1, 2. (a) Etthu xeeni yootepa otthuneya mookumini mwanyu? (b) Ikeekhai xeeni ninvaha ahu efaita ni nthowa xeeni? (Nwehe elatarato yoopacerya.)

ETTHU XEENI yootepa otthuneya mookumini mwanyu? Hiyo Anamoona a Yehova, etthu yootepa otthuneya ti waataana wahu ni Yehova. Nto nihikhala-khale nitumihaka waataana wahu. Nave ninnivaha efaita ekeekhai ya mBiibiliyani, maana enninikhaliherya okhala apatthani a Yehova.​—aKolosi 1:9, 10.

² Yehova tori Mwiixuttihi ahu Muulupalexa, nto onniniixuttiha ikeekhai sootthuneya siri mBiibiliyani. Nave onniniixuttiha efaita nrina aya nsina nawe ni onninleela mikhalelo sawe. Owo ooniphenta vanceene mpakha onivaha Mwanawe. Onniniixuttiha voohimya sa Omwene wa oMesiya. Oonivaha nlipelelo na muhoolo, maana ale oowoottihiwa anrowa okhalaka wiirimu, nto ale a “ipwittipwitthi sikina” anrowa okhalaka mParayiisu valaponi. (Yohani 10:16) Yehova  onniniixuttiha moota wookhalana okumi wooloka. Nto ninnivaha efaita ikeekhai iyo, okhala wira sinninikhaliherya omwaattamela Mpattuxa ahu yoowo onnikhaliherya mookumini mwahu.

3. Niireke Yehova onninivekela omuliva etthu wira niixutte ekeekhai?

³ Yehova ti Muluku oovaha. Ohooniherya eyo onivahaka Mwanawe wira onoopole. Vaavo oninweha awe mutthu ophavelasaka ekeekhai, Yehova onnimukhaliherya mutthu owo ophwanya. Yehova khonnivekela omuliva etthu mwaha wa wiixutta ekeekhai. Ekwaha emosa, mulopwana iihaniwa Simoni, aahinvaha musurukhu murummwa Pedru, mwaha woowi aahikhalana owerya woowaavaha atthu akina munepa wootteela. Pedru aahimuleela mulopwana ole wira khaarina muupuwelo wooloka, oriki: “Musurukhu anyu opweteye vamosá ni nyuwo, wona munupuwela wira sovaha sa Muluku sinthummwa ni musurukhu!” (Miteko 8:20) Nto ontaphulela exeeni othuma ekeekhai?

4. Mwaha ola, ninrowa wiixutta exeeni voohimya sa ekeekhai?

⁴ Musome Miruku 23:23. Nihaana wiimananiha wira niixutte ekeekhai ya mBiibiliyani. Nto eyo enivekela oleva itthu sikina. Nuumala othuma “ekekhai”, eyo piiyo, wiixutta ekeekhai, nihaana ovaha ephoole wira nihikhala-khale nitumihaka, niire so, ohiya. Ninrowa othuma sai ekeekhai ya mBiibiliyani? Ekeekhai eniliviwa musurukhu mikavi? Waakhuliwa wa makoho ala, onoonikhaliherya otepa ovaha efaita ekeekhai ni oniiriha olakela ohihiya ekeekhai. Nave onoonikhaliherya woona nthowa naya ekeekhai ya Yehova eri aya yootepa otthuneya ovikana itthu sotheene.

5, 6. (a) Ninrowa othuma sai ekeekhai voohiliva etthu? Mutthokiherye. (b) Ekeekhai ennikhaliherya sai?

⁵ Hata etthu eyo eri ene ya mahala, khentaphulela wira munoophwanya muhipanke etthu. Nuulumo na eHeeberi nri Miruku 23:23, nitaphuleliwe ni aBiibiliya akina noowi othuma, pooti-tho otaphulela “ophwanya”. Moolumo ala, antaphulela wira mutthu ohaana wiimananiha aahiiso oleva etthu, wira ophwanye ele onoona awe okhala yootthuneya. Wira niiwexexe moota woothuma ekeekhai, nrowe nuupuwele ela: Nkahaya muupuwele wira omerkaatu enikaiwa enika. Niireke enika eyo enimoorwa mekhaya-ru vate vahu? Nnaari. Maana nihaana orowa omerkaatu wira navahiwe enika eyo. Tivonto, nnaamwi enika ele evahiwaka mahala, hiyo nihaana wiimananiha wira nrowele. Vamosaru, hata nihilivaka etthu wira niixutte ekeekhai, nihaana wiimananiha ni oleva itthu sikina.

⁶ Mmusome Yesaya 55:1-3, Tradução do Novo Mundo. Ele Yehova aahimmye awe enninikhaliherya wiiwexexa ele enitaphulela aya othuma ekeekhai. Iversu iya, Yehova onnilikanyiha moolumo awe eekeekhai ni maasi, eleite ni eviinyu. Ntoko siisaale maasi ooriirya annikhaliherya aya navoliwa ntthona, ekeekhai enninikhaliherya. Nave ntoko siisaale eleite enimwiiriha aya mwaana wunnuwa saana, ekeekhai ya mBiibiliyani ennilipiha waataana wahu ni Yehova. Nave-tho, Yehova onnilikanyiha moolumo awe ni eviinyu. Nthowa xeeni? Nthowa noowi Biibiliya onihimya wira, eviinyu  ennitteeliha murima wa mutthu. (Esalimo 104:15) Tivonto, vaavo Yehova onihimya awe wira “othuma eviinyu”, owo oniphavela onisuweliha wira weettela malakiheryo awe, anooniphwanyiha ohakalala. (Esalimo 19:9) Yehova onnirumeela malikanyiho ala wira onikhaliherye woona mireerelo nimphwanya ahu mwaha wowiixutta ni weettela ekeekhai. Vano nrowe nthokorerye itthu thanu nilenve ahu wira nithume ekeekhai.

7, 8. (a) Xeeni onitthuneya aya okathi wira niixutte ekeekhai? (b) Exeeni Mariko olenve awe, ni yaakhumelenle exeeni?

⁷ Okathi. Onitthuneya okathi wira mutthu owiriyane muhupi wa Omwene, omusoma Biibiliya, iliivuru sinimutthokiherya Biibiliya, osomihiwa ni Anamoona a Yehova, oreherya mithukumano ni orowa omuthukumanoni. Wira nipake itthu iyo, nihaana orumeela okathi naarowa ahu ovaraka itthu sihirina efaita yinceene. (Mmusome aÉfeso 5:15, 16.) Wira mutthu iixutte ikeekhai soopacerya sa Biibiliya, ohaana ovira okathi mikavi? Eyo enlipa ni khula mutthu. Maana ninrowa ovikanihaka wiixutta voohimya sa miruku, iphiro ni itthu Yehova opanke awe. (aRoma 11:33) Erevista yoopacerya ya Watch Tower yaahilikanyiha ekeekhai ni “efilori yooreera” nto khuhimya wira: “Nuumala ophwanya efilori emosa, eyo piiyo, ekeekhai emosa, muhuupuweleke wira yoophiyerya. Masi muhaana ovikaniha ophavela sikina”. Tivonto, niikoheke so: ‘Ikeekhai kavi kiixuntte aka voohimya sa Yehova?’ Hata nrowaka okhalaka mahiku otheene, ninrowa ovikanihaka wiixutta voohimya sa Yehova. Tivonto, olelo-va nihaana omananiha wiixutta itthu sinceene. Nookhala ntakiheryo na mutthu opanke eyo.

⁸ Mariko, * (nwehe enoota) mwali ooJapão, aahithaamela wEstados Unidos wira asomeke epooma ya oNova York. Nihiku nimosa, aahilaleeriwa ni pioneera. Mariko aahikhalana etiini awe, masi vano aaheemererya osomihiwa Biibiliya ni murokora ole. Nto aahisiveliwa vanceene ele iixutta awe, khuvekela wira osomihiweke ikwaha piili vasumanani. Nnaamwi Mariko aatteliwe miteko sa oxikola ni aavara muteko wa okathi vakhaani, moohipisa, aahipacerya orowa omuthukumanoni. Aanitthekula okathi vakhaani wira okhalane okathi munceene wowiixutta ekeekhai. Mwaha wa wiimananiha wawe, Mariko aahaataana ni Yehova, nto aahibatiziwa ohimanle mwaakha. Nuuvira myeeri 6, mwaakha wa 2006 aahikhala pioneera, ni mpakha-va pioneera.

9, 10. (a) Moota xeeni ekeekhai enturuka aya moonelo ahu itthu sa werutthuni? (b) Exeeni Maria olenve awe, nto onoonela sai?

⁹ Itthu sa werutthuni. Woonasa wene, nooleva muteko onliviwa musurukhu  munceene, aahiiso itthu sikina sa olumwenku ola wira niixutte ekeekhai. Mwa ntakiheryo, Pedru ni Andreya yaari atothi a ihopa, masi vaavo Yesu aalattunle awe wira akhale awiixutti awe, awo yaahihiya muteko ole. (Matheyo 4:18-20) Eyo khentaphulela wira muhaana ohiya muteko anyu wira mwiixutte ekeekhai. Maana mutthu ohaana ovara muteko wira okhapeleleke etthoko awe. (1 Timótheyo 5:8) Masi vaavo muniixutta anyu ekeekhai, moonelo anyu itthu sa werutthuni onniturukeya. Maana munnipacerya ovaha efaita itthu sootepa otthuneya. Yesu aahimmye wira: “Muhìthukumanyeryé mihakhu vathí-va”. Ohiya-vo, Yesu onnitumererya so: “Mwìthukumanyeryeke mihakhu wirimu”. (Matheyo 6:19, 20) Eyo ti etthu Maria aapanke awe.

¹⁰ Okathi aari awe mwali, Maria aanisiveliwa omweetta xooku oniihaniwa golfe. Osomaka oxikola secundária, owo aanitepa omweetta saana. Vano aahivahiwa eparakha yooliveriwa osoma wuniversidade. Maria aaphavela omusuwela saana xooku ole, wira ophwanyeke musurukhu munceene. Muhoolo mwaya, aahipacerya wiixuttihiwa Biibiliya. Maria aanisiveliwa ni itthu iixutta awe khuvarihela muteko. Owo onihimya wira: “Vaavo kaatepa aka ovarihela muteko itthu kiixutta aka mBiibiliyani, kaanitepa ohakalala”. Maria aahoona wira khaarowa owerya ovara itthu piili, niire so, waataana wawe ni Yehova vamosa ni omweetta xooku ole. (Matheyo 6:24) Tivonto, aahithanla ohiya omweetta xooku ole wira opakeke etthu yootepa otthuneya. Olelo-va, Maria onirumeela ntoko pioneera ni onihimya wira “ootepa ohakalala vano”.

11. Exeeni ekhanle ookhumelela vaavo nniixutta ahu ekeekhai?

¹¹ Waataana wahu ni atthu akina. Vaavo ninvarihela ahu muteko itthu siniixutta ahu mBiibiliyani, waataana wahu ni apatthani ni amusi onniturukeya. Yesu oonikhaliherya wiiwexexa ele eniiriha okhumelela eyo, vaavo aavekelenle awe atthareli awe oriki: “Mwaareerihe veekeekhai okhala wira masu anyu ekeekhai”. (Yohani 17:17, Waataana wa Naanaano) Nuulumo noowi “mwaareerihe”, nintaphulela “othanleliwa”. Vaavo nneettela ahu ekeekhai, ninnivirikana ni anamunceene a olumwenku ola, okhala wira nintthara malamulo a mBiibiliyani. Nave ninnimananiha waataana saana ni apatthani ni amusi, hata atthu akina ahisiveliwaka ni anlupatthaka mwaha wa sookupali sahu isya. Eyo khennitikiniha, maana Yesu aahimmye wira: “Awanani awe mutthu t’ale a ntthoko nawe”. (Matheyo 10:36) Nave-tho, Yesu aaleihenrye wira hata nlevaka itthu sinceene mwaha wa ekeekhai, ninrowa waakhela sowaatta ovikana nlenve ahu!—Mmusome Marko 10:28-30.

12. Exeeni muYuda mmosa aalenve awe wira iixutte ekeekhai?

¹² Okhuma enamwane awe, muYuda oniihaniwa  Aaron aakupali wira ti vootthekeya oromola nsina na Muluku. Masi owo aaniphavela osuwela ekeekhai voohimya sa Muluku. Nihiku nimosa, Namoona a Yehova aahimuleela wira akhala wira aamuhela ivogaali ileetera iye sa eHeeberi sinooniherya nsina na Muluku, anwerya osoma so: “Yehova”. Aaron aahisiveliwa osuwela eyo, vano aahirowa osinagoga waaleela awiixuttihi! Owo uupuwela wira awiixuttihi ale yaamuhakalala osuwela nsina na Muluku, masi khiyaasiveliwe. Nto yaahimusenela ni omoomola. Nave amusi awe Aaron yaahimurukunuwela. Masi Aaron kheemerenrye itthu iyo omukhoottiherya wiixutta itthu sikina voohimya sa Yehova. Nto Aaron aahikhala Namoona a Yehova ni moororomeleya aahimurumeela Yehova okumi awe wotheene. Nave nuupuweleke wira waataana wahu ni atthu akina pooti oturukeya nuumala wiixutta ekeekhai.

13, 14. Marukunuxo xeeni nintthuneya ahu opaka nuumala wiixutta ekeekhai? Nvahe ntakiheryo.

¹³ Muupuwelo ni miteko soohiloka. Vaavo nniixutta ahu ekeekhai ni ovarihela muteko itthu siniixutta ahu mBiibiliyani, nihaana ophavela orukunuxa muupuwelo ahu ni sowiira sahu. Murummwa Pedru aalempe wira: “Ntoko anamwane òwìwelela, muhetteleké-tho makhalelo anyu òtakhala, yettenlyanyu khalai, okathi wahamusuwelanyu Muluku”. Nave ancerenrye oriki: “Mukhaleke atthu” oowaarya “ni mwettelo anyu wothene”. (1 Pedru 1:14, 15) Khalai epooma ya oKorinto, atthu anceene yaari anamuttompe. Ale yaakhala epooma ele yaahipaka marukunuxo maalupale wira akhale oowaarya vamaithoni va Yehova. (1 aKorinto 6:9-11) Olelo-va, atthu anceene annipaka marukunuxo awo wira yiixutte ekeekhai. Otthokiheryaka eyo, Pedru aalempe so: “Vekekhai, mòviriha mahiku manjene muttharaka sotakhala s’atthu ahinamini: mwahetta enamuttompe, mwahettela makhalelo anyu òtakhala, ohapaliwa, wipeliwa, owuryexa, wakokhorela amuluku ahikhanle ottittimihiwaka”.—1 Pedru 4:3.

¹⁴ Devynn ni Jasmine, yaari anamuhapaliwa mwa iyaakha sinceene. Nnaamwi Devynn aari contabilista, owo khaawerya ovara muteko mwaha woohapaliwa. Jasmine aahisuweliwa okhala mutthu oowaakuva onanariwa ni oowali. Nihiku nimosa, ohapaliwe ene Jasmine aahikumana mphironi mamisionaario manli aNamoona a Yehova. Anamoona ale yaaniphavela omusomiha Biibiliya. Nto okathi yaaronwe aya owannyawe esumana yaattharelana, yamphwanyale Jasmine ni Devynn ahapaliwe ene. Awo yoona wira mamisionaario ale khiyaarowa otthika. Mukwaha mukina mamisionaario ale yaatthinke aya, yaaphwanyale ahihapaliwe. Jasmine ni Devynn yaaniphavela wiixutta ekeekhai ya mBiibiliyani, nto moohipisa, yaahipacerya ovarihela muteko itthu yiixutta aya. Sihimanle myeeri miraru, awo yaahihiya ohapaliwa ni muhoolo mwaya yaahilepiha ekasamento aya. Atthu anceene a muttetthe ole yaahoona wira Jasmine ni Devynn yaahituruka makhalelo aya, nto eyo yaahiwiiriha atthu awo opacerya omusoma Biibiliya.

15. Etthu xeeni yootepa ovila ohiya nuumala wiixutta ekeekhai ni nthowa xeeni?

¹⁵ Soolema sihinimusivela Muluku. Wira nimusiveliheke Yehova nihaana ohiya wiirela mpantta soolema ni miteko  soohiloka, opaka eyo etthu yootepa ovila. Hata atthu yaale asuwenle wira itthu iyo khasinimusivela Yehova, onnaavila ohiya. Maana annixanka yuupuwelaka moota amusi aya anrowa aya woonela, ale anivarana aya muteko aahiiso apatthani aya. Awo aasuwela wira ikwaha sinceene atthu khanleva soolema saya, ntoko yoolema ele ya waavaha isatakha amusi aya akhwiiye. (Otumererya 14:1) Nto exeeni enrowa onikhaliherya opaka marukunuxo? Ninniixutta etthu yuulupale ni atthu a khalai, eyo piiyo, maKristau a wEefeso, yaawo yaapanke marukunuxo nuumala wiixutta ekeekhai.

16. Exeeni maKristau makina a wEefeso yaalenve aya?

¹⁶ Epooma ya wEefeso, yaahisareya onammunepani. Nuumala okhala maKristau, ale yaavara itthu sa okhwiri yaapanke exeeni? Biibiliya onihimya wira: “Atthu akina anjene, yapaka maxitta òtakhala, yahiruha ilívuru saya, khupaha oholo w’atthu othene. Esisapo aya ilívuru iya yahiphiyerya musurukhu wa paratha ntoko ikonto miloko mithanú [50.000]. Siso, molumo Àpwiya yanimwarela mulaponi n’uwerya wulupale, etepaka olipihiwa”. (Miteko 19:19, 20) MaKristau ale oororomeleya yaahileva iliivuru iye sa musurukhu munceene, nto Yehova aahaareeliha.

17. (a) Itthu xeeni nikhanle ahu ooleva wira niixutte ekeekhai? (b) Makoho xeeni ninrowa ahu waakhula muru onittharelana?

¹⁷ Itthu xeeni mulenve anyu wira mwiixutte ekeekhai? Akina a hiyo nooleva okathi ahu. Akina, aaleva eparakha yoothaaciri. Nave akina ahaahiya apatthani aya. Akina aaturuka muupuwelo ni mweettelo aya. Nave-tho, noohiya soolema ni sowiira sinimunanara Yehova. Noopaka marukunuxo awo, maana noosuwela wira ekeekhai ya Biibiliya terina efaita yuulupale ovikana sotheene nilenve ahu. Ekeekhai niixuntte ahu enninikhaliherya waataana ni Yehova, weiwo ori wootepa otthuneya. Wuupuwela mareeliho arina ahu mwaha woosuwela ekeekhai, onnintikiniha naawehaka akina ‘atumihaka’. Vaniweryaneya sai mutthu otumiha ekeekhai? Exeeni enrowa onikhaliherya ohipaka etthu eyo yootepa otakhala? Makoho ala ninrowa waakhula muru onittharelana.