1, 2. (a) Muteko xeeni waari wootepa otthuneya mookumini mwa Yesu, ni nthowa xeeni? (b) Okhala wira “ninvara vamosá . . . [ni] Muluku”, nipakeke exeeni wira nikhumele saana?

WANIPACERYA, Yesu Kristu aari kalapintero, nto muhoolo mwaya aahisuweliwa okhala mwiixuttihi. (Marko 6:3; aRoma 15:8) Yesu aahiixutta ovara saana miteko iyo. Ntoko kalapintero, Yesu aahiixutta moota woorumeela ikaruma sa kalapintero, wira ovareke saana muteko awe. Nave, ntoko mwiixuttihi, Yesu aanirumeela saana osuwela wawe Soolempwa wira aakhaliherye atthu yahooneliwa vatthu,t wiiwexexa Nuulumo na Muluku. (Matheyo 7:28; Luka 24:32, 45) Okathi aarina awe iyaakha 30, Yesu aahihiya okhala kalapintero khukhala mwiixuttihi, maana aanisuwela wira aahaana ovara muteko owo wootepa otthuneya. Nave, aanisuwela wira olaleya ihapari sooreera sa Omwene wa Muluku ti waamwiirinhe orwa valaponi. (Matheyo 20:28; Luka 3:23; 4:43) Olaleya ihapari sooreera waari muteko wootepa otthuneya mookumini mwa Yesu ni aaphavela wira atthu akina apakeke eyo.​—Matheyo 9:35-38.

² Anamunceene a hiyo, khahiyo makalapintero, masi otheene ahu ninniwiixuttiha atthu ihapari sooreera. Muluku onnivara muteko ola, okhala wira ti wootepa otthuneya. Tivonto  “ninvara vamosá . . . [ni] Muluku”. (1 aKorinto 3:9; 2 aKorinto 6:4) Nave, ninnikupali moolumo a nasaalimo ani: “Olipa wa masu anyu t’ikekhai”. (Esalimo 119:159, 160) Tthiri Nuulumo na Yehova ti ekeekhai. Ti maana aya nimphavela ahu olaleya “vophwanela ehapari y’ekekhai”. (Mmusome 2 Timótheyo 2:15.) Nto nimphavela omurumeelaka oratteene Biibiliya, ekaruma yeeyo ennikhaliherya owiixuttiha atthu voohimya sa Yehova, Yesu ni Omwene. Wira onikhaliherye okhumela saana naalaleeryaka, mutthenkeso wa Yehova onninivaha ikaruma sikina sooloka, nto nihaana osuwela orumeela saana. Ikaruma iyo siri Ekaaxa ya Ikaruma Sinnikhaliherya Wiixuttiha.

3. Nikhalaneke yoolukama xeeni naalaleeryaka? Moovarihana ni Miteko 13:44-48, nihaana waaphavela atthu xeeni?

³ Pooti wira munniikoha so: Xeeni wiihanaka Ekaaxa ya Ikaruma Sinnikhaliherya Wiixuttiha, ohiya Ekaaxa ya Ikaruma Sinnikhaliherya Olaleerya? Okhala wira, nuulumo noowi “olaleerya”, nintaphulela olaleya muhupi. Masi, nuulumo noowi “wiixuttiha”, nintaphulela omutthokiherya mutthu wiiwexexa muhupi iiwale awe wira ovariheleke muteko ele iixuntte awe. Okathi ola vakhaani ohanle wira olumwenku opwetexiwe, nihaana oluttuweliwa opaceriha soosoma sa Biibiliya ni owiixuttiha atthu ekeekhai wira akhale awiixutti a Kristu. Eyo enitaphulela wira nihaana wiimananiha waaphavela ale aniphavela ekumi ehinimala ni waakhaliherya omurumeela Yehova.​—Musome Miteko 13:44-48.

4. Ninrowa waaphwanya sai ale aniphavela ekumi ehinimala?

⁴ Ninrowa waaphwanya sai ale aniphavela ekumi ehinimala? MaKristau a eseekulu yoopacerya, yaahaana olaleerya wira yaaphwanye atthu awo. Yesu aahaaleela awiixutti awe wira: “Muttetthe ti muttetthe onrowanyu ophiya, mmwavyeke omphwanela”. (Matheyo 10:11) Olelo-va, nihaana opaka etthu emosa-ru. Atthu ahimphavela wiiwa, oowiixinnuwiha aahiiso ahinimphavela Muluku, khanrowa owiriyana ihapari sooreera naalaleeryaka. Masi nnaaphavela atthu aniphavela wiiwa, oowiiyeviha ni ale tthiri aniphavela wiixutta ekeekhai. Muteko ahu woowaaphavela atthu onlikana ni ele Yesu aapaka awe ntoko kalapintero. Wanipacerya, Yesu aahaana ophwanya ithaapwa sooloka ohinatthi opaka itthu aaphavela awe, ntoko mikhora aahiiso itthu sikina. Nto aahaana oweha ikaruma sawe saari mukaaxani, woona moota woorumeela wira opake etthu aaphavela awe. Moolikanasa, olelo-va, nihaana waaphavela atthu, nuumala-vo orumeela saana ikaruma sahu wira niwiirihe okhala awiixutti.​—Matheyo 28:19, 20.

5. Nihaana osuwela exeeni voohimya sa khula ekaruma eri Ekaaxa ya Ikaruma Sinnikhaliherya Wiixuttiha? Mulikanyihe. (Nwehe ifootu soopacerya.)

⁵ Khula ekaruma yookhalana yoolakela aya. Mwa ntakiheryo, nkahaya muupuwele ikaruma Yesu aarumeela awe ntoko kalapintero. * (Nwehe enoota.) Yesu aahaana okhalana ikaruma soophimana, elepelo, etesora, muttemulelo ni eliixa wira owakane ithaapwa, ni ikaruma sooweereryaniha ni olupanyiha ithaapwa. Vamosa-ru, khula ekaruma eri Ekaaxa ya Ikaruma Sinnikhaliherya Wiixuttiha, yookhalana yoolakela  aya. Tivonto nrowe niwehe moota woorumeela saana.

6, 7. (a) Munirumeela sai ikartau sa oxukurya? (b) Xeeni ninrumeela ahu nlattulo na mithukumano sahu?

⁶ Ikartau sa Oxukurya. Sinikhala saamukhaani, masi soovareleya muteko sinaakhaliherya atthu onsuwela ni owooniherya esaite ahu jw.org. Arumeelaka esaite ahu, atthu anniwerya onisuwela ni ovekela yoosoma ya Biibiliya. Atthu anivikana 400.000, aavekela yoosoma ya Biibiliya amurumeelaka jw.org. Nave, khula nihiku atthu anivikana emiya annipaka eyo! Nyuwo pooti okuxa ikartau sa oxukurya wira mwaavaheke atthu anikumana anyu.

⁷ Malattulo. Epaphelo ya nlattulo enihimya wira: “Nyuwo munnilattuliwa wira mmusome Biibiliya ni Anamoona a Yehova”. Nuumala-vo, enihimya so: “Mithukumano sahu sa atthu otheene” wala “mmusome Biibiliya ni mutthu mukina”. Tivonto, nlattulo ninnaakhaliherya atthu onisuwela ni waalattula ale “ari amasikhini murohoni mwaya” wira amusome Biibiliya ni hiyo. (Matheyo 5:3) Tthiri khula mutthu onnaakheliwa omithukumanoni wahu hata ohimusomaka Biibiliya. Nto vaavo anirweela aya mithukumano sahu, awo animwiixutta itthu sinceene sa mBiibiliyani.

8. Xeeni vari aya vootthuneya ovikaniha waalattula atthu orweela mithukumano sahu? Nvahe ntakiheryo.

⁸ Ti vootthuneya ovikaniha waalattula atthu orweela mithukumano sahu. Nthowa xeeni? Okhala wira, okathi anirweela aya, anoosuwela wira hata itiini sowootha sihiixuttihaka ekeekhai, Anamoona a Yehova anniixuttiha ekeekhai ya mBiibiliyani ni annaakhaliherya atthu omusuwela Muluku. (Yesaya 65:13) Mwa ntakiheryo, anamathelana amosa a wEstados Unidos, Ray ni Linda yaahoona ovirikana iwo iyaakha sivinre. Awo yaanimwaamini Muluku ni yaaphavela omusuwela oratteene. Nto yaahilakela oxukurya ikerexa sotheene sa epooma aya wira awehe itthu piili yaaphavela aya ahinatthi okela. Wanipacerya, yaahaana osuwela etthu ekerexa eyo eniixuttiha aya. Ya nenli, atthu a ekerexa eyo yaahaana owara saana ntoko atthu animukokhorela Muluku. Okhala wira khisaareere ikerexa epooma ele, nto saahivira iyaakha sinceene aphavelasaka. Masi khiyaareere onyoonyiheya. Awo khiyiixuntte etthu ni yaahoona wira atthu a ikerexa iyo khiyaawara saana. Nuumala oxukurya ekerexa yookiserya, Linda aahirowa omutekoni, masi Ray aaronwe owaani. Mphironi, Ray aaheemela ohoolo wa Empa ya Omwene. Nto onuupuwela so: ‘Kihaana okela mme wira kawehe etthu eniiraneya’. Tthiri ele yaari yowiiraneya yootepa ohakalaliha! Khula mutthu Empa ya Omwene aari ooreera murima, oopatthaneya ni aahiwara saana. Ray aakilanthi ohoolo ni aahisiveliwa ele iixuntte awe! Eyo ennuupuxerya ele murummwa Paulo aahimmye awe sa mutthu onipacerya orowela mithukumano sahu, onahimya wira: “Vekekhai, Muluku ori ni nyuwo!” (1 aKorinto 14:23-25) Okhuma nihiku nne, Ray khonicompela mithukumano sa Ettiminku. Nuumala-vo, aahipacerya orowela mithukumano sa eriyari ya esumana. Nave, Linda aahipacerya orowela mithukumano. Nnaamwi arina ene iyaakha sinivikana 70, awo yaahimusoma Biibiliya mpakha obatiziwa.

9, 10. (a) Xeeni ifolyeeto siri aya sookhweya orumeela? (b) Mutthokiherye moota woorumeela efolyeeto Omwene wa Muluku Exeeni?

⁹ Ifolyeeto. Ekaaxa ahu ya ikaruma, nookhalana ifolyeeto 8. Iyo ti sookhweya orumeela ni soovareleya muteko wira nipacerihe ovaanela. Ifolyeeto soopacerya saakumiheriwe 2013 ni sihimpirimiriwa ifolyeeto sinivikana ibilyau 5! Ifolyeeto sotheene sirina mukhalelo mmosa-ru. Mwasuwela orumeela efolyeeto emosa, munoowerya orumeela sotheene! Munirumeela sai efolyeeto wira mpacerihe ovaanela?

¹⁰ Woonasa wene, munniphavela orumeela efolyeeto eni: Omwene wa Muluku Exeeni? Mmooniherye mutthu owo nikoho nri wanipacerya wa efolyeeto ni mmukohe so: “Mootoko wiikoha wira Omwene wa Muluku exeeni? Niireke munaakhula wira . . . ”. Nuumala-vo, munvekele wira othanle eponto onoona awe oreerela. Ohiya omuleela wira ohaakhula saana aahiiso nnaari, mutthukule efolyeeto mpantta oni: “Ele Biibiliya Onihimya Awe”, ni musome soolepa siri mpantta owo, eyo piiyo, Daniyeli 2:44 ni Yesaya 9:5. Nto wanikisa waya, mmuhiyerye nikoho nri ottuli wa efolyeeto mpantta oni: “Wira Muupuwelele”, nikoho nni: “Okumi onirowa okhala sai okathi Omwene wa Muluku onirowa aya olamulelaka?” Muhaana waakhula nikoho nlo nihiku nikina. Vaavo munrowa anyu ovaanelana, muhaana orumeela yoosoma 7 ya ebroxura Ihapari Sooreera Sinikhuma wa Muluku!, ekaruma yeeyo ennikhaliherya opaceriha soosoma sa Biibiliya.

11. Irevista sahu sinipakiwa wira saasiveleke aani, ni exeeni nintthuneya ahu osuwela?

¹¹ Irevista. Owehaweha ni Nvenye! ti irevista sootepexa olaleiwa ni otaphuleliwa olumwenku wotheene! Okhala wira sinnisommwa ni atthu a ilapo soovirikana, mwaha wa vakaapani onipakiwa wira waasiveleke atthu a khula opuro. Nihaana orumeela irevista iyo wira naakhaliherye atthu osuwela ele eri yootepa otthuneya mookumini mwaya olelo-va. Nihaana osuwela wira khula erevista aakhala atthu anlepeliwa.

12. (a) Tani anlepeliwa erevista Nvenye! ni tiivi eri yoolakela aya? (b) Yookumanana xeeni yooloka mphwannye anyu niinaano okathi mwaarumeela anyu ekaruma ela?

¹² Erevista Nvenye!, anlepeliwa atthu animusuwela vakhaani Biibiliya aahiiso ahinimusuwela. Awo khansuwela sowiixuttiha sa eKristau, khanikupali itiini aahiiso khanikupali wira Biibiliya onoowerya waakhaliherya mookumini mwaya. Yoolakela yuulupale ya Nvenye! ori waakhaliherya atthu osuwela wira Muluku ookhala. (aRoma 1:20; aHéberi 11:6) Nave onnaakhaliherya ale animusoma omwaamini Biibiliya wira “masu a Muluku”. (1 aTesalonika 2:13, Waataana wa Naanaano) Irevista Nvenye! sa 2018, sirina miru iya: “Moota Woophwanya Ohakalala”, “Isiiri 12 Siniiriha Etthoko Ohakalala” ni “Itthu Sinaakhaliherya Ale Akhweliwe”.

13. (a) Tani anlepeliwa erevista Owehaweha ya atthu otheene? (b) Yookumanana xeeni yooloka mphwannye anyu niinaano okathi mwarumeela anyu ekaruma ela?

¹³ Yoolakela yuulupale ya Owehaweha a atthu otheene, ti waatthokiherya soowiixuttiha sa Biibiliya atthu yaale animuttittimiha Muluku ni Biibiliya. Awo annisuwela itthu sikina  sa mBiibiliyani, masi khaniiwexexa saana ele oniixuttiha awe. (aRoma 10:2; 1 Timótheyo 2:3, 4) Irevista Owehaweha sa 2018, sirina miru iya: “Será que a Bíblia ainda é útil?”, “Nlipeleleke Exeeni Ohoolo?” ni “Niireke Muluku Onnookhapelelani?”

14. ((a) Tani anipakeliwa iviidiyu 4 siri Ekaaxa ya Ikaruma Sinnikhaliherya Wiixuttiha? (b) Yookumanana xeeni yooloka mphwannye anyu okathi mooniherya anyu iviidiyu iyo?

¹⁴ Iviidiyu. Mahiku a Yesu, kalapintero aakhalana ikaruma sahaarumeela energia. Masi mahiku ala, makalapintero aakhalana ikaruma sinirumeela energia ntoko aseera, mittemulelo ni iliixa. Moolikanasa, ohiya paahi iliivuru soowimpirimiriwa, nookhalana iviidiyu sooreera wira niwooniheryeke atthu naalaleeryaka. Ekaaxa ahu ya ikaruma, nookhalana iviidiyu iya xexe: Xeeni Vanitthuneya Anyu Omusoma Biibiliya?, Enipakiwa Sai Yoosoma ya Biibiliya?, Exeeni Eniiraneya mMithukumanoni Empa ya Omwene?, ni Anamoona a Yehova Atthu a Mukhalelo Xeeni? Vanniweryaneya orumiha iviidiyu iya saamukhaani sihivinre minutu miili ni sinnikhaliherya opaceriha ovaanela. Iviidiyu soorakama ahaana wooniheriwa atthu arina okathi munceene ni okathi nimpaka ahu mikwaha sootthikela oxukurya. Ikaruma iyo ti sooloka, maana sinniwiiriha atthu ophavela omusoma Biibiliya ni orweela mithukumano sahu.

15. Atthu anoonela sai oweha iviidiyu sa nttaava naya? Nvahe matakiheryo.

¹⁵ Mwa ntakiheryo, murokora mmosa aahimphwanya muthiyana a oMicronésia yoowo onilavula eYapese. Nto murokora ole aahimooniherya eviidiyu eni: Xeeni Vanitthuneya Anyu Omusoma Biibiliya?, nttaava na eYapese. Vaavo eviidiyu yaapacenrye aya oruma, muthiyana ole aahimmye so: “Nna nttaava naka. Nkinkupali! Moota onilavula awe onnooniherya wira onikhuma esisiro kiyariwa aka. Owo onilavula nttaava naka!” Nuumala-vo, aahimmye wira aarowa osoma ni oweha iviidiyu sa nttaava nawe va jw.org. (Mulikanyihe ni Miteko 2:8, 11.) Ntakiheryo nikina ti na murokora a wEstados Unidos, anvanhe elink ya eviidiyu ya nttaava nawe, mwaana a murokorawe onikhala elapo ekina. Nuumala oweha eviidiyu aahimulepela oriki: “Mpantta onihimya wira ohaavo mutakhali ohinooneya oneettiha olumwenku khoreere okivara murima. Nto kaahivekela yoosoma ya Biibiliya”. Eyo etthu yoohakalaliha okhala wira onikhala elapo muteko ahu onikhoottihiwa aya!

16. Mutthokiherye yoolakela ya ibroxura iya: (a) Munwiriyaneke Muluku Wira Mphwanye Ekumi Ehinimala. (b) Ihapari Sooreera Sinikhuma wa Muluku! (c) Tani Anipaka Yootthuna ya Yehova Olelo-va?

¹⁶ Ibroxura. Ninrowa omwiixuttiha sai ekeekhai mutthu ohinsuwela osoma aahiiso ohirina iliivuru sinimutthokiherya Biibiliya nttaava nawe? Nihaana orumeela ebroxura Munwiriyaneke Muluku Wira Mphwanye Ekumi Ehinimala. * (Nwehe enoota.) Ekaruma ennikhaliherya opaceriha soosoma sa Biibiliya ti ebroxura Ihapari Sooreera Sinikhuma wa Muluku! Nyuwo pooti omooniherya mutthu owo miru 14 siniphwanyaneya epaaxina yookiserya, ni mmukohe  mutthu owo muru onimusivela vanceene. Moottharelana, mpacerihe osoma ni mutthu owo. Niireke mootoko weererya okathi wa mikwaha sootthikela oxukurya? Ebroxura ya neeraru eri ekaaxa ahu ya ikaruma eni: Tani Anipaka Yootthuna ya Yehova Olelo-va? Ebroxura ela, epakeliwe waakhaliherya atthu animusoma Biibiliya osuwela mutthenkeso ahu. Wira musuwele moota woorumeela saana okathi muniiriha anyu yoosoma ya Biibiliya, nwehe Okumi ni Orummwa Ahu wa Ekristau​—Ekaderno Enirumeeliwa Omuthukumanoni, ya Março 2017.

17. (a) Tiivi eri yoolakela ya khula eliivuru nnaasomiha ahu atthu? (b) Otheene ale anibatiziwa ahinatthi omaliha ahaana opaka exeeni ni nthowa xeeni?

¹⁷ Iliivuru. Nuumala omaliha omusomiha mutthu murumeelaka ebroxura, muhaana opaceriha omusomiha eliivuru Biibiliya Onniixuttiha Exeeni? Eliivuru ela, ennaakhaliherya atthu osuwela sowiixuttiha soopacerya sa Biibiliya. Akhala wira onnirowa vahoolo mpakha omaliha eliivuru eyo, muhaana ovikaniha omusomiha murumeelaka eliivuru “Mukhaleke Mophentani Mwa Muluku”. * (Nwehe enoota.) Eliivuru ela, ennimukhaliherya naxikola ovarihela muteko malakiheryo a Biibiliya mookumini mwawe khula nihiku. Muupuweleke wira hata obatiziwaka, owo ohaana ovikaniha osoma iliivuru iyo soopiili mpakha omaliha. Eyo enoomukhaliherya olipiha omwaamini wawe Yehova ni ovikaniha ororomeleya.​—Mmusome aKolosi 2:6, 7.

18. (a) 1 Timótheyo 4:16 onnitumererya opaka exeeni, ni tiivi eri yookhumelela aya? (b) Yoolakela ahu tiivi vaavo ninrumeela ahu Ekaaxa ya Ikaruma Sinnikhaliherya Wiixuttiha?

¹⁸ Okhala wira na Anamoona a Yehova, nookhalana muritti wa owiixuttiha atthu ‘molumo èkekhai, eyo p’iyo, ehapari yorera’ wira aphwanye okumi woohimala. (aKolosi 1:5; mmusome 1 Timótheyo 4:16.) Wira nipake eyo, nookhalana Ekaaxa ya Ikaruma Sinnikhaliherya Wiixuttiha. (Nwehe ekaaxa eni: “ Ekaaxa ya Ikaruma Sinnikhaliherya Wiixuttiha”.) Nto nrowe niimananihe orumeela saana ikaruma iyo. Khula mmosa a hiyo, ohaana othanla ekaruma enrowa awe orumeela ni okathi ene. Masi muupuweleke wira yoolakela ahu khahiyo okawa iliivuru paahi, ni nihaavaheke atthu ahiniphavela owiriyana muhupi ninlaleya ahu. Yoolakela ahu, waapaka awiixutti a Kristu atthu otheene aniphavela owiriyana, omusuwela Muluku ni oowiiyeviha, yaawo aniphavela ekumi ehinimala.​—Miteko 13:48; Matheyo 28:19, 20.