1. Sinivirikana sai itthu sintthuneya ahu ni iye simphavela ahu paahi?

ITTHU vakhaani paahi ti sintthuneya wira nikhalane okumi. Mwa ntakiheryo, nihaana okhalana yoolya, ikuwo ni opuro wookhala. Masi itthu mutthu oniphavela awe khasimmala. Ni atthu anceene khansuwela wira khahiyo itthu sotheene simphavela aya ti sootthuneya tthiri.

2. Itthu xeeni atthu akina aniphavela aya?

² Itthu simphavela awe mutthu onikhala elapo yoohaawa, sinnivirikana ni iye simphavela awe mutthu onikhala elapo yoothaaciri. Ilapo sikina, atthu aniphavela okhalana selulari, moota, wala ematta aahiiso nipuro nooteka empa. Masi ilapo sikina, atthu aniphavela okhalana ikuwo sa musurukhu munceene, empa yuulupale aahiiso ekaaro ya musurukhu munceene. Mapuro otheene, khula mmosa a hiyo, pooti opaceryaka ophavela wiithukumanyerya itthu sinceene sihintthuneya, wala sihiniwerya ahu okhalana.

3. Onitaphulela exeeni ophenta itthu sa werutthuni?

³ Onitaphulela exeeni ophenta itthu sa werutthuni? Mutthu oniphenta itthu sa werutthuni ti yoole onisiveliwa vanceene ni itthu iyo, ovikana wataana wawe ni Muluku. Khoniphiyeriwa ni itthu sirina awe, masi onniphavela-tho itthu sinceene. Hata atthu ahirina musurukhu munceene aahiiso ahiweryaka othuma itthu sa musurukhu munceene pooti okhala atthu oophenta itthu sa werutthuni. Waaniheryasa atthu awo pooti ohiya opweha Omwene nipuro noopacerya mookumini mwaya.—aHéberi 13:5.

4. Satana onirumeela sai “ophavela okhalana [itthu] sothene sinòna ahu”?

⁴ Satana oniphavela onikupaliha wira okumi onipuheya mutthu akhalana itthu sinceene. Tivonto onnirumeela olumwenku awe ni “ophavela okhalana [itthu] sothene sinòna ahu”, wira oniirihe ophavelaka okhalana itthu sinceene. (1 Yohani 2:15-17; Maphattuwelo 3:6; Miruku 27:20) Khula okathi ninniweha ni owiriyana mihupi sinipakiwa wira siniiriheke ophavela othuma itthu isya. Niireke mootoko othuma etthu mwaha woowi murooweha paahi ethomeiwale ene mmontorani wala elaleiwaka? Woonasa wene, nuuvira okathi mwaahoona wira khahiyo yaari etthu yootthuneya. Omakela othuma khula etthu enoona ahu, pooti oxankiha okumi ahu. Itthu iyo pooti onihapuxa wira nihimurumeeleke Yehova. Mwa ntakiheryo, pooti ohikhalana okathi oniphiyerya wira nimusomeke Biibiliya, olokiherya ni orowela mithukumano, ni okhalele nthiti olaleerya. Muupuweleke ele murummwa Paulo ohimmye awe: “Makhalelo ala anomala vamosá n’itthu simphavelexaya”.

5. Exeeni enrowa owiiraneela ale anrumeela okathi aya munceene wira aphwanyeke itthu sa werutthuni?

⁵ Satana oniphavela wira nrumeeleke ikuru sahu wira niphwanyeke musurukhu munceene ni itthu sinceene, ohiya omurumeela Yehova. (Matheyo 6:24) Masi akhala wira nimphavela wiithukumanyerya itthu paahi, nto okumi ahu khonrowa okhalana efaita. Eyo yaamuniiriha okhala oonyoonyiheya ni omaleliwa musurukhu. Ohiya-vo, omwaamini wahu Yehova wampacerya ovukuwa ni namooceela okela Momweneni mwawe. (1 Timótheyo 6:9, 10; Wisupulula 3:17) Yesu aahimmye wira ‘ophavelexa itthu sohiloka’ onlikana ni miiwa, seiyo siniwerya ovuvurya ni okhoottiherya epyo wunnuwa ni wiima mihokorokho.—Marko 4:14, 18, 19.

6. Exeeni eniixutta ahu ni ntakiheryo na Barukhi?

⁶ Mmuupuwele Barukhi, yoowo aari mulipa oolepa a Yeremiya. Okathi Barukhi aapacenrye awe ‘ophavela’ itthu suulupale, Yehova aahimuupuxerya wira Yerusalemu aamuhononiwa moohipisa. Masi aahimuleela Barukhi wira aamoopola okumi awe. (Yeremiya 45:1-5) Tthiri eyo ti etthu Barukhi aareerela awe olipelela. Yehova kaarowa woopola mireerelo sa atthu ale. (Yeremiya 20:5) Olelo-va, ninkhala waattamela wanikisa wa olumwenku ola wa Satana. Tivonto, ola khahiyo okathi woophavela wiithukumanyerya itthu. Nave-tho nihilipeleleke wira nuumala maxakha maalupale, nnoohalana  mireerelo sahu sa werutthuni, hata siryeene sootthuneya.—Miruku 11:4; Matheyo 24:21, 22; Luka 12:15.

7. Exeeni ninrowa ahu othokorerya, ni nthowa xeeni?

⁷ Ninrowa owerya sai okhapelela okumi ahu, emusi ahu ni ovikaniha opweha nipuro noopacerya itthu sootepexa otthuneya mookumini mwahu. Ninrowa osyaka sai ophenta itthu sa werutthuni? Ni exeeni enrowa onikhaliherya ohixankiheya vanceene ni itthu siniphavela ahu? Yesu oonivaha miruku sooloka okathi aalavula awe Mwaha awe Vamwaako. (Matheyo 6:19-21) Nrowe nimusome ni omuthokorerya Matheyo 6:25-34. Wira niwehe akhala wira ninnivikaniha ophavela Omwene ohiya itthu.—Luka 12:31.

8, 9. (a) Xeeni vahinitthuneya ahu oxankiheya vanceene ni itthu sinnithowa? (b) Exeeni Yesu aasuwela awe voohimya sa apinaatamu ni itthu sinaathowa?

⁸ Mmusome Matheyo 6:25. Okhala wira Yesu aahisuwela wira awiixutti awe yaarowa oxankaka mwaha wa yoolya, yoowurya, yoowara, aahaaleela moolumo ala okathi aalavula awe Mwaha awe Vamwaako, oriki: “Murima ohovaveni”. Yesu aahiphavela waakhaliherya woona nthowa naya yahaatthuneya aya oxankiheya ni itthu iya. Maana aahisuwela wira oxankiheya vanceene ni itthu iyo, saamwaaliyaliha itthu sootepa otthuneya mookumini. Tivonto, okhala wira Yesu aanaathokorerya vanceene awiixutti awe, owo aahiviriha okathi munceene owooniheryaka woopiha waya oxankiheya ni itthu iyo, okathi aalavula awe mwaha awe.—Matheyo 6:27, 28, 31, 34.

⁹ Masi xeeni Yesu vannileela awe wira nihixankiheyeke ni yoolya, aahiiso yoowurya, ni yoowara? Niireke khanimphavela yoolya ni yoowara? Tthiri itthu iyo ninniphavela! Nto akhala wira khanrina musurukhu oniphiyerya wira nthume itthu iyo, hiyo ninnixanka. Yesu aanisuwela eyo. Nave aanisuwela soophavela sa apinaatamu. Aahisuwela wira “okathi wokiserya”, atthareli awe yaarowa oxankaka vanceene. (2 Timótheyo 3:1) Tthiri, olelo-va atthu anceene vannaavila ophwanya muteko, ni itthu sinootepa owela epereso. Mapuro manceene atthu toohaawa vanceene, ni arina yoolya vakhaani aahiiso kharina. Masi Yesu aahisuwela-tho wira okumi wa mutthu ti wootepa otthuneya ovikana ‘yolya ni yowara’.

10. Vaavo Yesu aawiixuttinha awe atthareli awe moota woovekela, etthu xeeni aahimmye awe wira teri yootepa otthuneya mookumini mwaya?

¹⁰ Wanipacerya, Yesu aahiwiixuttiha atthareli awe wira okathi yaapaka aya nivekelo, yahaana onvekela Tiithi aya a wiirimu wira aavahe itthu saathowa. Awo yaahaana oveka so: “Munivahe olelo yoly’ahu ya khula nihiku”. (Matheyo 6:11) Okathi mukina aahaaleela ovekela so: “Munivaheke yolya emphavelahu wa khula nihiku”. (Luka 11:3) Masi eyo khenitaphulela wira nihaana omakelaka wuupuwela paahi moota woophwanya itthu sinnithowa. Tthiri, Yesu aahaaleela  atthareli awe wira ovekela orwa Omwene wa Muluku, etthu yootepa otthuneya ovikana ovekela itthu sinaathowa. (Matheyo 6:10; Luka 11:2) Wira aakhaliherye awiixutti awe ohitepa oxankiheya, Yesu aahaamaaliha owuupuxeryaka moota Yehova onikhapelela awe soopattuxiwa sotheene.

11, 12. Nniixutta exeeni moota Yehova onaakhapelela awe axipalame? (Nwehe elatarato yoopacerya.)

¹¹ Mmusome Matheyo 6:26. Nihaana ‘waweha axinuni anvava musulu’. Hata siryeene soopattuxiwa saamukhaani, iyo sinnoolya vanceene. Tthiri, vaakhanle wira mwaapalame ohinnuwa ntoko mutthu, aarowa olyaaka vanceene onvikana pinaatamu. Axipalame annoolya mihokorokho, inuku, isoope ni axikokho. Masi awo khanlima nnakhala waala. Nto Yehova onnaavaha khula etthu enaathowa. (Esalimo 147:9) Tthiri Yehova khonihela yoolya mwaano mwaya! Awo ahaana orowa waavya, maana yiira siiso anoophwanya.

¹² Yesu khaanyiherya wira Tiithi awe onnaakhapelela axipalame, eyo enooniherya wira Muluku onrowa waakhapelelaka apinaatamu. ^[1] (Nwehe enoota.) (1 Pedru 5:6, 7) Tivonto, ntoko axipalame, hiyo nihooloweleke miteko sahu. Nihaana ovara muteko wira niphwanye yoolya aahiiso musurukhu wira nithume yoolya eyo. Yehova onrowa oreeliha wiimananiha wahu. Akhala wira khanrina yoolya aahiiso musurukhu oniphiyerya, Yehova onninivaha ele ennithowa. Mwa ntakiheryo, atthu akina pooti onivaha etthu ennithowa. Nave-tho, Yehova onnaavaha axipalame opuro wookhala. Ohaavaha owerya woopaka ipuru, ni ohaapaka mwa enamuna eniwerya aya opaka ipuru iyo. Moolikanasa, Yehova onninikhaliherya ophwanya opuro wookhala ni emusi ahu.

13. Exeeni enooniherya wira apinaatamu tootthuneya waavikana axipalame?

¹³ Nuumala Yesu owuupuxerya awiixutti awe moota Yehova onaalyiha awe axipalame, owo aahaakoha wira: “Khi nyuwo, khamuhiyó alupalexa wavikana axinuni?” (Mulikanihe ni Luka 12:6, 7.) Vaavo aahimmye awe ela, Yesu waaniheryasa uupuwela sa moota moohipisa aarowa awe ovaha okumi awe ntoko mukuttho wa apinaatamu otheene. Tthiri, Yesu khaakhwenle axipalame aahiiso enama ekina. Owo onikhwenle hiyo wira niphwanye okumi ohinimala.—Matheyo 20:28.

14. Exeeni oxankiheya wa mutthu ohiniwerya aya opaka?

¹⁴ Mmusome Matheyo 6:27. Exeeni Yesu aaphavela awe ohimya vaavo aalavunle awe wira khaninwerya orakamiha olekela wa okumi ahu mwaha wooxankiheya. Eyo enitaphulela wira khanniwerya wuncererya olekela wa okumi ahu mwaha wooxankiheya ni itthu siniphavela ahu. Tthiri, akhala wira ninnixankiheya vanceene, oxankiheya iwo pooti onikumiherya iretta mpakha okhwa.

15, 16. (a) Exeeni eniixutta ahu moota Yehova onikhapelela awe ifilori sa mmathalani? (Nwehe elatarato yoopacerya.) (b) Makoho xeeni ninreerela ahu wiikoha ni nthowa xeeni?

¹⁵ Mmusome Matheyo 6:28-30. Ninnihakalala akhala wira nookhalana ikuwo sooreera, otepexa wene akhala wira ninrowa muteko woolaleerya aahiiso mithukumano sa muloko ni asembeleya. Masi niireke nihaana ‘oripiwa murima mwaha wa sowara’? Nave-tho, Yesu aahiwuupuxerya awiixutti awe moota Yehova onikhapelela awe soopattuxiwa sawe. Yesu aahivaha ntakiheryo na “ithutu sa mmathalani” aahiiso ifilori. Nto “ithutu” wala ifilori iyo saari sa khula inamuna. Khasivo ifilori sinwerya ottottha ikuwo saya. Masi ifilori aahiiso ithutu iyo saari sooreera vanceene mpakha omwiiriha Yesu ohimya wira “Salomoni, eyulupale awe yothene, khanaware sorera ntoko emosá ya ithutu seiyo”!

¹⁶ Muupuwele ele Yesu yaahimmye awe moottharelana: “Muluku, yowo oniwariha siso malaxi a mmathalani . . . , onotepa wowarihani nyuwo, atthu òwamini vakhani?” Tthiri owo onoopaka! Masi awiixutti a Yesu yahaana wuncererya waamini waya. (Matheyo 8:26; 14:31; 16:8; 17:20) Yahaana okupali wira Yehova aaniphavela waakhapelela ni wira aarowa waakhapelelaka tthiri. Ankhi hiyo? Niireke ninnikupali wira Yehova onrowa onikhapelela?

17. Exeeni yaarowa ohonona wataana wahu ni Yehova?

¹⁷ Mmusome Matheyo 6:31, 32. Atthu ahinimusuwela Yehova anipweha nipuro noopacerya mookumini mwaya ophavela musurukhu ni mireerelo paahi. Masi akhala wira nimpaka etthu emosaru, ninrowa ohonona wataana wahu ni yena. Ninnisuwela wira Yehova tori Tiithi ahu ni onniniphenta. Nave ninnikupali wira akhala wira nimpaka ele ennivekela awe, ni opweha nipuro noopacerya Omwene awe mookumini mwahu, onoonivaha khula etthu ennithowa ni wuncererya. Nave-tho, ninnisuwela wira okhalana wataana wooloka ni Yehova tonniiriha ohakalala mwekeekhai, ni onninikhaliherya ohakalala nakhalana “yolya ni sowara” paahi, seiyo siri sootthuneya.—1 Timótheyo 6:6-8.

18. Exeeni Yehova ensuwela awe voohimya sa hiyo, ni onrowa opaka exeeni mmureerelo ahu?

¹⁸ Mmusome Matheyo 6:33. Akhala wira ninnipweha nipuro noopacerya Omwene mookumini mwahu, Yehova onoonivaha itthu sinnithowa. Yesu aahitthokiherya nthowa naya vanitthuneya ahu okupali yooleiherya eyo. Owo aahimmye so: “Masi Atith’inyu ari wirimu annisuwela wira sothene iya sinnohalelani”. Yehova onnisuwela itthu sinoothowani nyuwo muhinatthi osuwela. (aFilipi 4:19) Onnisuwela ikuwo ninrowa ahu ophavela. Nave onnisuwela yoolya eniphavela anyu. Onnisuwela-tho wira nyuwo ni emusi anyu munniphavela opuro wookhala. Tthiri Yehova onimookhaliheryani ophwanya itthu sinoothowani.

19. Xeeni vahinireerela aya wuukhuwa ni ele enrowa okhumelela muhoolo?

¹⁹ Mmusome Matheyo 6:34. Nave Yesu aahaaleela awiixutti awe wira: “Muhukhuwé”. Yehova onimoovahani etthu enoothowani khula nihiku. Tivonto, nihuukhuweke vanceene ni ele enrowa okhumelela muhoolo. Maana opaka eyo, enooniiriha wiiroromela, nto eyo yaarowa ohonona wataana wahu ni Yehova. Ohiya-vo, nihaana omuroromela Yehova moomalela.—Miruku 3:5, 6; aFilipi 4:6, 7.

20. (a) Yoolukama xeeni enwerya anyu okhalana mmuteko wa Yehova? (b) Exeeni enireerela anyu opaka wira mukhweiherye okumi anyu?

²⁰ Etthu yooriipiha murima, akhala wira khanrina ikuru wira nimurumeeleke Yehova saana, mwaha woophavela itthu sa werutthuni paahi! Masi nihaana omurumeela Yehova ni murima ahu wotheene. Mwa ntakiheryo, munoowerya othaamela muloko woothowa anamalaleerya? Aahiiso okhala pioneero? Nto akhala wira mwa pioneero, munnuupuwela orowa Exikola ya Anamalaleerya a Omwene? Munoowerya okhaliherya oBetheli aahiiso mapuro anitaphuleliwa iliivuru mahiku aahiiso esumana emosa? Aahiiso munoowerya okhaliherya Edepartamento Eniweherya Muteko Wooteka Ipa sa Omwene Elapo Anyu, wala orumeela okathi anyu wira mukhaliherye oteka Ipa sa Omwene? Muupuwele etthu eniwerya anyu opaka wira mukhweiherye okumi anyu mukhalanaka okathi munceene wookhaliherya miteko sa Omwene. Ekaaxa eni: “ Moota Wookhweiherya Okumi Anyu”, ennivaha malakiheryo. Munvekele Yehova wira ookhaliheryeni othanla etthu yoopaka. Nuumala-vo mpaceryeke opaka marukunuxo.

21. Exeeni enrowa wookhaliheryani omwaattamela Yehova?

²¹ Yesu ooniixuttiha opacerya ophavela Omwene. Akhala wira nnoopaka eyo, nnoosyaka oxankiheya vanceene mwaha wa itthu sinnithowa. Ninnimwaattamela Yehova maana ninnimuroromela wira onoonikhapelela. Nihiixutta moota woosyaka othuma khuta etthu eniphavela ahu aahiiso khula etthu olumwenku ola enikumiherya aya, hata nirineene musurukhu woothumana. Nakhweiherya okumi ahu nenna-va, eyo enoonikhaliherya ovikaniha omwaamini Yehova ni ohoolo ‘ophwanya ekumi yekekhai’ Yehova onleihenrya awe.—1 Timótheyo 6:19.