1, 2. Exeeni Diabo aarumenle awe wira aakumiherye maxakha apinaatamu?

ITTHU sikumiheriwe niinaano, ntoko atelefoni, maluuxu, ikaaro ni ixilera, sinnikhaliherya vanceene. Masi itthu sikina ntoko ikapwitthi, miina, soona ni ibomba, sinnikumiherya mixankiho. Yookhala etthu ya khalai ovikana itthu iyo enitepa waakumiherya maxakha apinaatamu. Etthu xeeni? Wootha! Olavula itthu sowootha onitaphulela ohimya etthu ninsuwela ahu wira khahiyo ekeekhai, niphavelaka omuhapuxa aahiiso onwoka mutthu. Ti pani opacerinhe wootha? Diabo topacerinhe! Yesu aahimuhimya Diabo okhala “tithi a wothá”. (Mmusome Yohani 8:44.) Diabo aahimmye silini wootha woopacerya?

² Diabo aahimmye iyaakha ikonto sinceene sivinre ojardim ya wEedeni. Adamu ni Eva yaahikhalana ekumi yoohakalaliha mParayiisu yaavahiwe aya ni Yehova. Masi Muluku aahaaleela wira yalya “mihokorokho sa mwirí onsuweliha oreriwa n’utakhaliwa” yaamookhwa. Hata Satana aasuwela eyo, aahirumeela enowa omuleela Eva wira: “Nnari, khamunokhwa!” Tthiri nno waari wootha woopacerya. Nave Satana aahimmye  wira: “Muluku orosuwela wira nihiku ninkelanyu olya, maitho anyu anotthukuwa, nyuwo munokhala ntoko Muluku, musuwelaka oreriwa n’utakhaliwa”.​—Maphattuwelo 2:15-17; 3:1-5.

3. (a) Xeeni wootha wa Satana ori aya wootepa otakhala? (b) Nto exeeni ekhumelenle?

³ Wootha wa Satana ti wootepa otakhala, maana aanisuwela wira Eva amukupali, khulya muhokorokho ole, Eva aamookhwa. Tthiri eyo ti etthu yiiraneyale. Vano Eva ni Adamu khiyiiwelenle yooruma ya Yehova, nto muhoolo mwaya yaahikhwa. (Maphattuwelo 3:6; 5:5) Nave, mwaha wa etampi ya Adamu “okhwa ohaphwanya atthu othene”. Tthiri ‘ohawerya atthu othene, hatá ale yahatthenke volikana n’uhìwelela w’Adamu’. (aRoma 5:12, 14) Ti maana aya hiyo nranve ahu etampi ni nihinkhala ahu mahiku otheene ntoko Muluku aaphavela awe. Masi “iyakha miloko mithanu na mili [70] sinniphiyerya ekumi ahu: nakhalanaka ikuru sinjene, nnophiya iyakha miloko mithanu na miraru [80]. Vano olekela waya, ovelavela n’uhawa pahi”. (Esalimo 90:10) Itthu iya sotheene sihiiraneya mwaha wa wootha wa Satana!

4. (a) Makoho xeeni nintthuneya ahu osuwela waakhuliwa waya? (b) Moovarihana ni Esalimo 15:1, 2, tani aniphwanela okhala apatthani a Yehova?

⁴ Omulavulaka Satana, Yesu aahimmye so: “Owo khanakhale n’ikekhai, okhala wira mwa yowo khivo ekekhai”. Satana khoturukeyale. Nlelo onnivikaniha ‘owototha atthu othene’. (Wisupulula 12:9) Masi, hiyo khanimphavela owokiwa ni Satana. Tivonto nihaana osuwela waakhuliwa wa makoho ala mararu: Olelo-va, Satana onaawoka sai atthu? Xeeni atthu anootha aya? Ni xeeni okathi wotheene nintthuneya ahu olavula ekeekhai, wira nihiyeleele wataana wahu ni Yehova?​—Musome Esalimo 15:1, 2.

5. Olelo-va, Satana onaawoka sai atthu?

⁵ Nnoowerya osyaka owokiwa ni Satana. Murummwa Paulo aahimmye so: “Nosuwela sana simphavelawe [Satana]”. (2 aKorinto 2:11) Noosuwela wira Satana toneettiha olumwenku wotheene, ohela muhina itiini sowootha, anamalamulela a makhwankwa ni olumwenku wa nakoso wa nrima. (1 Yohani 5:19) Nto khanintikhina woona wira Satana ni malaikha awe ootakhala anniwiiriha atthu oowerya “wotha”. (1 Timótheyo 4:1, 2) Mwa ntakiheryo, ikwaha sikina alipa a nakoso annaawoka atthu ahimyaka wira itthu antumiha aya ti sooloka variki sihilonke, aphavelaka owiiyerya musurukhu.

6, 7. (a) Xeeni vari aya vootakhala ahooleli a itiini waawoka atthu? (b) Soowootha xeeni nwiiwale anyu ahooleli a itiini ahimyaka?

⁶ Ti vootepa otakhala vaavo ahooleli a itiini anaawoka aya atthu. Nthowa xeeni? Mwaha woowi, akhala wira mutthu onookupali soowiixuttiha saya sowootha, onapaka itthu Muluku oninyokha awe, mutthu owo pooti ohikela elapo esya. (Hoseya 4:9) Yesu aanisuwela wira ahooleli a itiini a mahiku awe yaanaawoka atthu. Moolipa murima aahaaleela wira: “Motakhaliwa nyuwo, awixuttihi a ikano n’aFarisi, anawothe! Nyuwo munnettetta ilapo n’iphareya, wira mumphwanye nnákhala mutthu mmosá, òmukhaliha mwixutti anyu: mwamphwanyá vale, munnimukhaliha mwana òmoroni”,  eyo piiyo, opwetexiwa moohilipelela ohihimuxiwa. (Matheyo 23:15) Nave, Yesu aahimmye wira ahooleli ale yaalikana ni tiithi aya Diabo, yoowo ori “mulipa-òwiva”.​—Yohani 8:44.

⁷ Olelo-va, khareere ahooleli a itiini. Awo annivahiwa maihaneliwo a nttittimiho oowi: mapastoore, mapaatiri, mapaapa, mwaaliimo aahiiso mahanifa ni maihaneliwo makina. Ntoko aFarisi, awo khaniixuttiha ekeekhai ya Nuulumo na Muluku, masi ‘annitthukela ekekhai mwa sotakhala saya’. (aRoma 1:18, 25) Nave annootha ariki: “mutthu onoopowa omosa”, apinaatamu aakhalana erooho ehinikhwa, mutthu akhwa onthatuwa etthu ekina, Muluku onniweemererya ale anrupihana alopwanaru aahiiso athiyanaru ni othelana atthu a enoka emosaru.

8. Moohipisa, wootha xeeni ahooleli eepoliitika anrowa olaleya? Nto ninrowa opaka exeeni?

⁸ Nave, anapoliitika annirumeela wootha wira yaahapuxe apinaatamu. Moohipisa, ahooleli a epoliitika anrowa olaleya wira “nokhalana murettele [ni ovareleleya]”, nto iwo onrowa okhala wootha wuulupale. Masi ‘onimwarwela opweteya nananoru’. Tivonto nihikhala-khale naakupaliki ahooleli awo eepoliitika, anihimya wira itthu sinooloka. Ekeekhai tiila: “Nyuwo mwaxinene mosuwela sana wira orwa w’Apwiya onolikana n’urwa wa nawiye, ohiyu”.​—1 aTesalonika 5:1-4.

9, 10. (a) Xeeni atthu anootha aya, ni exeeni enikhumelela? (b) Niireke atthu anoowerya onwoka Yehova?

⁹ Olelo-va, khahiyo atthu oowerya paahi tanootha. Mwaha a Y. Bhattacharjee oni: “Xeeni Atthu Anootha Aya”, aahimmye so: “Wootha onnisuweliwa ntoko etthu eri mphomeni mwa apinaatamu”. Mwa enamuna ekina, atthu anuupuwela wira wootha etthu yeephattu ni ti wooloka. Nave, atthu annootha aphavelaka wiisaakiha, woonasa wene avithaka soovonya ni ikrime apanke aya. Akina annootha aphavelaka ophwanya musurukhu aahiiso mireerelo. Nave yoohimmwa eyo, enihimya wira atthu akina annaawoka “anamurwa, ale anivarana aya muteko, apatthani aya ni ale anaaphenta aya”.

¹⁰ Exeeni enikhumelela mwaha wa wootha iwo? Yookhumelela aya ti yoowi atthu khaniroromelana ni ompatthani onnimala. Mwa ntakiheryo, nkahaya muupuwele moota mulopwana oororomeleya ni othenle aarowa awe okhala nuumala osuwela wira mwaarawe oopaka etthu yoohiloka onavitha onwokaka iyawe. Nave mmuupuwele mulopwana a mphwini, yoowo owaani ohinaathokorerya saana amwaarawe ni anaawe, masi akhala ni atthu akina oniipaka okhala mutthu ooloka. Nto atthu awo, pooti waawoka apinaatamu, masi nuupuweleke wira khaniwerya onwoka Yehova. Biibiliya onihimya wira: “Khivo etthu epattuxiwe envitheya vamaithoni va Muluku”.​—aHéberi 4:13.

11. Ntakiheryo noohiloka na Ananiya ni Safira ninniixuttiha exeeni? (Nwehe elatarato yoopacerya.)

 ¹¹ MBiibiliyani, nookhala ntakiheryo na anamathelana amosa maKristau yaaphavela onwoka Muluku. Awo ti Ananiya ni Safira, yaawo yaawonke arummwa. Awo yaahitumiha ematta aya, masi khiyaavanhe musurukhu wotheene arummwa. Aphavelaka wooniwa okhala atthu oovaha, awo yaahaawoka ahimyaka wira yaahivaha musurukhu wotheene. Masi Yehova aahisuwela wira yaamootha, tivonto aahaahukhumu.—Miteko 5:1-10.

12. Atthu anootha ni ahinattharuwa anrowa wiirihiwa exeeni ni nthowa xeeni?

¹² Yehova oniwoonela sai atthu anootha? Atthu otheene anootha ni ahinattharuwa anrowa oriheliwa vamosa ni Satana “mphareya mwa moro”, eyo piiyo, opwetexiwa moohikhalana nlipelelo na ohihimuxiwa. (Wisupulula 20:10; 21:8; Esalimo 5:7) Nthowa xeeni? Nthowa noowi, Yehova onniwoona anawoothe ntoko atthu ale “anira sowuliha muru” vamaithoni va Muluku.​—Wisupulula 22:15, Biblia Solempwa sa Muluku.

13. Exeeni enisuwela ahu voohimya sa Yehova? Nto eyo ehaana oniiriha opaka exeeni?

¹³ Noosuwela wira Yehova “khanotha: owo khanlikana ni mutthu” ni ‘khonwerya wotha’. (Mothakoni 23:19; aHéberi 6:18) Miruku 6:16, 17 onihimya wira: “Apwiya . . . [waananara] nlumi nowotha”. Nto naaphavelaka omusiveliha Yehova, nihaana olavula ekeekhai. Tivonto ‘nihotheryaneké’.—aKolosi 3:9.

14. (a) MaKristau eekeekhai avirikanne sai ni atthu a etiini yoowootha? (b) Mutthokiherye malakiheryo aniphwanyaneya Luka 6:45.

¹⁴ Enamuna xeeni emosa maKristau eekeekhai avirikanne aya ni atthu a etiini  yoowootha? Okhala wira hiyo ‘ninlavula ekekhai’. (Mmusome Zakariya 8:16, 17.) Biibiliya onihimya wira: ‘[Hiyo] ninnòniherya mwa sothene wira na anamuteko a Muluku’ nilavulaka ‘èkekhai’. (2 aKorinto 6:4, 7) Nave Yesu aahimmye wira “eyano ya mutthu enlavula itthu sàttale mmurimani mwawe”. (Luka 6:45) Eyo enooniherya wira mutthu oororomeleya onilavula ekeekhai. Nto onnaaleela ekeekhai anamurwa, ale onivarana awe muteko, apatthani awe ni ale onaaphenta awe. Vano nrowe nthokorerye matakiheryo anooniherya moota nikhanle ahu oororomeleya mwa itthu sotheene.

15. (a) Xeeni ori aya vootakhala okhalana mirima miili? (b) Exeeni enrowa waakhaliherya amiravo okhootta sookhanyererya sa apatthani? (Nwehe enoota.)

¹⁵ Akhala wira mwa mmiravo, pooti wira munniphavela ophentiwa ni apatthani anyu. Mwaha wa yeeyo, amiravo akina annikhalana mirima miili. Awo anniimananiha okhalana mweettelo wooloka ari ene ni anamuyari aya aahiiso anna a mmulokoni, masi okathi anaarumeela aya redes sociais wala anikhala aya ni atthu ahinimurumeela Yehova anikhalana mweettelo mukina. Nave awo pooti olavulaka itthu soohiloka, owara ikuwo soohikhalela, owiriyana muusika woohiloka, ohapaliwa, olya mirette soohapala, onamorari va mwiitiho aahiiso opaka itthu sikina soohiloka. Awo annaawoka anamuyari aya, anna, arokora ni Yehova. (Esalimo 26:4, 5) Yehova onnisuwela vaavo nimpaka ahu itthu oninyokha awe. (Marko 7:6) Ti vooloka opaka ele Biibiliya onihimya awe wira: “Muhakhalelé nrima alipa-òttheka: mwattittimihe Apwiya mahiku othene”.​—Miruku 23:17. * (Nwehe enoota.)

16. Naakhuleke sai naalepaka eformulaario ya muteko wa Muluku wa okathi wotheene?

¹⁶ Akhala wira muniphavela okhala pioneero ookilaatheya aahiiso ovara muteko wa Muluku wa okathi wotheene, ntoko orumeela oBetheli, muhaana olepa eformulaario. Muhaana ohivitha etthu mwaakhulaka makoho voohimya sa okumi anyu, matthekulelo anyu ni mweettelo anyu. (aHéberi 13:18) Ankhi akhala wira moopaka etthu Yehova oninyokha awe aahiiso enixankiha yowuupuxerya ya murima anyu, yeeyo muhaalenle anyu axitokweene? Nto muhaana waaleela wira yookhaliheryeni omurumeela Yehova ni yowuupuxerya ya murima yooloka.—aRoma 9:1; aGalasia 6:1.

17. Nipakeke exeeni akhala wira ale annilupattha anninikoha voohimya sa anna?

¹⁷ Sai akhala wira elapo anyu muteko ahu wookhoottihiwa ni moovariwa ni mapoliisia munakohiwa voohimya sa anna? Niireke muhaana waaleela itthu sotheene  munisuwela anyu? Nnaari! Muupuweleke ele Yesu aapanke awe okathi aakohiwa awe ni guvernatoro a oRoma. Yesu aahivarihela muteko malakiheryo a Biibiliya anihimya wira, wookhala “okathi w’omàla n’ukathi w’olavula”. Nto Yesu aaroomaala! (Musuweli 3:1, 7; Matheyo 27:11-14) Akhala wira eyo enoowiiraneelani, muhaana waarumeela ankhili wira muhaakumiherye maxakha anna.​—Miruku 10:19; 11:12.

18. Muritti xeeni nrina ahu akhala wira axitokweene anninikoha voohimya sa anna atthenke?

¹⁸ Ankhi mwasuwela wira munna aahiiso murokora oopaka etampi yuulupale? Okhala wira axitokweene tarina muritti wookhapelela muloko, awo pooti wookohani voohimya sa mwaha owo. Niireke munoohimya ekeekhai akhala wira mutthu owo mpatthani inyu aahiiso mmusi inyu? Biibiliya onihimya wira: “Onihimya ekhweli, onnilaleya exariya”. (Miruku 12:17; 21:28) Tivonto mookhalana muritti wowaaleela axitokweene itthu sotheene munisuwela anyu sa mwaha owo. Maana, axitokweene ahaana osuwela ekeekhai wira awerye omukhaliherya mutthu owo olokiherya wataana wawe ni Yehova.​—Yakobo 5:14, 15.

19. Mwaha onittharelana, ninrowa othokorerya exeeni?

¹⁹ Davidi aahinvekela Yehova wira: “Nyuwo munnikiphavelela murima wekekhai”. (Esalimo 51:8) Davidi aanisuwela wira etthu yootepa otthuneya ti okhalana murima wooloka. Tivonto okathi wotheene maKristau eekeekhai annilavula “ekekhai mukina ni mukhw’awe”. Enamuna ekina nnooniherya ahu wira noovirikana ni atthu a itiini sowootha, ori wiixuttiha ekeekhai ya mBiibiliyani. Mwaha onittharelana, ninrowa othokorerya moota woopaka eyo naalaleeryaka.