1, 2. (a) Yesu aamwaakhunle sai Pedru? (Nwehe elatarato yoopacerya.) (b) Xeeni Yesu ohalaka omwaakhula siisaale?

AWIIXUTTI a Yesu yaahinyoonyiheya! Maana Yesu khaapanke ele yuupuwela aya, niire so, otikitherya omwene wa Isarayeli, masi aahimmye wira moohipisa aarowa ohaaxiwa ni wiiviwa. Murummwa Pedru taapacenrye olavula oriki: “Pwiya, Muluku ahitthuné eyo. Nnari! Etthu iyo ehokhumeleleni!” Yesu aakhunle wira: “Satana wé! Khuma vamaithoni vaka! Weyo onokererya: khunupuwela itthu sa Muluku, onupuwela s’atthu pahi”.​—Matheyo 16:21-23; Miteko 1:6.

² Waakhula wa Yesu onooniherya wira muupuwelo wa Yehova ti woovirikana ni muupuwelo wa elapo ela eneettihiwa ni Satana. (1 Yohani 5:19) Pedru aamutumererya Yesu wiisuupuwela mmansawe paahi, ntoko siniira aya anamunceene a olumwenku ola. Masi Yesu aanisuwela wira Yehova aaphavela wira iilokiherye mwaha wa ohaaxiwa ni okhwa aalipelela  awe. Wakhula wa Yesu, wooniherya wira aaneemererya muupuwelo wa Yehova ni aanikhootta muupuwelo wa olumwenku.

3. Xeeni vanivila aya weemererya muupuwelo wa Yehova ni okhootta muupuwelo wa mulaponi?

³ Ankhi hiyo? Niireke nnuupuwela ntoko Yehova, aahiiso ntoko atthu a elapo ela? Ntoko maKristau, ninnimananiha opaka itthu sinimusivela Muluku. Masi, sai voohimya sa itthu nnuupuwela ahu? Niireke ninnimananiha wuupuwela ntoko Yehova, niire so, woonaka itthu ntoko Yehova onoona awe? Eyo enivekela wiimananiha vanceene. Masi, ti vookhweya wuupuwela ntoko anuupuwela aya atthu a mulaponi, maana munepa wa elapo ela ohuulaana. (aÉfeso 2:2) Nave-tho, atthu a moolumwenkuni waasivela wiisuupuwela mmensaya paahi, nto vanniweryaneya hiyo otthara muupuwelo aya. Tthiri, ti voovila wuupuwela ntoko Yehova onuupuwela awe masi, ti vookhweya wuupuwela ntoko anuupuwela aya atthu a elapo ela.

4. (a) Exeeni enrowa okhumelela neemererya weettihiwa ni muupuwelo wa elapo ela? (b) Mwaha onittharelana, ninrowa wiixutta exeeni?

⁴ Akhala wira ninnihiya muupuwelo ahu weettihiwaka ni olumwenku ola, ninrowa okhalaka atthu a nrima, ni nnimuupuwelaka wira nookhalana ehakhi ya othanla ele eri yooloka ni yoohiloka. (Marko 7:21, 22) Tivonto, ti vootthuneya wiixutta wuupuwela “itthu sa Muluku”, ohiya “s’atthu”. Mwaha ola, onoonikhaliherya opaka eyo. Nave ninrowa woona wira othokorerya itthu ntoko Yehova onthokorerya awe onniniphwanyiha mureerelo. Nave-tho, ninrowa othokorerya moota woosyaka weettihiwa aahiiso ohapuxiwa ni muupuwelo wa olumwenku ola. Mwaha onittharelana, ninrowa wiixutta moota wookhalana muupuwelo wa Yehova myaha sikina ni otthara muupuwelo awe.

5. Xeeni atthu akina ahiniphavela aya oleeliwa etthu yoopaka?

⁵ Atthu akina khaniphavela oleeliwa etthu yoopaka. Awo anihimya wira: “Miyo kihaana opaka ele kimphavela aka”. Woonasa wene, awo aniphavela ohimya wira ahaana opaka soothanla saya maana aakhalana ehakhi yoopaka eyo. Nto khaniphavela okhanyereriwa waatakiha atthu akina aahiiso oleeliwa etthu yoopaka. * (Nwehe enoota.)

6. (a) Otaphuwa xeeni Yehova onivanhe awe? (b) Niireke otaphuwa iwo khorina mukano?

⁶ Ti vooloka osuwela wira, weemererya muupuwelo wa Yehova, khonnikhoottiherya okhalana moonelo ahu. AKorinto a nenli 3:17, onihimya so: “Apwiy’awo ti eroho [munepa]: vavo vankhalaya eroho [munepa wa Yehova], vavo-tho onniphwanyaneya otaphuwa”. Yehova oonivaha othanla mootaphuwa wira nikhale atthu onaaphavela awe. Hiyo pooti okhalana moonelo ahu ni othanla itthu sinnisivela. Maana Yehova onipanke siiso. Masi eyo khentaphulela wira otaphuwa wahu khorina mukano. (Mmusome 1 Pedru 2:16.) Okathi nimphavela ahu osuwela etthu yooloka ni yoohiloka, Yehova oniphavela wira nirumeeleke Nuulumo nawe. Niireke eyo ennikhoottiherya  otaphuwa aahiiso enoonikhaliherya?

7, 8. Woona itthu ntoko Yehova onoona awe, niireke onnikhoottiherya etthu? Nvahe nlikanyiho.

⁷ Nrowe nivahe nlikanyiho nimosa. Nkahaya nwuupuwele anamuyari aneererya owiixuttiha anaaya makhalelo ooloka. Awo pooti owiixuttiha okhala oororomeleya, ovara muteko ni nthiti, ni owoonela vatthu akina. Opaka eyo khahiyo ohaaxa. Masi anamuyari awo aniphavela mureerelo wa anaaya. Maana vaavo anamwane aninnuwa aya ni okhuma vate, anrowa opakaka soothanla saya. Akhala wira anootthara makhalelo ooloka yiixuttihiwa aya, anrowa opakaka soothanla sooloka, osyaka mixankiho sinceene, ohithanana nnakhala wooceya.

⁸ Ntoko tiithi ooreera murima, Yehova oniphavela wira anaawe akhalane okumi wooloka. (Yesaya 48:17, 18) Tivonto onniixuttiha awe okhalana mweettelo wooloka ni moota wowaathokorerya akina. Nave onniniixuttiha woona itthu ntoko onoona awe, ni otthara malakiheryo awe. Opaka eyo khahiyo ohaaxa. Maana onninikhaliherya okhalana ankhili ni opaka soothanla sooloka. (Esalimo 92:6; Miruku 2:1-5; Yesaya 55:9) Nnoowerya okhalana moonelo ahu ni opaka soothanla sinrowa onihakalaliha. (Esalimo 1:2, 3) Tthiri, vaavo nnuupuwela ahu ntoko Yehova, ninniphwanya mareeliho manceene!

9, 10. Exeeni enooniherya wira muupuwelo wa Yehova tori muulupale ovikana wa olumwenku ola?

⁹ Nthowa nikina ninniiriha ophavelaka wuupuwela ntoko Yehova, okhala wira muupuwelo awe ti muulupale ovikana wa mulaponi. Olumwenku onnivaha malakiheryo voohimya sa mweettelo, moota woohakalala vatthokoni, ophwanya muteko wooloka ni itthu sikina. Masi malakiheryo manceene olumwenku onivaha aya, annivirikana ni muupuwelo wa Yehova. Mwa ntakiheryo, ikwaha sinceene olumwenku onaatumererya atthu ophavela itthu sinaasivela paahi ni woona wira orupihana woohiloka khahiyo etthu yootthekeya. Okathi mukina vanihimmwa wira anamathelana pooti omwalana voohikhala mathowa ooloka akhala wira opaka eyo enimwaaphwanyiha ohakalala. Malakiheryo awo annivirikanya ni ele Biibiliya onniixuttiha awe. Olelo-va, niireke miruku sa olumwenku ola ti soovareleya muteko ovikana sa Biibiliya?

¹⁰ Yesu aahimmye so: “Ankhili annòneya okhala òloka mwaha wa miteko saya”. (Matheyo 11:19) Nnaamwi etekonologia eronwe ene vahoolo, olumwenku khowenrye omaliha mixankiho suulupale sinnikhoottiherya ohakalala, ntoko ikhotto, nthalu ni ikrime. Nave olumwenku khonikhoottiherya orupihana woohiloka. Nto atthu anceene anneemererya wira mweettelo owo onnihonona itthoko, okumiherya iretta, ni maxakha makina. Ankhi miruku sa Yehova? MaKristau aneemererya  moonelo wa Yehova voohimya sa ele enihakalaliha etthoko, annisyaka mixankiho ni annaataana saana ni atthu a Yehova, olumwenku wotheene. (Yesaya 2:4; Miteko 10:34, 35; 1 aKorinto 6:9-11) Eyo enooniherya wira muupuwelo wa Yehova tori muulupale ovikana wa olumwenku ola.

11. Muupuwelo wawani Moise eemerenrya awe, ni exeeni yaakhumelenle?

¹¹ Arumeyi oororomeleya a khalai, yaanisuwela wira muupuwelo wa Yehova ti muulupale. Mwa ntakiheryo, nnaamwi Moise iixuttihiwe “osuwela wothene w’atthu a wEjitu”, aahisuwela wira miruku seekeekhai sinikhuma wa Yehova. (Miteko 7:22; Esalimo 90:12) Tivonto anvekenle awe Yehova wira: ‘Mukoniherye ephiro anyu’. (Okhuma 33:13, Biblya Exirima) Okhala wira Moise aaheemererya weettihiwa ni muupuwelo wa Yehova, vano Yehova aahimurumeela mwa enamuna ya vameekhaaya wira opakeke yootthuna awe, ni aahimuttittimiha omuhimyaka okhala mulopwana aarina waamini wuulupale.​—aHéberi 11:24-27.

12. Paulo aarumeela malakiheryo xeeni okathi aapaka awe soothanla?

¹² Murummwa Paulo aari mutthu ankhili, aasomme ni aalavula oratteene mattaava manli. (Miteko 5:34; 21:37, 39; 22:2, 3) Owo khaatthara miruku sa mulaponi, masi aatthara malakiheryo a Nuulumo na Muluku okathi aapaka awe soothanla. (Musome Miteko 17:2; 1 aKorinto 2:6, 7, 13.) Nto eyo yaahimukhaliherya okhumela saana okathi aalaleerya awe ni aaniwehexexa etthuvo ya muhoolo.​—2 Timótheyo 4:8.

13. Tani orina muritti woolokiherya muupuwelo ahu wira nooneke itthu ntoko Yehova onoona awe?

¹³ Mwekeekhai, muupuwelo wa Muluku ti muulupale ovikana wa mulaponi. Akhala wira nnootthara malamulo a Muluku, ninrowa ohakalala ni okhumela saana. Masi Yehova khonnikhanyererya wira nuupuweleke ntoko yena. “Murumeyi òroromeleya ni ànkhili” khoneettelela muupuwelo ahu, nnakhala axitokweene khanipaka eyo. (Matheyo 24:45; 2 aKorinto 1:24) Maana otheene ahu nookhalana muritti woolokiherya muupuwelo ahu wira nooneke itthu ntoko Yehova onoona awe. Ninrowa opaka sai eyo?

14, 15. (a) Nihaana wuupuwelela exeeni wira nooneke itthu ntoko Yehova onoona awe? (b) Xeeni nintthuneya ahu osyaka muupuwelo wa mulaponi? Nvahe ntakiheryo.

¹⁴ ARoma 12:2 onihimya wira: “Muhitthareké mwettelo w’atthu a vathí, masi murukunuxe mukhalelo anyu, mùlule osuwela wanyu, wira nwerye osuwela sintthunawe Muluku, muthanlaka etthu ekhanle yorera, enimusivela Muluku ni ya xariya”. Yoolepa ela enniixuttiha wira, hata muupuwelo ahu weettihiwa ni itthu sikina nihinatthi wiixutta ekeekhai, nnoowerya oturuka wira olikaneke ni muupuwelo wa Muluku. Nnaamwi eyareliwo ahu ni sookumanana sa mweekumini sihapuwelaka moota nnuupuwelo ahu, masi muupuwelo ahu pooti oturukeya. Nto eyo enimwiiraneya mwaha wa itthu nnuupuwela ahu. Tivonto, akhala wira nookhalana muupuwelo wa Yehova, nnimooniherya wira moonelo awe tori wooloka okathi wotheene. Nto ninrowa ophavelaka woona itthu ntoko Yehova onoona awe.

¹⁵ Wira nuupuweleke ntoko Yehova onuupuwela awe, nihaana osyaka otthara “mwettelo  w’atthu a vathí”. Eyo enooniherya wira nihaana osyaka oweha, osoma ni owiriyana itthu sotheene sihinivarihana ni muupuwelo wa Yehova. Wira niiwexexe otthuneya waya opaka eyo, nrowe niwehe ntakiheryo na yoolya. Mutthu oniphavela okhalana ekumi yooloka, ohaana olya soolya sooloka. Nto wiimananiha wawe khonrowa okhalana efaita, akhala wira onimoolya soolya soohiloka. Moolikanasa, wiimananiha wahu okhalana muupuwelo wa Yehova khonrowa okhalana efaita, akhala wira ninneemererya weettihiwa ni muupuwelo wa olumwenku.

16. Nihaana osyaka exeeni?

¹⁶ Niireke nnoowerya osyaka moomalela muupuwelo wa mulaponi? Nnaari, okhala wira muupuwelo wa mulaponi ohuulaana, nto hiyo khanniwerya omaliha. (1 aKorinto 5:9, 10) Okathi ninlaleerya ahu, ninniwiiwa atthu ahimyaka miyuupuwelo soohiloka aahiiso sookupali sowoothiwa. Nnaamwi nihirowaka osyaka moomalela miyuupuwelo iyo, khanintthuneya ovikaniha wuupuwelela nnakhala weemererya. Ntoko Yesu, nihaana waakuvela okhootta muupuwelo woohiloka Satana oniphavela awe wira nikhalane. Nave wira niikhapelele, nihaana osyaka okhala ni atthu antumererya muupuwelo wa olumwenku ola.​—Musome Miruku 4:23.

17. Ninrowa osyaka sai opahula muupuwelo ahu?

¹⁷ Mwa ntakiheryo, nihaana waathanla mwa miruku apatthani ahu. Biibiliya onnilopola wira opatthana ni atthu ahinimukokhorela Yehova, onooniiriha wuupuwelaka ntoko anuupuwela aya. (Miruku 13:20; 1 aKorinto 15:12, 32, 33) Nave nihaana othanla saana matthekulelo ahu. Vaavo ninkhootta ahu matthekulelo aniixuttiha othatuwa, owali, orupihana woohiloka, ninnisyaka opahula muupuwelo ahu wira ‘ohiwanane [ni] osuwela wa Muluku’.—2 aKorinto 10:5.

18, 19. (a) Xeeni nintthuneya ahu ovaha ephoole wira nihihapuxiwe ni muupuwelo ohinooniheriwa mooluluwanya? (b) Makoho xeeni anitthuneya ahu wiikoha ni nthowa xeeni?

 ¹⁸ Nave-tho, nihaana woonela ni okhootta muupuwelo wa olumwenku onikumiheriwa moolavilavi. Mwa ntakiheryo, irelatoorio sikina sinnooniheriwa mwa enamuna enikhaliherya epoliitika. Nave soohimmwa sikina sinnitumererya soophavela ni soolukama sinaatikiniha atthu. Iliivuru ni ifilme sinceene, sinnitumererya muupuwelo woophavela okhala “oopacerya” aahiiso “wira emusi aka teri opuro woopacerya”. Nto muupuwelo owo pooti okhalaka ntoko ti wookhalela, wooreerela ni wa xariya. Masi miyuupuwelo iyo, sinninvirikanya Biibiliya. Maana owo, onihimya wira etthoko ahu enrowa ohakalala akhala wira ninnimphenta Yehova ovikana itthu sotheene. (Matheyo 22:36-39) Nnaamwi ifilme sinceene sa anamwane sikhalaka ntoko wira ti sooloka, pooti owiiriha wuupuwelaka orupihana woohiloka.

¹⁹ Nto eyo kheniphavela ohimya wira nihitthekuleke mooreerela. Masi nihaana wiikoha so: ‘Kiireke kinnoonela miyuupuwelo sa mulaponi hata sihooniheriwaka mooluluwanya? Kiireke kinniwaakiherya anaaka ni miyo wira nihiweheke iprograma sikina sa TV? Kiireke kinnaakhaliherya anaaka okhalana muupuwelo wa Yehova wira ahihapuxiwe ni itthu aniiwa aya aahiiso woona, sa olumwenku ola?’ Akhala wira ninnoona ovirikana okhanle muupuwelo wa Muluku ni wa olumwenku ola, nnoowerya osyaka ‘otthara mwettelo w’atthu a vathí’.

20. Ninrowa omusuwela sai ole onneettiha?

²⁰ Nihaana wuupuwela wira mihupi ninwiriyana ahu sinkhuma mapuro manli paahi. Mihupi sikina sinkhuma wa Yehova, masi sikina sinkhuma wa Satana ni olumwenku awe. Vano ti pani oninwiriyana anyu? Tuule onaakhelela anyu soohimmwa sawe. Akhala wira nnimweemererya miyuupuwelo sa olumwenku ola, ninrowa wuupuwelaka ntoko anuupuwela aya anamunceene a elapo ela. Tivonto, ti vootthuneya vanceene okhalana ephoole wira nithanleleke itthu siniweha ahu, osoma, owiriyana ni wuupuwela.

21. Mwaha onittharelana, ninrowa wiixutta exeeni?

²¹ Mwaha ola, nihiixutta wira, wira nikhalane muupuwelo wa Yehova, nihaana osyaka muupuwelo wa olumwenku. Nave nihaana ovarerya muupuwelo wa Muluku wira muupuwelo ahu olikaneke ni wawawe. Mwaha onittharelana, ninrowa wiixutta moota woopaka eyo.