1, 2. (a) Xeeni okathi mukina ninxanka ahu? (Nwehe elatarato yoopacerya.) (b) Exeeni enrowa ahu othokorerya mwaha ola?

OLELO-VA, Satana onnirukurerya “ntoko kharamu onòpa murukulu, amphavelaka òmukhura”. (1 Pedru 5:8; Wisupulula 12:17) Tivonto, okumi ti wooxankiha, nave arumeyi a Muluku sinnaaphwanya mixankiho iyo. Nave-tho, ikwaha sikina sanaaphwanya mixankiho iyo arumeyi a Muluku a khalai. Mwa ntakiheryo, Biibiliya onihimya wira ikwaha sikina Mwene Davidi aanixanka. (Esalimo 13:3) Nave, murummwa Paulo ‘ahivelavela nihiku ti nihiku, othokoreryaka’ miloko. (2 aKorinto 11:28) Masi, exeeni enireerela ahu opaka akhala wira nooxanka vanceenexa?

² Khalai, Tiithi ahu oophenta a wiirimu aahaakhaliherya arumeyi awe wira avukule oxanka, ni oniphavela opaka etthu emosaru mahiku ala. Biibiliya onihimya wira: “Muhelé mmatatani mwawe ovelavela wanyu wothene, okhala wira owo  onnokhapelelani”. (1 Pedru 5:7) Munrowa owerya sai ohela mmatatani mwa Muluku ovelavela wanyu? Ninrowa othokorerya inamuna xexe sinrowa wookhaliheryani. Nyuwo muhaana (1) ovekela, (2) osoma ni wuupuwelela Nuulumo na Muluku, (3) ohiya munepa wootteela wa Yehova wookhaliheryakani, ni (4) omuleela moonelo anyu mutthu onimuroromela anyu. Vaavo ninthokorerya ahu inamuna iya xexe, mweererye oweha opuro onireerela anyu olokiherya.

3. Munrowa owerya sai ‘wareya Apwiya [Yehova] muritti anyu’?

³ Enamuna yoopacerya wira nihele mmatatani mwa Yehova oxanka wahu, ti onvekela ni murima ahu wotheene. Okathi onixanka anyu, Tiithi inyu oophenta a wiirimu oniphavela wira mmuleeleke itthu sinooxankihani. Nasaalimo Davidi aahimuxonttela Yehova oriki: “Muluku aka! Mwiwe ovekela waka”. Nave esaalimo emosaru, Davidi aahimmye so: “Nto nyuwo mwareye Apwiya muritti anyu: awo t’aniwemexani”. (Esalimo 55:2, 23) Nuumala opaka sotheene siniwerya anyu wira mphuke muxankiho anyu, munvekeleke Yehova ni murima anyu wotheene wira ookhaliheryeni ovukula oxanka wanyu. Nto nivekelo ninnikhaliherya sai? Nave ninrowa onikhaliherya sai okathi onixanka ahu vanceenexa?​—Esalimo 94:18, 19.

4. Okathi onixanka ahu, xeeni vanitthuneya aya ovekela?

⁴ Mmusome aFilipi 4:6, 7. Moota xeeni Yehova onaakhula awe mavekelo oohihiyererya anipaka ahu ni murima wotheene? Yehova onoowerya onikhaliherya okhala oomaaleleya ni osyaka muupuwelo ni moonelo woohiloka. Nave Muluku onoonikhaliherya ophwanya murettele wekeekhai, ohiya oxanka ni woova. Anna ni arokora anceene aaphwanya murettele owo. Nave hiyo nnoowerya ophwanya. Tthiri, “murettele wa Muluku” onoowerya wookhaliheryani oxintta khula muxankiho! Muhaana omuroromela natiri a Yehova oni: “Muhové! Miyo kiri ni nyuwo. Muhivelavelé! Miyo ki Muluku anyu. Miyo kinnolipihani: kinnokhaliheryani”.​—Yesaya 41:10.

5. Nuulumo na Muluku ninrowa wookhaliheryani sai ophwanya murettele wekeekhai?

⁵ Enamuna ya nenli wira niphwanye murettele wekeekhai, ori osoma ni wuupuwelela iversiikulu sinisoma ahu. Xeeni vanitthuneya aya opaka eyo? Okhala wira, Biibiliya ti Nuulumo na Muluku. MBiibiliyani sookhala miruku sooloka sinikhuma wa Mpattuxa ahu. Hata muxankale ene vanceene, munoowerya wuupuwelela miruku sa Muluku ni woona moota siniwerya aya woolipihani. Opaka eyo enimookhaliheryani oxintta oxanka, ovukula aahiiso osyaka oxanka vanceenexa. Yehova onnooniherya  ovarihana okhanle osoma Nuulumo nawe ni ‘olipiha murima ni okhalana nthiti’, wira mutthu ‘ohithukumeleké nnákhala wova’.​—Yoxuwa 1:7-9.

6. Moolumo a Yesu anookhaliheryani sai?

⁶ MBiibiliyani, ninnisoma moota Yesu aalavula awe ni atthu. Atthu awo yaanisiveliwa onwiriyana mwaha woowi moolumo awe yanaamaaliha ni waalipiha murima, vanceenexa atthu ookhulumuwa aahiiso ooriipiwa murima. (Mmusome Matheyo 11:28-30.) Yesu aanithokorerya moonelo wa atthu akina. (Marko 6:30-32) Okhala wira Yesu aahaaleiherya waakhaliherya arummwa awe, nave owo onrowa onikhaliherya olelo-va. Hata Yesu ohikhanle valaponi ni hiyo olelo-va, nnoowerya ottottela mureerelo nikhaliheryo nawe. Tthiri, Yesu yoowo ori Mwene ahu a wiirimu onnivikaniha oniphenta. Tivonto, okathi onixanka anyu, mukupaliki wira onimookhaliheryani okathi wooreerela. Yesu onninivaha nlipelelo ni olipa murima, wira onikhaliherye oxintta oxanka.​—aHéberi 2:17, 18; 4:16.

7. Munepa wootteela wa Muluku onnikhaliherya sai?

⁷ Yesu aahileiherya wira Tiithi ihu a wiirimu, onrowa onivaha munepa awe wootteela akhala wira nnonvekela. (Luka 11:10-13) Moota xeeni enamuna ela ya neeraru ennikhaliherya aya ovukula oxanka? Munepa wootteela wa Muluku aahiiso ikuru sawe, sinninikhaliherya okhalana mikhalelo sooloka sirina awe Muluku ahu oowerya sotheene. (aKolosi 3:10) MBiibiliyani mikhalelo iya sinihimmwa okhala yoowiima ya munepa. (Mmusome aGalasia 5:22, 23.) Vaavo vaniimananiha ahu okhalana mikhalelo iya, wataana wahu ni akina onnilipa, ni nnoowerya osyaka itthu saarowa oniiriha oxanka. Nrowe noone moota yoowiima ya munepa ennikhaliherya aya mwa inamuna soovirikana.

8-12. Yoowiima ya munepa enrowa wookhaliheryani sai?

⁸ “Ophenta, otteliwa murima, murettele”. Vaavo munaattittimiha anyu atthu akina, munoowerya ovukula oxanka. Moota xeeni? Okhala wira, vaavo munooniherya anyu ophentana ntoko anna, oreerelana murima ni ottittimiha, munnisyaka miyuupuwelo soohiloka ntoko onanariwa, onyoonyiheya ni oxanka. Nave munookhalana murettele ni atthu awo.​—aRoma 12:10.

⁹ “Ovilela, othunku, orera murima”. Biibiliya onihimya wira: “Murerelaneke murima n’umorelana ikharari mukina ni mukhw’awe. Mulevelelaneke”. (aÉfeso 4:32) Vaavo nintthara ahu miruku iya, ninnaataana ni atthu akina ni osyaka itthu saarowa oniiriha oxanka. Nave-tho, onoonikhaliherya ophuka mixankiho sinikhumelela mwaha wa ohimalela wahu.

¹⁰ “Ororomeleya”. Olelo-va, mwaha woothowa musurukhu, okathi mukina ninnixanka ni itthu sa werutthuni. (Miruku 18:11) Ninrowa osyaka sai oxanka mwaha wa itthu iyo? Nihaana otthara miruku  sa murummwa Paulo sini: “muhakalaleke n’itthu sirinanyu”. Omuroromela Yehova onoonikhaliherya okupali wira onoonivaha itthu sinnithowa. Maana Muluku onileiherya wira: “Miyo nkinonyanyalani-tho: kinimojalani mahiku othene”. Tivonto, vaniwerya ahu ohimya ntoko Paulo aahimmye wira: “Apwiya t’anikikhaliherya, tivó vahinòvaka etthu. Atthu anwerya okìriha exeni?”​—aHéberi 13:5, 6.

¹¹ “Wiyeviha, wisumaliha aahiiso [wiihiiha]”. Nkahaya muupuwelele mureerelo oniphwanya anyu akhala wira munimwiiyeviha aahiiso wiihiiha. Mikhalelo iya sinimookhaliheryani osyaka opaka aahiiso ohimya itthu saarowa wooxankihani, nave munoottottela mureerelo mwaha woosyaka moolumo “òwawa, ònanariwa, òwali, òviruwa ni òruwana”.​—aÉfeso 4:31.

¹² Wiiyeviha, onimookhaliheryani okupali wira ‘Muluku tòwerexa’ ni ‘ohela mmatatani mwawe ovelavela wanyu wothene’. (1 Pedru 5:6, 7) Akhala wira munimwiiyeviha, Yehova onimookhaliheryani ni wookhapelelani. Osuwela wira sookhala itthu siniwerya anyu opaka ni iye sihiniwerya anyu, onoowiirihani ohiiroromela. Nave munoovukula oxanka okhala wira munimuroromela Muluku.​—Mikeya 6:8.

13. Yesu aaphavela ohimya exeeni ni masu oowi: “Muhukhuwé”?

¹³ Matheyo 6:34 (mmusome), ninniphwanya miruku sa Yesu sini: “Muhukhuwé”. Hiyo pooti woonaka wira miruku iya ti soovila otthara. Yesu aaphavela ohimya exeeni ni masu ala? Nihiixutta wira ikwaha sikina Davidi ni Paulo yaanixanka. Nto Yesu khaaphavela ohimya wira ale animurumeela Muluku khanikhala-khala axankaka. Ohiya-vo, Yesu aahaakhaliherya awiixutti awe woona wira wuukhuwa mootepana aahiiso moohikhalela, khoniphuka muxankiho. Nave okhala wira khula nihiku nookhalana mixankiho saya, tivonto maKristau ahaana osyaka wuupuwelela mixankiho sivinre aahiiso sa muhoolo wira ahincererye oxanka waya. Moota xeeni miruku sa Yesu sinookhaliheryaayani ovukula oxanka?

14. Ntoko Davidi, munrowa ovukula sai oxanka?

¹⁴ Ikwaha sikina atthu annixanka mwaha wa itampi sipanke aya khalai. Awo annixanka vanceene ni anniivaha nthowa, mwaha wa itthu apanke aya khalai. Ikwaha sikina Mwene Davidi, aahixanka mwaha wa itampi sawe. Owo aahimmye so: “Murim’aka wothuluwa, nkirere okhuwela”. (Esalimo 38: 4, 5, 9, 19) Okathi ole Davidi aahipaka etthu ya miruku wira ovukule oxanka. Owo aaniroromela wira Yehova aarowa ommorela ikharari ni omulevelela. Nave Davidi aahihakalala osuwela wira Muluku aahimulevelela.​—Musome Esalimo 32:1-3, 5.

15. (a) Exeeni eniixutta ahu ni Davidi? (b) Munrowa opake exeeni wira nvukule oxanka? (Nwehe ekaaxa eni: “ Moota Woovukula Oxanka”.)

¹⁵ Okathi mukina, woonasa wene nyuwo munnixanka mwaha wa itthu siniwiiraneelani. Mwa ntakiheryo, okathi Davidi aalempe awe Esalimo 55, owo aanoova wiiviwa. (Esalimo 55:3-6) Hata vari siiso, owo kheemerenrye wira oxanka omwiirihe ohiya omuroromela Yehova. Davidi aahimuxonttela Yehova wira omukhaliherye mixankiho sawe, nave aanisuwela wira aahaana opaka etthu wira omalihe mixankiho sawe. (2 Samuweli 15:30-34) Munoowerya wiixutta etthu ni Davidi. Ohiya oxanka vanceenexa, muhaana opaka etthu eniwerya anyu wira mphuke muxankiho owo, muroromelaka wira Yehova onimookhaliheryani.

16. Moota xeeni ele enitaphulela aya nsina na Muluku, enlipiha aya waamini wanyu?

¹⁶ Ikwaha sikina muKristau pooti oxanka mwaha wa itthu waaniheryasa sinrowa wiiraneya muhoolo. Masi muhixankeke mwaha wa itthu nlelo sihiiraneyale. Nthowa xeeni? Okhala wira ikwaha sinceene, itthu pooti ohiiraneya ntoko suupuwela ahu. Nave-tho, muupuweleke wira khiivo etthu Muluku onooceela awe. Maana nsina nawe nintaphulela: “Owo Onniiriha Okhala”. (Okhuma 3:14, Tradução do Novo Mundo) Tivonto, nihixankeke mwaha wa itthu sinrowa wiiraneya muhoolo, okhala wira nsina na Muluku ninnooniherya wira itthu sotheene aaleihenrye awe apinaatamu sinimwiiraneya. Mukupaliki wira Muluku, onrowa waareeliha arumeyi awe oororomeleya ni waakhaliherya ovukula oxanka mwaha wa itthu sa khalai, sa vano ni sa muhoolo.

17, 18. Moota xeeni omuleela mutthu onimuroromela anyu onrowa aya wookhaliheryani ovukula oxanka?

¹⁷ Enamuna ya neexexe enrowa wookhaliheryani okathi onixanka anyu, ti omuleela mutthu onimuroromela anyu itthu sinooxankihani. Pooti okhala ole othelanne anyu, mpatthani anyu muulupale, aahiiso mutokweene a mmulokoni pooti wookhaliherya woona ele mukhanle anyu oopaka. Biibiliya onihimya wira: “Ovelavela  onnimuripiha murima mutthu: nulumo nowepesa ninnimuhihimuxa”. (Miruku 12:25) Nave onihimya wira: “Mwahikoheru miruku, munimojela miteko sanyu: yattá anvaha miruku sorera, miteko iyo sinokelela oholo”.​—Miruku 15:22.

¹⁸ Mithukumano sahu sa mmulokoni sinnikhaliherya-tho ovukula oxanka. Maana mithukumano iyo sa khula esumana, nyuwo munnikhala ni anna ni arokora, yaawo anoothokoreryani ni aniphavela woolipihani. (aHéberi 10:24, 25) Nto, ‘olipihana vamosá’, onimookhaliheryani olipa momunepani ni ovukula oxanka.​—aRoma 1:12.

19. Moota xeeni wataana wanyu ni Muluku onrowa aya woolipihani?

¹⁹ Mutokweene mmosa a oCanada aahiixutta otthuneya waya ohela mmatatani mwa Yehova oxanka wawe. Owo ookhalana muteko wooxankiha, prusoore, namavaha miruku, ni ookhalana oretta onimuxankiha. Exeeni yaamukhalihenrye okhala oolipa? Owo aahiimananiha opaka yaawerya awe wira olipihe wataana wawe ni Yehova. Nave apatthani awe, yaahimukhaliherya okathi wa mixankiho ni aahaaleela amwaarawe moonelo awe. Nave-tho, axitokweene akhwaawe ni mutokweene a esirkwiitu, yaahimukhaliherya woona muxankiho awe ntoko Yehova sinoonela awe. Meediku aahimukhaliherya munna ole woona mukhalelo awe, nto aahiwerya opaka marukunuxo a eprograma awe wira okhalane okathi woophumurya ni wiiniha nikuruta erutthu awe. Vakhaani-vakhaani, aahiixutta weettiha mukhalelo awe ni moonelo awe. Akhala wira sookhala itthu sihinwerya ahu weettiherya, nihaana ovekela nikhaliheryo na Yehova.

20. (a) Ninrowa ohela sai mmatatani mwa Muluku oxanka wahu? (b) Exeeni enrowa ahu othokorerya mwaha onittharelana?

²⁰ Mwaha ola nihiixutta otthuneya waya ohela mmatatani mwa Muluku oxanka wahu, ninvekelaka Yehova, omusoma Biibiliya ni wuupuwelela ele enisoma ahu. Nave-tho, nihiixutta otthuneya waya ohiya munepa wootteela wa Yehova onikhaliheryaka, omuleela mutthu onimuroromela ahu, ni orowela mithukumano sa mmulokoni. Mwaha onittharelana, ninrowa wiixutta moota Yehova onaatthuvela awe ale animphavela.​—aHéberi 11:6.