NKAHAYA muupuwele nihiku nootepa ohakalaliha mookumini mwanyu. Niireke naari nihiku na ekasamento anyu, wala oyariwa wa mwaninyu oopacerya? Wala naari nihiku mwaabatiziwe anyu? Woonasa wene, munoona wira nihiku mwaabatiziwe anyu ti nihiku nootepa otthuneya ni ohakalaliha. Mohaanyiherya, amusi ni apatthani anyu yaahihakalala vanceene woowehani mwiivahereryaka omurumeela Muluku ni murima anyu, okumi anyu, ni ikuru sanyu sotheene!​—Mar. 12:30.

Tthiri, moophwanya itthu sinceene soohakalaliha okhuma vaavale mbatiziwe anyu. Masi, anamalaleerya a Omwene akina ohakalala waya woovukuwa. Mwaha wa xeeni? Nrowe nithokorerye mathowa anniiriha ovikaniha omurumeela Yehova ni murima woohakalala.

Ihapari sa Omwene sinninihakalaliha vanceene okhala wira Yehova onnileiherya wira moohipisa Omwene awe onoomaliha otakhala mulaponi ni onookhaliha elapo esya. Sofoniya 1:14 onninilipiherya oriki: “Nihiku nulupale n’Apwiya nri vakhiviru: nihanle ophiya vowakuveya”. Masi, mwaha wa oviraka iyaakha sinceene nlipelelaka, nto pooti ovukula ohakalala waarina ahu. Eyo pooti oniirihaka ohiluttuweliwa ovara muteko wa Muluku.​—Mir. 13:12.

Masi vaavo vaniviriha ahu okathi ni anna ni arokora, ninnilipihiwa wira nivikaniheke omurumeela Yehova. Woonasa wene, mweettelo wooloka wa arumeyi a Yehova toniirihale waakhulela ekeekhai ni omurumeela Yehova. (1 Ped. 2:12) Masi exeeni yaarowa wiiraneya vaakhanle wira muKristau mmosa oopwapweliwa mwaha wa ohiiwelela malamulo a Muluku? Woonasa wene, ale yiixuttale ekeekhai mwaha wa oweha mweettelo wooloka wa Anamoona a Yehova yampacerya okhumuwa ni ovukula ohakalala waya.

Ophavelasa muhakhu pooti-tho ovukula ohakalala mutthu aarina awe mmuteko wa Muluku. Olumwenku ola wa Satana oniphavela onikupaliha wira nohaana okhalana khula etthu, hata seiyo sihintthuneya. Masi nohaana wuupuwelaka moolumo a Yesu, ani: “Khavo onwerya warumela mamwene manli: mana onomunyokha mmosá, amphenteke mukina pahi; walá onomurumela mmosá, mukina amuthanyeke. Khamunwerya omurumela Muluku vamosá ni muhakhu”. (Math. 6:24) Khivaniweryaneya omurumeela Yehova  moohakalala, ni weererya ophavelasa mihakhu okathi omosaru.

Ale animurumeela Yehova annisuwela wira omurumeela yena khahiyo etthu yoolipa. Nuupuweleke ele Yesu aahimyale awe oriki: “Nyuwo othene mukhulumunwe, mulemeliwene muritti mulupale, mukirwele miyo: komumuliheni. Mwireye muritti aka: mukihiye kolakeni, mana miyo ka mutthu òmàla ni òwiyeviha. Mwirá siso, munophwanya murettele murohoni mwanyu. Tthirí, muritti onoreyakani ti woveya: olemela onotexihakani ti wokhweya”. (Math. 11:28-30) Okhala muKristau eekeekhai, etthu yookurunuxa murima ni yoohakalaliha. Tthiri nookhalana mathowa anniiriha ohakalala ni muteko wa Yehova. Vano nrowe nithokorerye mathowa mararu anniiriha ‘ohakalala ni Muluku oninòpola’.​—Hab. 3:18.

Hiyo nimmurumeela Mpattuxa ahu, Muluku oohakalala. (Mit. 17:28; 1 Tim. 1:11) Ninnisuwela wira Yehova tonivahale okumi. Tivonto, nohaana ovikaniha omurumeela moohakalala, hata nibatiziwe ene khalai.

Munna mmosa oniitthaniwa Héctor, oomurumeela Yehova ntoko mutokweene onixukurya miloko, mwa iyaakha 40. Munna owo onnivikaniha omurumeela Yehova, hata uuluvanle ene. (Esal. 92:13-15) Mwaha wa owereeliwa mwaarawe, munna Héctor oovukula muteko anvarela awe Muluku, masi eyo khevukunle ohakalala wawe. Owo onihimya so: “Nnaamwi vakiriipaka murima onweha mwaaraka otepaka owereiwa, masi nkineemererya wira eyo evukule ohakalala waka kimurumeelaka Yehova. Osuwela wira Yehova tokipattunxe, eyo ennikiiriha omphenta vanceene ni omurumeela ni murima wotheene. Kinniimananiha ovikaniha olaleerya, ni kinneererya omakela wuupuwelela iparakha sa Omwene, wira ohakalala waka ohivukuwe”.

Yehova oovaha mukuttho wowoopola wira nikhalane okumi woohakalaliha. Vekeekhai, “Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”. (Yoh. 3:16) Vanniweryaneya oleveleliwa itampi sahu ni olipelela okhalana okumi woohimala, vakhala wira ninnaamini mukuttho wowoopola wa Yesu Kristu, yoowo ovahiwe ni Yehova. Tthiri ela etthu enireerela oxukhurela! Oxukhurela wahu mukuttho wowoopola onooniiriha omurumeelaka Yehova ni murima woohakalala.

Munna mmosa oniitthaniwa Jesús, yoowo onikhala oMexico, onihimya so: “Miyo kaari epottha ya muteko aka, kaanivara muteko iwoora sinceene, khula nihiku, nnaamwi kahaakhanyereriwa. Kaaphavela ophwanya musurukhu munceene  paahi. Nuumala-vo kaahiixutta voohimya sa Yehova ni moota yena aavahale awe apinaatamu Mwanawe. Nto kaaniphavela vanceene omurumeela Muluku. Tivonto, kaahivahererya okumi aka wa Yehova, nto aahihiya muteko waavara aka iyaakha 28, khukela opioneero”. Okhuma vaavale, munna ole aahipacerya omurumeela Yehova moohakalala, mwa iyaakha sinceene.

Miteko sinivara ahu sinnikumiherya ohakalala, ohiya owereya. Munnuupuwela moota okumi anyu waari aya muhinatthi omusuwela Yehova? Murummwa Paulo aahiwuupuxerya aRoma wira khalai ‘yari ipottha s’etampi’, masi vano “arumeyi àxariya”. Yaahikhalana “makhalelo òrera”, yaawo yaarowa waaphwanyiha okumi woohimala. (aRom. 6:17-22) Hiyo-tho ninnitthara mweettelo wooreera, yoowo ohiniphwanyiha owereya mwaha wa otakhala ni mweettelo woohiloka wa mulaponi. Eyo tthiri enninihakalaliha!

Mmuupuwele Jaime, yoowo ahaakupali wira Muluku ookhala ni aamwiira xooku a owana. Jaime aahipacerya orowela mithukumano ni aahitikinihiwa woona moota atthu yaaphentana aya. Wira ottharuwe mweettelo awe wa khalai, aahinvekela Yehova wira omukhaliherye wira omukupaliki Muluku. Onihimya so: “Vakhaani-vakhaani, kaahipacerya osuwela wira ookhala Tiithi oophenta ni oolevelela. Otthara malamulo a xariya a Yehova, onnikikhapelela. Kahaarukununxe mukhalelo aka, kaarowa wiiraka kikhwiiye ene, ntoko ewiiranenle aya apatthani aka kaawanana aka. Iyaakha sootepa ohakalaliha ti iye kivirihale aka kimurumeelaka Yehova”.

Nooneleke sai itthu vaavo vanaattamela ahu wanikisa wa olumwenku ola wootakhala? Muupuweleke wira hiyo nimpaka yootthuna ya Muluku ni ninlipelela waakhela okumi woohimala. Tivonto, “nihikhulumuweleké ovara miteko sorera: okhala wira nahojeyeru, nnohepha okathi aya”. (aGal. 6:8, 9) Niroromeleke nikhaliheryo na Yehova wira nivileleke mixankiho, niimananiheke wira nikhalane mikhalelo sooloka, seiyo sinrowa onikhaliherya woopowa “maxakha malupale”, ni ovikaniha omurumeela Yehova ni murima woohakalala, hata nikumanaka mixankiho.​—Wis. 7:9, 13, 14; Yak. 1:2-4.

Niroromeleke wira Yehova onoonikhaliherya mwaha wa ovilela wahu, okhala wira Muluku khonliyala muteko oninvarela ahu mwaha wa omphenta wahu ni ophenta wahu nsina nawe. Navikaniha omurumeela Yehova ni murima woohakalala, ninrowa okhala ntoko nasalimo Davidi, yoowo aahimmye so: “Okathi p’ukathi kinnona wira Apwiya ari ni miyo: wona yawo annikivarela mono, nkinova etthu. Tivó, murim’aka onnitteliwa, eroho aka ennitthapa: erutthu aka ennimumula ni murettele”.​—Esal. 16:8, 9.