Mooniheryeke Ovilela Mookumini Mwanyu
‘Vano nthiti nla [ovilela], omaliheriwe ni miteko sorera, wira mukhalé òmalelene ni òhittheka wa inamuna sothene’.—YAK. 1:4.
ISIPO: 24, 139
1, 2. (a) Ovilela wa Gedeyoni ni anakhotto awe 300 onniixuttiha exeeni? (Nwehe elatarato yoopacerya.) (b) Moovarihana ni aHéberi 10:36, xeeni ovilela oryaaya wootthuneya?
MWEERERYE wuupuwelela ekhotto yooviha ni yookhulumula, yeeyo anakhotto aIsarayeli, ahooleliwaka ni Mukhulupale Gedeyoni, yaawana aya ni awanani aya. Gedeyoni ni anakhotto awe yaahiwoomola anakhotto oowuuraana a oMadiyani ohiyu wotheene, etthu yowiiraka ikiloomo 32! Biibiliya onnihimya ele yiiraneyale moottharelana: “Gedeyoni n’atthu awe miloko miloko miraru [300] yahiphiya omuró Yordani, khulapuwa. Ohiya wira yira ekhulumunwene”. Masi nlelo khiyaaxinttale ekhotto eyo, ni yahaana owana ni anakhotto 15.000. Awanani ale yanaahaaxa aIsarayeli iyaakha sinceene, tivonto, Gedeyoni ni anakhotto awe khiyaaphavela waahiyererya. Nto yaahivikaniha owoomola awanani aya mpakha waaxintta.—Makh. 7:22; 8:4, 10, 28.
2 Hiyo-tho ninwana ekhotto yooviha ni yookhulumula. Awanani ahu anihela muhina Satana, elapo ela yootakhala, ni ohimalela wahu. Akina a hiyo, nipacenrye khalai owanana atakhali ala. aHéberi 10:36.) Ovilela onitaphulela exeeni? Exeeni enrowa onikhaliherya ovilela? Ntakiheryo na ale avilenle ninniixuttiha exeeni? Exeeni enirowa ahu opaka wira ovilela ‘omaliherye miteko sorera’ mookumini mwahu?—Yak. 1:4.
Nikhaliheriwaka ni Yehova, ninniwerya waaxintta awanani awo. Masi nlelo khanixinttale ekhotto yookiserya. Ikwaha sikina pooti okhulumuwa owana ekhotto eyo. Wala pooti ovela owehererya omala wa makhalelo ala ootakhala a itthu. Biibiliya onnihimya wira wanikisa, hiyo naarowa weehereriwaka ni olupatthiwa vanceene. Masi onnihimya-tho wira akhala wira nnoovilela, nnoowerya oxintta. (MmusomeOVILELA ONITAPHULELA EXEENI?
3. Ovilela onitaphulela exeeni?
3 MBiibiliyani, nuulumo noowi ovilela khanintaphulela paahi ohiyererya etthu yoohiloka evikanihaka oniiraneela. Enihela muhina enamuna enoonela ahu wala wuupuwelela mixankiho sahu. Ovilela onninikhaliherya olipa murima, ororomeleya ni opixa murima. Eliivuru emosa enihimya wira ovilela ti mukhalelo onnikhaliherya okhalana nlipelelo noolipa ni osyaka waakuva wooceya, okathi wa mixankiho. Onninikhaliherya okhala oolipa, hata okathi wa mixankiho suulupale. Nave ovilela onninikhaliherya moota wooxintta mixankiho, nuupuwelelaka paahi mareeliho a muhoolo ohiya mixankiho sirina ahu olelo-va.
4. Xeeni vanihimya ahu wira ophenta tonimwiiriha mutthu ovilela?
4 Ophenta tonniiriha ovilela. (Mmusome 1 aKorinto 13:4, 7.) Moota xeeni? Omphenta Yehova onnintumererya ovilela khula etthu oneemererya awe oniiraneela. (Luka 22:41, 42) Waaphenta annihu onninikhaliherya ovilela soovonya saya. (1 Ped. 4:8) Omphenta ole othelanne ahu onninikhaliherya ovilela “maxakha” anaakhumelela atthu otheene athelanne, ni onnilipiha ekasamento ahu.—1 aKor. 7:28.
EXEENI ENROWA WOOKHALIHERYANI OVILELA?
5. Xeeni vanihimya ahu wira Yehova paahi toniwerya onikhaliherya ovilela?
5 Munvekeleke ikuru Yehova. Yehova ti Muluku “onvaha nthiti [ovilela] n’uhakalala”. (aRom. 15:5) Owo paahi tonisuwela oratteene mukhalelo ahu ni muupuwelo ahu. Tivonto, onnisuwela etthu ennikhaliherya wira niweryeke ovilela. Biibiliya onihimya so: “Apwiya annavaha simphavelaya ale anattittimiha: anniwiriyana okhuwela waya, khuwòpola”. (Esal. 145:19) Muluku onrowa waakhula sai nivekelo nahu wira onivahe ikuru soowerya ovilela?
6. Ntoko Biibiliya onihimya awe, moota xeeni Yehova onrowa awe ‘onivaha ikuru’, wira nixintte mixankiho sahu?
6 Mmusome 1 aKorinto 10:13. Okathi oninvekela ahu Yehova wira onikhaliherye ovilela, owo onnihimya wira ‘ononivaha ikuru’. Onipaka sai etthu eyo? Ikwaha sikina pooti omaliha muxankiho owo. Masi ikwaha sinceene, onrowa onivahaka ikuru wira niweryeke “ovilela [moohakalala] mohawani mothene”. (aKol. 1:11) Nave okhala wira onnisuwela oratteene erutthu ahu ni muupuwelo ahu, Yehova khonirowa weemererya wira etthu yoohiloka etepeke onixankiha, vahiniwerya ahu ovikaniha ororomeleya.
7. Nvahe nlikanyiho nnooniherya otthuneya waya olya yoolya yomunepani wira niweryeke ovilela.
7 Eyoolya yomunepani elipiheke waamini wanyu. Nthowa xeeni yoolya yomunepani eryaaya yootthuneya? Mwa ntakiheryo: wira mutthu owele mwaako woorekamexa olumwenku wotheene, oniitthaniwa Mwaako Evereste, ohaana olya yoolya yinceene enrowa onvaha ikuru, ovikana ele enilya awe khula nihiku. Opaka eyo onoomukhaliherya ophiya vasulu va mwaako onirowa awe. Vamosaru, hiyo nihaana olya yoolya Yoh. 6:27.
yinceene yomunepani wira enikhaliherye ovilela ni ophiya onirowa ahu. Nohaana okhalela nthiti omusoma Biibiliya ni orowela mithukumano. Wira siiso, onoonikhaliherya olipiha waamini wahu.—8, 9. (a) Moovarihana ni Yobi 2:4, 5, mwaha xeeni wootthuneya onireerela ahu othokoreryaka okathi oneehereriwa ahu? (b) Okathi onoophwanyayani yoweeha, muhaana wuupuwela exeeni?
8 Muupuweleleke efaita erina aya ororomeleya wanyu. Okathi ninlupatthiwa ahu, hiyo ninnihaawa vanceene. Masi yookhala etthu yootepa otthuneya ovikana ohaawa wahu. Satana onneehererya ororomeleya wahu. Etthu enipaka ahu okathi oneehereriwa ahu ennooniherya akhala wira ninnimoona Yehova okhala Namalamulela a olumwenku wotheene. Moota xeeni? Satana, nwanani a Muluku, oomuruwana Yehova ohimyaka wira apinaatamu animurumeela Muluku wira aphwanye mureerelo aya paahi. Satana aahimyale wira “atthu annivaha sothene sirinaya wira esuke ekumi aya”. Nuumala vo, Satana aahimulavula Yobi oriki: “Mmuhaxeke mmakhuvani mwawe ni mwerutthuni mwawe. Munimona wira onimovehani”. (Yobi 2:4, 5) Niireke vano Satana ooturuka moonelo awe? Nnaari! Nuuvira iyaakha sinceene okhuma vaavale oomoliwe awe wiirimu, nlelo aanaaramusa arumeyi oororomeleya a Muluku. (Wis. 12:10) Olelo-va, Satana nlelo onnihimya wira apinaatamu animurumeela Muluku wira aphwanye mureerelo aya paahi. Owo onniphavela vanceene wira nikhootteke olamuleliwa ni Muluku ni nihiye omurumeela.
9 Okathi onihaawa anyu mwaha wa olupatthiwa, mweererye wuupuwelela etthu ela: Satana ni malaikha awe, ari moono mmosa. Nto awo anniweha khula etthu enipaka anyu ni anihimya wira munimooceela weettela ekeekhai. Nave moono mukina, munniwerya onweha Yehova, Mwene ahu Yesu Kristu, anna oowoottihiwa yaawo ari wiirimu, ni malaikha manceene. Awo anniweha mixankiho sanyu ni wiimananiha wanyu, masi annootthapelani. Nto annihakalala vaavo vanooona aya wira munniwerya ovikaniha ovilela sooweha ni ororomeleya wa Yehova. Nuumala vo, munniiwa nsu na Yehova nihimyaka so: “Mwan’aka, nwetteleke ankhili: siso miyo kinotteliwa murima, kinowerya omwakhula onkiveha”.—Mir. 27:11.
10. Munrowa omutakiha sai Yesu nwehexexaka etthuvo ya ovilela wanyu?
10 Nwehexexeke etthuvo. Nkahaya muupuwele vaakhanle wira muneetta mukwaha. Mphironi, nyuwo pooti oviraka muhina mwa nikhuku noorekama. Okathi onivira anyu mukhukuni mmo, khula mpantta oniweha anyu, eri ewiriphi paahi. Masi munnisuwela wira mwavikaniha weetta murowaka ohoolo, munoophwanya okokola. Okumi ahu pooti olikanyihiwa ni weetta mukwaha. Woonasa wene, muhaana okumana mixankiho suulupale, ni ikwaha sikina pooti olemeliwa ni mixankiho sanyu. Hata Yesu, woonasa wene oonenle siiso. Okathi ookotthiwa awe vamwirini, aahiveehiwa ni woonihiwa owereya vanceene. Tthiri ole waari okathi wootepexa oxankiha valaponi! Exeeni yaamukhalihenrye ovilela? Biibiliya onihimya wira Yesu aahivilela mwaha wa etthuvo yoohakalaliha aarowa awe waakhela. (aHéb. 12:2, 3) Yesu aaniwehexexa etthuvo aarowa awe waakhela mwaha wa ovilela, vanceenexa aanisuwela wira ovikaniha ovilela waamukhaliherya otteeliha nsina na Muluku ni waakiherya ehakhi ya olamulela wa Yehova. Yesu aanisuwela wira mixankiho iye khisaarowa opisa ni aanisuwela wira etthuvo aarowa awe waakhela wiirimu ti yoohimala. Olelo-va, mixankiho sinikumana anyu pooti woolemelani ni woowereyani, masi muupuweleke wira khasimpisa.
“ALE ANVILELA”
11. Xeeni vanireerela aya othokorerya itthu siwiiranenle “ale anvilela”?
11 Khivanitthuneya wira nivileleke mekhihu. 1 Ped. 5:9) Matakiheryo a “ale anvilela” anniniixuttiha okhala oororomeleya, anninlipiha wira nnoowerya okhumela saana ni anninuupuxerya wira ororomeleya wahu onootthuveliwa. (Yak. 5:11) Nrowe nthokorerye matakiheryo vakhaani. [1]
Wira aalipihe maKristau ovilela mixankiho sinceene Satana onaakumiherya awe, murummwa Pedru olempe so: “Mmukhotteke Satan’owo, mulimpene mowaminini, musuwelaka wira sohawa simosaru sinnaphwanya axinn’inyu a elapo yothene”. (12. Nniixutta exeeni ni ntakiheryo na makerubi yaapwehiwe muJardim ya wEdeni?
12 Makerubi, ari malaikha ootthuneya ovikana malaikha makina. Nuumala Adamu ni Eva ottheka, Yehova aahaavaha makerubi muteko musya valaponi. Muteko owo waari woovirikana ni ole waavara aya wiirimu. Ntakiheryo naya ninniniixuttiha moota woovilela okathi onaakhela ahu muteko wooxankiha. Biibiliya onihimya wira Yehova ‘ahipweha mmatta mwa wEdeni makerubi mpantte onikhuma nsuwa, ekunxene ophanka wa moro walikana n’itari, wira elipeleleke ephiro y’omwirini w’ekumi’. [2] (Maph. 3:24) Biibiliya khonihimya wira makerubi ale yaaninlaseya wala wiixoona wira yaari ootthuneya nto khuhiyaphwanela ovara muteko ola. Khiyaaphweeleyale wala khiyoocenle muteko aya. Ohiya vo, yaahivikaniha ovara muteko ole mpakha omala, woonasa wene okathi wa Mutaaseke, sivinre ene iyaakha 1.600.
13. Exeeni yaamukhalihenrye Yobi ovilela mixankiho sawe?
13 Mulopwana oororomeleya Yobi. Ikwaha sikina pooti woonaka owereya mwaha wa etthu emosa yookhulumula mpatthani wala mmusi anyu olavunle awe. Aahiiso, woonasa wene murina eretta yuulupale wala murookhweliwa. Masi, hata yookhumelelakani khuta etthu, ntakiheryo na Yobi nnimoolipihani. (Yobi 1:18, 19; 2:7, 9; 19:1-3) Yobi khaasuwela nthowa naya aaphwanyiwe awe ni mixankiho sinceene, okathi omosaru ni mootutuxerya, masi hata vari siiso, owo khaatthikenle ottuli? Exeeni yaamukhalihenrye ovilela? Etthu yoopacerya, mwaha woowi aanimphenta Yehova ni aanoova omutthekela. (Yobi 1:1) Yobi aaphavela omuhakalaliha Muluku okathi wooreera ni okathi wooxankiha. Nave-tho Yehova aahimukhaliherya Yobi oweha owerya wa Muluku, omuleelaka itthu sootikiniha sipattuxale awe. Ela yaahitepa omulipiherya Yobi woona wira Yehova ammaliha ohaawa wawe, okathi wooreerela. (Yobi 42:1, 2) Nto eyo yaahiiraneya tthiri. “Apwiya yahimuttikiherya oreriwa wawe wa khalai. Ohiya vo, yahinjererya mihakhu sawe sothene imara pili”. Yobi aahikhala “avonnene iyaakha”, eyo piiyo, aahikhala iyaakha sinceene moohakalala.—Yobi 42:10, 17.
14. Moovarihana ni 2 aKorinto 1:6, ovilela wa Paulo waakhalihenrye sai akina?
2 aKor. 11:23-29) Masi Paulo khaatthikenle ottuli, nto ntakiheryo nawe nanaalipiha akina. (Mmusome 2 aKorinto 1:6.) Muupuweleke wira ovilela wanyu onimwaalipiha akina wira avileleke.
14 Murummwa Paulo. Niireke nyuwo munnivaanyihiwa wala olupatthiwa? Niireke nyuwo mwa mutokweene a mmulokoni wala a esirkwitu, mwaatteliwe miteko sa Muluku? Akhala wira ti siiso, ntakiheryo na Paulo nnimookhaliheryani. Paulo aanilupatthiwa vanceene, ni aanixanka mwaha wa anna mmulokoni. (NIIREKE OVILELA ‘ONOMALIHERYA MITEKO SORERA’ MOOKUMINI MWANYU?
15, 16. (a) Ovilela onrowa ‘omaleliha muteko’ xeeni mookumini mwahu? (b) Nvahe matakiheryo anooniherya moota ovilela ‘onimaliherya aya miteko sorera’.
15 Uupuxeriwaka ni Muluku, Yakobo aalempe so: “Vano nthiti nla [ovilela] nimalelihiwe ni miteko sorera, wira mukhalé òmalelene ni òhittheka wa inamuna sothene”. (Yak. 1:4) Ovilela onrowa omalihrya sai ‘muteko’ mookumini mwahu? Okathi nneehereriwa ahu, ninnoona wira nohaana opixa murima, oxukhurela ni ophenta. Vaavo vanivilela ahu mixankiho, nnimwiixutta moota ninrowa ahu wooniheryaka saana mikhalelo iya, ni nnoolokiherya omutthu ahu, ntoko muKristau.
Okathi onivilela ahu mixankiho, omutthu ahu wa oKristau onnitepa olipa (Nwehe ittima 15, 16)
16 Okhala wira ovilela onninikhaliherya okhala maKristau ooloka, nto khanimphavela opaka etthu yaarowa otthekela malamulo a Muluku, niphavelaka omaliha muxankiho ahu paahi. Mwa ntakiheryo, akhala wira munniwanana miyuupuwelo soohiloka, mwiimananihe wira muhipake etampi. Munvekeleke Yehova wira ookhaliheryeni okhootta muupuwelo woohiloka. Niireke ookhala mmusi anyu onoolupatthani? Muhitthikele ottuli. Nvikaniheke omurumeela Yehova. Mwiira siiso, munoolipiha omuroromela wanyu Yehova. Muupuweleke wira Muluku oniweemererya paahi ale anivilela.—aRom. 5:3-5; Yak. 1:12.
17, 18. (a) Nvahe nlikanyiho nnooniherya otthuneya waya ovilela mpakha wanikisa. (b) Niroromeleke exeeni vaavo vanaattamela ahu wanikisa wa olumwenku ola?
17 Hiyo nohaana ovilela mpakha wanikisa, ohiya okathi vakhaani paahi. Nkahaya mmuupuwele pakiti onisama. Wira atthu yoopowe, ahaana okata mpakha ophiya okhopela. Mutthu onrowa ohiyererya opaceryakaru okata, onoomiryeya. Nave ole onrowa ohiyererya okata ohalaka vakhaani ophiya okhopela, nave onoomiryeya-tho. Akhala wira nimphavela okhala elapo esya, nohaana ovikaniha ovilela. Nto otheene ahu nikhalaneke muupuwelo mmosaru ntoko wa Paulo, yoowo aahimmye so: “Siso hiyo khannojela muteko ahu”.—2 aKor. 4:1, 16.
18 Ntoko murummwa Paulo, ninnikupali tthiri wira Yehova onoonikhaliherya ovilela mpakha wanikisa. Paulo olempe so: “Nto hiyo ninniweryexa itthu iya sothene n’ikuru sa Yesu oniphentale. Tthiri, kosuwelexa wira khivo enwerya onimwalanyiha n’uphenta wa Muluku: nnákhala okhwa walá ekumi, nnákhala malaikha walá owerya n’ikuru sa wirimu, nnákhala nanano walá oholo, nnákhala ikuru s’osulú walá ikuru sa vathí, nnákhala itthu sikina sipattuxiwe. Khivo etthu enwerya onimwalanyiha n’uphenta wa Muluku, omphwanyahu mwa Yesu Kristu Pwiy’ahu”. (aRom. 8:37-39) Ekeekhai wira ikwaha sikina nnookhulumuwa. Masi nimutakiheke Gedeyoni ni anakhotto awe. Awo yaahitemwa, masi khiyaatthikenle ottuli. “Yahitthikela-tho owòmola awanani aya”.—Makh. 8:4.
^ [1] (ettima 11) Nave-tho munoolipihiwa osoma matakiheryo a ovilela a arumeyi a Muluku mahiku ala. Mwa ntakiheryo, Anuário a 1992, 1999, ni 2008 sookhala soohimmwa sinilipiha waamini wahu, sa anna ni arokora a wEtiopia, oMalawi, ni oRussia.
^ [2](ettima 12) Biibiliya khonihimya nummuru na makerubi yaathanleliwe muteko ole.