1, 2. (a) Ninsuwela sai wira pinaatamu pooti okhala mpatthani a Muluku? (b) Exeeni enrowa ahu othokorerya mwaha ola?

OKHUMA nihiku niyariwe ahu mpakha nihiku ninkhwa ahu, ninniphavela ophentiwa. Khula mutthu onnitthuna ophentiwa, ohiya ophenta wa mulopwana ni muthiyana paahi. Hiyo ninniphavela okhalana apatthani. Masi otheene ahu ninniphavela vanceene ophenta wa enamuna emosa, eyo piiyo, ophenta wa Yehova. Atthu anceene khanikupali wira pinaatamu pooti okhalana ompatthani woolipa ni Muluku Oowerya Sotheene, maana owo khonooneya. Niireke ni hiyo nnuupuwela siiso? Nnaari!

² Biibiliya onnooniherya wira apinaatamu aatoko okhala apatthani a Muluku. Nohaana wiixutta etthu ni atthu awo, okhala wira ompatthani ni Muluku etthu emosa enireerela ophavelasa. Mulopwana mmosa aapanke ompatthani woolipa ni Muluku ti Abrahamu. (Mmusome Yakobo 2:23.) Aawenrye sai opaka ompatthani ni Yehova? Etthu emosa yaamukhalihenrye waari waamini woolipa.  Biibiliya onnimuhimya Abrahamu okhala “tithi aya atthu othene animwamini Muluku”. (aRom. 4:11) Nrowe noone moota waamini waamukhalihenrye aya Abrahamu okhala mpatthani muulupale a Muluku. Nave, khula mmosa a hiyo ohaana wiikoha so: ‘Kinrowa otakiha sai waamini wa Abrahamu ni olipiha ompatthani aka ni Yehova’?

3, 4. (a) Muhimye etthu yuulupale yeeherenrye waamini wa Abrahamu. (b) Xeeni Abrahamu aakhulenle awe ompaka mukuttho Isakhi?

³ Nkahaya mmuupuwele mulopwana mmosa oowuuluvala owelaka va mwaako. Woonasa wene, owo khonatoko weetta mukwaha woovila ntoko ola. Masi khahiyo mwaha wa wuuluvala wiirihale mukwaha owo okhala woovila. Nnaamwi aarina iyaakha 125, Abrahamu nlelo aahikhalana ikuru. ^[1] Owo aari ni mwanawe, Isakhi, yoowo aarina iyaakha 25, ni aateexale ikhuni. Abrahamu aakunxe mwaalo ni aahiilokiherya wira apattihe mooro. Yehova aaronvekela Abrahamu wira ampake mukuttho mwanawe.—Maph. 22:1-8.

⁴ Woonasa wene, Abrahamu khonatoko oviriha etthu yuulupale yeehererya waamini wawe, ovikana ekwaha ela. Aakhala atthu anihimya wira Muluku aahimutakhalela murima Abrahamu, mwaha wa onvekela ompaka mukuttho mwanawe, nave-tho aakhala akina anihimya wira Abrahamu khaamoriwa ikharari. Atthu awo anuupuwela siiso, maana awo khanaamini ni khanisuwela ele enitaphulela aya waamini. (1 aKor. 2:14-16) Abrahamu khahiyo paahi aamwiiwelela Muluku ohuupuwelaka etthu. Ohiya-vo, aaniiwelela mwaha woowi aarina waamini wekeekhai. Aanisuwela tthiri wira Tiithi awe a wiirimu, Yehova, khaarowa onvekela opaka etthu yaarowa omukumiherya maxakha mookathi woohimala. Abrahamu aanisuwela wira amwiiwelela Yehova, owo ammureeliha ni mwanawe. Exeeni yaamukhalihenrye olipiha waamini wawe? Osuwela ni sookumanana sa mookumini mwawe.

5. Abrahamu aamusuwenle sai Yehova, nto osuwela iwo waamwiirihale opaka exeeni?

⁵ Osuwela. Nnaamwi annuwale wUri a oKhaldeya, muttetthe yoowo waasanrye amuluku a ethiru, Abrahamu aahiwerya omusuwela Yehova. Vaaweryaneyale sai, nakela wuupuwela wira Terahi, paapa awe Abrahamu aakokhorela amuluku a ethiru? (Yox. 24:2) Nnaamwi Biibiliya ohihimyaka moowiiwanyeya, masi onnooniherya wira Abrahamu aari a nloko na neethanu ni xexe nuumala oyariwa Semi, mwanawe Nowe. Semi aari mulopwana oowaamini ni aahikhala mpakha Abrahamu ophiyeriha iyaakha 150. Khaninsuwela akhala wira Abrahamu aamusuwenle Yehova mwaha wa Semi. Masi vanikhala wira Semi aahiwiixuttiha amusi awe voohimya sa Yehova. Nto woonasa wene eyo ti enamuna Abrahamu aamusuwenle awe Yehova, khupacerya omphenta. Omusuwela Yehova waahimukhaliherya olipiha waamini wawe.

6, 7. Moota xeeni sookumanana Abrahamu aarina awe, saalipihale aya waamini wawe?

⁶ Sookumanana. Abrahamu aaphwannye woowi sookumanana, seiyo saamukhalihenrye olipiha waamini wawe? Vannihimmwa wira itthu soovara sinipacerya mmuupuweloni, khiyarowa vamurimani, nuumala-vo, khiyavara. Itthu Abrahamu aixuttale awe voohimya sa Yehova, saahinvara murima, nto eyo yaanimwiiriha omuttittimiha Yehova, “Muluku Mulupalexa, yowo opattunxe erimu n’ilapo ya vathí”. (Maph. 14:22) Ottittimiha moota owo, Biibiliya onnihimya okhala ‘omwiwelela Muluku’. Eyo ennimwiiriha mutthu  okhal ampatthani a Muluku. (aHéb. 5:7; Esal. 25:14) Omuttittimiha Muluku waahimwiiriha omwiiwelela Yehova.

⁷ Yehova aahimulakiherya Abrahamu ni Sara othaama elapo aya wUri, wira arowe elapo yahaasuwela aya. Awo yaarowa okhalaka muheemani mahiku otheene. Okhala wira aahiiwelela, Yehova aarowa omureeliha ni omukhapelela. Mwa ntakiheryo, Abrahamu aanoova wira aarowa waakhiwa mwaarawe ooreera, ni aarowa wiiviwa. Woova wawe khahiyo waari wa ethiru, masi Abrahamu kheemerenrye wira woova iwo omuhiihe omwiiwelela Yehova. Nto Yehova aahimukhapelela Abrahamu ni Sara mwa mwiiriirya, ovikana ekwaha emosa. (Maph. 12:10-20; 20:2-7, 10-12, 17, 18) Sookumanana iya, saahilipiha waamini wa Abrahamu.

8. Ninrowa ophwanya sai osuwela ni sookumanana, wira nilipihe ompatthani ahu ni Yehova?

⁸ Niireke vanniweryaneya opaka ompatthani ni Yehova? Aayo. Olelo-va, nookhalana itthu sinceene sinnikhaliherya okhalana osuwela ni sookumanana sa mweekumini. Masi Abrahamu khaarina itthu sinceene saakhanle oomukhaliherya okhalana osuwela ori mBiibiliyani. (Dan. 12:4; aRom. 11:33) Nuulumo na Muluku nookhalana itthu sinceene siniwerya onikhaliherya omusuwela saana ‘Mpattuxa a erimu n’ilapo ya vathí’, ni ninninikhaliherya omuttittimiha ni omphenta Muluku. Nto opaka eyo, onoonikhaliherya okhalana sookumanana, maana ninnoona moota Muluku onaareeliha awe ale animwiiwelela. Ninniixutta wira omurumeela Muluku ni murima wotheene onnihakalaliha ni onnikumiherya murettele. (Esal. 34:9; Mir. 10:22) Vaavo vanitepa ahu omusuwela ni okhalana sookumanana sinceene, omwaamini wahu Yehova ni ompatthani ahu onnitepa wunnuwa.

9, 10. (a) Exeeni enireerela opaka wira ompatthani olipe? (b) Exeeni enooniherya wira Abrahamu aanithokorerya oratteene ompatthani awe ni Yehova?

⁹ Opatthani pooti olikanyihiwaka ni muhakhu. (Musome Miruku 17:17.) Masi khahiyo etthu enirumeeliwa paahi wira ereeriheke etthu wala opuro. Onlikana ni efilori yooreera, yeeyo enitthuneya oheliwa maasi wira ethapuluweke. Abrahamu aanithokorerya oratteene ompatthani awe ni Yehova. Moota xeeni?

¹⁰ Abrahamu khuupuwela wira mwaha woowi aahimwiiwelela Muluku khalai, nto vaahiphiyerya vaavo. Mwa ntakiheryo, okathi aarowa awe oKanani ni etthoko awe, aahivikaniha omwiiwelela Yehova, okathi aapaka awe soothanla, suulupale ni saamukhaani. Ohalaka mwaakha mmosa wira oyariwe Isakhi, Abrahamu orina ene iyaakha 99, Yehova aahimuruma wira alopwana otheene a vatthokoni vawe athikiliwe. Niireke Abrahamu aahikhootta, ophavelaka enamuna ya osyaka yooruma  eyo? Nnaari, owo aahimwiiwelela Muluku “nihiku nenlo”.​—Maph. 17:10-14, 23.

11. Xeeni Abrahamu aaxankale awe mwaha wa opwetexiwa mittetthe sa oSodoma ni oGomora? Nto Yehova aamukhalihenrye sai?

¹¹ Ompatthani wa Abrahamu ni Muluku waanitepa olipa okhala wira owo aanimwiiwelela Muluku mwa itthu sotheene, hata saamukhaani. Khoovelela olavula ni Yehova khula etthu, ni ikwaha sikina aanimukoha Yehova itthu saamuxankiha. Mwa ntakiheryo, nuumala osuwela wira Muluku aarowa onyaanya mittetthe sa oSodoma ni Gomora, Abrahamu aahixanka, nto aahimukoha Muluku akhala wira aarowa waapwetexa atthu ootakhala vamosa ni anaxariya. Woonasa wene, aaxankale mwaha wa musulu awe, Lothi ni emusi awe, yaawo yaakhala oSodoma. Abrahamu aanimuroromela Muluku, yoowo ‘onlamula elapo yothene’, tivonto aanimukoha Yehova itthu saamuxankiha. Moopixa murima, Yehova aahimooniherya Abrahamu wira Owo toomoriwa ikharari, nto onnaasuwela anaxariya ni onniwoopola, hata okathi yoole onaaphukela awe atthu.—Maph. 18:22-33.

12, 13. (a) Moota xeeni osuwela ni sookumanana saamukhalihenrye aya Abrahamu muhoolo mwaya? (b) Exeeni enooniherya wira Abrahamu aanimuroromela Yehova?

¹² Mwekeekhai, osuwela ni sookumanana aarina awe Abrahamu saahimukhaliherya olipiha ompatthani awe ni Yehova. Tivonto, okathi Yehova anvekenle awe Abrahamu ompaka mukuttho mwanawe, owo aahisuwela wira Yehova toopixa murima, oomoriwa ikharari, oororomeleya ni oothokorerya. Vano nrowe nuupuwelele-tho okathi Abrahamu aawela awe va mwaako Moriya. Niireke yena aahipacerya wuupuwela wira vano Yehova tootakhala ni oomuliyala? Nnaari! Ninsuwela sai?

¹³ Ohinatthi waahiya ottuli arumeyi awe yaamuhoola, Abrahamu aahimmye so: “Muhalase vava ni bùr’ula, miyo ni mwan’ak’ola ninrowa iwe olompa. Namalá, nnotthika”. (Maph. 22:5) Abrahamu aaphavela ohimya exeeni? Niireke aamootha, vaavo aahimya awe wira aamuhokolowa ni Isakhi, osuwelaka wira aarowa ompaka mukuttho? Nnaari. Biibiliya onnooniherya etthu yaamwiiriha Abrahamu olavula siiso. (Mmusome aHéberi 11:19.) Abrahamu ‘anamini wira Muluku anwerya hatá omuhihimuxa [Isakhi] mokhwani’. Abrahamu aanaamini ohihimuxiwa wa alipa ookhwa. Aanisuwela wira Yehova aahimukhaliherya owo ni Sara oyara, nnaamwi yuuluvanle. (aHéb. 11:11, 12, 18) Aanisuwela wira Yehova khonooceela etthu. Ti nthowa naya Abrahamu onihimmwa awe okhala “tithi aya atthu othene animwamini Muluku”!

14. Mixankiho xeeni muniphwanya anyu okathi munimurumeela anyu Yehova, nto ntakiheryo na Abrahamu ninrowa wookhaliheryani sai?

¹⁴ Ankhi hiyo? Olelo-va, Yehova khonnivekela wira naapakeke mukuttho aniihu. Masi onnivekela wira niiweleleke sooruma sawe,  hata ikwaha sikina vahinikhweelaka wala nihisuwelaka oratteene nthowa naya onniruma awe. Niireke munnuupuwela etthu Muluku enoorumaweni, yeeyo munoona anyu ovila weettela? Akina annoona ovila weettela yooruma ya olaleerya. Woonasa wene, atthu awo toowuuliwa muru okhala wene, nto vannaavila omulaleerya mutthu ahinimusuwela aya. Akina-tho vannaarikela okhala atthu oovirikana ni akhwaaya oxikola wala omutekoni. (Okhum. 23:2; 1 aTes. 2:2) Okathi onivekeliwa ahu opaka etthu enoona ahu ovila, nohaana wuupuwelaka ntakiheryo nooloka na Abrahamu yoowo oonihenrye olipa murima ni waamini. Wuupuwelela matakiheryo a alopwana ni athiyana oororomeleya, onooniiriha ophavela waatakiha ni omwaattamela Mpatthani ahu, Yehova.​—aHéb. 12:1, 2.

15. Exeeni ennikupaliha wira Abrahamu khaatonko othanana mwaha wa omwiiwelela Yehova?

¹⁵ Niireke Abrahamu aahithanana mwaha wa wiiwelela sooruma sa Yehova? Biibiliya onihimya wira “Abrahamu ahuluvala vanjene sana, ahikhalana murettele. Numalá khukhwaka”. (Maph. 25:8) Okathi aarina awe iyaakha 175, ikuru saahimmalela, masi aaniwerya wuupuwelela iyaakha sinceene omurumenle awe Muluku moohakalala, nto eyo yaanimutteeliha murima. Okumi awe wotheene, aahiphavelasa olipiha ompatthani awe ni Yehova. Masi okathi onisoma ahu wira Abrahamu aahikhwa ni murettele, uuluvanle ene saana, khonitaphulela wira khaaphavela-tho okhalana okumi muhoolo.

16. Itthu xeeni soohakalaliha Abrahamu onrowa awe osuwela mParayiisu?

¹⁶ Biibiliya onihimya wira Abrahamu “aniwehererya muttetthe otekiwe mmathipeloni, wupuweliwe ni otekiwe ni Muluku”. (aHéb. 11:10) Abrahamu aanikupali wira aarowa woona muttetthe owo, eyo piiyo, Omwene wa Muluku, olamulelaka elapo. Owo onimoona tthiri! Muupuwele moota Abrahamu onrowa awe ohakalala, okathi onrowa awe okhalaka mParayiisu valaponi ni onavikaniha olipiha ompatthani awe ni Yehova. Onootteeliwa murima osuwela wira ntakiheryo nawe na waamini, nihaakhaliherya arumeyi anceene a Yehova mwa iyaakha sinceene. MParayiisu, onoosuwela wira mukuttho aaronwe awe ovaha oMwaako Moriya, naari ‘nthonyeryo’ na etthu yuulupale. (aHéb. 11:19) Nave onoosuwela wira owereya oonale awe okathi aarowa awe ompaka mukuttho mwanawe Isakhi, ohaakhaliherya atthu anceene oweha moota Yehova oonale awe owereya okathi anvahale awe Mwanawe, Yesu Kristu, ntoko mukuttho wowoopola. (Yoh. 3:16) Ntakiheryo na Abrahamu noonikhaliherya otheene ahu oxukhurela vanceene yoovaha ya Yehova, yeeyo enooniherya waaphenta wawe vanceene apinaatamu!

17. Yoolakela anyu tiivi, ni exeeni enrowa ahu othokorerya mwaha onittharelana?

¹⁷ Nto otheene ahu nilakeleke otakiha waamini wa Abrahamu. Vaavo vaniimananiha ahu omusuwela oratteene Yehova, nto ninnikhalana sookumanana sinceene, mwaha wa ovara muteko wa Muluku moororomeleya. (Mmusome aHéberi 6:10-12.) Yoolakela ahu ekhale okhala mpatthani a Yehova, mookathi woohimala! Mwaha onittharelana ninrowa othokorerya matakiheryo mararu a atthu oororomeleya, yaawo yaarina ompatthani woolipa ni Muluku.