro woorupa. (Yobi 31:32; Filémoni 22) Olelo-va, vannitthuneya opaka etthu emosaru. Ikwaha sinceene, mutokweene a esirkwiitu onniphavela opuro woomaka okathi onixukurya awe muloko. Nave-tho, eyo ennaahela muhina anna anrowa ixikola sa Muluku ni ale anikhaliherya muteko wooteka. Ankhi ale anipweteiwa empa aya okathi wa ehasara? Awo anniphavela ovahiwa opuro woomaka mpakha otekiwa-tho empa aya. Nihuupuweleke wira ale arina empa yuulupale tanireerela paahi owaakhela atthu awo. Woonasa wene, awo ahaakhaliherya atthu anceene okhuma khalai. Niireke munoowerya owaakhela atthu hata empa anyu eri ene yaamukhaani?

¹⁰ Munna a oCoreia do Sul, onnuupuwela okathi anna yaarwenle ixikola sa Muluku yaamanke aya owannyawe. Owo olempe wira: “Wanipacerya kaanoovelela owaakhela, maana kaathenle niinaano, ni empa ahu yaari yaamukhaani. Masi owaakhela anaxikola ale woonihakalaliha vanceene. Hata kaathenle niinaano, naahoona moota anamathelana akhanle aya oohakalala vaavo animurumeela aya Yehova ni okhalana soolukama somunepani”.

11. Xeeni anna anamphiyaru muloko anyu anitthuneya aya waakheliwa?

¹¹ Anna ni arokora a niinaano a mmulokoni: Anna ni arokora aahiiso imusi pooti othaamela muloko anyu. Awo pooti wira arwenle okhaliherya muloko anyu. Nave pooti okhala mapioneero athanleliwe muloko anyu. Eyo pooti waaxankiha, maana ahaana olimalela muttetthe musya, muloko musya, ni woonasa wene nttaava ni soolema isya. Niireke munoowerya waalattula wira mulye hoothe aahiiso otthekula? Opaka eyo enimwaakhaliherya okhalana apatthani asya ni olimalela makhalelo masya.

12. Yowiiraneya xeeni enooniherya wira owaakhela aletto khontaphulela olokiherya itthu sinceene?

¹² Owaakhela aletto khontaphulela olokiherya itthu sinceene. (Mmusome Luka 10:41, 42.) Munna mmosa ni mwaarawe, onnuupuwela etthu yaakhumelenle okathi aapacenrye awe omisionaario. Owo onihimya so: “Naari amiravo, khinaasuwela itthu sinceene ni naaninkheliwa owaani. Ohiyu omosa mwaaraka aahinkheliwa vanceene owaani, nto nkaawenrye omukhaliherya hata kiimananinhe. Nto, ohiyu yoole ookhala mutthu aamanne mukhora  ahu. Owo aari naxikola a Biibiliya aarwiiye onivaha irarance tthaaru. Aarwenle onaakhela okhala wira naari mamisionaario masya. Naahirowa vasaala khunvaha maasi. Nuumala-vo, naahinvaha exa ni xokolati ooviha. Hiyo khinaasuwela eSwahili nave yena khaasuwela Enkelexi”. Munna ola ohimmye wira yowiiraneya ele yoomukhaliherya yena ni mwaarawe woona otthuneya waya waapaka apatthani a muttetthe ori aya ni ophwanya ohakalala.

13. Owaakhela aletto onrowa wookhaliherya sai?

¹³ Niireke mootoko woovelela owaakhela aletto? Akhala wira ti siiso, eyo pooti owiirihani oyeleela ohakalala ni waapaka apatthani mwaarowa anyu okhalana mahiku otheene. Owaakhela aletto enamuna emosa ennikhaliherya osyaka omeekha. Nto, exeeni yaarowa omwiiriha mutthu woovelela owaakhela aletto? Nrowe nthokorerye mathowa vakhaani.

14. Nihaana opaka exeeni wira nikhalane okathi ni ikuru wira niwaakhele aletto?

¹⁴ Okathi ni ikuru: Arumeyi a Yehova toowaatteliwa miteko ni khareerane miritti. Nto akina pooti woonaka wira kharina okathi wala ikuru wira awaakhele aletto. Akhala wira munuupuwela siiso, muhaana oturuka eprograma anyu wira nwerye owaakhela aletto. Eyo ti yootthuneya okhala wira Biibiliya onnitumererya owaakhela aletto. (aHéberi 13:2) Nto, owaakhela aletto, etthu yooloka. Masi wira mpake eyo, muhaana osyaka oviriha okathi munceene nvaraka itthu soohitepa otthuneya.

15. Exeeni eniwiiriha akina woona wira khaniwerya owaakhela aletto?

¹⁵ Moota muniithokorerya anyu: Niireke mootoko ophavela owaakhela aletto moona wira khamunwerya? Waaniheryasa nyuwo muupuwelaka wira aletto anyu khanrowa osiveliwa. Woonasa wene, khamurina musurukhu munceene ni munnixanka muupuwelaka wira khamunrowa waavaha aletto anyu etthu anna akina anwerya aya waavaha. Masi muupuweleke wira khivanitthuneya okhala namuhakhu wira nwaakhele aletto. Aletto anyu anoohakalala akhala wira empa anyu ti yooratteleya, yootthokiheya ni mwa mutthu oohakalala.

16, 17. Exeeni munrowa anyu opaka akhala wira munnixanka mwaha wa owaakhela aletto?

¹⁶ Akhala wira munnoovelela owaakhela aletto, muhixanke maana khamukhanle mekhinyu. Mutokweene omosa a wInglaterra onihimya so: “Mutthu pooti oxanka vaavo oniilokiherya awe wira owaakhele aletto. Masi ntoko miteko sikina nimpaka ahu wira nimurumeele Yehova, ninniphwanya mireerelo ni ohakalala, nto ohakalala iwo onnivikana oxanka wahu. Okisivela okilaathi ni aletto kiwuryaka ekafe ni kivanelanaka”. Okathi wotheene ti vootthuneya waathokorerya saana aletto. (aFilipi 2:4) Atthu anceene waasivela ohimya sookumanana saya. Nto okathi ninkhala ahu vamosa ninniwerya owiriyana sookumanana iyo. Mutokweene mukina olempe wira: “Waalattula apatthani a mmulokoni owannyaka, onnikikhaliherya waasuwela saana, ni osuwela moota anna awo yiixuntte aya ekeekhai”. Vaavo munaathokorerya anyu saana aletto, awo anoohakalalaka vanceene.

 ¹⁷ Murokora mmosa pioneera, yoowo onimakela owaakhela anna anrowa ixikola sa Muluku, onihimya wira: “Wanipacerya kaanixanka okhala wira empa aka kherina mireerelo sinceene ni iferemento saka ti soorumeeliwa maana kiroovahiwa ni atthu akina. Mwaarawe munna mmosa onisomiha ixikola iyo, ookikhaliherya vanceene. Owo aahimmye wira, okathi anixukurya aya miloko, annisiveliwa okhala vamosa ni anna oolipa momunepani, yaawo ahirina mireerelo sinceene masi anisiveliwa omurumeela Yehova ni okhweiherya okumi aya. Eyo yaahikuupuxerya ele maama aka aamakela awe onileela nri ene anamwane wira: ‘Erayi olya ntikwa n’opatthani’”. (Miruku 15:17) Tivonto, muhixanke, okhala wira etthu yootepa otthuneya waaphenta aletto.

18, 19. Moota xeeni owaakhela aletto onnikhaliherya aya oxintta muupuwelo woohiloka voohimya sa akina?

¹⁸ Moota muniwoonela anyu atthu akina: Niireke ookhala mutthu a mmulokoni mwanyu ohinoosivelani? Akhala wira nyuwo khamunimananiha oxintta moonelo owo woohiloka, musuweleke wira moonelo anyu owo khonrowa oturukeya. Eyo pooti owiirihani ohimulattula mutthu owo orina mukhalelo ohinoosivelani. Nave woonasa wene ookhala mutthu otonko woonyoonyihani, nto muhinawerya oliyala.

¹⁹ Biibiliya onihimya wira owaakhela aletto onnikhaliherya wataana ni atthu akina, hata ari ene awanani anyu. (Musome Miruku 25:21, 22.) Akhala wira munoomulattula mutthu owannyu, eyo pooti  wookhaliheryani oxintta muupuwelo woohiloka, okhalana murettele ni wataana ni yena. Nave enimookhaliheryani woona mikhalelo sooloka sirina awe, seiyo Yehova oonale awe okathi aamuthanlale awe wira iixutte ekeekhai. (Yohani 6:44) Vaavo ophenta oniwiirihayani omulattula mutthu ahaalipelela, eyo enimookhaliheryani wataana ni yena. Nto munrowa wooniherya sai niphento okathi onimulattula anyu? Enamuna emosa ovarihela muteko miruku siri aFilipi 2:3, seiyo sini: “Mwiyeviheke, khula mutthu awonelaka vatthu akhw’awe vowivikana mmansawe”. Nihaana wuupuwela inamuna anna ni arokora ari aya aalupale onivikana hiyo. Woonasa wene, hiyo pooti wiixutta ni waamini waya, ovilela aahiiso mikhalelo saya sooloka sa eKristau. Nto wuupuwela mikhalelo saya sooloka, onoonikhaliherya olipiha waaphenta wahu ni owaakhela saana.

20. Nthowa xeeni ni moota xeeni ninrowa ahu wooniherya okhala atthu oororomeleya naakhulela nlattulo?

²⁰ Nasaalimo Davidi aakonhe so: “Apwiya! Ophwanenle tani okhala mpani mwanyu?” (Esalimo 15:1) Nuumala-vo, Davidi aahilavula mikhalelo anitthuneya aya okhalana aletto a Yehova. Mukhalelo mmosa ti ororomeleya. Tivonto aahimmye awe wira: “Ohinihiya, hatá ahawaka, itthu salaphenlyawe”. (Esalimo 15:4) Akhala wira niheemererya nlattulo, nihinteeryeke nihikhanle nthowa nuulupale. Okhala wira ole onlattunle ohiilokiherya wira onaakhele, nto nihaana ovaha efaita wiimananiha wawe. (Matheyo 5:37) Atthu akina annikhootta nlattulo nimosa, nto aneemererya nikina anoona aya wira ti nootepa oreera. Niireke nlo niphento ni nttittimiho? Nihaana oxukhurela ele enivahiwa ahu ni ale anlattunle. (Luka 10:7) Nto, akhala wira nimphavela wunteerya, nihaana wooniherya ophenta naaleelaka vahinatthi ale anlattunle.

21. Moota xeeni ottittimiha soolema sa muttetthe owo, onnikhaliha aya aletto ooloka?

²¹ Nave-tho, ti vootthuneya ottittimiha soolema sa muttetthe owo. Ilapo sikina, annaakheliwa aletto oohileeha. Masi mittetthe sikina, ti vooloka oleiha. Mapuro makina, aletto annaakheliwa saana avahiwaka yoolya yoolokexa, waavikana ale a vatthokoni-vo. Masi ilapo sikina, aletto annithokoreriwa mwa enamuna emosaru. Mittetthe sikina, aletto anniruuha etthu wira akhaliherye. Ilapo sikina, ale anlattula khaniphavela wira aletto aruuheke etthu. Mapuro makina, mwa nttittimiho aletto annikhootta nlattulo noopacerya aahiiso na nenli. Masi mapuro makina, khahiyo nttittimiho oheemererya nlattulo noopacerya. Okathi wotheene, nihaana opaka ele eniwerya ahu wira nimuhakalalihe ole onlattunle.

22. Xeeni siri aya sootthuneya miruku sini: “Mwakhelaneke vaté vanyu”?

²² Pedru ohimmye wira: “Omala wa itthu sothene ori vakhiviru”. (1 Pedru 4:7) Olelo-va, annitepa waattamela maxakha maalupalexa ahitonko wiiraneya. Vaavo olumwenku ola ontepa aya otakhala, nihaana otepa olipiha waaphenta wahu anna ni arokora. Tthiri, miruku sa Pedru sini: “Mwakhelaneke vaté vanyu”, sinnivareleya muteko olelo-va ovikana khalai. (1 Pedru 4:9) Tivonto, olelo-va, nihaana waakhelana vate vahu moohakalala. Nave muhoolo ninrowa-tho waakhelanaka.