1. Xeeni Yehova oryaawe Mulipa-oowuupa muulupale?

MWEERI wa Novembro 2010, murinki wa khalai wa oChina waahitumihiwa oLondres, wInglaterra, musurukhu onaattamela imilyau 70 sa edoolare ya wAmerica. Tthiri vannintikiniha oweha wira mulipa-oowuupa myaapu pooti orumeela oloko ohinooneliwa vatthu, wira opake murinki wooreera ni wa musurukhu munceene. Hata vari siiso, khuuvo mulipa-oowuupa onlikana ni Yehova. Biibiliya onihimya wira nihiku na neethanu namosa, Muluku ‘ahihavula etthaya [oloko] vakhani ya vathí, ahimùpa mutthu’, khunvaha owerya wira ooniheryeke mikhalelo sa Muluku. (Maph. 2:7) Tivonto Biibiliya onimuhimya awe mutthu ole oomalela, Adamu, okhala mwaana a Muluku, maana “àpattuxiwe ni Muluku”.​—Luka 3:38.

2, 3. Ninrowa waatakiha sai aIsarayeli ale yaattharunwe mweettelo aya woohiloka?

² Masi Adamu aahihiya okhala mwaana a Muluku, vaavo aamurukunuwenle awe Muluku. Masi aana anceene a Adamu aamuthanla Yehova okhala Namalamulela aya. (aHéb. 12:1) Mwaha wa omwiiwelela Mpattuxa aya, awo annooniherya wira aniphavela wira owo okhale Tiithi aya ni Mulipa-oniwuupa, ohiya  omuthanla Satana. (Yoh. 8:44) Ororomeleya wa atthu awo, onnuupuxerya moolumo a aIsarayeli a khalai, yaawo yaattharunwe mweettelo aya woohiloka. Awo yaahimmye so: “Nto nyuwo Apwiya [Yehova] mwá Tith’ihu: hiyo nri ntoko oloko, ti nyuwo munupalé; othene hiyo nùpiwé ni nyuwo!”​—Yes. 64:8.

³ Olelo-va, otheene yaale animurumeela Yehova mwekeekhai, anniimananiha wiiyeviha ni omwiiwelela Yehova ntoko yiirale aya aIsarayeli ale a khalai. Annoona okhala eparakha yuulupale okhalana Yehova ntoko Tiithi aya ni Mulipa-oniwuupa. Niireke munniixoona okhala oloko wookhweya wuupeya mmatatani mwa Muluku, ni munneemererya okhalihiwa mwaapu wooloka? Niireke munnaathokorerya anninyu ni arokorinyu, ntoko atthu anuupiwa ni Muluku? Wira nikhalane moonelo ooloka, ninrowa othokorerya moota Yehova onaathanla awe ale oniwuupa awe, nthowa naya oniwuupa awe ni moota oniwuupa awe.

4. Yehova onaathanla sai atthu wira amurumeeleke? Nvahe matakiheryo.

⁴ Yehova khoniwoonela apinaatamu ntoko hiyo nniwoonela ahu. Owo oniweha murima, eyo piiyo, mutthu a vamurimani. (Mmusome 1 Samuweli 16:7b.) Eyo ti etthu yiiraneyale eseekulu yoopacerya, okathi waakhumelenle aya muloko wa eKristau. Aahaathanla atthu wira amurumeeleke yena ni Mwanawe, akina a yaawo woonasa wene yooneliwa ohikhala a faita. (Yoh. 6:44) Mutthu mmosa ti Saulo, yoowo ‘anveha [Muluku], olupattha ni ohaaxa’ muloko wa eKristau. (1 Tim. 1:13) Masi Yehova, yoowo oniweha mirima, khaanweha Saulo ntoko oloko woohiloka. (Mir. 17:3) Ohiya-vo, Muluku aaninweha wira vanweryaneya omuupa, khukhala wooloka, maana Yehova aahimuthanla wira alaleye ekeekhai “oholo w’amalapo ni mamwene n’atthu a Isarayeli”. (Mit. 9:15) Atthu akina Muluku aawoonela awe okhala ntoko mwaapu wooloka, yaahela muhina yaale khalai yaari anamuhapaliwa, anamararuwa, ni anawiiye. (aRom. 9:21; 1 aKor. 6:9-11) Vaavo vaatepa aya wiixutta Nuulumo na Muluku, yaanilipiha omwaamini waya Yehova ni yaanimweemererya owuupa.

5, 6. Moota xeeni omuroromela wahu Yehova ntoko Mulipa-onnuupa onnikhaliherya aya owoonelaka saana (a) atthu a muttetthe ahu? (b) anna ni arokora?

⁵ Ninniroromela wira Yehova mwaneene onniwerya waathanla atthu ooreerela, tivonto hiyo khinnaaphukela atthu akina, mmulokoni wala ale a muttetthe ahu. Nkahaya nthokorerye ntakiheryo na Michael. Owo onihimya so: “Okathi Anamoona a Yehova yaaphiya aya vatthokoni vaka, miyo khaamwaathanya, onakhala wira nkinwehale mutthu. Tthiri kaari mutthu ootakhala murima! Okathi mukina, kaahisuwela emusi emosa yaakisivela vanceene mwaha wa mweettelo aya wooloka. Muhoolo mwaya, kaahitikinihiwa vanceene osuwela wira yaari Anamoona a Yehova! Mweettelo aya wooloka waahikiiriha ovarerya etthu yaakiiriha waanyokha [Anamoona a Yehova]. Nuuvira okathi, kaahoona wira etthu yaakiiriha waanyokha waari ohisuwela ni omakela wiiwa soohimmwa paahi”. Wira aasuwele oratteene Anamoona, Michael aahaakhulela omusoma Biibiliya. Nuuvira okathi, aahibatiziwa, khukela muteko woolaleerya wa okathi wotheene.

⁶ Omukupali Yehova okhala Mulipa-onnuupa, onninikhaliherya owoonelaka moota mukina annihu ni arokorihu. Niireke ninniwoonela ntoko atthu nlelo anumpwa? Yehova onniwerya osuwela murima wa mutthu ni onniwerya woona mikhalelo sooloka atthu awo anrowa aya okhalana muhoolo, ni onnisuwela wira ohimalela waya onoomala moohipisa.  (Esal. 130:3) Hiyo nnoomutakiha Yehova akhala wira nnoowoonela annihu ntoko yena oniwoonela awe. Hiyo nnoowerya ovara muteko vamosa ni Mulipa-onnuupa wira naakhaliherye anna ni arokora wunnuwa momunepani. (1 aTes. 5:14, 15) Nto axitokweene a mmulokoni ahaana ohoolela muteko owo, avahaka ntakiheryo nooloka.​—aÉf. 4:8, 11-13.

7. Xeeni vanivaha anyu efaita olakiwa ni Yehova?

⁷ Woonasa wene, mootoko omwiiwa mutthu ohimyaka so: “Okathi kaari aka mwaana, nkaavaha efaita yuulupale okathi kaalakiwa aka ni anamuyari aka, mpakha nuumala waayara anaaka”. Vaavo vaninnuwa ahu, pooti opaceryaka ovaha efaita olakiwa, maana ninnisuwela wira eyo ethoonyeryo yoowi ninniphentiwa. (Mmusome aHéberi 12:5, 6, 11.) Mwaha wa oniphenta wawe, Yehova onninuupa moopixa murima. Oniphavela wira hiyo nikhalaneke miruku, nihakalaleke ni nimphenteke yena. (Mir. 23:15) Khonihakalala naahaawaka; nnakhala khoniphavela wira nikhwe ntoko atthu ahirina nlipelelo na ohihimuxiwa, ntoko Adamu.​—aÉf. 2:2, 3.

8, 9. Yehova onniixuttiha sai olelo-va, nto muhoolo ninrowa wiixuttihiwaka sai?

⁸ Nihinatthi omusuwela Yehova, woonasa wene naahikhalana mikhalelo sinceene soohiloka. Masi Yehova oonuupa ni oonikhaliherya okhalana mikhalelo sooreera. (Yes. 11:6-8; aKol. 3:9, 10) Vano nookhalana eparayiisu yomunepani. Eparayiisu eyo ti makhalelo ooloka a vameekhaaya, yeeyo Yehova onirumeela awe wira onuupe. Eyo enniniiriha okhala oovareleleya nnaamwi nikhalaka elapo ela yootakhala. Atthu akina ahuuwale ahiphentiwaka ni emusi aya, vano anniphentiwa ni annaya oomunepani mmulokoni. (Yoh. 13:35) Nave-tho hiyo nihiixutta waaphenta akina. Ohiya-vo, noomusuwela Yehova ni ninnoona oniphenta wawe, ntoko tiithi ahu.​—Yak. 4:8.

⁹ Elapo esya, ninrowa okhalana mireerelo sinceene somunepani. Nave-tho ninrowa okhalaka mparayiisu, nilamuleliwaka ni Omwene wa Muluku. Okathi owo, Yehova onoovikaniha onuupa ni oniixuttiha mwa enamuna yahaanyiherya ahu. (Yes. 11:9) Ohiya-vo, Muluku onoonikhaliherya okhalana muupuwelo ni erutthu soomalela, wira niweryeke wiiwexexa sowiixuttiha sawe ni opaka yootthuna awe moomalela. Nto nivikaniheke omweemererya Yehova wira onuupeke, ni nimooniheryeke wira yena onniniphenta tthiri.​—Mir. 3:11, 12.

10. Yesu oonihenrye sai opixa murima ni oreera murima wa Mulipa-oowuupa Muulupale, Yehova?

¹⁰ Ntoko mulipa-oowuupa ooratta, Yehova onnisuwela mukhalelo wa “oloko” orina awe, ni onnuupa moovarihana ni mukhalelo wa oloko owo. (Musome Esalimo 103:10-14.) Yehova onnisuwela sootteettheya sahu, itthu sihinwerya ahu, ni munnuwelo ahu womunepani. Yesu ohooniherya moota Yehova oniwoonela awe apinaatamu oohimalela. Muthokorerye moota Yesu oonela awe soovonya sa arummwa awe, vanceenexa okathi yaavaanyihana aya voohimya sa okhulupale. Vaakhanle wira mwahaaweha arummwa ale avaanyihanaka vanceene, niireke mwaarowa owoonaka okhala atthu oowiiyeviha ni oowoolowa ntoko oloko? Masi Yesu khaawoona okhala atthu ootakhala. Aanisuwela wira vanweryaneya owuupa arummwa awe ale oororomeleya, aapixeryaka murima, aavahaka miruku mooreerela murina, ni awehaka ntakiheryo nawe na wiiyeviha. (Mar. 9:33-37; 10:37, 41-45; Luka 22:24-27) Nuumala Yesu ohihimuxiwa, arummwa awe yaahaakhela munepa wootteela, nto yaahihiya  wuupuwela ti pani aari ootthuneyexa eriyari aya. Ohiya-vo, yaanikhalela nthiti muteko Yesu aavahale awe.​—Mit. 5:42.

11. Davidi oonihenrye sai okhala ntoko oloko wowoolowa, ni ninrowa omutakiha sai?

¹¹ Olelo-va, Yehova onniwuupa arumeyi awe, orumeelaka Nuulumo nawe, munepa awe wootteela ni muloko wa eKristau. Nasoma oratteene ni wuupuwelela ele enisoma ahu ni onvekela Yehova wira onikhaliherye ovarihela muteko mookumini mwahu, nto Nuulumo na Muluku nnoonikhaliherya onuupa. Mwene Davidi olempe so: “Kammathikiru, kinniwupuwelani: kinniviriha okathi munjene kilompaka”. (Esal. 63:7) Nave-tho aahilepa oriki: “Kinnatthapela Apwiya ankivaha miruku sorera: hatá ohiyu, ankhili aka annikilopola”. (Esal. 16:7) Davidi aanuupuwelela miruku sa Yehova, ni aaneemererya wira miruku iyo silokiheryeke muupuwelo ni murima awe, nnaamwi miruku iyo saari sooxankiha otthara. (2 Sam. 12:1-13) Tthiri Davidi oonivaha ntakiheryo nooloka na wiiwelela ni wiiyeviha! Nto niireke nyuwo munnuupuwelela Nuulumo na Muluku, muneemererya wira nlokiheryeke omutthu anyu? Niireke munoowerya wuncerererya opaka eyo?​—Esal. 1:2, 3.

12, 13. Yehova onnuupa sai orumeelaka munepa wootteela ni muloko wa eKristau?

¹² Munepa wootteela onoonikhaliherya mwa inamuna soovirikana. Mwa ntakiheryo, onoonikhaliherya okhalana omutthu ntoko wa Kristu, yoowo onihela muhina mikhalelo soovirikana sa yoowiima ya munepa. (aGal. 5:22, 23) Mukhalelo mmosa ti ophenta. Hiyo ninnimphenta Muluku ni ninniphavela omwiiwelela ni wumpwa ni yena, maana noosuwela wira sooruma sawe khasinvila weettela. Nave-tho munepa wootteela onoowerya onikhaliherya okhootta wumpwa ni olumwenku ola wootakhala. (aÉf. 2:2) Okathi aaryaawe mmiravo, mukhalelo wa murummwa Paulo waahumpwa ni ahooleli a etiini a aYuda, yaawo yaari oowiixinnuuha. Owo aalempe so: “Kinniwerya sothene mwa [Muluku] onkivaha ikuru”. (aFil. 4:13) Nimutakiheke murummwa Paulo, ninvekeleke Yehova munepa wootteela. Yehova khonikhootta waakhula mavekelo a atthu oowiiyeviha.​—Esal. 10:17.

 ¹³ Yehova onnirumeela-tho muloko wa eKristau ni axitokweene wira onuupe. Mwa ntakiheryo vaavo axitokweene vaniweha aya wira nookhalana muxankiho womunepani, awo pooti waavya enamuna yoonikhaliherya, masi khanrowa orumeela miruku saya paahi. (aGal. 6:1) Ohiya-vo, awo anninvekela Muluku wira aavahe miruku. Nuumala-vo, annimutokosa Biibiliya ni iliivuru sahu wira aphwanye soohimmwa sinrowa onikhaliherya. Nto axitokweene yaaphavelaka wookhaliheryani moophenta, mwa ntakiheryo mwaha wa iwarelo sanyu, muhaana wuupuwelaka wira miruku anivaha aya, yowooniherya yoowi Muluku onnoophentani. Mwatthara miruku iyo, munrowa okhala ntoko oloko wowoolowa, yoowo Yehova onuupa awe wira muttottele mureerelo.

14. Nnaamwi Yehova oryeene mulipa-onnuupa, onooniherya sai wira onnittittimiha ehakhi erina ahu ya othanla mootaphuwa?

¹⁴ Osuwela moota Yehova onnuupa awe, onoonikhaliherya wiraana ni annihu a mmulokoni, nnoowoonelaka saana atthu anikhala muttetthe ahu, waahela muhina ale anaasomiha ahu Biibiliya. Khalai, ohinatthi wuupa etthu, mulipa-onuupa aapacerya othanlela oloko ene, okumiha maluku ni ikokhola sikina. Mmukhalelo womunepani, Yehova onnaakhaliherya atthu yaale ari ntoko oloko onuupeya. Owo khonaakhanyererya atthu opaka marukunuxo, masi onnaavaha malamulo awe a xariya. Nuumala-vo, atthu awo ahaana othanla akhala wira anoopaka marukunuxo aahiiso nnaari.

15, 16. Ale animusoma Biibiliya anrowa wooniherya sai wira anniphavela wira Yehova owuupe? Nvahe ntakiheryo.

¹⁵ Muthokorerye ntakiheryo na murokora Tessie, yoowo onikhala wAustralia. Murokora aamusomiha Tessie onihimya so: “Tessie aahiixutta ekeekhai moohipisa. Masi khaarowa vahoolo momunepani, nnakhala khaarowa omithukumanoni! Nto nuumala onvekela Yehova, kaahilakela ohiya omusomiha. Masi yaahiiraneya etthu yoohakalaliha. Nihiku kuupuwela aka wira naari nookiserya omusomiha Biibiliya, Tessie aahikileela yaari va murimani vawe. Aahimmye wira khaaphavela okhala ntoko nawoothe, maana vaanimusivela oweetta axooku a musurukhu. Masi vano aahilakela ohiya yoolema ele”.

¹⁶ Moohipisa, Tessie aahipacerya orowela mithukumano ni wooniherya mikhalelo sa eKristau, nnaamwi aatheiwa ni apatthani awe a khalai. Murokora ole aamusomiha Tessie onnincererya oriki: “Nuuvira okathi, Tessie aahibatiziwa ni aahirumeela ntoko pioneero ookilaatheya, hata okathi aarina awe anamwane axexe acikhaani”. Mwekeekhai, vaavo ale anaasomiha ahu Biibiliya anipacerya aya opaka marukunuxo wira amuhakalalihe, Yehova onnaakhaliherya ni onniwuupa wira akhale myaapu sa faita.

17. (a) Exeeni enoosivelani mwaha wa Yehova okhala Mulipa-oniwuupani? (b) Itthu xeeni sinrowa ahu othokorerya mwaha onittharelana?

¹⁷ Olelo-va, alipa-oowuupa myaapu annirumeela oloko wira apake myaapu sooreera ni matata aya. Vamosaru, Yehova moopixa murima onninuupa onivahaka miruku sawe, ni onniweha moota onivarihela ahu muteko miruku iyo. (Musome Esalimo 32:8.) Niireke munniwerya woona wira Yehova oniphavela mureerelo anyu? Niireke munninweha Yehova owuupakani oratteene? Akhala wira ti siiso, nto mikhalelo xeeni sikina sinrowa wookhaliheryani okhala ntoko oloko wowoolowa mmatatani mwa Yehova? Mikhalelo xeeni soohiloka sintthuneya osyaka wira muhikhale ntoko oloko woolipa ni woosareya maluku, ohiniwerya wuupeya? Ni anamuyari anrowa omukhaliheryaka sai Yehova wira owuupe anaaya? Mwaha onittharelana onrowa waakhula makoho ala.