1-3. (a) Nooneleke sai ekeekhai ya mBiibiliyani? Nvahe ntakiheryo. (Nwehe elatarato yoopacerya.) (b) Mwaha ola, ninrowa othokorerya exeeni?

OLELO-VA, anamunceene annithuma itthu mulooxa, nuumala-vo anattikiha. Nave vaavo anthuma aya arumeelaka interneti, ikwaha sinceene, awo annittikiha. Waaniheryasa, annittikiha mwaha woohaasivela etthu eyo athumme aya aahiiso khelonke. Nto, awo annithanla ottikiha wira avahiwe etthu yooloka aahiiso musurukhu aya.

² Hiyo khanimphavela opaka eyo ni ekeekhai ya mBiibiliyani. Maana nuumala othuma, niire so, wiixutta ekeekhai khanimphavela-tho otumiha, eyo piiyo, ohiya. (Musome Miruku 23:23; 1 Timótheyo 2:4) Ntoko niixuntte ahu mwaha ovinre, waahivira okathi munceene wira niixutte ekeekhai. Pooti wira nooleva muteko aahiiso osoma waarowa oniiriha ophwanya musurukhu munceene. Nave-tho, pooti wira nihaahiya apatthani akina, nooturuka moonelo ahu itthu, aahiiso noohiya wiirela mpantta soolema sihinimusivela Yehova. Tthiri ninnikupali wira itthu iyo khasirina efaita, nalikanyiha ni mareeliho niphwannye ahu mwaha woosuwela ekeekhai.

 ³ Yesu aahilavula nlikanyiho na mulipa a nakoso, yoowo aaphavelasa ophwanya maluku oowaaryexa. Nuumala ophwanya nluku noowaaryexa, moohipisa, aahirowa otumiha sotheene aarina awe wira othume nluku nne. Nto nluku noowaaryexa, nintaphulela ekeekhai ya Omwene wa Muluku. Nlikanyiho nla, Yesu aaphavela wooniherya wira ale aniphavela ekeekhai, annoona eyo okhala ya efaita yuulupale. (Matheyo 13:45, 46) Vaavo naapacenrye ahu wiixutta ekeekhai, eyo piiyo, ekeekhai voohimya sa Omwene wa Muluku ni ikeekhai sotheene siri mBiibiliyani, naahileva khula etthu. Akhala wira nnoovikaniha ovaha efaita ekeekhai, khaninkhala-khala nihiyaka. Mooriipiha murima, atthu akina a Muluku khanivaha efaita ekeekhai, nto annihiya. Nihikhala-khale nipakaka eyo! Masi nihaana otthara miruku sa Biibiliya sini: ‘Mwetteleke ekekhai’. (Mmusome 3 Yohani 2-4.) Eyo entaphulela wira ekeekhai ehaana okhala etthu yuulupale mookumini mwahu. Xeeni ni moota xeeni mutthu onrowa awe otumiha aahiiso ohiya ekeekhai? Ninrowa osyaka sai ohapuwa aahiiso ohiya ekeekhai? Exeeni enrowa onikhaliherya ovikaniha ‘wetta mwekekhaini’?

4. Okathi wa Yesu, xeeni atthu akina yaahiyale aya weettela ekeekhai?

⁴ Okathi Yesu aari awe valaponi, atthu akina yaapacenrye wiixutta ekeekhai, khiyaavikaninhe weettela ekeekhai. Mwa ntakiheryo, nuumala Yesu opaka mwiiriirya aalyinhe awe atthu anceene, awo yaahimutthara mpakha mpantta mukina wa Ephareya ya oGalileya. Masi Yesu aahihimya etthu yaanyoonyale oriki: “Mwahikhurekeru erutthu ya Mwana a mutthu, mwahiwuryekeru ephome awe, khamunkhalana ekumi mwa nyuwo”. Ohiya omukoha Yesu etthu aaphavela awe ohimya, awo yaahimmye wira: “Molumo ala àtepa orika. T’ani onwerya okupali?” Okhuma nihiku nne, “awixutti awe anjene yahitthikela ottuli, khuttharuwa wettana”.​—Yohani 6:53-66.

5, 6. (a) Mahiku ala, atthu akina ahiyale sai ekeekhai? (b) Vaniweryaneya sai mutthu ohiya ekeekhai?

⁵ Mooriipiha murima, olelo-va, atthu akina annilakela ohiya ekeekhai. Nthowa xeeni? Atthu akina aakhumuwa mwaha woohisiveliwa otthokiheriwa wa niinaano wa eveersu ya mBiibiliyani, aahiiso mwaha woonyoonyihiwa ni munna orina miritti sinceene. Atthu akina, mwaha woohisiveliwa enamuna avahiwa aya miruku sinikhuma mBiibiliyani aahiiso khaniiwanana ni munna mukina a mmulokoni. Nave akina mwaha wootthara sowiixuttiha sa anammwareya wala yiiwale itthu anootheriwa aya Anamoona a Yehova. Ala mathowa vakhaani paahi aniwiiriha atthu omuhiya Yehova ni muloko awe. (aHéberi 3:12-14) Vaamuloka vaakhanle wira atthu awo annimukupali Yesu ntoko Pedru aamukupali awe! Maana okathi atthu akina a muttitthi ole yaanyoonyinwe aya ni masu awe, Yesu aahaakoha arummwa awe akhala wira nave awo yaaphavela orowa. Pedru aahimwaakhula wira: “Pwiya, nintthuna omutthara pani? Murina molumo anvaha ekumi yohimala, ti nyuwo”.​—Yohani 6:67-69.

 ⁶ Atthu akina aahiya ekeekhai vakhaani-vakhaani, waanyiheryasa moohisuwela. Mutthu onihiya ekeekhai vakhaani-vakhaani, onlikana ni ekalawa yeeyo vakhaani-vakhaani enihiya ephiro aya. Biibiliya onninlopola wira nihaana ovaha ephoole wira “ephiro y’ekekhai ehinrimele”. (aHéberi 2:1) Ikwaha sinceene, mutthu pooti ohiya ekeekhai moohisuwela. Vaavo vanihiya awe waataana wawe ni Yehova otteettheyaka, ohoolo waya onnihapuwa. Ninrowa osyaka sai wira eyo ehiniiraneele?

7. Ninrowa osyaka sai otumiha ekeekhai?

⁷ Wira nivikanihe weettela ekeekhai, nihaana weemererya ni wiiwelela sotheene Yehova onnileela awe. Nave ekeekhai ehaana okhala etthu yootepa otthuneya mookumini mwahu, ni nihaana opaka itthu nittharaka malakiheryo a Biibiliya. Okathi aavekela awe, Mwene Davidi aahimuleiherya Yehova wira: ‘Kinimwettela ekekhai anyu’. (Esalimo 86:11) Davidi aahilakela ovikaniha weettela ekeekhai, nave hiyo nihaana opaka etthu emosaru. Naahiire siiso, pooti opaceryaka wuupuwela itthu nihiyale ahu wira niixutte ekeekhai, nto nnaphavela otthikela itthu iyo. Masi wira eyo ehiiraneye, nihaana weettela ikeekhai sotheene sa mBiibiliyani. Nave nihaana weettela ‘ekekhai yothene’. (Yohani 16:13) Mwaha ovinre, noothokorerya itthu thanu nilenve ahu wira niixutte ni ovarihela muteko ekeekhai. Vano ninrowa othokorerya moota woosyaka otthikela itthu sihiyale ahu.​—Matheyo 6:19.

8. Niireke wira ohirumeela okathi mwa miruku pooti omwiiriha muKristau ohiya ekeekhai? Nvahe ntakiheryo.

⁸ Okathi. Nihaana ovikaniha orumeela mwa miruku okathi ahu, wira nihikhala-khale nihiyaka ekeekhai. Naahiivahe ephoole, nnoovirihaka okathi munceene ntthekulaka, nipakaka itthu sinnisivela paahi, nrumeelaka Interneti aahiiso onweha televisau. Nnaamwi itthu iyo sihitthekeyaka, naahiivahe ephoole pooti orumeelaka okathi naarumeela ahu wira nimusome Biibiliya ni olaleerya. Eyo ti etthu yaamwiiranenle Emma. * (Nwehe enoota.) Okhuma okathi aari awe mwaaruusi, owo aanisiveliwa weettiha ikhavalo. Nuumala woona wira aaniviriha okathi munceene eettihaka ikhavalo, aahipacerya wiivaha nthowa, nto nuuvira okathi aahipaka marukunuxo. Nave Emma oottottela mureerelo yowiiraneya ya Cory Wells, murokora yoowo eettiha ikhavalo. * (Nwehe enoota.) Vano Emma onniviriha okathi munceene omurumeelaka Yehova, nave onniwerya okhala ni amusi ni apatthani, yaawo animurumeela Yehova. Nto ooweha wira vano oomwaattamela Muluku ni onnihakalala  osuwela wira onnirumeela saana okathi awe.

9. Moota xeeni itthu sa werutthuni siniwerya aya okhala sootepa otthuneya wa hiyo?

⁹ Itthu sa werutthuni. Wira nivikanihe weettela ekeekhai, nihaana osyaka othokorerya itthu sa werutthuni okhala sootepa otthuneya. Maana okathi niixutta ahu ekeekhai, naahoona wira omurumeela Yehova ti etthu yootepa otthuneya ovikana itthu sa werutthuni, tivonto naalenve ahu sotheene wira niixutte ekeekhai. Masi nuuvira okathi, nnimwaawehaka atthu yaathumaka aparelyo eletroniku a niinaano aahiiso itthu sa musurukhu munceene. Nave pooti opaceryaka woonaka wira yookhala nimpweteiwa ahu. Nto khaninrowa ohakalalaka ni itthu sirina ahu, masi ninrowa opaceryaka oluttuweliwa itthu sa werutthuni ohiya omurumeela Yehova. Ela ennuupuxerya ele yiiraneyale ni Dema. Okhala wira Dema aaniphenta vanceene ‘itthu sa vathí’, owo aahihiya muteko aavara awe ni murummwa Paulo. (2 Timótheyo 4:10) Pooti wira Dema aaniphenta vanceenexa itthu sa werutthuni ovikana omurumeela Muluku. Aahiiso pooti wira khaaphavela-tho wiimananiha wira ovareke vamosa ni Paulo. Nniixutta exeeni? Waaniheryasa khalai naaniphenta vanceene itthu sa werutthuni. Nto naahiivahe ephoole pooti otthikela ophenta itthu iyo mpakha oniiriha ohiya ekeekhai.

10. Itthu xeeni nintthuneya ahu okhootta?

¹⁰ Waataana wahu ni atthu akina. Wira nivikanihe weettela ekeekhai, nihaana osyaka ohapuxiwa ni ale ahinimurumeela Yehova. Okathi niixutta ahu ekeekhai, naahituruka waataana wahu ni apatthani ni amusi ahikhanle Anamoona. Woonasa wene, atthu akina yaahisiveliwa sookupali sahu isya, masi akina khiyaasiveliwe. (1 Pedru 4:4) Hata vari siiso, ninnimananiha waareerela murima ni okhalana waataana wooloka ni amusi ahu. Masi khaninrowa ohiya weettela malamulo a Yehova wira naahakalalihe atthu awo. Nave ntoko niixuntte ahu 1 aKorinto 15:33, nihaana waathanla apatthani animphenta Yehova.

11. Ninrowa osyaka sai muupuwelo ni miteko soohiloka?

¹¹ Muupuwelo ni miteko soohiloka. Wira neetteleke ekeekhai, nihaana okhala oowaarya aahiiso ooratta vamaithoni va Yehova. (Yesaya 35:8; mmusome 1 Pedru 1:14-16.) Nuumala wiixutta ekeekhai, noopaka marukunuxo wira nitthareke malamulo a Biibiliya. Akina a hiyo noopaka marukunuxo maalupale. Masi nihaana ovaha ephoole wira itthu soohiloka sihihonone mweettelo ahu wooloka. Exeeni enrowa onikhaliherya wira nikhootte opaka itthu soohiloka? Nihaana wuupuwela ele Yehova onivanhe awe wira nikhale atthu oowaarya. Yehova oonivaha Yesu Kristu, Mwanawe a vameekhaawe! (1 Pedru 1:18, 19) Wira nikhale oowaarya vamaithoni va Yehova, okathi wotheene nihaana wuupuwela mukuttho Yesu ovanhe awe.

12, 13. (a) Xeeni nintthuneya ahu othokorerya iferiado ntoko Yehova oniira awe? (b) Exeeni ninrowa ahu othokorerya moottharelana?

¹² Soolema sihinimusivela Muluku. Amusi ahu, atthu anivarana ahu muteko  ni ale anisomana ahu oxikola, pooti ophavelaka wira nuupuweleleke hoothe mahiku a iferiado. Exeeni enrowa onikhaliherya okhootta yookhanyererya ya wiirela mpantta soolema ni iferiado sihinimusivela Yehova? Nihaana ovikaniha woona mathowa animwiiriha Yehova ohisiveliwa iferiado iyo. Nave pooti otokosa iliivuru sahu ni wuupuwelela moota iferiado sipacenrye aya. Vaavo nnuupuwelela ahu mathowa a mBiibiliyani anniiriha ohiirela mpantta iferiado iyo, ninrowa otepaka woona wira ninnivara “itthu sinasivela Apwiya”. (aÉfeso 5:10) Akhala wira ninnimuroromela Yehova ni Nuulumo nawe, khaninrowa owoovaka atthu.​—Miruku 29:25.

¹³ Nihaana ovikaniha weettela ekeekhai mahiku otheene. Exeeni enrowa onikhaliherya olakela ni ovikaniha weettela ekeekhai? Sookhala itthu tthaaru sinrowa onikhaliherya opaka eyo.

14. (a) Moota xeeni ovikaniha omusoma Biibiliya onnikhaliherya aya ohihiya ekeekhai? (b) Xeeni ankhili, ottaruxa ni osuwela ori aya wootthuneya?

¹⁴ Yoopacerya, nvikanihe omusoma Biibiliya ni wuupuwelela ele enisoma anyu. Nave muhihiye eprograma anyu yoomusoma Biibiliya. Vaavo munitepa anyu omusoma, munrowa otepaka ophenta ekeekhai ni khamunkhala-khala muhiyaka. Miruku 23:23, onihimya wira “[nithume] ekekhai n’osuwela n’ikano n’ankhili”. Tivo, khivaniphiyerya osuwela ekeekhai paahi. Nihaana ovarihela muteko mookumini mwahu. Okathi nniiwexexa ahu ekeekhai, ninnitakaaha itthu nniixutta ahu niiye ninsuwela ahu. Maana ankhili anniniiriha orumeela itthu ninsuwela ahu. Ikwaha sikina ekeekhai enninttaruxa, enooniheryaka marukunuxo nintthuneya ahu opaka. Nto nihaana weemererya ottaruxiwa iwo, maana Biibiliya onihimya wira ankhili, annivikana eparatha.​—Miruku 8:10.

15. Moota xeeni ekeekhai ennaakiherya aya ntoko esintu?

¹⁵ Ya nenli, mulakele ovarihela muteko ekeekhai khula nihiku. Biibiliya onnilikanyiha ekeekhai ni esintu ya nakhotto. (aÉfeso 6:14) Okathi aalempwa awe Biibiliya, esintu ya nakhotto yaanimukhaliherya okhottoni vakhala wira yaanilipiha soowara sawe. Akhala wira esintu eyo khiyaalipiha, khiyaarowa omukhaliherya. Moota xeeni ekeekhai ennaakiherya aya ntoko esintu? Akhala wira nnoovikaniha weettela ekeekhai, ekeekhai eyo enoonikhaliherya ohuupuwela itthu soohiloka ni opaka soothanla sooloka. Vaavo ninkhalana ahu muxankiho muulupale aahiiso nneehereriwa ahu opaka etthu yoohiloka, ekeekhai enoonikhaliherya opaka  itthu sooloka. Ntoko siisaale nakhotto ahaarowa awe okhottoni ohiwanre esintu, nihikhala-khale nihiyaka ekeekhai. Nto nihaana ovarihela muteko ekeekhai okumi ahu wotheene. Nave nakhotto aanihela ekatana awe muyuununi. Nrowe noone moota nikhanle ahu oopaka eyo.

16. Moota xeeni wiixuttiha ekeekhai onnikhaliherya aya ovikaniha weettela ekeekhai?

¹⁶ Ya neeraru, mmananihe owiixuttiha atthu akina ekeekhai ya mBiibiliyani. Biibiliya onlikanyihiwa ni ekatana. Ntoko siisaale esintu ya nakhotto enlipiha aya ekatana awe eri muyuununi, nave hiyo nihaana ovikaniha olipihiwa ni Nuulumo na Muluku. (aÉfeso 6:17) Otheene ahu nnoowerya okhala awiixuttihi ooloka ‘anlaleya vophwanela ehapari y’ekekhai’. (2 Timótheyo 2:15) Vaavo ninwiixuttiha ahu atthu Biibiliya, ninnisuwela ekeekhai ni otepa ophenta. Nave ninnitepa ovikaniha weettela ekeekhai.

17. Xeeni ekeekhai eri aya yootthuneya vanceene?

¹⁷ Ekeekhai, ti yoovaha yootepa otthuneya enikhuma wa Yehova. Maana enninikhaliherya waataana ni Tiithi ihu a wiirimu. Eyo ti etthu yootepa otthuneya eniwerya ahu okhalana. Ekeekhai wira Yehova ooniixuttiha itthu sinceene, masi sookhala sikina sirina ahu osuwela! Nto onrowa ovikanihaka oniixuttiha mahiku otheene. Tivonto, nvaheke efaita ekeekhai ntoko siisaale mwaarowa anyu ovaha efaita nluku noowaaryexa. Nvikanihe othuma “ekekhai” ni muhitumihe. Nuumala-vo, ntoko Davidi, munrowa ovikanihaka omulela Yehova, wira: ‘Kinimwettela ekekhai anyu’.​—Esalimo 25:5.