1, 2. Vaavo ninrowa ahu vahoolo, exeeni nniixutta ahu? Nvahe ntakiheryo.

NKAMUUPUWELENI mutthu onvanhe etthu mwaana. Vano anamuyari awe anamuleela so: “Mwiire kooxukhuru”. Nto mwaana owo onnixukhurela, okhala wira anamuyari awe aamuruma. Masi vaavo mwaana owo oninnuwa awe, onnipacerya woona nthowa naya anamuyari awe yaamuleela aya wira oxukhureleke avahiwa etthu. Muhoolo mwaya, ohirummwale onnaaxukhurela atthu okhala wira ohiixutta opaka eyo.

² Etthu emosaru yooniiraneela. Okathi naapacenrye ahu wiixutta ekeekhai, naahoona otthuneya waya wiiwelela malamulo a Yehova. Vaavo naarowa ahu vahoolo, naahipacerya osuwela muupuwelo wa Yehova, niire so, itthu sinimusivela, itthu sihimmusivela ni moota onoonela awe itthu. Nto vaavo nimpaka ahu itthu aahiiso othanla nittharaka muupuwelo awe, ninniiriha muupuwelo wa Yehova okhala wawihu.

3. Xeeni vanvila aya woona itthu ntoko Yehova onoona awe?

³ Okhala wira na atthu oohimalela, hata nisiveliwaka  wiixutta wuupuwela ntoko Yehova, ikwaha sikina vannivila woona itthu ntoko onoona awe. Mwa ntakiheryo, ninnisuwela moota Yehova onoonela awe orupihana woohiloka, ophenta muhakhu, olaleerya, orumeela ephome moohiloka ni itthu sikina. Masi pooti ovila wiiwexexa nthowa naya orina awe moonelo owo. Nto, ninrowa owerya sai otepa wuupuwela ntoko Yehova onuupuwela awe? Nave, moota xeeni eyo ennikhaliherya aya opaka itthu sooloka vano ni muhoolo?

4. Ontaphulela exeeni wuuluula osuwela wahu?

⁴ Mmusome aRoma 12:2. Eveersu ela, murummwa Paulo onnitthokiherya etthu enitthuneya ahu opaka wira nuupuweleke ntoko Yehova onuupuwela awe. Owo onihimya wira nihaana osyaka ‘otthara mwettelo w’atthu a vathí’. Ntoko niixuntte ahu mwaha ovinre, nihaana okhootta miyuupuwelo ni moonelo wa olumwenku ola. Nave Paulo aahimmye wira nihaana wuuluula osuwela wahu. Eyo entaphulela wira nihaana wiixutta Nuulumo na Muluku, ophavela wiiwexexa muupuwelo awe, wuupuwelela ele enisoma ahu ni omananiha okhalana muupuwelo wa Yehova.

5. Mutthokiherye ovirikana okhanle osoma ni wiixutta.

⁵ Wiixutta onnivirikana ni osoma aahiiso ohela ekanyero opuro anaakhuliwa aya makoho a yoosoma eyo. Vaavo nniixutta ahu, ninnuupuwelela etthu nniixuttiha ahu voohimya sa Yehova, ele ompaka awe ni muupuwelo awe. Ninnimananiha osuwela ele enimwiiriha Yehova onileela opaka etthu ni onyokha itthu sikina. Nave-tho, nihaana woona marukunuxo nikhanle ahu oopaka mookumini ni mmuupuweloni mwahu. Ekeekhai wira khivaniweryaneya wuupuwelela itthu sotheene khula okathi nniixutta ahu. Masi vaavo ninsoma ahu nihaana ophavelasa okathi wira nuupuwelele ele niixuntte ahu.​—Esalimo 119:97; 1 Timótheyo 4:15.

6. Etthu xeeni enikhumelela vaavo nnuupuwelela ahu Nuulumo na Muluku?

⁶ Vaavo nimmakela ahu wuupuwelela Nuulumo na Muluku, ennikhumelela etthu yoohakalaliha. Hiyo ‘ninnikupali’ aahiiso osuwela wira muupuwelo wa Yehova ti woomalela. Nave, ninnisuwela moota Yehova onoonela awe mwaha owo ni ninneemererya moonelo awe. Eyo enninikhaliherya wuuluula osuwela wahu ni okhalana muupuwelo musya. Nto vakhaani-vakhaani ninnipacerya wiiriha muupuwelo wa Yehova okhala wawihu.

7, 8. (a) Yehova onoonela sai itthu sa werutthuni? (Nwehe ilatarato soopacerya.) (b) Akhala wira ninnoona itthu sa werutthuni ntoko Yehova, etthu xeeni enrowa okhala yootepa otthuneya mookumini mwahu?

⁷ Muupuwelo ahu onnivarihana ni ele enipaka ahu. (Marko 7:21-23; Yakobo 2:17) Nrowe nithokorerye matakiheryo vakhaani aniiwanyeiha mwaha ola. Ntakiheryo nimosa, nimphwanya yowiiraneya ya oyariwa wa Yesu, eyo ennooniherya oratteene moota Yehova onoonela awe itthu sa werutthuni. Muluku aahimuthanla Yosefe ni Maria wira amuhuwe Yesu, nnaamwi aasuwela wira khiyaarina musurukhu munceene. (Onamukuttho 12:8; Luka 2:24) Okathi Yesu aayariwe awe, Maria “ahimukhunela n’ikuwo, khumwatalela  munikulani, okhala wira mpani mwamakaya aletto khiwarivo opuro wàrerela”. (Luka 2:7) Yehova aaphavenle, ampaka mareheryo wira Yesu oyariwe nipuro nootepexa oloka. Masi aaphavela wira Yesu oyariwe emusi yaahela nipuro noopacerya omukokhorela Muluku. Eyo ti yaari etthu yootepa otthuneya wa Yehova.

⁸ Yowiiraneya ela ya oyariwa wa Yesu, enniniixuttiha moota Yehova onoonela awe itthu sa werutthuni. Anamuyari akina, aniphavela wira anaaya akhalane mihakhu sinceene hata eyo ehononaka waataana wooloka wa anaaya ni Yehova. Etthu Yehova onoona awe okhala yootepa otthuneya ti waataana wahu ni yena. Akhala wira munneemererya moota Yehova onoonela awe mwaha ola, miteko sanyu sinimooniherya eyo.—Mmusome aHéberi 13:5.

9, 10. Niireke ninnoona waakhumuliha atthu akina ntoko Yehova onoonela awe?

⁹ Ntakiheryo na nenli, ti na moota Yehova onimoonela awe mutthu onimukhumuliha mutthu mukina, eyo piiyo, omwiiriha mutthu opaka etampi aahiiso ohiya omurumeela Yehova. Yesu ahimmye wira: “Vano, akhalá mutthu onimutthekiha mmosá àxikhani ala ankamini miyo, fatari atthukeleliwe nxilo nulupale muxikoni, ariheliwe mphareya eriyari”. (Marko 9:42) Tthiri, moolumo ala anninlopola vanceene! Maana noosuwela wira Yesu aamutakiha Tiithi awe. Nto ninnoona wira Yehova khonisiveliwa ni mutthu onimutthekiha mutthareli a Yesu.​—Yohani 14:9.

¹⁰ Niireke ninnoona mwaha ola wa omukhumuliha mutthu ntoko Yehova ni Yesu anoonela aya? Akhala wira ti siiso, miteko sahu sinimooniherya eyo. Mwa ntakiheryo, pooti wira yookhala enamuna yoowara ni wiitthokiha ennisivela. Ninrowa opaka exeeni akhala wira soothanla sahu sinnaakhumuliha akina ni owiiriha ophavela orupihana woohiloka? Niireke waaphenta wahu anna onooniiriha osyaka mweettelo owo?​—1 Timótheyo 2:9, 10.

11, 12. Ninrowa wiikhapelela sai vaavo nniixutta ahu onyokha itthu Yehova onnyokha awe ni okhala atthu oowiihiiha?

¹¹ Ntakiheryo na neeraru ti nna: Yehova onninyokha ohixariya. (Yesaya 61:8) Tthiri, Yehova onnisuwela wira ikwaha sikina vannivila opaka itthu sa xariya okhala wira naatthu oottheka. Nave oniphavela wira ninyokheke itthu sootakhala, ntoko Yehova onnyokha awe. (Musome Esalimo 97:10.) Akhala wira nnimuupuwelela etthu enimwiiriha Yehova onyokha itthu sootakhala, eyo enoonikhaliherya okhalana muupuwelo awe ni onivaha ikuru wira nihipake itthu soohiloka.

¹² Nave, akhala wira nnoosuwela etthu enimwiiriha Yehova onyokha itthu sootakhala, eyo enoonikhaliherya-tho woona wira itthu sikina ti soohiloka hata Biibiliya ohilavulaka mooluluwanya. Mwa ntakiheryo, yookhala enamuna ya wiina enitumererya orupihana woohiloka entepa wuulaana  olelo-va, eniihaniwa lap dancing (muthiyana oniina awe ohoolo wa anamathuma owanre ene ikuwo sootepa okhuveya). Atthu akina anoona wira opaka eyo khonlikana ni orupihana, tivonto anuupuwela wira eyo khahiyo etthu yootakhala. * (Nwehe enoota.) Masi Yehova onoonela sai mwaha owo? Muupuweleke wira Yehova onninyokha khula etthu yootakhala. Tivonto nihaana osyaka khula etthu yootakhala nikhalaka atthu oowiihiiha ni onyokha itthu Yehova onnyokha awe.​—aRoma 12:9.

13. Xeeni nintthuneya ahu niinaano-va osuwela moota Yehova onoonela awe myaha sikina wira nipake soothanla mwa miruku?

¹³ Vaavo ninsoma ahu, nihaana wuupuwela moota Yehova onoonela awe mwaha owo, maana eyo enoonikhaliherya opaka soothanla mwa miruku. Nto akhala wira nnookumanana muxankiho onitthuneya opaka yoothanla moowaakuveya, nnoosuwela yoopaka. (Miruku 22:3) Nrowe nithokorerye matakiheryo vakhaani a mBiibiliyani.

14. Moota Yosefe aamwaakhunle awe mwaarawe Potifari, onniixuttiha exeeni?

¹⁴ Okathi mwaarawe Potifari anveka awe Yosefe, moohipisa Yosefe aahimukhootta. Tthiri Yosefe aahisuwela wira Yehova oniphavela wira ale athelanne ahiraruwelaneke. (Musome Maphattuwelo 39:8, 9.) Yosefe aahimuleela mwaarawe Potifari wira: “Kiniwerya sai wira etthu yotepexa otakhala, kinvehaka Muluku?” Eyo enooniherya wira Yosefe aahiiriha moonelo wa Muluku okhala wawawe. Ankhi nyuwo? Munrowa opaka exeeni akhala wira ole onivarana anyu muteko onnoolavulihani moovekana? Aahiiso ankhi mwanviyareliwa mensagem wala efootu enooniherya orupihana woohiloka? * (Nwehe enoota.) Vanoonikhweela ovikaniha ororomeleya wa Yehova, akhala wira nootoko osoma mwaha owo ni weemererya moota Yehova onuupuwela awe ni akhala wira noothanla ele enrowa ahu opaka neehereriwa vale.

15. Ninrowa ovikaniha sai ororomeleya wa Yehova ntoko amiravo ale araru aHeberi?

¹⁵ Vano, nrowe nithokorerye ntakiheryo na amiravo araru aHeeberi, Xadraki, Mexaki ni Abedi-Nego. Okathi Mwene Nabukhodonosori aarumme awe okokhorela elatarato ya eweero aapanke awe, awo yaahikhootta. Moota yaamwaakhunle aya mwene, ennooniherya wira yaanisuwela ele yaarowa okhumelela yavikaniha omuroromela Yehova. (Okhuma 20:4, 5; Daniyeli 3:4-6, 12, 16-18) Ankhi olelo-va? Munrowa opaka exeeni, akhala wira patarau anyu, onnoovekelani ovaha musurukhu anyu wira mukhaliherye niira ninvarihana ni etiini yoowootha? Ohiya olipelela okhumelela  etthu ntoko eyo, vaamuloka wuupuwelela vano, moota Yehova onoonela awe mwaha owo. Nto, akhala wira eyo enooniiraneela, vanoonikhweela opaka aahiiso ohimya etthu yooloka ntoko amiravo ale araru aHeeberi.

16. Moota xeeni okhalana muupuwelo wa Yehova onnikhaliherya aya wiilokiherya akhala wira enooniphwanya eretta mootutuxerya?

¹⁶ Okhalana muupuwelo wa Yehova onoonikhaliherya ororomeleya okathi enniphwanya aya eretta mootutuxerya. Tthiri, noolakela okhootta oheleliwa ephome aahiiso mipantta mixexe suulupale sa ephome. (Miteko 15:28, 29) Masi sookhala inamuna sikina sa olooliwa sirumeeliwaka ifrasau sa ephome onitthuneya awe khula muKristau opaka yoothanla awe ottharaka malakiheryo a Biibiliya. Tuuvi ori okathi wooreerela othanla ele ninrowa ahu opaka? Wakhala oxiripitali, woona owereya ni okhanyereriwa pooti oniiriha opaka yoothanla yoohiloka. Tivonto, ola ti okathi wootokosa mwaha owo ni olepa edukumento ntthokiheryaka enamuna yoolooliwa ni olavula ni totoro ahu. * (Nwehe enoota.)

17-19. Xeeni ola ori aya okathi wooreerela osuwela moota Yehova onoonela awe myaha sikina? Nvahe ntakiheryo.

¹⁷ Vano nkahaya muupuwele moota Yesu aamwaakhunle awe Pedru vaavo anvahe awe miruku soohiloka oriki: “Pwiya, Muluku ahitthuné eyo”. Yesu aahisuwela ele Muluku aaphavela awe wira opake ni iprofesia saalavula okumi ni okhwa wawe valaponi. Osuwela iwo waahimulipiha Yesu wira ovikanihe ororomeleya wa Yehova ni ovaha okumi awe wira onoopole.​—Mmusome Matheyo 16:21-23.

¹⁸ Olelo-va, Muluku oniphavela wira nikhale apatthani awe ni niimananiheke olaleya ihapari sooreera. (Matheyo 6:33; 28:19, 20; Yakobo 4:8) Masi atthu akina arina mukhalelo wooloka pooti weererya  onikhulumula ntoko Pedru aamwiirenle awe Yesu. Mwa ntakiheryo, pooti wira patarau anyu omphavela woovahani musurukhu munceene, masi munnisuwela wira munrowa ovaraka muteko okathi munceene ni khamunrowa okhalana okathi woorowela mithukumano ni olaleerya ni muloko. Ankhi akhala wira munoosoma maprusoore anyu yoovahani eparakha yoorowa osoma opuro ottaivenle emusi anyu? Akhala wira eyo enoowiiraneelani, muhaana otokosa mwaha owo, ovekela ni ovaanela ni etthoko anyu aahiiso olavula ni axitokweene muhinatthi opaka yoothanla. Ti vooloka osuwela niinano-va moota Yehova onoonela awe mwaha owo ni wiiriha muupuwelo awe okhala wawinyu. Akhala wira munoovahiwa itthu iyo, pooti wuupuwelaka wira khahiyo yooweeha. Munoopaka yoothanla yooloka, akhala wira moolakela ohela nipuro noopacerya omurumeela Yehova.

¹⁹ Nave, nyuwo pooti wuupuwela itthu sikhanle ooweehererya ororomeleya wanyu wa Yehova. Ekeekhai wira khaninrowa owerya wiilokiherya wa khula etthu enrowa onikhumelela. Masi, akhala wira ninnuupuwelela moonelo wa Yehova okathi nimmusoma ahu Biibiliya, eyo enoonikhaliherya wuupuwela ele ntoko ahu osoma ni osuwela moota woovarihela muteko. Tivonto, okathi ninsoma ahu, nihaana ophavela osuwela muupuwelo wa Yehova, wiiriha okhala wawihu wira onikhaliherye opaka soothanla mwa miruku olelo-va ni muhoolo.

20, 21. (a) Elapo esya, ninrowa ottottela sai mureerelo otaphuwa wahu? (b) Ninrowa ophwanya sai ohakalala olelo-va?

²⁰ Otheene ahu ninnilipelela elapo esya. Masi anamunceene a hiyo ninnilipelela okhala mParayiisu valaponi. Okathi Omwene wa Muluku onrowa aya olamulelaka, otheene ahu khaninrowa woonaka owereya aahiiso ohaawa nimphwanya ahu olumwenku ola wootakhala. Nave, ninrowa okhala ootaphuwa wira nipakeke khula etthu eniphavela ahu.

²¹ Masi eyo khentaphulela wira otaphuwa wahu khonrowa okhalana mukano. Maana atthu oomaala anrowa opakaka soothanla attharaka malamulo ni muupuwelo wa Yehova. Nto eyo enookumiherya ohakalala wuulupale ni murettele woomalela. (Esalimo 37:11) Nlipelelaka ophiya okathi owo, vanniweryaneya ophwanya ohakalala ni wiiriha muupuwelo wa Yehova okhala wawihu.