1. Ninrowa waaphwanya sai ankhili, ni anrowa oniphwanyiha mireerelo xeeni?

YEHOVA tori mwaneene ankhili ni onnaavaha otheene yaale aninvekela. Yakobo 1:5, onihimya so: “Akhalá mwa nyuwo ohirina ankhili, anvekele Muluku: onovahiwa, okhala wira Muluku onnavaha atthu othene ni murimène, ahùlumelaka”. Enamuna emosa ya okhalana ankhili a Muluku ti weemererya olakiwa ni yena. Opaka eyo onninaakiherya opaka itthu soohiloka ni onoonikhaliherya ovikaniha okhala mpatthani a Yehova. (Miruku 2:10-12) Nave nnookhalana eparakha ya ophwanya okumi woohimala.​—Yuda 21.

2. Ninrowa weemererya sai ophenta yoolaka ya Muluku?

² Mwaha wa ohimalela aahiiso ihuweliwo sahu, ikwaha sikina vannivila weemererya olakiwa wala woona okhala etthu yooloka. Masi vaavo ninweha ahu mireerelo nimphwanya ahu mwaha wa olakiheriwa ni Muluku, ninnoona tthiri wira owo onniniphenta. Miruku 3:11, 12 onihimya so: “Mwan’aka, muhikhotté ottaruxiwa n’Apwiya”. Onincererya oriki: “Tthiri Apwiya annapwapwela anaphentaya”. Nikupaliki wira Yehova oniphavela mureerelo ahu. (Mmusome aHéberi 12:5-11.) Okhala wira  Muluku onninisuwela saana, nto okathi wotheene ninnitthuneya olakiwa nuuwo. Mwaha ola, ninrowa othokorerya mithinto mixexe sa olakiwa: (1) wiilaka, (2) yoolaka anamuyari anaavaha aya anaaya, (3) yoolaka ninvahiwa ahu mmulokoni, ni (4) mixankiho sinikhumelela mwaha wookhootta ovahiwa miruku.

3. Anamwane aniwerya sai wiittaruxa? Nvahe ntakiheryo.

³ Akhala wira ninniilaka, nnoowerya okhapelela muupuwelo ahu. Hiyo khaniyariwe ni mukhalelo wa wiilaka, nto nniixutta othana-thanaru. Mwa ntakiheryo, vaavo mwaana oniixutta awe omweettiha moskaleeta ikwaha sinceene namuyari mmosa onninvarela moskaleta owo wira ohimore. Masi nuuvira okathi, mwaana owo onnipacerya wiixutta omweettiha moskaleeta ohimonre, nave anamuyari annimuhiya moskaleeta ole vakhaani-vakhaani. Okathi anamuyari aniweha aya wira tthiri mwaana ole onniwerya omweettiha ohimonre, awo annimuhiya omweettihaka mekhawe. Moolikanasa, vaavo anamuyari moopixa murima aniwiixuttiha aya anaaya, ‘ewettihaka ni yalakaka n’ikano s’Apwiya’ Yehova, awo annaakhaliherya anaaya wunnuwa ni okhala atthu oowiilaka ni a miruku.—aÉfeso 6:4.

4, 5. (a) Xeeni mutthu onitthuneya awe wiilaka vaavo oniwara awe ‘omutthu wa nanano’? (b) Xeeni nihintthuneya ahu otthikela ottuli hata okathi ninvonya ahu?

⁴ Etthu emosaru enniiraneya ni atthu animusuwela Yehova yinnunwe ene. Nnaamwi awo eweryaka wiittaruxa vakhaani, nlelo khalimpe omunepani. Masi okathi awo aniwara aya ‘omutthu wa nanano’ ni omananiha omutakiha Kristu, awo annilipa omunepani. (aÉfeso 4:23, 24) Wiittaruxa onninikhaliherya wiixutta “okhotta makhalelo ahu òtakhala n’uhiya itthu sintthunexiwa vathí-va, wira mahiku othene netteke ni wisumaliha n’ixariya n’umuttittimiha Muluku”.​—Tito 2:12.

⁵ Hata vari siiso, otheene ahu ninnivonya. (Musuweli 7:20) Nto akhala wira noopaka etampi, niireke eyo entaphulela wira khaninwerya wiilaka? Nnaari. Miruku 24:16, oniihimya so: “Tthiri naxariya, amorá imara thanu na pili, onnivenya”. Exeeni enrowa onikhaliherya otthikela ‘ovenya’? Khahiyo ikuru sahu, masi munepa wootteela wa Muluku. (Mmusome Yesaya 12:2.) Sowiima sa munepa sinihela muhina wiihiiha, weiwo onlikana ni wiilaka.

6. Exeeni enrowa onikhaliherya osiveliwaka osoma Nuulumo na Muluku? (Nwehe elatarato yoopacerya.)

⁶ Nave ovekela, omusoma Biibiliya, ni wuupuwelela onoonikhaliherya okhala atthu oowiittaruxa. Masi exeeni mukhanle anyu oopaka akhala wira khonoosivelani omusoma Biibiliya? Muhikhulumuwe. Mwanvekela Yehova nikhaliheryo, owo onimookhaliheryani. (1 Pedru 2:2) Munvekeleke Yehova wira ookhaliheryeni wiilaka mmansinyu wira mukhalaneke okathi woomusoma Biibiliya. Waaniheryasa nyuwo pooti opacerya mmusomaka minutu vakhaani paahi. Vakhaani-vakhaani, vanimookhweelakani ni munoosiveliwaka osoma. Vanimoosivelakani okhala opuro woomaaleleya ni wuupuwelela saana Nuulumo na Yehova.​—1 Timótheyo 4:15.

7. Moota xeeni wiilaka onnikhaliherya aya ophwanya soolukama sahu mmutekoni mwa Yehova?

⁷ Wiittaruxa onninikhaliherya ophwanya soolukama sahu mmutekoni mwa Yehova. Mwa ntakiheryo, okathi tiithi mmosa aawenhe awe wira oluttuweliwa wawe waanivukuwa, aahilakela okhala pioneero ookilaatheya. Moota xeeni wiilaka waamukhalihenrye aya?  Owo aanisoma myaha murevistani mwahu saalavula sa opioneero ni aaninvekela Muluku olavulaka mwaha owo. Opaka eyo woolipiha waataana wawe ni Yehova. Owo nave aanirumeela ntoko pioneero ookhaliherya okathi mukina. Owo aahiimananiha vanceene wira ehikhale etthu yaarowa omooceeliha waakhwaniherya soolukama sawe. Nuuvira okathi aahikhala pioneero ookilaatheya.

8-10. Exeeni ekhanle oowaakhaliherya anamuyari waahuwa anaaya wira emurumeeleke Yehova? Nvahe ntakiheryo.

⁸ Yehova ohaavaha anamuyari muritti wa waahuwa anaaya ‘awettihaka ni yalakaka ni ikano s’Apwiya’ Yehova. (aÉfeso 6:4) Eyo etthu yooxankiha olumwenku ola. (2 Timótheyo 3:1-5) Okathi anamwane aniyariwa aya, awo khanisuwela othanla itthu sooloka wala soohiloka, nave yowuupuxerya aya ya murima nlelo khiyiixuttihiwe. Nto awo annitthuneya olakiheriwa wira epakeke itthu sooreera. (aRoma 2:14, 15) Musomi mmosa onitokosa myaha sa mBiibiliyani ohimmye wira nuulumo na eGriki noowi “olaka” nave pooti otaphulela “munnuwelo wa mwaana”, wala omuhuwa mwaana wira okhaleke mutthu a miruku nuumala wunnuwa.

⁹ Okathi anamuyari anaalaka aya anaaya moophenta, awo annilipiheya vanceene. Anamwane anniixutta wira otaphuwa waya  wookhalana mikano, nave eyo ennaakhaliherya oweha wira khula etthu anipaka aya mookumi yookhalana sookumiherya saya. Nto ti vootthuneya vanceene anamuyari maKristau ororomela miruku sa Yehova wira saakhaliherye waahuwa anaaya. Miyuupuwelo sa moota wowaahuwa anamwane sinnivirikana moovarihana ni khula elapo, nave vaavo onivira aya okathi miyuupuwelo iyo sinniturukeya. Masi anamuyari aninwiriyana Muluku khanixankiheya ni etthu yoopaka wala khaniroromela osuwela ni miyuupuwelo sa apinaatamu.

¹⁰ Hiyo nnoowerya wiixutta ni ntakiheryo na Nowe. Okathi Yehova aamurumme awe oteka ekalawa, Nowe khaasuwela moota wooteka. Owo aahimuroromela Yehova, nto ninnisoma mBiibiliyani wira ‘Nowé ahira sothene’ aarummwale awe ni Yehova. (Maphattuwelo 6:22) Exeeni yaakhumelenle? Ekalawa ele yaahoopola ekumi ya Nowe ni emusi awe! Nowe nave aari namuyari ookhumela saana. Nthowa naya? Mwaha woowi aahiroromela miruku sa Muluku. Nowe aahiwiixuttiha saana anaawe ni aanaavaha ntakiheryo nooloka, nnaamwi eyo yaahaari etthu yookhweya okathi ole ehinatthi orwa epula ya Mutaaseke.​—Maphattuwelo 6:5.

11. Xeeni anamuyari anitthuneya aya wiimananiha vanceene owiiniha nikuruta anaaya?

¹¹ Akhala wira nyuwo mwa namuyari, nave munrowa opaka sai ‘sothene’? Munwiriyaneke Yehova. Mmweemererye owo wookhaliheryani waahuwa aniinyu. Murumeeleke malakiheryo a Nuulumo nawe vamosa ni mutthenkeso awe. Muhoolo, aniinyu waaniheryasa animooxukhurelani vanceene mwaha woopaka eyo! Munna mmosa olempe so: “Kinnaaxukhurela vanceene anamuyari aka enamuna akihunwe aya. Awo ahiimananiha vanceene ovara murima aka”. Owo ohimmye wira anamuyari awe taamukhalihenrye omwaattamela Yehova. Nto ikwaha sikina hata anamuyari yiimananihaka vanceene omwiixuttiha mwanaya, muhoolo owo pooti omuhiya Yehova. Masi namuyari iimananinhe vanceene mpakha vanwerya awe, onnikhalana yowuupuxerya ya murima yooloka ni onnilipelela wira muhoolo mwanawe onoomutthikela Yehova.

12, 13. (a) Akhala wira mwanaya onookumihiwa mmulokoni, anamuyari anrowa wooniherya sai wira annimwiiwelela Muluku? (b) Moota xeeni emusi emosa ephwannya aya mureerelo mwaha wa anamuyari omwiiwelela Yehova?

¹² Aanamuyari akina etthu emosa enaaxankiha ori ovikaniha omwiiwelela Yehova nuumala mwanaya okumihiwa mmulokoni. Murokora mmosa yoowo mwanawe mwaamuthiyana aakumihiwe mmulokoni onihimya so: “Kanaavya mathowa muliivuruni mwahu yaarowa okeemererya oviriha okathi ni mwanaka ni musulu aka mwaamuthiyana”. Masi moophenta iyawe murokora ole aahimukhaliherya oweha wira vano mwaana ole eettela murima awe ni wira awosa yaahaana okhala oororomeleya wa Yehova.

¹³ Nuuvira okathi, mwaana ole aahittikiheriwa mmulokoni. Maama awe onihimya so: “Mwanaka onnikilikarela ni onnikilepela mensage mahiku otheene! Vano onninttittimiha vanceene miyo ni apapawe mwaha woosuwela wira ninnimwiiwelela Muluku. Vano ninniiwanana vanceene mweemusini mwahu”. Nto akhala wira mwaninyu onookumihiwa mmulokoni, niireke munoomuroromela Yehova ni “murim’anyu wothene”? Munoomooniherya Yehova wira khamunroromela ‘osuwela wanyu’? (Miruku 3:5, 6) Muhiliyale wira ottaruxa wa Yehova onooniherya  ankhili awe ni oniphenta wawe. Muupuweleke wira owo onvaha Mwanawe wira owoopole atthu otheene, omuhela muhina mwaninyu. Muluku oniphavela wira atthu otheene ephwanye ekumi yoohimala. (Mmusome 2 Pedru 3:9.) Nto anamuyari, nvikanihe ororomela wira okhala-wene ottaruxa wa Yehova ni malakiheryo awe tooloka, hata okathi mukina owereyaka wiiwelela. Nwiriyaneke yoolaka ya Muluku ni muhikhootteke wiiwelela.

14. Ninttottela sai mureerelo malakiheryo ninvahiwa ahu ni “murumeyi òroromeleya”?

¹⁴ Yehova ooleiherya okhaliherya, okhapelela ni wiixuttiha muloko wa eKristau. Owo onnipaka eyo mwa inamuna sinceene. Mwa ntakiheryo, owo oomuthanla Mwanawe wira okhapeleleke muloko, nave Yesu oomuthanla “murumeyi òroromeleya” wira okumiheryeke eyoolya ya omunepani yeeyo ennikhaliherya okhala oororomeleya. (Luka 12:42) “Murumeyi” owo onninivaha malakiheryo ootthuneya wala yoolaka. Waaniheryasa munnuupuwela okathi mwaawiriyanne anyu wala osoma mwaha murevistani mwahu wookhalihenryeni olokiherya muupuwelo ni mweettelo anyu. Tthiri mootteeliwa murima mwaha woopaka marukunuxo awo maana eyo enitaphulela wira munneemya olakiwa ni Yehova.​—Miruku 2:1-5.

15, 16. (a) Ninrowa ottottela sai mureerelo muteko wa axitokweene? (b) Ninrowa okhweiherya sai muteko wa axitokweene?

¹⁵ Nave Kristu ohaathanla axitokweene wira ekhapeleleke muloko. Biibiliya onnaahimya anna awo okhala “sovaha”. (aÉfeso 4:8, 11-13) Ninrowa ottottela sai mureerelo muteko wa axitokweene? Hiyo pooti otakiha waamini waya ni ntakiheryo naya nooloka, ni otthara miruku sa mBiibiliyani annivaha aya. (Mmusome aHéberi 13:7, 17.) Axitokweene anniniphenta ni aniphavela wira nimwaattameleke Muluku. Vaavo aniweha aya wira ninnicompela mithukumano wala oluttuweliwa wahu onnivukuwa, moohipisa awo anoomananiha onikhaliherya. Awo anooniwiriyana ni onilipiha ni miruku soovareleya muteko sa mBiibiliyani. Niireke munnoona nikhaliheryo naya ntoko etthu enookupalihani wira Yehova onnoophentani?

¹⁶ Muupuweleke wira khahiyo etthu yookhweya axitokweene onivaha malakiheryo. Munoonela sai, niireke vaari wookhweya profeta Natani olavula ni Mwene Davidi nuumala mwene owo omananiha ovitha itampi suulupale aapanke awe? (2 Samuweli 12:1-14) Murummwa Paulo oonenle sai okathi awenhe awe wira vaanitthuneya onvaha miruku Pedru, yoowo aari mmosa a arummwa 12, mwaha wowaathokorerya saana maKristau aYuda ni waathanya amalapo? Paulo aahaana olipa murima wira opake eyo. (aGalasia 2:11-14) Nto munrowa waakhweiherya sai axitokweene okathi anoovahayani malakiheryo? Mwiiyeviheke, muxukhureleke, ni mukhaleke okhweya olavulaniwa. Muthokoreryeke nikhaliheryo naya ntoko ophenta wa Muluku. Munoophwanya mareeliho, nave axitokweene anoohakalalaka okathi anivara aya muteko aya.

17. Axitokweene yaamukhalihenrye sai murokora mmosa?

¹⁷ Murokora mmosa onihimya wira itthu saamukhumelenle khalai saahimwiiriha woona okhala woovila omphenta Yehova, ni aahiriipiwa murima vanceene. Owo onihimya so: “Kaahoona wira kaahaana olavula ni axitokweene. Awo khiyaakinyemenle, masi yaahikilipiha.  Wanikisa wa khula muthukumano, hata okathi awo anaatteliwa aya miteko, mutokweene mmosa onnikikoha ihaali wira osuwela akhala wira ka mukumi. Mwaha wa mweettelo aka wa khalai, vannikivila okupalixa wira Muluku onnikiphenta. Hata vari siiso, khula okathi Yehova onnaarumeela anna a mmulokoni ni axitokweene wira okooniherye okiphenta wawe. Kinlompa wira kihimuhiye-tho Yehova”.

18, 19. Mixankiho xeeni sinikhumelela mwaha wookhootta ovahiwa miruku? Nvahe ntakiheryo.

¹⁸ Tthiri ottaruxiwa pooti okhala voowereya, masi eyo eniiraneya mwaha woohiiwelela malakiheryo a Muluku. (aHéberi 12:11) Hiyo pooti wiixutta ni matakiheryo oohiloka a Kayini ni Mwene Zedekiya. Okathi Muluku awenhe awe wira Kayini aanimunyokha muhima awe ni aaphavela omwiiva, Muluku aahimulopola Kayini ohimyaka so: “Exeni enanareliwanyu? Owitho wanyu orwelenle-ni mannyari? Mwiraru sorera, ekhove anyu enimokokolani. Mwahiré sorera, etampi enowipithelani, ephavelaka wovarani. Nto nyuwo munniwerya oxintta?” (Maphattuwelo 4:6, 7) Kayini aahikhootta ottaruxiwa ni Yehova, aahimwiiva munnawe, ni aahiphwanya maxakha okumi awe wotheene. (Maphattuwelo 4:11, 12) Vaakhanle wira Kayini aahimwiiwelela Muluku, khaarowa ophwanya maxakha.

¹⁹ Zedekiya aari mwene oolosowa ni ootakhala. Okathi aalamulela awe, atthu a oYerusalemu makhalelo aya khiyaalonke. Profeta Yeremiya aahimulopola Zedekiya ikwaha sinceene wira aahaana orukunuxa mweettelo awe. Masi mwene Zedekiya aanikhootta olakiheriwa ni Yehova, ni eyo yaahimukumiherya mixankiho sinceene. (Yeremiya 52:8-11) Yehova khoniphavela wira hiyo nihaaweke vahitthuneleyaka!​—Mmusome Yesaya 48:17, 18.

20. Exeeni enrowa waakhumelela ale aneemya olakiheriwa ni Muluku ni ale anikhootta?

²⁰ Olelo-va, atthu anceene khanittittimiha malakiheryo a Muluku ni annithanya. Masi moohipisa, khula mutthu onithanya malakiheryo a Muluku onoophwanya maxakha. (Miruku 1:24-31) Nto nrowe niimananihe ‘owiriyana miruku wira naaphwanye ankhili’. Sintoko onihimya awe Miruku 4:13, “muhihiyé mukhalelo worera walakiwanyu: mwilipiherye wettela okhala wira t’ikumi anyu”.