1, 2. Muteko xeeni wooxankiha Yoxuwa aavahiwe awe nuumala Moise okhwa?

YEHOVA aahimuleela Yoxuwa wira: “Moise, murumeyi aka, ohòkhwa. Vano nyuwo nvenyé n’atthu ala othene, mulapuwe muró Yordani: mukeleke elapo enrowaka wavaha atthu a Isarayeli”. (Yoxuwa 1:1, 2) Tthiri eyo yaahimuxankiha Yoxuwa, yoowo aavirinhe iyaakha 40 omukhaliheryaka Moise!

² Moise aahaahoolela aIsarayeli okathi munceene, masi vano Yoxuwa taarowa waahoolelaka. Nto, Yoxuwa aaniikoha akhala wira atthu ale yaarowa omuttittimihaka ntoko muhooleli aya. (Otumererya 34:8, 10-12) Elavulaka yoolepa ya Yoxuwa 1:1, 2, eliivuru emosa enimutthokiherya Biibiliya, eni: okhuma khalai mpakha olelo-va, oranttelana wa mamwene etthu yooxankiha ni yoovelaveliha vanceene.

3, 4. Muluku aamureelinhe sai Yoxuwa mwaha woomuroromela yena, nto niikoheke exeeni?

 ³ Nnaamwi Yoxuwa aaxankale, owo aanimuroromela Yehova ni otthara malakiheryo aavahiwe awe. (Yoxuwa 1:9-11) Muluku aahimureeliha Yoxuwa mwaha woomuroromela, nto aahirumeela nlaikha wira nimulakiheryeke Yoxuwa ni aIsarayeli. Ti vookhalela ohimya wira, nlaikha nne naari Nsu, eyo piiyo, Mwaana oopacerya a Muluku.​—Okhuma 23:20-23; Yohani 1:1.

⁴ Yehova aahikhaliherya nloko na aIsarayeli wira ntthareke marukunuxo ale, maana vano Yoxuwa taarowa okhala muhooleli aya musya. Olelo-va, anniiraneya marukunuxo maalupale. Hiyo pooti wiikoha so: ‘Vaavo mutthenkeso wa Muluku onivikaniha aya orowa vahoolo, niireke nihaana ororomela ohoolela wa Yesu yoowo ori muhooleli ahu?’ (Mmusome Matheyo 23:10.) Wira naakhule nikoho nna, nihaana othokorerya moota Yehova aahoolenle awe atthu awe khalai okathi wa marukunuxo.

5. Yowiiraneya xeeni yootikiniha Yoxuwa aakumanne awe waattamela epooma ya oYerikho? (Nwehe elatarato yoopacerya.)

⁵ Moohipisa nuumala aIsarayeli olapuwa muro Yordani, Yoxuwa aahikumana etthu yootikiniha. Waattamela epooma ya oYerikho, Yoxuwa aahimoona mulopwana aakunxe ekatana. Nto Yoxuwa, aahimukoha oriki: “Nyuwo mw’àwihu, walá mwá nwanan’ihu?” Yoxuwa aahitikinihiwa vaavo mulopwana ole aahimmye awe wira aari “mukhulupale ànakhotto Àpwiya”, eyo piiyo, nlaikha naawaakiherya atthu a Muluku. (Mmusome Yoxuwa 5:13-15.) Nnaamwi mapuro makina Biibiliya ohimyaka wira Yehova aanilavula ni Yoxuwa, vanikhala ntoko wira Muluku aarumeela nlaikha wira nilavule ni Yoxuwa.​—Okhuma 3:2-4; Yoxuwa 4:1, 15; 5:2, 9; Miteko 7:38; aGalasia 3:19.

6-8. (a) Xeeni malakiheryo a nlaikha yaakhala aya ntoko khiyaalonke? (b) Ninsuwela sai wira malakiheryo ale yaari ookhalela ni a miruku? (Nwehe enoota.)

⁶ Nlaikha nle naahimuleela Yoxuwa ele aatthuneya awe opaka wira oxintte muttetthe wa oYerikho. Woonasa wene, malakiheryo ale yaakhala wira khiyaalonke. Mwa ntakiheryo, nlaikha naamulenle Yoxuwa wira anakhotto awe otheene, yaahaana wunnuwihiwa. Eyo enooniherya wira yanvira mahiku vakhaani ahiwanne. Niireke ole waari okathi wooreerela wira yinnuwihiwe anakhotto ale?—Maphattuwelo 34:24, 25; Yoxuwa 5:2, 8.

⁷ Waanyiheryasa, anakhotto ale yaaniikoha ariki: ‘Akhala wira awanani ihu animoorwa ontuphela, ninrowa waakiherya sai itthoko sahu?’ Masi, yaahiiraneya etthu yahaalipelela aya! Atthu ale a oYerikho, khiyaatuphenle aIsarayeli, okhala wira yaahoova. Yoxuwa 6:1 onihimya wira: “Mikhora s’oYerikhó sarowaliwa n’ulipihiwa vowòviwa atthu a Isarayeli. Khavo àwerya okela nnákhala okhuma”. Tthiri, ihapari iya saahiwiiriha aIsarayeli otepa ororomela malakiheryo a Muluku!

⁸ Nlaikha nle naahimuleela Yoxuwa wira aIsarayeli khiyaarowa owana ni atthu a oYerikho. Masi, yaahaana orukurerya epooma ele emaara emosa khula nihiku mpakha mahiku 6. Nto nihiku na neethanu nenli [7], yaahaana orukurerya muttetthe ole imaara 7. Waanyiheryasa, anakhotto a  Yoxuwa yuupuwela so: ‘Ninhaawa mahala ene!’ Masi Muhooleli a aIsarayeli aanisuwela etthu yaarowa wiiraneya! Otthara malakiheryo a muhooleli aya, waanilipiha waamini wa aIsarayeli, tivonto, awo khiyaawanne ni anakhotto a oYerikho.​—Yoxuwa 6:2-5; aHéberi 11:30. * (Nwehe enoota.)

9. Xeeni vanitthuneya ahu otthara malakiheryo nnaakhela ahu ni mutthenkeso wa Muluku? Nvahe ntakiheryo.

⁹ Exeeni eniixutta ahu ni yowiiraneya ela? Nniixutta wira ikwaha sikina, mutthenkeso wa Yehova onnirumeela enamuna esya yoopaka itthu, woonasa wene, nihiniiwexexa ahu saana. Mwa ntakiheryo, pooti wira khinoona oreerela waarumeela apareelyo eletroniko wira nipakeke yoosoma ahu, olaleerya aahiiso omithukumanoni. Masi vano ninnoona mareeliho anikhumelela mwaha woorumeela ikaruma iyo. Vaavo nnoona ahu sookhumelela iyo sooreera sa marukunuxo awo, waamini wahu onnilipa ni ninnitepa wiiraana ni anna ni arokora.

10. Ti pani aakhalihenrye anna a nikhuuru noolamulela oYerusalemu othokorerya mwaha a winnuwihiwa?

¹⁰ Nuuvira iyaakha 13, Mmalapo Kornelio okhanle ene muKristau, nlelo maKristau akina aYuda, yaahimya wira atthu yaaphavela okhala maKristau yaahaana winnuwihiwa. (Miteko 15:1, 2) Epooma ya wAntiyokiya, anna yaaninyakulihana voohimya sa mwaha ola. Tivonto, axitokweene yaahinvekela murummwa Paulo orowa waakoha  anna a nikhuuru noolamulela oYerusalemu. Masi tani aapanke marehereryo ale wira Paulo orowe oYerusalemu? Paulo aatthokihenrye so: “Kahirowa weiwo kimwaleliwene ni Muluku”. Veekeekhai, aari Kristu aahoolela mwaha ole wira waakhuliwe ni anna a nikhuuru noolamulela.​—aGalasia 2:1-3.

11. (a) Moonelo xeeni nlelo yaarina aya aYuda akina voohimya sa winnuwihiwa? (b) Moowiiyeviha, Paulo aakhalihenrye sai axitokweene a oYerusalemu? (Nwehe enoota.)

¹¹ Kristu aahaakhaliherya anna a nikhuuru noolamulela wiiwanyeiha wira atthu yahaakhanle aYuda, khiyaatthuneya winnuwihiwa wira akhale maKristau. (Miteko 15:19, 20) Hata vari siiso, nuuvira iyaakha, maKristau aYuda anceene, yaaniwinnuwiha anaaya aaxilopwana. Nuumala-vo, axitokweene a oYerusalemu yaahileeliwa wira Paulo khaatthara Nlamulo na Moise. Nto axitokweene yaahinvekela Paulo opaka etthu yooniherya wira aanittittimiha Nlamulo. * (Nwehe enoota.) (Miteko 21:20-26) Awo yanvekenle wira aakuxe alopwana 4 aaroihe otemplo wira Paulo ooniherye ottittimiha wawe Nlamulo. Paulo anwerya ohimya wira: ‘Nkinoona okhalela waya! Xeeni okivekelaka opaka eyo? Okhala wira aYuda tahiniiwexexa mwaha ola wa winnuwihiwa, awo tarina muxankiho’. Masi Paulo aanisuwela wira axitokweene yaaphavela wira maKristau otheene yiiraaneke, nto moowiiyeviha aahitthara malakiheryo aya. Woonasa wene, hiyo pooti wiikoha nthowa naamwiiriha Yesu ohiya mwaha ole ovikanihaka okathi munceene, hata Nlamulo na Moise naamanle nuumala Yesu wiiviwa.​—aKolosi 2:13, 14.

12. Woonasa wene, xeeni Kristu ohiyaka ovira okathi ohinatthi ophuka mwaha wa winnuwihiwa?

¹² Pooti ovira okathi wira nlimalele malakiheryo a niinaano. Nto waahaana ovira okathi wira aYuda akina yeemererye wira vano khiyaakhanyereriwa otthara Nlamulo na Moise. (Yohani 16:12) AYuda akina waanaavila weemererya wira winnuwihiwa khahiyo ethoonyeryo yoowi yaahaataana ni Muluku. (Maphattuwelo 17:9-12) Akina yoova woomoliwa mittetthe yaakhala aya mwaha wookhala oovirikana. (aGalasia 6:12) Masi, nuuvira okathi Kristu aahaavaha malakiheryo omurumeelaka murummwa Paulo.​—aRoma 2:28, 29; aGalasia 3:23-25.

13. Olelo-va, exeeni enrowa onikhaliherya otthara ohoolela wa Kristu?

¹³ Olelo-va, Kristu onnivikaniha ohoolela muloko wa eKristau. Tivonto, vaavo mutthenkeso onipaka aya marukunuxo nihiniiwexexa ahu, nihaana wuupuwela moota Kristu aahoolela awe atthu a Muluku khalai. Hata mahiku a Yoxuwa aahiiso a arummwa, vannooneya wira okathi wotheene Kristu onnivaha malakiheryo a miruku wira  owaakiherye atthu a Muluku, olipiha waamini waya ni wira avikaniheke wiiraana.​—aHéberi 13:8.

14-16. Moota xeeni malakiheryo a “murumeyi òroromeleya ni ànkhili” anooniherya aya wira Kristu omphavela olipiha waamini wahu?

¹⁴ Mahiku ala, “murumeyi òroromeleya ni ànkhili” onninivaha malakiheryo ootthuneya okathi wooreerela. (Matheyo 24:45) Malakiheryo awo anithoonyerya wira nlelo Yesu onninikhapelela. Marc, yoowo orina anamwane axexe, onihimya wira: “Satana onneererya ohonona itthoko ophavelaka otteettheiha muloko. Nto itthoko sinnilipa ni eprograma ya omulompa Muluku khula esumana, okhala wira ahooleli a itthoko annitumereriwa okhapelela itthoko saya!”

¹⁵ Vaavo nnoona ahu wira Kristu onninihoolela, nnoosuwela wira omphavela olipiha waamini wahu. Mwa ntakiheryo, mutokweene oniihaniwa Patrick oni: “Wanipacerya, atthu akina waanaavila othukumana igrupu saamukhaani wira yalaleerye wuumalani wa esumana”. Masi, owo onihimya wira marukunuxo ale anooniherya wira Yesu onnimukhapelela khula mutthu mmulokoni. Mwa ntakiheryo, anna ni arokora akina oowuuliwa muru aahiiso yahaaluttuweliwa olaleerya annoona wira vano tootthuneya ni ta faita. Eyo yoolipiha vanceene waamini waya.

¹⁶ Nave, Kristu onninikhaliherya ovikaniha oluttuweliwa olaleerya, muteko yoowo ori wootepa otthuneya olelo-va. (Mmusome Marko 13:10.) André, mutokweene a niinaano, onniimananiha otthara malakiheryo masya a mutthenkeso wa Yehova. Owo onihimya wira: “Ovukuliwa anna oBetheli, onninuupuxerya wira okathi ohanle ori vakhaani ni nihaana olaleya ihapari mowaakuveya”.

17, 18. Xeeni nintthuneya ahu oweha inamuna ninttottela ahu mureerelo marukunuxo?

¹⁷ Malakiheryo ninvahiwa ahu ni Yesu Kristu, Mwene ahu onilamulela, anoonikhaliherya vano ni muhoolo. Mmananihe woona mareeliho akhumelenle mwaha wootthara marukunuxo a niinaano. Okathi wa omulompa Muluku vatthokoni, muthokoreryeke moota marukunuxo a mithukumano ni muteko woolaleerya akhalihenrye aya etthoko anyu.

¹⁸ Etthu enrowa onikhaliherya otthara malakiheryo ni ophwanya ohakalala, wuupuwela wira wiiwelela malakiheryo a mutthenkeso wa Yehova anniphwanyiha mareeliho manceene. Mwa ntakiheryo, okhala wira khasinimpirimiriwa iliivuru sinceene ntoko khalai, eyo enniiriha ohirumeeliwa musurukhu munceene. Nave, okhala wira ninrumeela etekonologia, ninnikhaliherya waaphwanyiha ihapari sooreera atthu anceene. Niireke ninnirumeela vanceene iliivuru eletroniko ni iviidiyu? Opaka eyo enamuna emosa nimmukhaliherya ahu Kristu, yoowo oniphavela wira nirumeeleke mwa miruku mireerelo sa mutthenkeso.

19. Xeeni ninkhaliherya ahu ohoolela wa Kristu?

¹⁹ Vaavo nintthara ahu ohoolela wa Kristu, ninnaakhaliherya anna ni arokora olipiha waamini waya ni otepa wiiraana. Olavulaka marukunuxo a niinaano a ovukuliwa anna anirumeela oBetheli, André ohimmye wira: “Moonelo wooloka yoonihenrya aya anna arumenle oBetheli, onnikiiriha omuroromela ni omuttittimiha [Kristu]. Awo aakhalana murettele maana annivikaniha otthara ekaaro ya Yehova ahakalalaka ni khula yoothanleliwa anvahiwa aya”.

20, 21. (a) Xeeni nintthuneya ahu omuroromela Kristu, Muhooleli ahu? (b) Nikoho xeeni ninrowa ahu waakhula mwaha onittharelana?

²⁰ Moohipisa, Muhooleli ahu Yesu Kristu, onrowa omaleliha ‘oxintta’ wawe wira ‘opake [itthu] sothamaleya’. (Wisupulula 6:2; Esalimo 45:5) Masi olelo-va, onninlokiherya wira navareke miteko elapo esya ntoko owiixuttiha atthu anrowa ohihimuxiwa ni wiiriha elapo okhala eParayiisu.

²¹ Vaavo nintepa ahu omuroromela Muhooleli ni Mwene ahu hata sinikhumelelaka mixankiho, owo onoonihoolela mpakha elapo esya. (Musome Esalimo 46:2-4.) Olelo-va, marukunuxo pooti onixankiha otepexa wene akhala wira khinaawehererya. Akhala wira eyo enimwiiraneya, ninrowa okhalana sai murettele wa mmuupuweloni ni olipiha omwaamini wahu Yehova? Nikoho nna ninrowa waakhula mwaha onittharelana.