1-3. (a) MaKristau anooniherya sai wira annisiveliwa vanceene othukumana ni annaya? (Nwehe elatarato yoopacerya.) (b) Exeeni enrowa ahu othokorerya mwaha ola?

OKATHI Corinna aarina awe iyaakha 17, maama awe aahitthukiwa ni oroihiwa mapuro yaavariwa muteko wookhanyereriwa. Muhoolo mwaya, Corinna aahikuxiwa arowaniwaka oSiberia, elapo yootteivela owannyawe. Owo aavara nipuro naahuuwa inama, ntoko ipwittipwitthi ni inyompe, nto aarumeeliwa ntoko epottha. Ikwaha sikina aanikhanyereriwa ovara ota, okathi wooriirya, ohiwanre ikuwo sooviha. Hata vari siiso, Corinna ni murokora mukina yaahilakela opaka khula etthu yaawerya aya wira arowe omuthukumanoni.

² Corinna onitthokiherya so: “Naanikhuma omutekoni wahu vapaceryaka wiila, naneetta ikiloomo 25 nrowaka estasau ya kampoi. Nto kampoi aakhuma iwoora piili sa vosiisu, khiyeetta iwoora 6 nihinatthi okhuruwa. Nuumala okhuruwa, naneetta ikiloomo 10 mpakha ophiya opuro wa muthukumano”. Corinna aahihakalala mwaha wa ophiya opuro ole. Owo onihimya so: “Omuthukumanoni, naanisoma erevista Owehaweha ni wiipa isipo sa  Omwene. Eyo yaari etthu yoohakalaliha ni yaalipiha waamini wahu”. Axirokora ale anli yaahihokolowa nuuvira mahiku mararu, masi mwaneene ematta hata khaasuwenle wira yaahikhumasa.

³ Okhuma khalai, arumeyi a Yehova onnaasivela othukumana. Mwa ntakiheryo, maKristau oopacerya vaanaasivela vanceene othukumana wira amukokhoreleke Yehova ni omusuwela oratteene. (Mit. 2:42) Woonasa wene, nyuwo-tho vannoosivelani orowa omithukumanoni. Masi ikwaha sikina, pooti woonaka ovila ohicompela mithukumano sotheene. Woonasa wene muhaana oviriha iwoora sinceene omutekoni aahiiso muhaatteliwa soovara, ni ikwaha sikina munnikhulumuwa. Nto exeeni enrowa onikhaliherya wira nihicompeleke mithukumano? ^[1] Ninrowa waakhaliherya sai ale anaasomiha ahu Biibiliya ohicompela mithukumano? Mwaha ola ninrowa othokorerya moota mithukumano sinikumiherya aya mureerelo: (1) mithukumano sinninikhaliherya, (2) mithukumano sinnaakhaliherya akina, ni (3) sinnimuhakalaliha Yehova. ^[2]

4. Moota xeeni othukumana vamosa onnikhaliherya aya omusuwela Yehova?

⁴ Mithukumano Sinniniixuttiha. Khuta muthukumano onninikhaliherya wiixutta voohimya sa Yehova. Mwa ntakiheryo, miloko sinceene soosoma ninaano eliivuru “Mukhaleke Mophentani Mwa Muluku” ntoko Yoosoma ya Biibiliya ya Muloko. Moonenle sai okathi naathokorerya ahu mikhalelo sa Yehova ni mwaawiriyana anyu anninyu ahimyaka moota animoonela aya Yehova? Tthiri eyo yaahiwiirihani otepa omphenta Tiithi anyu. Omuthukumanoni ninniixutta itthu sinceene sa mBiibiliyani vaavo vaniwiriyana ahu myaha sinilavuliwa, osommwa wa Biibiliya ni oweha sowooniherya. (Neh. 8:8) Nave nkahaya muupuwele mureerelo oniphwanya anyu mwaalokiheryaka iponto suulupale sa yoosoma ya Biibiliya ni owiriyana ele akina attottenle aya mureerelo!

5. Mithukumano sinookhaliheryani sai ovarihela muteko ele yiixuntte anyu mBiibiliyani ni olokiherya moota onilaleerya anyu?

⁵ Mithukumano ntoko Yoosoma ya Owehaweha, sinniniixuttiha orumeela mookumini mwahu ele eniixutta ahu mBiibiliyani. (1 aTes. 4:9, 10) Niireke mootoko owiriyana Yoosoma ya Owehaweha, yeeyo yawiirihaleni ophavela wuncererya muteko oninvarela anyu Yehova, olokiherya saana mavekelo anyu ni wiixutta enamuna yowaalevelela anna ni arokora? Mithukumano sikina ninkhalana ahu vasumanani, sinniniixuttiha moota woolaleerya ihapari sooreera ni moota wowaakhaliherya akina wiiwexexa ekeekhai ya mBiibiliyani.—Math. 28:19, 20.

6. Mithukumano sinlipiha sai waamini wahu?

⁶ Mithukumano sinninlipiha. Olumwenku ola wa Satana onneererya ovukula waamini wahu, nto ikwaha sikina hiyo pooti okhulumuwa. Masi mithukumano sahu sinninlipiha wira nivikaniheke omurumeela Yehova. (Musome Miteko 15:30-32) Ikwaha sinceene, ninnithokorerya moota iprofesia sa mBiibiliyani siniiraneya aya. Eyo enninlipiherya wira Yehova onoomaliherya soolaiherya sawe, nlelo sihiiraneyale. Anna ni arokora anninlipiha okathi anilavula aya myaha, masi ohiya vo, anninlipiha-tho okathi anivaha aya ikomentaario ni wiipa masipo aninvuwiha Yehova. (1 aKor. 14:26) Nave-tho okathi onivaanela ahu naawo vahinatthi ni nuumala mithukumano, ninnilipa okhala wira niri ni apatthani anniphenta.​—1 aKor. 16:17, 18.

7. Nthowa xeeni vanitthuneya aya othukumana ni muloko?

 ⁷ Omuthukumanoni ninnikhaliheriwa ni munepa wootteela wa Muluku. Yesu onnirumeela munepa owo wootteela wira eettiheke miloko. Owo onnileela wira nohaana ‘wiwa etthu Eroho [munepa] ya Muluku enahimeryaya aKristu’. (Wis. 2:7) Munepa wootteela onninikhaliherya okhootta soweeha ni olaleerya nihoovaka etthu. Nave pooti onikhaliherya othanla itthu sooloka. Tivonto, nohaana wiimananiha vanceene ohicompela mithukumano wira naakheleke munepa wa Muluku.

8. Nnaakhaliherya sai annihu naahicompeleke mithukumano, ovaha ikomentaario ni wiipa masipo? (Nwehe ekaaxa eni: “Owo Onikhuma Omithukumanoni Ohakalanle ene”.)

⁸ Omithukumanoni, nookhalana eparakha ya oowooniherya anna ni arokora wira ninnaaphenta. Anna anceene mmulokoni mwahu annivilela mixankiho suulupale. Murummwa paulo olempe so: “Nlipiheryaneke”. (aHéb. 10:24, 25) Okathi onithukumana ahu wira nlipihane, hiyo ninniwooniherya annihu wira ninnaaphenta. Okathi ninrowa ahu omuthukumanoni, ninniwooniherya annihu wira nimphavela okhala vamosa ni awo, ni wira ninnaathokorerya. Nave-tho awo annilipa vaavo vaniwiriyana aya ikomentaario sahu ni wiipa wahu.​—aKol. 3:16.

9, 10. (a) Mutthokiherye moota masu a Yesu ari Yohani 10:16 anooniherya aya otthuneya waya othukumana ni annihu. (b) Nimmukhaliherya sai mutthu oninyokhiwa ni amusi awe, vaavo vahincompela ahu mithukumano?

⁹ Orowela mithukumano ninnikhaliherya muloko wiiraana. (Mmusome Yohani 10:16.) Yesu aahiilikanyiha ni makampusi, ni atthareli awe ntoko nikoto na ipwittipwitthi. Muupuwele ela: Akhala wira ipwittipwitthi piili siri vasulu va mwaako, piili siri mukhatoni, ni emosa eri opuro mukina, niireke ipwittipwitthi iyo siri nikoto nimosa? Nnaari, okhala wira nikoto na ipwittipwitthi ninkhala vamosa ni nimmutthara makampusi aya. Vamosaru, nihivalaaneke ni annihu, nicompelaka mithukumano. Nohaana othukumana vamosa ni annihu ntoko “nikoto nimosa”, nneettihiwa ni “makampusi aya mmosá”.

¹⁰ Mithukumano sahu sinninikhaliherya okhala oowiiraana ntoko emusi eniphentana. (Esal. 133:1) Atthu akina mmulokoni aakhoottiwa ni amusi aya, wala anamuyari aya. Masi Yesu aahilaiherya wira ale animutthara anoophwanya emusi aya mmulokoni, yeeyo enrowa waaphentaka ni waakhapelela. (Mar. 10:29, 30) Nto akhala wira khamunicompela mithukumano, nyuwo pooti okhala ntoko paapa, maama, munna wala murokora a mutthu mmosa mmulokoni. Nto wuupuwelela eyo, onooniiriha ohicompela mithukumano.

11. Orowela mithukumano onnikhaliherya sai onvaha Yehova ele eniphwanela awe?

¹¹ Omithukumanoni ninninvaha Yehova ele eniphwanela awe. Okhala wira owo Mpattuxa ahu, hiyo nohaana omuxukhurela, omuttittimiha ni onvuwiha. (Mmusome Wisupulula 7:12.) Nnoowerya opaka eyo okathi onivekela ahu, wiipa ni ovaha ikomentaario mmuthukumanoni. Tthiri nookhalana eparakha yuulupale ya onvuwiha Yehova khula esumana!

12. Yehova onoonela sai naiwelelaka yooruma awe ya othukumanaka?

¹² Yehova tonipattunxe, nto nohaana omwiiwelela. Owo onniruma wira nithukumaneke, vanceenexa vaavo vanaattamela ahu wanikisa. Wiiwelela yooruma eyo, Yehova onnihakalala. (1 Yoh. 3:22) Onniweha ni onnivaha efaita wiimananiha wahu wira nihicompeleke mithukumano.​—aHéb. 6:10.

13, 14. Nimmwaattamela sai Yehova ni Yesu mmuthukumanoni?

¹³ Orowela mithukumano, ninnimooniherya Yehova wira nimphavela wataana ni yena ni Mwanawe. Mmithukumanoni ninnimusoma Biibiliya ni wiixutta ele Yehova oniphavela awe wira nipakeke ni moota wookhala moovarihana ni sooruma sawe. (Yes. 30:20, 21) Hata yaale ahinimurumeela Yehova, okathi anirowa aya omuthukumanoni annihimya wira: “Vekekhai, Muluku ori ni nyuwo!” (1 aKor. 14:23-25) Yehova onneettiha mithukumano sahu orumeelaka munepa awe wootteela, nave owo tonnivaha itthu sotheene siniixutta ahu. Mithukumano sinninikhaliherya owiriyana ele Yehova enihimya awe, woona moota onniphenta awe ni oniiriha omwaattamela.

¹⁴ Yesu, yoowo ori muru wa muloko, aahimmye so: “Nipuro ninthukumanaya atthu anli walá araru ni nsina naka, miyo kiri vavo, vamosá n’awo”. (Math. 18:20) Biibiliya onihimya-tho wira Yesu “onetta eriyari” ya miloko. (Wis. 1:20–2:1) Eyo enooniherya wira Yehova ni Yesu ari ni hiyo, ni anninlipiha okathi onithukumana ahu. Nto Yehova onoonela sai vaavo oniweha awe mwiimananihaka wira mwaataane nuuwo vamosa ni Mwanawe?

15. Moota xeeni ohicompela mithukumano onimooniherya aya Muluku wira nimphavela omwiiwelela?

¹⁵ Orowela mithukumano, ninnimooniherya Yehova wira ninnimwiiwelela. Yehova khonnikhanyererya opaka ele enniruma awe. (Yes. 43:23) Nto namwiiwelelaka, ninnimooniherya wira ninnimphenta ni ninnikupali wira yena toniphwanelela onilamulela. (aRom. 6:17) Mwa ntakiheryo, exeeni yaarowa anyu opaka vaakhanle wira patarau anyu onnoovahani muteko, yoowo muhiniwerya anyu orowela mithukumano sotheene? Wala guvernu a elapo anyu onihimya wira ole onrowa othukumana wira amukokhoreleke Yehova onoolivihiwa muulutha, onootthukweliwa wala ohukhummwa. Ikwaha sikina pooti wira ninnithanla ovara etthu ekina owaani, okathi wa mithukumano. Mwa itthu sotheene iyo siromoliwe, Yehova khonnikhanyererya, owo onninihiya wira nithanleke yoopaka. (Mit. 5:29) Masi khuta ekwaha enithanla ahu omwiiwelela, owo onnihakalala.​—Mir. 27:11.

16, 17. (a) Ninsuwela sai wira maKristau oopacerya, yaanivaha efaita mithukumano? (b) Munna George Gangas oonela sai mithukumano?

¹⁶ Nuumala othukumana nihiku na Pentekoositi a 33 EC, maKristau yaanimakela othukumana wira amukokhoreleke Yehova. Awo “yanikhalela nthiti wiwa mixuttiho s’arummwa ni wettihana [othukumana] n’uphenta”. (Mit. 2:42) Awo khiyaahiyale othukumana, hata yaalupatthiwa ni anamalamulela a  oRoma ni ahooleli a itiini aYuda. Nnaamwi vahaakhweya, awo yaanipaka sotheene yaawerya aya wira athukumaneke ni annaya.

¹⁷ Olelo-va, arumeyi anceene a Yehova annixukhurela vanceene murehereryo wa othukumana ni annihakalala okhala vamosa ni annaya. Munna George Gangas, yoowo iirenle mpantta Nikhuuru Noolamulela mwa iyaakha soophiyerya 22, aahimmye so: “Miyo, othukumana ni anna teri etthu emosa enikisivela vanceene ni ennikilipiha. Okisivela okhala oopacerya ophiya ni ookiserya okhuma Empa ya Omwene. Vannikisivela vanceene ovaanela ni atthu a Muluku. Okathi onikhala aka eriyari ya atthu awo, vanikhala ntoko kiri ni emusi aka, mparayiisu yomunepani”. Owo aahincererya oriki: “Etthu emosa enitepexa aka ophavela, ori owiriyana mithukumano”.

18. Munoonela sai mithukumano sahu, nto exeeni elakenle anyu opaka?

¹⁸ Niireke nyuwo munoonela siiso mithukumano wira nimukokhoreleke Yehova? Akhala wira ti siiso, mwiimananiheke wira muthukumaneke vamosa ni anninyu mmulokoni, hata vahikhweyaka. Mmooniherye Yehova wira munoonela sisaale ntoko Mwene Davidi oonela awe. Owo aahimmye so: “Apwiya! Ennikisivela empa enkhalanyu”.​—Esal. 26:8.