1, 2. Xeeni opatthani wa Yonathani ni Davidi oryaaya ntakiheryo nuulupale na ororomeleya?

WOONASA wene Yonathani aahitikinihiwa oweha moota Davidi aari awe oolipa murima, ohoolo wa Goliyathi. Vano, Davidi aaheemela ohoolo wa Mwene Sawuli, paapa awe Yonathani, “akunxene mmatatani mwawe muru wa nFilisti ule”. (1 Sam. 17:57) Yonathani aanisuwela tthiri wira Muluku aanimukhaliherya Davidi, nto okhuma vaavo, “Yonathani ahisiveliwa vanjene ni yowo”. Vekeekhai, “Yonathani ahipatthana ni Davidi, tthiri animphenta ntoko saìphentawe”. (1 Sam. 18:1-3) Okumi awe wotheene, Yonathani aaniroromeleya wa Davidi.

² Ompatthani wa Yonathani ni Davidi waari woolipa, nnaamwi Muluku aamuthanlale Davidi wira okhale mwene a Isarayeli. Okathi Sawuli aaphavela awe omwiiva Davidi, Yonathani aahimukhaliherya mpatthani awe. Wira omulipihe mpatthani awe, Yonathani aahirowa omuxukurya Davidi oHorexa. Yonathani “ahimulipiherya murima [Davidi] ni nsina na Muluku”. Owo aahimuhimeerya wira: “Muhové! . . .  ti nyuwo munrowa okhala mwené a Isarayeli: vano miyo kikhale anenli”.​—1 Sam. 23:16, 17.

3. Exeeni yaari nipuro noopacerya vamurimani va Yonathani ovikana okhala oororomeleya wa Davidi? Nto ninsuwela sai? (Nwehe elatarato yoopacerya.)

 ³ Atthu anceene annisiveliwa ni mutthu oororomeleya. Niireke ninnimuttottopela Yonathani mwaha wa okhala oororomeleya wa Davidi paahi? Nnaari, okhala wira Yonathani aanihela nipuro noopacerya ororomeleya wa Yehova. Nto, yookhala etthu Yonathani oona awe okhala yootepa otthuneya ovikana ophwanya okhulupale. Etthu yaamukhalihenrye okhala oororomeleya wa Davidi, mwaha woowi aari oororomeleya wa Yehova. Nto oowanli aya yaanikhala moovarihana ni natiri yaamanelanne aya, oowi: “Apwiya, yawo ekhalé mphuki ahu ni mphuki òsúlu ahu, wa mahiku othene”.​—1 Sam. 20:42.

4. (a) Exeeni enrowa onihakalaliha? (b) Exeeni enrowa ahu othokorerya mwaha ola?

⁴ Ntoko maKristau, khahiyo paahi nnaattottopela atthu oororomeleya; hiyo-tho ninniroromeleya wa amusi ahu, apatthani ni annihu. (1 aTes. 2:10, 11) Nto ti pani onireerela omooniherya ororomeleya wahu nipuro noopacerya? Tuule onivahale okumi! (Wis. 4:11) Ovikaniha ororomeleya wa Muluku onninihakalaliha. Masi akhala wira nimphavela ororomeleya wa Muluku, nohaana opaka eyo hata okathi wa mixankiho. Mwaha ola ninrowa othokorerya moota ntakiheryo na Yonathani ninrowa aya onikhaliherya okhala oororomeleya wa Yehova, okathi onikumana ahu mixankiho iya: (1) vakhala wira mutthu orina okhulupale khoniphwanela nttittimiho, (2) vaavo akhulupale anivekela aya itthu ahiniphwanelela aya, (3) akhala wira nihiireliwa etthu voohixariya wala wootheriwa, ni (4) akhala wira vannivila ovara etthu elaihenrye ahu.

5. Nthowa xeeni olamulelo wa Sawuli waaxankiha aya atthu okhala oororomeleya wa Yehova?

⁵ Nnaamwi Yehova aamuthanlale Sawuli okhala mwene, muhoolo mwaya Sawuli aahihiya omwiiwelela Yehova, nto Muluku aahimukhootta. (1 Sam. 15:17-23) Okhala wira Yehova khaamukumihale Sawuli okathi ene yoole, nto mweettelo awe woohiloka wahaakumiherya maxakha atthu aalamulela awe. Vanaaxankiha okhala oororomeleya wa Muluku, okathi ene yoowo mwene aathanleliwe ‘okilathi vehijeni v’Apwiya’, aapaka awe itthu soohiloka.​—1 Wah. 29:23.

6. Exeeni enooniherya wira Yonathani aanimuroromela Yehova moomalela?

⁶ Yonathani aahivikaniha okhala oororomeleya wa Muluku, nnaamwi paapa awe aamurukunuwenle Yehova. (1 Sam. 13:13, 14) Profeta Samuweli aahihimya oriki: “Apwiya t’alaphenle mwaha wa nsina naya: awo khanrowa wanyanyala atthu aya”. (1 Sam. 12:22) Yonathani aahooniherya wira aanikupali masu awo, okathi yoole anakhotto aFilisti anceene ni ikaaro saya sa ekhotto 30.000, yawoopopiha aya aIsarayeli. Sawuli aarina anakhotto 600, nto owo ni Yonathani paahi ti yaarina ikapwitthi. Hata vari siiso, Yonathani aahaattamela nipuro naari atoropa aFilisti oryeene ni nakhotto mmosa paahi. Owo aahimmye so: “Khivo etthu eniwojeiha Apwiya onivaha wawerya awanan’ihu, hatá nikhalaka vakhanixa”. Nto oowanli aya yaahiwiiva atoropa 20 yaari opuro ole. Nuumala-vo, “elapo yahithukumela: wari wova waruhiwe ni Muluku”. AFilisti yaahixankiheya, nto yaahipacerya wiivana yaaworu. Nto mwaha wa Yonathani omwaamini Muluku, aIsarayeli yaahixintta ekhotto.​—1 Sam. 13:5, 15, 22; 14:1, 2, 6, 14, 15, 20.

7. Yonathani aamoonela sai paapa awe?

⁷ Hata okathi yoole Yehova aamukhoottale awe Sawuli, Yonathani aanimwiiwelela paapa awe mwa enamuna yaaphwanelela. Mwa ntakiheryo, Yonathani aahimukhaliherya Sawuli  owana ekhotto, wira awaakihe atthu a Muluku.​—1 Sam. 31:1, 2.

8, 9. Xeeni vanireerela aya waattittimiha ale avahiwe okhulupale?

⁸ Ntoko Yonathani, hiyo pooti wooniherya ororomeleya wa Yehova niwiiwelelaka mwa enamuna enikhalela ale aneettiha elapo hata akina akhalaka ntoko khaniphwanelela. Mwa ntakiheryo, makhulupale a mulaponi pooti okhala oohiroromeleya, masi hata vari siiso, ninnaattittimiha maana Biibiliya oniruma wira nihaana owiiwelela wa enamuna eniphwanelela. (Mmusome aRoma 13:1, 2.) Tthiri otheene ahu nihaana owiiwelela otheene yaale avahiwe okhulupale ni Yehova.​—1 aKor. 11:3; aHéb. 13:17.

⁹ Murokora mmosa oniitthaniwa Olga  ^[1] yoowo onikhala wAmerica do Sul aahooniherya ororomeleya wa Yehova, omwiiwelelaka iyawe, nnaamwi aamuhasula. Mwa iyaakha sinceene, mulopwana ola aanooniherya wira vaahimunanara mwaarawe okhala Namoona a Yehova. Aaninveeha, omuruwana, aanikhootta omulavuliha, aanihimya wira aarowa omuhiya ni waakuxa anamwane. Masi Olga khaattikiha soonanara siireliwa awe. Aaniimananiha okhala muthiyana ooloka, aanimwaapeela iyawe, omukatthela ikuwo sawe, ni okhapelela etthoko awe. (aRom. 12:17) Ikwaha sikina aanimuhoola mapuro aatthekula awe ni amusi awe ni apatthani. Mwa ntakiheryo, okathi iyawe aarowa awe muttetthe mukina waakhwiiye paapa awe, murokora ole aahaatthokiha anamwane ni aahitthokiha itthu saarowa aya ophavela mmukwahani. Nihiku na masikho, Olga aahimulipelela iyawe vamukhora wa okerexa, mpakha niira nle omala. Nuumala ovira iyaakha sinceene, iyawe aahipacerya orukunuxa mukhalelo awe, mwaha wa opixa murima ni nttittimiho na murokora Olga. Vano iyawe onnimutumererya ni omuhoola murokora ole omithukumanoni, nto ikwaha sikina onnihala khiyawiriyana mithukumano.​—1 Ped. 3:1.

10. Yonathani aasuwenle sai wira ti pani aareerela omooniherya ororomeleya wawe?

¹⁰ Okhala wira Sawuli aaphavela omwiiva Davidi, nto Yonathani aahixanka ahisuwelaka ti pani aarowa awe omooniherya ororomeleya. Nnaamwi aamanelanne natiri ni Davidi, Yonathani aahaana-tho omwiiwelela paapa awe.  Masi Yonathani aanisuwela wira Muluku aari ni Davidi, ohiya ni Sawuli. Tivonto, Yonathani aamuroromenle awe Davidi nipuro noopacerya onvikana paapa awe. Aahimuleela Davidi wira iipithe ni aanimulavula saana ohoolo wa Sawuli.​—Mmusome 1 Samuweli 19:1-6.

11, 12. Omphenta Muluku onnikhaliherya sai ovikaniha okhala oororomeleya wa yena?

¹¹ Alice, murokora yoowo onikhala wAustralia, ahaana othanla ti pani aareerela awe omooniherya ororomeleya wawe. Okathi aamusoma awe Biibiliya, aanaaleela amusi awe itthu saixutta awe. Nave aahaaleela wira khaarowa-tho omwiira Natali ni aahaatthokiherya mathowa aya. Wanipacerya amusi awe khiyaasiveliwe, masi muhoolo mwaya yaahinanariwa vanceene ni yena. Yoona wira Alice khonaacikha-tho. Alice onihimya so: “Maama aka aahikikhootta okhala mwanawe. Eyo yaahikiwereya vanceene okhala wira kaanaaphenta vanceene amusi aka. Masi, kaahilakela omuhela Yehova ni Mwanawe nipuro noopacerya vamurimani vaka, nto asembeleya oottharelana kaahibatiziwa”.​—Math. 10:37.

¹² Naahikhalane ephoole, ororomeleya wahu wa Muluku pooti ovuvuriwaka ni itthu sikina ntoko elapo eyariwe ahu, exikola ahu wala ekiipa ya xooku. Mwa ntakiheryo Henry aanisiveliwa omweetta dama. Exikola awe yaamakela olola, nto owo ahaana wiimananiha vanceene wira avikaniheke olola. Nto onihimya so: “Vakhaani-vakhaani, exikola yaahipacerya okuxa ororomeleya waka wa Muluku. Axooku a dama kaaweetta aka wuumalani wa sumana, yaahipacerya ovuvurya muteko wa Muluku. Nto kaahilakela okhuma ekiipa ele ya dama”.​—Math. 6:33.

13. Ororomeleya wa Muluku onrowa onikhaliherya sai weettiherya saana mixankiho sa emusi?

¹³ Ikwaha sikina vannixankiha okhala oororomeleya wa atthu otheene a emusi ahu. Mwa ntakiheryo, Ken onihimya so: “Kaaniphavela omuxukurya maama aka oowuuluvala ikwaha sinceene, ni kaaniphavela yena ovirihaka okathi vakhaani vatthokoni vahu. Masi maama aka ni mwaaraka khiyaiwanana. Wanipacerya khivaaweryaneya waahakalaliha oowanli aya ekwaha emosaru. Nto kaahoona wira, hata vari siiso, mwaaraka taari nipuro noopacerya. Tivonto, kahiimananiha ophavelasa enamuna emosa yoopaka itthu yaarowa omuhakalaliha.” Ororomeleya wa Yehova ni wiiwelela Nuulumo nawe, waahimukhaliherya Ken omutthokiherya mwaarawe nthowa naya vanireerela aya owaakhelaka oratteene amamawe, ni aahaatthokiherya amamawe nthowa naya vanireerela aya waattittimiha amwaarawe.​—Musome Maphattuwelo 2:24; 1 aKorinto 13:4, 5.

14. Sawuli aamuthokorerya sai Yonathani?

¹⁴ Ikwaha sikina pooti onixankiha ovikaniha ororomeleya wa Yehova akhala wira mutthu orina okhulupale mmulokoni ooniirela etthu voohixariya. Woonasa wene, Yonathani aahikhalana muxankiho mmosaru. Mwene Sawuli aahithanliwa ni Muluku, masi aanimuhasula mwanawe, yoowo aapanke ompatthani ni Davidi. Sawuli aahinviruwela Yonathani vanceene. Masi Yonathani khaattikihale yootakhala iireliwe awe. Khaahiyale ororomeleya wa Muluku hata wa Davidi, yoowo muhoolo aarowa okhala mwene a Isarayeli.​—1 Sam. 20:30-41.

15. Akhala wira anna anniniphukela voohixariya, nipakeke exeeni?

¹⁵ Woonasa wene, etthu eyo kheniiraneya mmulokoni mwahu. Masi, ale anihoolela muloko toohimalela, nto pooti ikwaha sikina oniphukela mwaha wa etthu emosa nipanke ahu, masi awo ahisuwelaka mathowa aya. (1 Sam. 1:13-17) Akhala wira anna awo anniniphukela, nivikaniheke okhala oororomeleya wa Yehova.

16. Okathi xeeni vanitthuneya ahu ovikaniha ororomeleya hata vahikhweyaka?

¹⁶ Sawuli aamutumererya Yonathani ophavela omwene. (1 Sam. 20:31) Masi mwaha wa okhala oororomeleya wa Yehova, Yonathani aahaataana ni Davidi, ohiya ophavela okhala mwene. Naphavela omutakiha Yonathani, nihaana wuupuwelaka moolumo a mBiibiliyani anooniherya wira ole oniphavela okhala mpatthani a Muluku, hata ahaawaka ‘khonihiya itthu salaphenlyawe’. (Esal. 15:4) Yonathani ‘khahiyale itthu samulaphenlyawe’ David. Nave-tho hiyo nihitthikeleke ottuli akhala wira nooleiherya opaka etthu. Mwa ntakiheryo, akhala wira noovarihana nakoso ni mutthu nto khiyoona wira vanoovila opaka ele eleihenrye ahu, nto ororomeleya wahu wa Muluku ni wiiwelela Nuulumo nawe, onoonikhaliherya waakhwaniherya ele eleihenrye ahu. Vamosaru, akhala wira ekasamento ahu yookhalana mixankiho, nnoovikaniha wooniherya ororomeleya wahu wa Yehova ni ole othelanne ahu.​—Mmusome Malakhiya 2:13-16.

17. Mwaha ola wookhalihenryeni sai?

¹⁷ Wuupuwelela ntakiheryo na Yonathani ohaana oniiriha ophavela otakiha ororomeleya wawe wa Yehova. Nihiphaveleke mureerelo ahu paahi. Ntoko Yonathani, nohaana wooniherya ororomeleya wahu wa Yehova ni waaroromela atthu awe, hata yaale ikwaha sikina anniirela itthu voohixariya. Ororomeleya wa Yehova okathi wa mixankiho, onnimuhakalaliha Muluku vamosa ni hiyo. (Mir. 27:11) Navikaniha ororomeleya wa Yehova, nnooweha moota yena onipaka awe itthu mwa mureerelo ahu. Mwaha onittharelana ninrowa othokorerya itthu siniweryaneya wiixutta ni miteko sa atthu oororomeleya ni oohiroromeleya yaakhala okathi wa Davidi.