1, 2. (a) Anamuyari akina anoonela sai okathi anaaya aniphavela aya obatiziwa? (b) Xeeni atthu aniphavela obatiziwa anikohiwa aya akhala wira ahiivahererya wa Yehova? (Nwehe elatarato yoopacerya.)

NKUUPUWELANI ELA: Anamuyari awe mwaaruusi mmosa oniitthaniwa Maria, anninwehexexa vaavo oneemela awe ni atthu akina aniphavela obatiziwa. Mulipa-oolavula mwaha onnaakoha makoho manli. Maria onnaakhula moowiiwanyeya. Nuumala-vo, onnibatiziwa.

² Anamuyari awe Maria yaahitteeliwa murima vanceene maana mwanaya aahiivahererya wa Yehova ni aahibatiziwa. Masi nihinatthi ophiya nihiku nle, maama awe Maria aahixanka vakhaani. Aaniikoha so: ‘Kiireke Maria khotempe oyeva wira obatiziwe? Kiireke onnisuwela wira wivahererya wa Yehova etthu enireerela wuupuweleliwa saana? Kiireke khivaareerela olipelela vakhaani?’ Anamuyari anceene annipaka makoho sintoko ala okathi anaaya anaaleela aya wira aniphavela  obatiziwa. (Musuweli 5:4) Mwekeekhai, wiivahererya wa Yehova ni obatiziwa, teri yoothanla yootepa otthuneya mutthu okhanle awe oopaka.​—Nwehe ekaaxa eni: “ Niireke Muhiivahererya wa Yehova?”

3, 4. (a) Moota xeeni murummwa Pedru onniixuttiha awe wira obatiziwa etthu yootthuneya vanceene? (b)  Xeeni Pedru aalikanyihenrye awe obatizo ni oteka ekalawa okathi wa Nowe?

³ Murummwa Pedru aahilikanyiha obatizo ni oteka ekalawa ya Nowe. Owo aahimmye wira ‘obatizo ti weiwo vano oniwòpolani’. (Mmusome 1 Pedru 3:20, 21.) Oteka ekalawa yaari yowooniherya yoowi Nowe aanipaka yootthuna ya Yehova ni murima awe wotheene. Nowe aahivara muteko opakaka itthu Yehova aamurummye awe. Mwaha wa waamini wa Nowe, Yehova aahimoopola yena ni emusi awe okathi wa epula ya Mutaaseke. Exeeni Pedru aaphavela awe oniixuttiha?

⁴ Okathi atthu yaaweha aya ekalawa ya Nowe, yaanisuwela wira Nowe aanimwaamini Muluku. Nave okathi atthu aninweha aya mutthu obatiziwaka, awo annisuwela wira mutthu owo ohiivahererya wa Muluku mwaha woowi onnimwaamini Kristu. Moolikanasa ni Nowe, ale anibatiziwa, annimwiiwelela Muluku ni annipaka itthu owo onaaruma awe. Sintoko Yehova aamooponle awe Nowe okathi wa epula yuulupale, owo onoowoopola arumeyi awe oobatiziwa nihiku onirowa awe opwetexa olumwenku ola wootakhala. (Marko 13:10; Wisupulula 7:9, 10) Tthiri ti vootthuneya wiivahererya wa Yehova ni obatiziwa. Akhala wira mutthu onnilakela opisa obatiziwa, owo pooti opweteiwa eparakha ya okhalana okumi woohimala.

5. Exeeni ninrowa ahu wiixutta mwaha ola?

 ⁵ Okhala wira vano ninnisuwela wira obatizo etthu yuulupale, nto nihaana osuwela waakhuliwa wa makoho ala mararu: Biibiliya oniixuttiha exeeni voohimya sa obatizo? Mutthu opakeke exeeni ohinatthi obatiziwa? Xeeni nintthuneya ahu wuupuwelela efaita erina aya obatiziwa, okathi ninwiixuttiha ahu aniihu wala anaxikola ahu a Biibiliya?

6, 7. (a) Waathoonyerya exeeni obatizo wa Yohani? (b)  Xeeni obatiziwa wa Yesu waavirikanne aya ni obatiziwa wa atthu akina?

⁶ Mutthu Biibiliya onipacerya awe omuromola wira aanaabatiza atthu, aari Yohani Mbatiza. (Matheyo 3:1-6) Xeeni atthu yaamurowela aya wira aabatize? Awo yaanipaka eyo mwaha woowi yaahittharuwa itampi saya, aahiiso okupali wira yaahihiya wiiwelela nlamulo na Moise, ni yaahiriipiwa murima vanceene. Masi etthu yootthuneya okhala wira obatizo wa Yohani waahikhalana yootaphulela ekina. Yohani aahikhalana eparakha yuulupale ya ombatiza Yesu, yoowo ori mwaana oomalela a Muluku. (Matheyo 3:13-17) Yesu khaatonko opaka etampi. Owo khaatthuneya ottharuwa. (1 Pedru 2:22) Nto xeeni Yesu aaronwe awe obatiziwa? Aaphavela wooniherya wira aahivahererya ekumi awe wira opakeke yootthuna ya Muluku.​—aHéberi 10:7.

⁷ Nuumala Yesu opacerya olaleerya, awiixutti awe yaahipacerya waabatiza atthu. (Yohani 3:22; 4:1, 2) Nave atthu yaanibatiziwa mwaha woowi yaahittharuwa itampi saya yaapanke aya etthekelaka nlamulo na Moise. Masi nuumala Yesu okhwa ni ohihimuxiwa, ale aniphavela omutthara ahaana obatiziwaka mwaha wa mathowa makina.

8. (a) Etthu xeeni Yesu aarummye awe atthareli awe nuumala ohihimuwa? (b) Xeeni maKristau anitthuneya aya obatiziwa?

⁸ Nuumala Yesu oohihimuxiwa, mwaakha wa 33, moohipisa aahilavula ni atthu 500, alopwana, athiyana ni anamwane. Woonasa wene waari okathi aahimmye awe so: “Vano, murowé, mwawixuttiheke atthu a maloko othene, mwabatizaka ni nsina n’Atithi ni na Mwana n’Eroho Yowarya. Mwawixuttiheke wettela sothene sòrumalyakani”. (Matheyo 28:19, 20; 1 aKorinto 15:6) Yesu aahaaruma atthareli awe owiixuttiha atthu. Nto khula mutthu aaphavela okhala mwiixutti awe, wala okuxa “muritti” awe, ahaana obatiziwa. (Matheyo 11:29, 30) Wira mutthu omurumeeleke Muluku mwa enamuna enimusivela Muluku, mutthu owo ohaana weemererya wira Muluku onnimurumeela Yesu wira opake yootthuna awe. Nuumala-vo, mutthu owo pooti obatiziwa, aakheliwaka ni Muluku. Biibiliya onnooniherya wira atthareli a Yesu yaanisuwela efaita ya obatizo. Awo khiyuupuwenle wira yaahaana olipelela wira ebatiziwe muhoolo.​—Miteko 2:41; 9:18; 16:14, 15, 32, 33.

9, 10. Exeeni eniixutta ahu voohimya sa obatiziwa wa mulopwana a wEthiyopia ni Saulo?

⁹ Musome Miteko 8:35, 36. Nihiku nimosa, mulopwana mmosa a wEthiyopia eettela ikano sa aYuda, aatthikela owannyawe nuumala okokhorela otemplo. Nlaikha na Yehova naahimuruma Filipe omulaleerya mulopwana ole. Nto Filipe aahimwiixuttiha “Ehapari Yorera ya Yesu”. Mulopwana ole a wEthiopia oonenle sai? Owo aahoona  otthuneya waya omweemererya Yesu ntoko Pwiya ni aaniphavela opaka etthu Yehova onaavekela awe maKristau. Nto owo aahibatiziwa moohipisa.

¹⁰ Ntakiheryo nikina ti na muYuda aitthaniwa Saulo. Nnaamwi nloko notheene na aYuda naari noothanliwa ni Muluku, Yehova aahaakhootta aYuda mwaha wa ohimwiiwelela. Masi Saulo aakupali wira nloko na aYuda nlelo naanimurumeela Muluku mwa enamuna yooloka, nto owo aanaalupattha maKristau. Masi nihiku nimosa, Yesu, yoowo Saulo uupuwela awe wira nlelo aahiikhwa, aahimulavuliha Saulo ori ene wiirimu. Saulo oonenle sai? Moohakalala, Saulo aaheemya okhaliheriwa ni muKristau aitthaniwa Ananiya. Biibiliya onihimya wira Saulo “ahivenya, khubatiziwa”. (Miteko 9:17, 18; aGalasia 1:14) Muuhoolo mwaya Saulo aahisuweliwa okhala murummwa Paulo. Nwehe wira nuumala wiiwexexa wira Muluku aamurumeela Yesu wira aakhwaniherye yootthuna awe, Saulo aahibatiziwa moohipisa.​—Musome Miteko 22:12-16.

11. (a) Exeeni eniwiiriha atthu animusoma Biibiliya ophavela obatiziwa? (b) Nnoonela sai okathi mutthu onibatiziwa awe?

¹¹ Olelo-va, eyo enniwiiraneela atthu anceene animusoma Biibiliya, amiravo ni atthu oowunnuwa. Mwaha wa osiveliwa ni okupali ikeekhai sa mBiibiliyani aniixutta aya, awo anniivahererya wa Yehova ni obatiziwa. Tthiri, nihiku na asembeleya ni muthukumano wa muttetthe, vaavo onilavuliwa aya mwaha wa obatizo onikhala okathi woohakalaliha. Anamoona a Yehova annihakalala vanceene okathi ale anaasomiha aya Biibiliya aneemya aya ekeekhai ni obatiziwa. Anamuyari annihakalala vanceene okathi anaaya anipaka aya eyo. Mwaakha wa muteko wa 2017, atthu anivikana 284.000 yaahibatiziwa, yooniheryaka wira ahiivahererya wa Yehova. (Miteko 13:48) Awo yaahiweha wira tthiri vaanitthuneya obatiziwa wira mutthu okhale muKristau. Masi exeeni atthu awo yaapanke aya ehinatthi obatiziwa?

12. Exeeni anitthuneya aya opaka ale animusoma wBiibiliya ehinatthi obatiziwa?

¹² Ehinatthi obatiziwa, ale anaasomiha ahu Biibiliya ahaana wiixutta ekeekhai voohimya sa Muluku, etthu emwiirinhe opaka elapo, ni etthu opanke awe wira owoopole apinaatamu. (1 Timótheyo 2:3-6) Awo ahaana okhalana waamini, weiwo onrowa waakhaliherya wiiwelela malamulo a Yehova ni ohiya opaka itthu sinimunanara. (Miteko 3:19) Eyo etthu yootthuneya, maana Yehova khoneemererya wiivahererya wa mutthu onivikaniha oopaka itthu soohiloka. (1 aKorinto 6:9, 10) Masi sookhala-tho itthu sikina. Atthu aniphavela wiivahererya wa Yehova ahaana orowela mithukumano sa mmulokoni moohicompela, olaleerya ihapari sooreera ni owiixuttiha akina. Atthu otheene aniphavela omutthara Kristu ahaana opaka itthu iyo. (Miteko 1:8) Ale animusoma Biibiliya ahaana opacerya opaka itthu iyo sotheene. Nuumala-vo, awo pooti wiivahererya wa Yehova ni nivekelo eri ene mekhaya ni obatiziwa.

13. Okathi ninwiixuttiha ahu akina, xeeni nintthuneya ahu owuupuxerya wira ahaana obatiziwa wira ekhale maKristau eekeekhai?

¹³ Okathi onaakhaliherya ahu aniihu wala ale nnaasomiha ahu Biibiliya opaka itthu iyo sootthuneya, nihaana wuupuwela wira atthu yaale aniphavela okhala atthareli eekeekhai a Yesu ahaana obatiziwa. Nuumala-vo, okathi wooreerela nihaana waaleela otthuneya waya wiivahererya ni obatiziwa. Hiyo nimphavela wira aniihu ni ale anaasomiha ahu Biibiliya evikaniheke orowa vahoolo momunepani ni abatiziwe.

14. Xeeni nihikhanle ahu oomukhanyererya mutthu wira obatiziwe?

¹⁴ Hata vari siiso, ohikhale mutthu onimukhanyererya mwanawe wala ole onimusomiha awe Biibiliya wira obatiziwe. Yehova khonimukhanyererya mutthu wira omurumeeleke. (1 Yohani 4:8) Okathi ninwiixuttiha ahu atthu akina, nihaana waakhaliherya wiiwexexa otthuneya waya opaka ompatthani ni Yehova. Nto akhala wira naxikola a Biibiliya onnixukhurela wiixutta ekeekhai voohimya sa Muluku ni onniphavela opaka itthu sotheene anivekeliwa aya maKristau ekeekhai, owo onirowa ophavelaka obatiziwa.​—2 aKorinto 5:14, 15.

15, 16. (a) Niireke sookhala iyaakha sooreerela wira mutthu obatiziwe? Mutthokiherye. (b) Xeeni ole animusoma Biibiliya onitthuneya awe obatiziwa ntoko Namoona a Yehova, hata mutthu owo obatiziwe ene etiini ekina?

¹⁵ Khasikhanle iyaakha sinivekeliwa wira mutthu obatiziwe. Makhalelo a khula mutthu annivirikana, nave atthu akina animusoma Biibiliya annakuva orowa vahoolo  waavikana akina. Anamunceene anibatiziwa ari ene amiravo, okathi aninnuwa aya annivikaniha omurumeela Yehova moororomeleya. Atthu akina aniixutta ekeekhai ni obatiziwa yuuluvanle ene. Nave akina arina iyaakha sinivira 100!

¹⁶ Muthiyana mmosa aamusoma Biibiliya, aahibatiziwa itiini sinceene. Tivonto aahimukoha murokora aamusomiha, akhala wira vaanitthuneya otthikela obatiziwa. Murokora ole aahimooniherya soolepa ikina sa mBiibiliyani saakhula nikoho nawe. Muthiyana ole aahixutta malakiheryo a mBiibiliyani, nto moohipisa aahibatiziwa, hata arina iyaakha 80. Exeeni nniixutta ahu ni ntakiheryo nla? Yehova onirowa weemererya wiivahererya wahu paahi akhala wira nnimwiixutta ekeekhai voohimya sa yootthuna awe. Nto hata hiyo nibatiziwe ene etiini ekina, nave nihaana obatiziwa wira nikhale Namoona a Yehova.​—Musome Miteko 19:3-5.

17. Nihiku na obatizo, etthu xeeni anitthuneya aya wuupuwelaka ale anirowa obatiziwa?

¹⁷ Nihiku mutthu onibatiziwa awe ninkhala nihiku noohakalaliha. Owo okathi wooreera wuupuwelela yootaphulela ya wiivahererya wawe ni obatiziwa. Tthiri opaka itthu sotheene anivekeliwa aya maKristau, khonikhweya. Atthareli a Yesu ahaana wiimananiha wira “ehìkhalele mmansaya, nto emukhalele ole àkhwenle, ni àhihimuwenle yawo”.​—2 aKorinto 5:15; Matheyo 16:24.

18. Makoho xeeni ninrowa ahu othokorerya mwaha onittharelana?

¹⁸ Sintoko niwenhe ahu mwaha ola, wiivahererya wa Yehova khahiyo etthu yoothweeliha. Ti maana aya amamawe Maria yaikoha aya makoho aromoliwe woopaceryani wa mwaha ola. Akhala wira mwa namuyari, waaniheryasa munniikoha so: ‘Kiireke mwanaka onnireerela obatiziwa? Onnisuwela itthu sinceene voohimya sa Yehova wira iivahererye wa Muluku? Mwanaka ohaana toko osoma vanceene ni ophwanya muteko wooloka ohinatthi obatiziwa? Ankhi attheka vale nuumala obatiziwa?’ Makoho ala ninrowa othokorerya mwaha onittharelana, nave nnimwiixutta moota anamuyari maKristau anrowa aya okhalana moonelo wooloka voohimya sa obatizo.