1, 2. Davidi oonihenrye sai ororomeleya wa Muluku? (Nwehe elatarato yoopacerya.)

SAWULI ni atoropa awe 3.000, yamphavelasa Davidi moothakoni mwa oYudeya wira amwiive. Masi ohiyu omosa, Davidi ni atthu awe yaahiphiya opuro Sawuli ni anakhotto awe yaathipenle aya iheema saya. Otheene aya yaamurupasa, nto Davidi ni Abixayi yaahaavikana anakhotto, mpakha ophiya vaarumpe Sawuli. Abixayi aahimwaapela Davidi oriki: “Mukihiye kirowe kamuhome [Sawuli] vathí vavale nnivaka nawe nenle: kinovonya omosa pahi, vohitthikela”. Waakhula wa Davidi waahimutikiniha Abixayi. Owo aakhunle so: “Nnari! Muhimwivé! Ole onimwiva mutthu orerihiwe n’Apwiya khamphwanya mulattu? . . . Apwiya ekitakhalihe, katthuna omwirela yotakhala mulipa-òrerihiwa n’Apwiya”.​—1 Sam. 26:8-12.

² Davidi aanisuwela ele yaareerela opaka wira ooniherye ororomeleya wawe wa Yehova. Aanisuwela wira ahaana omuttittimiha Sawuli, nto khuupuwela hata vakhaani omwiiriha etthu yootakhala. Mwaha wa xeeni? Mwaha woowi Muluku aahimuthanla Sawuli okhala mwene a wIsarayeli. Nto arumeyi oororomeleya a Yehova olelo-va, annaattittimiha  ale Yehova onaavaha awe okhulupale. Tthiri Yehova onivekela wira arumeyi awe otheene ahaana okhala oororomeleya.​—Musome Esalimo 18:26.

3. Abixayi oonihenrye sai ororomeleya wa Davidi?

³ Abixayi aanimuttittimiha Davidi. Mwa ntakiheryo, okathi eererya awe okuttelela yoottheka awe ni Bathi-Xeba, Davidi aahimuruma Yowabi, munnawe Abixayi, wira amwiivihe Uriya, iyawe Bathi-Xeba, okhottoni. (2 Sam. 11:2-4, 14,15; 1 Wah. 2:16) Woonasa wene, Abixayi aahisuwela etthu eyo, masi aahivikaniha omuttittimiha Davidi, ntoko mwene oothanliwa ni Muluku. Nave-tho, Abixayi kheerenrye orumeela okhulupale awe, ntoko muhooleli a anakhotto, wira okuxe omwene. Ohiya-vo, aahimwaakiherya Davidi awanani awe.​—2 Sam. 10:10; 20:6; 21:15-17.

4. (a) Ninsuwela sai wira Davidi aari oororomeleya wa Muluku? (b) Matakiheryo xeeni makina ninrowa ahu othokorerya?

⁴ Davidi aahooniherya wira aari mutthu oororomeleya mwaha wa okhootta omwiiva Mwene Sawuli. Oryeene mmiravo, Davidi aahimwiiva Goliyathi, yoowo aamakela waaveeha “anakhotto a Muluku mukumi”. (1 Sam. 17:23, 26, 48-51) Okathi Davidi aari awe mwene aahittheka vanceene. Aahiraruwa ni Bathi-Xeba ni aahimwiiviha iyawe okhottoni. Masi nuumala opwapweliwa ni profeta Natani, owo aahittharuwa. (2 Sam. 12:1-5, 13) Hata uuluvanle ene, Davidi aahivikaniha okhala oororomeleya wa Yehova. Mwa ntakiheryo, aahivaha itthu sinceene wira okhaliherye otekiwa etemplo ya Yehova. (1 Wah. 29:1-5) Nnaamwi Davidi aatthenke vanceene, owo aahivikaniha okhala oororomeleya wa Yehova. (Esal. 51:6, 13; 86:2) Vaavo vanithokorerya ahu soohimmwa sa Davidi ni atthu akina yaakhala okathi ole, nrowe niphavelase waakhuliwa wa makoho ala: Ti pani onireerela opacerya omooniherya ororomeleya wahu? Mikhalelo xeeni sinitthuneya wira nooniherye ororomeleya?

5. Etthu xeeni eniixutta ahu ni etthu yoohiloka Abixayi aaphavela awe opaka?

⁵ Okathi Abixayi aaphavela awe omwiiva Sawuli, owo eererya wooniherya ororomeleya wa Davidi. Masi Davidi aahimukhoottiherya opaka eyo, maana aanisuwela wira etthu yoohiloka “omwirela yotakhala mulipa-òrerihiwa n’Apwiya”. (1 Sam. 26:8-11) Ela enniniixuttiha etthu emosa yootthuneya: Okathi onithanla ahu ti pani onireerela opacerya omooniherya ororomeleya wahu, nohaana wuupuwela toko malakiheryo a Biibiliya aniwerya onikhaliherya ni mwaha owo.

6. Nnaamwi niphavelaka okhala oororomeleya wa amusi ni apatthani ahu, xeeni vanireerela aya okhalana ephoole?

⁶ Ororomeleya onikhuma vamurimani, masi murima woototha. (Yer. 17:9) Tivonto, mutthu oororomeleya wa Muluku pooti otepaka wooniherya ororomeleya wa mutthu mukina, ntoko mpatthani wala mmusi, hata opakaka etthu yoohiloka. Mwekeekhai, akhala wira mutthu onimphenta ahu onnipaka etthu yoohiloka ni onahiya weettela ekeekhai, nto nihaana wuupuwelaka wira Yehova toniphwanelela opacerya omooniherya ororomeleya wahu.​—Mmusome Matheyo 22:37.

7. Murokora mmosa oonihenrye sai ororomeleya wa Muluku okathi aarina awe muxankiho?

⁷ Vannitepa oxankiha akhala wira mmusi ahu onnikumihiwa mmulokoni. Mwa ntakiheryo, murokora mmosa oniitthaniwa Ana,  ^[1] aahiligareliwa ni maama awe ookumihiwa mmulokoni. Maama owo aahimya wira aaphavela omuxukurya Ana, maana aahipacerya omphwanya omeekha, mwaha woohithukumanaka ni amusi awe. Ana aahiriipiwa murima vanceene, nto aahimuleela wira aarowa waakhula ni epaphelo. Ohinatthi olepa, aahivarerya malakiheryo a mBiibiliyani. (1 aKor. 5:11; 2 Yoh. 9-11) Ana aahimulepela maama awe ni aahimuupuxerya wira yena taalakenle ohiya emusi awe, mwaha wa mweettelo  awe woohiloka ni ohiphavela ottharuwa. Ana aahimmye so: “Etthu enrowa wookhaliheryani omaliha omeekha anyu ti omuhokolowela Yehova”.​—Yak. 4:8.

8. Mikhalelo xeeni sinrowa onikhaliherya okhala oororomeleya wa Muluku?

⁸ Arumeyi akina oororomeleya yaakhala okathi wa Davidi, yaari oowiiyeviha, ooreera murima ni oolipa murima. Vano nithokorerye mikhalelo iya miraru ni niwehe moota sinrowa aya onikhaliherya okhala oororomeleya.

9. Xeeni Abineri aaphavela awe omwiiva Davidi?

⁹ Okathi Davidi aakunxe awe muru wa Goliyathi, omuruuhelaka Mwene Sawuli, Yonathani ni Abineri, muhooleli a anakhotto a Isarayeli, yaari vaavo. Yonathani aahikhala mpatthani a Davidi ni aahimooniherya ororomeleya wawe. (1 Sam. 17:57–18:3) Masi Abineri khiirale siiso. Owo aahimukhaliherya Sawuli, wira amwiive Davidi. Tivonto, Davidi aalempe awe oriki: “Atthu òwali annikilupattha”. (Esal. 54:5; 1 Sam. 26:1-5) Xeeni Yonathani aarina awe moonelo woovirikana ni Abineri? Abineri aanisuwela wira Muluku aahimuthanla Davidi okhala mwene a Isarayeli. Nuumala Sawuli okhwa, Abineri ahaana wiiyeviha ni wooniherya ororomeleya wawe wa Muluku, omukhaliheryaka Davidi, ohiya mwanawe Sawuli, Ixiboxethi. Masi ohiya-vo, Abineri aaphavela omwene, nto woonasa wene ti nthowa naya aamurupihale awe mwaarawe Mwene Sawuli.​—2 Sam. 2:8-10; 3:6-11.

10. Nthowa xeeni Absalomi aari awe oohiroromeleya wa Muluku?

¹⁰ Ohiiyeviha waahimwiiriha Absalomi, mwaana a Davidi, ohiroromeleya wa Yehova. Owo aaphavela okhala mwene, tivonto “Absalomi ahìphavelela ekaro n’ikhavalo, khwathanla alopwana miloko mithanu yettanawe”. (2 Sam. 15:1) Nave-tho aanaawoka atthu. Ntoko Abineri, Absalomi aaphavela omwiiva Davidi, nnaamwi aasuwela wira Yehova aahimuthanla Davidi okhala mwene a Isarayeli.​—2 Sam. 15:13, 14; 17:1-4.

11. Etthu xeeni eniixutta ahu ni matakiheryo a Abineri, Absalomi ni Barukhi?

¹¹ Matakiheryo a Abineri ni Absalomi annooniherya wira mutthu ohiniiyeviha vanninvila ovikaniha okhala oororomeleya wa Muluku. Tthiri hiyo khanimphavela okhala ntoko atthu awo ootakhala ni a nrima. Masi phoole, nihiphaveleke okhalana mihakhu sinceene wala ophwanya muteko onniiriha okhala atthu a faita yuulupale, maana itthu iyo pooti ohonona miteko sahu sooloka ni onihiiha omurumeela Yehova. Okathi  omosa, namakhaliherya a profeta Yeremiya, aitthaniwa Barukhi, aahipacerya ophavela itthu sahaarina awe ni khaasiveliwa-tho ni muteko wa Muluku. Nto Yehova aahimuruma Yeremiya omuleela Barukhi wira: “Miyo kinrowa okwanyula yatekalyaka: kinrowa ophela yaphatteiye aka. Kinimwira siso mulaponi mothene. Vano nyuwo mumphavelela-ni wireliwa sorera? Muhiphaveleké-tho”.(Yer. 45:4, 5) Barukhi aahiwiriyana yoolopola ele, khuttharuwa. Hiyo-tho nihaana otepaka onwiriyana Yehova, maana elapo ela yootakhala ehanle vakhaani onyaanyiwa!

12. Muhimye moota vahiniweryaneya aya okhala oororomeleya wa Yehova ni otthara itthu siniphavela murima ahu okathi omosaru.

¹² Munna oniitthaniwa Daniel, yoowo onikhala oMexico, aahaana othanla okhala oororomeleya wa Yehova wala otthara itthu siniphavela murima awe. Aaphavela omuthela muthiyana ahaakhanle Namoona a Yehova. Onihimya so: “Nnaamwi kaakenle muteko wa opioneero, nlelo kaahivikaniha omulepela ipaphelo muthiyana ole. Masi, muhoolo mwaya kaahiiyeviha, kimuleela mutokweene mmosa wira muupuwelo aka khiwaakhanle saana. Munna ole aahikikhaliherya woona wira kaphavela okhala oororomeleya wa Yehova, kihaana ohiya omulepela ipaphelo muthiyana ole. Nuumala ovekela ikwaha sinceene, kinlaka, kaahiwerya opaka eyo. Moohipisa, ohakalala waka waahincerereya”. Nuuvira okathi, Daniel aahimuthela murokora oophwanelela, nto vano onirumeela ntoko mutokweene a esirkwitu.

13. Natani oonihenrye sai okhala oororomeleya wa Muluku ni Davidi, okathi Davidi aatthenke awe?

¹³ Nakhala atthu oororomeleya wa Yehova, onoonikhaliherya okhala oororomeleya wa atthu akina. Profeta Natani aari oororomeleya wa Yehova ni wa Davidi. Nuumala Davidi omuraruwela mulopwana mmosa ni orumiha wiiviwa, Yehova aahimuruma Natani orowa ompwapwela Davidi. Natani aahilipa murima ni aahirowa opaka etthu aarummwale awe. Masi Natani aahimpwapwela mwa miruku ni mooreerela murima. Wira omukhaliherye Davidi woona wira ela yaapanke awe yaari yootakhala, Natani aahipaka nlikanyiho na thaaciri aakunxe epwittipwitthi emoseene ya namuhaawi. Nuumala Davidi wooniherya onanariwa ni thaaciri ole, nto Natani aahimmye so: “Mulopwan’owo ti yenyu”. Nto Davidi aahoona wira aahimutthekela Yehova!​—2 Sam. 12:1-7, 13.

14. Munrowa wooniherya sai okhala oororomeleya wa Muluku ni mpatthani wala mmusi anyu?

¹⁴ Oreera murima onoowerya onikhaliherya okhala oororomeleya wa Yehova ni wa atthu  akina. Mwa ntakiheryo, nyuwo pooti osuwela wira muKristau mmosa oopaka etampi yuulupale. Woonasa wene nyuwo munniphavela omooniherya ororomeleya wanyu, vanceenexa akhala mpatthani wala mmusi anyu. Masi ovitha etampi eyo, mwaarowa wooniherya ohiroromeleya wa Muluku. Ni nyuwo moosuwela wira muhaana opacerya omooniherya ororomeleya wanyu Yehova. Tivonto, ntoko Natani, muhaana omuttaruxa mukhwiinyu, masi mooreerela murima. Mmutumererye mutthu owo ophavela nikhaliheryo na axitokweene. Akhala wira khonipaka eyo mowaakuveya, nto ororomeleya wanyu wa Yehova ohaana owiirihani orowa waaleela axitokweene. Opaka eyo, enooniherya wira munniroromeleya wa Yehova ni munnimureerela murima mukhwiinyu. Axitokweene anoomukhaliherya mutthu owo moophwanelela.​—Mmusome Onamukuttho 5:1; aGalasia 6:1.

15, 16. Xeeni Huxayi aatthuneya awe olipa murima wira okhale oororomeleya wa Yehova?

¹⁵ Aahikhala mulopwana mmosa aitthaniwa Huxayi, yoowo aari mpatthani oororomeleya a Mwene Davidi. Ororomeleya wa Huxayi waheehereriwa okathi Absalomi aawenrye awe waakuxa murima atthu anceene, nto khiyaphavela onvaha omwene oYerusalemu. (2 Sam. 15:13; 16:15) Davidi aahitthyawa muttetthe ole, nto Huxayi aarowa opaka exeeni? Niireke anvikaniha ororomeleya wa Davidi, yoowo aatthyawa-tthyawa, wala vano aarowa omuttharaka Absalomi? Aahithanla omutthara mwene aathanliwe ni Muluku, nto aahirowa okumana ni Davidi Omwaako Olivera.​—2 Sam. 15:30, 32.

¹⁶ Davidi aahinvekela Huxayi wira orowe oYerusalemu, ni akhaleke wira mpatthani awe Absalomi, masi ophavelaka paahi omwiiriha Absalomi ohiwiriyana miruku sa Ahitofeli. Nto Huxayi aahirowa opaka ele Davidi aamurumale awe, nnaamwi aasuwenle wira pooti wiiviwa. Davidi aahinvekela Yehova wira Huxayi owerye omwiiriha Absalomi omwiiwelela yena, ohiya omwiiwelela Ahitofeli. Eyo yaahiiraneya tthiri!​—2 Sam. 15:31; 17:14.

17. Xeeni nintthuneya ahu olipa murima wira nikhale oororomeleya?

¹⁷ Nohaana olipa murima wira nikhale oororomeleya wa Yehova. Anceene a hiyo ninnikhootta moolipa murima itthu soohiloka sinitumereriwa ahu opaka ni amusi, apatthani, akhulupale a mulaponi ni atthu akina ahinimurumeela Yehova, okhala wira nimphavela ovikaniha okhala oororomeleya wa Yehova. Mwa ntakiheryo, Taro, yoowo onikhala oJapão, okhuma enamwane awe aaniimananiha waahakalaliha anamuyari awe, maana aanaattittimiha ni waaphenta. Masi okathi aapacenrye awe omusoma Biibiliya ni Anamoona a Yehova, anamuyari awe yaaphavela omuhiiha. Eyo yaanimuriipiha murima, masi aahaaleela anamuyari awe wira aahilakela orowelaka mithukumano sa Anamoona. Taro onihimya so: “Awo yaahinanariwa vanceene ni yaahikikhoottiherya waaxukuryaka owannyeya. Kaahinvekela Yehova wira okikhaliherye olipa murima wira kihitthikele ottuli. Vano aavola murima vakhaani, nto kinnaaxukurya ikwaha sinceene.”​—Musome Miruku 29:25.

18. Exeeni mwiixuttale anyu mwaha ola?

¹⁸ Nimutakiheke Davidi, Yonathani, Natani, ni Huxayi wira nikhale oororomeleya wa Yehova. Nave-tho nihaana wiixutta etthu ni Abineri ni Absalomi. Nimphavela ovikaniha okhala oororomeleya wa Yehova, ntoko siirale awe Davidi. Ntoko apinaatamu oohimalela, hiyo ninnittheka, masi nnoowerya wooniherya wira ororomeleya wa Yehova tori nipuro noopacerya vamurimani vahu.