1, 2. (a) Yesaya 60:22 oniiraneya sai mahiku ala ookiserya? (b) Etthu xeeni enitthuneya mpantta wa valaponi wa otthokeya wa Yehova?

“ETTHOKO anyu yamukhanixa enokhala muttitthi munjene: etthoko anyu yoyevaxa enokhala nloko nowatta atthu”. (Yesaya 60:22) Moolumo ala anniiraneya mahiku ala ookiserya. Tthiri, mwaakha wa 2015, arumeyi a Yehova oowiiraka 8.220.105, aavara muteko woolaleya ihapari sooreera sa Omwene olumwenku wotheene! Muluku aahihimya wuncerereya wa atthu awe oriki: “Miyo, Apwiya, kinrowa omaliherya sothene vowakuveya, waphiyakaru okathi aya”. Nto vaavo okathi onivira aya, muteko onnincerereya. Niireke olelo-va ninnipaka eniwerya ahu wira nilaleerye ni owiixuttiha atthu ihapari sooreera? Anna ni arokora anceene annipaka eyo arumeelaka ntoko mapioneero ookilaatheya aahiiso ookhaliherya. Akina aathaamela muttetthe mukina wira yakhaliherye muteko woolaleerya, nave akina anniluttuweliwa okhaliherya muteko wooteka Ipa sa Omwene.

² Khula mwaakha, sinnikhumelela miloko sowiiraka 2.000. Miloko iyo sinnitthuneya axitokweene ni arummwa oorumeela. Khuta mwaakha, ikonto sinceene sa arummwa oorumeela  annitthuneya wira akhale axitokweene, ni ikonto sinceene sa anna annitthuneya wira akhale arummwa oorumeela. Mwekeekhai, vannitthuneya anna ni arokora “okelela oholo mmutekoni mw’Apwiya”.​—1 aKorinto 15:58.

3, 4. Exeeni enitaphulela aya wa nyuwo wunnuwa momunepani?

³ Mmusome 1 Timótheyo 3:1. Murummwa Paulo aahaattottopela anna yaawo ‘aniphavela’ wira akhale axitokweene. Wira mutthu ophwanye etthu erakamenle, owo ohaana wiimananiha aahiiso wookola moono awe wira ophwanye wala okuxa etthu eyo. Vano nkahaya mmuupuwele munna oniphavela okhala murummwa oorumeela. Owo onnoona wira ohaana wiimananiha olokiherya mikhalelo sawe ntoko muKristau. Nto, nuumala okhala murummwa oorumeela, onnivikaniha wiimananiha wira ophwanelele okhala mutokweene.

⁴ Anna ni arokora akina annipaka marukunuxo mookumini mwaya, okhala wira anniphavela omurumeela vanceene Yehova. Mwa ntakiheryo, anniphavela okhala pioneero, orumeela oBetheli, aahiiso okhaliherya oteka Ipa sa Omwene. Nrowe niwehe moota Biibiliya oniwerya awe onikhaliherya otheene ahu ovikaniha wunnuwa momunepani.

5. Amiravo aniwerya sai orumeela ikuru saya mmutekoni mwa Omwene?

⁵ Amiravo anoowerya omurumeela vanceene Yehova mwaha woowi aakhalana ikuru sinceene ni okumi wooloka. (Musome Miruku 20:29.) Amiravo akina anrumeela oBetheli, annikhaliherya muteko woopaka iliivuru ni aBiibiliya. Amiravo anceene alopwana ni athiyana anniteka Ipa sa Omwene aahiiso okhaliherya olokiherya ipa iyo. Akina anniivahererya orowa okhaliherya mapuro akhumelenle ihasara sa ephattu. Nave amiravo anceene mapioneero anniixutta nttaava nikina ni annirowa mapuro makina olaleya ihapari sooreera.

6-8. (a) Mmiravo mmosa olokihenrye sai moonelo awe muteko wa Muluku, ni exeeni ekhumelenle? (b) Ninrowa weererya sai wira noone “orera waya murima Apwiya”?

⁶ Hiyo ninnimphenta Yehova ni ophavela omurumeela vanceene. Hata vari siiso, ninnoona ntoko oona awe munna Aaron. Owo aaniphavela omurumeela Muluku moohakalala, masi khaawerya opaka eyo. Nnaamwi Aaron aarowela mithukumano ni olaleerya okathi aarya awe mmiravo, owo onihimya so: “Kaaninyoonyiwa orowa omuthukumanoni ni muteko woolaleerya”. Exeeni yaapanke awe?

⁷ Aaron aahiimananiha omusoma Biibiliya khula nihiku, olokiherya mithukumano, ni ovaha ikomentaario mmithukumanoni. Nave, aahipacerya ovekela ikwaha sinceene. Itthu iya sotheene saahimukhaliherya wunnuwa momunepani. Aahimusuwela saana Yehova, ni aanitepa omphenta. Mwaha woopaka eyo, Aaron aanihakalala. Aahikhala pioneero, aanaakhaliherya akina okathi saakhumelela aya ihasara sa ephattu, ni aahirowa olaleerya elapo ekina. Vano Aaron mutokweene ni onirumeela oBetheli. Onoonela sai okumi awe? Aaron onihimya so: “Miyo ‘kihererya, [ni] kihona orera wawe murima’ Yehova. Mwaha wa mareeliho akivanha awe, kinnimuxukhurela  ni ophavela wuncererya muteko oninvarela aka, nto eyo ennikumiherya mareeliho makina manceene”.

⁸ Nasaalimo aahimmye wira: “Mwererye, mone orera waya murima Apwiya”. Nave-tho, aahincererya oriki: “Anarumela Apwiya khivo enahalela”. (Musome Esalimo 34:9-11.) Tthiri, vaavo vanimurumeela ahu Yehova ni murima wotheene, ninnihakalala mwekeekhai mwaha woowi ninnisuwela wira nimpaka etthu enimusivela. Nave owo onoovikanihaka onikhapelela ntoko sileihenrya awe.

9, 10. Xeeni vanitthuneya aya ovikaniha ‘owehererya’?

⁹ Hiyo pooti ophavela wuncererya muteko oninvarela ahu Yehova. Masi ankhi akhala wira onnivira okathi munceene niwehereryaka ovahiwa eparakha mmulokoni aahiiso olipelela olokihereya mikhalelo sahu? Nihaana ovikaniha opixa murima. (Mikeya 7:7) Hata Yehova eemereryaka muxankiho owo ovikaniha, nikupaliki wira onrowa onikhaliherya wira nivilele. Nnoowerya wiixutta etthu ni ntakiheryo na Abrahamu. Yehova aahimuleiherya wira aarowa omuyara mwaana, masi aahaana owehererya iyaakha sinceene Isakhi ohinatthi oyariwa. Okathi owo, Abrahamu aahipixa murima, ni aahivikaniha omwaamini Yehova.​—Maphattuwelo 15:3, 4; 21:5; aHéberi 6:12-15.

¹⁰ Tthiri, khivanikhweya owehererya. (Miruku 13:12) Masi akhala wira ninnivikaniha wuupuwelela mukhalelo ahu ni onyoonyiheya wahu, ninrowa wooceya. Ohiya-vo, nihaana orumeela okathi owo wira nilokiherye mikhalelo sahu wira nikhapeleleke miritti sikina sa mmulokoni.

11. Mikhalelo xeeni somunepani sinitthuneya ahu okhalana, ni xeeni siryaaya sootthuneya?

¹¹ Munnuuherye mikhalelo ni osuwela wanyu. Omusoma Biibiliya ni wuupuwelela ele enisoma anyu, pooti wookhaliheryani okhala a miruku, wuupuwelela aahiiso ovarerya saana myaha, ni opaka soothanla sooloka. Tthiri anna ahaana okhalana mikhalelo ni osuwela iwo wira akhapeleleke muloko. (Miruku 1:1-4; Tito 1:7-9) Okathi onimusoma ahu Biibiliya, nnoowerya woona moota Yehova onoonela awe myaha sinceene. Nto khula nihiku, nnoowerya orumeela ele eniixutta ahu wira nipake soothanla sinimuhakalaliha Yehova. Mwa ntakiheryo, nnoosuwela moota wowaathokorerya akina, orumeela saana musurukhu, ni moota woothanla matthekulelo ni soowara.

12. Moota xeeni anna mmulokoni anrowa aya wooniherya ororomeleya?

¹² Nvareke saana khula muteko onivahiwa anyu. Okathi atthu a Muluku yaatthikenle aya oteka etemplo, Nehemiya aahaaphavela atthu wira akhapeleleke miritti sikina. Owo aathanlale ale yaarina mweettelo wooloka. Aahisuwela wira alopwana ale yaanimphenta Muluku ni yaarowa wiimananiha ovara khula muteko waavahiwa aya. (Nehemiya 7:2; 13:12, 13)  Olelo-va, enniiraneya etthu emosaru, maana anna oororomeleya, aniluttuweliwa ovara muteko, ni arina mweettelo wooloka, annivahiwa miritti sinceene. (1 aKorinto 4:2) Tivonto, hata nri munna aahiiso murokora, nihaana wiimananiha okathi wotheene ovara saana khula muteko onivahiwa ahu.​—Mmusome 1 Timótheyo 5:25.

13. Munrowa otthara sai ntakiheryo na Yosefe vaavo atthu akina anoothokoreryayani moohixariya?

¹³ Mmuroromeleke Yehova. Mpakeke exeeni akhala wira akina anoothokoreryani moohixariya? Nyuwo pooti waahimeerya moonelo anyu. Masi akhala wira munivikaniha wiixaakiha ni othipelela ohimya wira mookhalana exariya, munrowa otepihaka muxankiho owo. Nnoowerya wiixutta itthu sinceene ni ntakiheryo na Yosefe. Annawe yaamuthokorerya mootakhala. Aahootheriwa, ni aahitthukweliwa mukhatteya mwaha wa etthu yahaapanke awe. Masi Yosefe aamuroromela Yehova. Aanuupuwela sooleiherya sa Yehova, ni aahivikaniha ororomeleya. (Esalimo 105:19) Okathi owo wooxankiha, aahinnuuherya mikhalelo sooloka saamukhalihenrye muhoolo mwaya vaavo aavahiwa awe okhulupale. (Maphattuwelo 41:37-44; 45:4-8) Akhala wira akina anoothokoreryani moohixariya, munvekeleke Yehova wira oovaheeni miruku. Owo onimookhaliheryani opixa murima ni waareerela murima okathi onilavulana anyu.​—Mmusome 1 Pedru 5:10.

14, 15. (a) Xeeni vanitthuneya ahu ‘wipasopa’ voohimya sa moota onilaleerya ahu? (b) Munoowerya weererya enamuna ekina yoolaleerya wira mwaaphwanye atthu? (Nwehe elatarato yoopacerya ni ekaaxa eni: “Munniphavela Weererya Enamuna Ekina?”)

¹⁴ Paulo aahimuleela Timootheyo wira ovikaniheke olokiherya moota aawiixuttiha awe atthu Soolempwa. Owo aahimmye so: “Mwipasope mmansinyu n’itthu sinixuttihanyu”. (1 Timótheyo 4:13, 16) Timootheyo aari namalaleerya mwa iyaakha sinceene. Nto, xeeni aatthuneya awe olokiherya wiixuttiha wawe? Timootheyo aahisuwela wira atthu ni mikhalelo sinnivirikana. Aaphavela wira atthu avikaniheke onwiriyana, tivonto aahaana ovikaniha olokiherya moota aawiixuttiha awe moovarihana ni mikhalelo saya. Okathi onilaleerya ahu, nihaana opaka etthu emosaru.

¹⁵ Mapuro makina, vaavo vanilaleerya ahu empa ni empa, khinnaaphwanya axineene etthoko. Mapuro makina, hata atthu aryeene vate, vannivila okela mukintaali mwaya. Akhala wira eyo enniiraneya muttetthe anyu, niireke munniwerya weererya inamuna sikina soolaleerya wira mwaaphwanye atthu awo?

16. Xeeni olaleerya mapuro oowaatta atthu onikumiherya aya mireerelo?

¹⁶ Anna ni arokora anceene annisiveliwa olaleerya mapuro oowaatta atthu. Mwa ntakiheryo, mapuro aniweliwa kampoi, mapuro aniweliwa ikaaro, omerkaatu ni mparkhi wira yaaphwanye atthu. Namoona pooti ovaanela ni mutthu voohimya sa ihapari sikhumelenle ninaano. Aahiiso owo pooti olavula etthu yooloka voohimya sa anaawe mwaneene etthoko aahiiso omukoha moota oneetta aya muteko awe. Akhala wira mutthu owo onnisiveliwa ovaanela, namalaleerya owo pooti olavula mwaha mmosa wa mBiibiliyani ni omukoha voohimya sa mwaha owo. Ikwaha sinceene atthu anniphavela wiixutta itthu sinceene sa mBiibiliyani.

17, 18. (a) Exeeni enrowa wookhaliheryani ohoova olaleerya mapuro oowaatta atthu? (b) Xeeni vanoona anyu okhala wa faita otthara moonelo wa Davidi wa onvuwiha Yehova okathi onilaleerya anyu?

¹⁷ Waaniheryasa vannoovilani ovaanela ni mutthu ohinimusuwela anyu mphironi. Eddie, pioneero onikhala muttetthe wa oNova York, oona siiso. Masi yookhala etthu yaamukhalihenrye oxintta muxankiho owo. Owo onihimya wira: “Okathi naamulompa ahu Muluku vatthokoni, miyo ni mwaaraka naanaavya waakhuliwa wa makoho aahiiso moonelo wa atthu. Nave naahaakoha Anna akina wira anivahe malakiheryo makina”. Vano Eddie onniphavela olaleerya mapuro oowaatta atthu.

¹⁸ Vaavo vanitepa ahu osiveliwa olaleerya ni olokiherya inamuna sahu sowaalaleerya atthu ihapari sooreera, wunnuwa wahu momunepani onnooniwa ni atthu akina. (Mmusome 1 Timótheyo 4:15.) Nave-tho nnoowerya omukhaliherya mutthu okhala murumeyi a Yehova. Davidi aahimmye so: “Kinimwattottopela Apwiya okathi p’ukathi: molumo aka anonvuwiha Muluku vohihiyererya. Murim’aka onnìttottopa mwaha w’Apwiya”.​—Esalimo 34:2, 3

19. Xeeni murumeyi a Yehova onihakalala awe, hata ophwanyiwaka mixankiho?

¹⁹ Nave Davidi aahimmye so: “Apwiya! Itthu sothene sipattuxalyanyu sovuwiheni:  atthu anyu othene yottottopeleni. Elaleye ovuwa w’omwene anyu: elaleyeke miteko sanyu sowerya. Atthu othene esuwelihiwe owerya wanyu n’uvuwa wotikiniha w’omwene anyu”. (Esalimo 145:10-12) Otheene ale animphenta Yehova ni aniroromeleya wa yena, annisiveliwa vanceene waalaleerya akina voohimya sa Yehova. Masi sai akhala wira mwaha wa owereyasiwa aahiiso wuuluvala, khamunwerya oviriha okathi munceene mulaleeryaka empa ni empa ntoko siniphavela anyu? Muhaana wuupuwelaka wira munninvuwiha Yehova okathi wotheene munaalaleerya anyu atthu awaattamenleni, ntoko manfurumeero aahiiso mameediko. Akhala wira muri mukhatteya mwaha wa waamini wanyu, munoowerya waalaleerya akina voohimya sa Yehova, ni omuhakalaliha. (Miruku 27:11) Nave, Yehova onnihakalala akhala wira munnimurumeela nnaamwi amusi anyu akina ahimurumeelaka. (1 Pedru 3:1-4) Hata soophwanyakani mixankiho sinceene, munoowerya onvuwiha Yehova, ovikaniha omwaattamela ni wunnuwa momunepani.

20, 21. Akhala wira moovahiwa miritti mootthokeyani mwa Yehova, munrowa okhaliherya sai muloko?

²⁰ Tthiri Yehova onrowa wooreelihani akhala wira munoovikaniha omwaattamela ni wiimananiha omurumeela. Waaniheryasa mwalokiherya eprograma anyu aahiiso okumi anyu, munookhalana okathi wira mwaakhaliherye atthu wiixutta voohimya sa sooleiherya sooloka sa Muluku. Nave pooti ovikanihaka waakhaliherya vanceene anna. Vano nkahaya muupuwele moota anna ni arokora anrowa aya woophentani, vaavo vaniweha aya wiimananiha wanyu okhaliherya muloko!

²¹ Hata nimurumeelaka Yehova okhuma khalai aahiiso niinano, otheene ahu nnoowerya ovikaniha omwaattamela Yehova, ni wunnuwa momunepani. Yoosoma enittharelana, ninrowa othokorerya moota wowaakhaliherya akina wunnuwa momunepani.