Muheemererye Soovonya sa Akina Sookhumulihakani
“Mulevelelaneke imara sothene muntthekelananyu”.—AKOL. 3:13.
ISIPO: 53, 28
1, 2. Exeeni Biibiliya aalavunle awe vahinatthi voohimya sa mwaattelo wa arumeyi a Yehova?
OLUMWENKU wotheene, wookhala mulokiheryo orina atthu animphenta Yehova ni aniphavela omurumeela. Atthu awo ti Anamoona a Yehova. Nnaamwi atthu awo aryeene oohimalela ni avonyaka, Yehova onniweettiha ni munepa awe wootteela. Nrowe niwehe inamuna Yehova onaareeliha awe arumeyi awe.
2 Mwaakha wa 1914, atthu yaamurumeela Yehova yaari vakhaani. Masi Yehova onnireeliha muteko aya woolaleerya. Nto atthu imilyau sene anniixutta ekeekhai ni annikhala Anamoona a Yehova. Yehova aahihimya vahinatthi moota atthu awe yaarowa aya waatta mowaakuveya, oriki: “Etthoko anyu yamukhanixa enokhala muttitthi munjene: etthoko anyu yoyevaxa enokhala nloko nowatta atthu. Miyo, Apwiya [Yehova], kinrowa omaliherya sothene vowakuveya, waphiyakaru okathi aya”. (Yes. 60:22) Olelo-va, ninnoona oratteene wiiraneya wa eprofesia ela. Mwekeekhai, sookhala ilapo sinceene atthu aya otheene ahiniphiyerya nummuru na Anamoona a Yehova olumwenku wotheene.
3. Arumeyi a Muluku anooniherya sai ophenta?
1 Yoh. 4:8) Yesu, yoowo aatakiha ophenta wa Muluku, aahaaleela awiixutti awe oriki: “Kinovahani nikano na nanano: mphentaneke mukina ni mukhw’awe . . . Atthu othene anosuwela wira mwá awixutti aka, mwaphentanaka mukina ni mukhw’awe”. (Yoh. 13:34, 35) Okathi ola onikhala ahu, arumeyi a Yehova annooniherya ophentana wekeekhai, nnaamwi maloko awanaka ikhotto. Mwa ntakiheryo, Ekhotto ya Nenli ya Olumwenku Wotheene yoowiiva atthu aniphiyerya imilyau 55. Masi Anamoona a Yehova khiyiirenle mpantta ekhotto eyo. (Mmusome Mikeya 4:1, 3.) Eyo ennaakhaliherya ‘ohikhalana mulattu’ mwaha wa ephome.—Mit. 20:26.
3 Mahiku ala ookiserya, Yehova onnaakhaliherya arumeyi awe olipiha ophentana waya, maana ophenta tori mukhalelo muulupale wa Muluku. (4. Munoonela sai wuncerereya wa arumeyi a Muluku?
4 Arumeyi a Muluku annitepa wuncerereya nnaamwi arineene nwanani muulupale, Satana, yoowo onihimmwa okhala “muluku a vathí-va”. (2 aKor. 4:4) Satana owo, onnaarumeela anapoliitika ni mitthenkeso sinilaleya ihapari wira amalihe muteko woolaleerya. Masi khaniwerya omaliha. Satana oosuwela wira okathi awe ohanle vakhaani omala, tivonto onniimananiha vanceene wira onihiihe omukokhorela Yehova.—Wis. 12:12.
MUNOOVIKANIHA OROROMELEYA HATA AKINA YAATTHEKAKA?
5. Nthowa xeeni ikwaha sikina atthu akhanle aya oolavula wala opaka etthu enniwereya? (Nwehe elatarato yoopacerya.)
5 Arumeyi a Muluku annisuwela wira ahaana omphenta Muluku ni atthu. Yesu aahimmye so: “‘Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene’. Ela ti yoruma yulupalexa ni yopajerya. Yoruma yanenli, enlikana ni yopajerya, t’ila: ‘Mumphenteke mukhw’inyu ntoko sinìphentanyu’”. (Math. 22:35-39) Masi Biibiliya onnooniherya wira apinaatamu otheene ayariwe oohimalela mwaha wa yoottheka ya Adamu. (Mmusome aRoma 5:12, 19.) Tivonto, ikwaha sikina munna wala murokora mmulokoni pooti olavula wala opaka etthu enniwereya. Ninrowa opaka exeeni, yiiraneya etthu eyo? Niireke omphenta wahu Yehova onoovikaniha olipa? Niireke nnoovikaniha okhala oororomeleya wa Yehova ni annihu? Biibiliya onnihimya wira aakhala arumeyi akina yaalavunle wala opaka itthu saawereyale akina. Nrowe niwehe etthu yaawiiranenle ni exeeni ekhanle ahu oowiixutta.
Mwaarowa opaka exeeni vaakhanle wira mwaakhala wIsarayeli mahiku a Eli ni anaawe? (Nwehe ettima 6)
6. Moota xeeni Eli oocenle awe waattaruxa anaawe?
6 Mwa ntakiheryo, mukhulupale aanamukuttho Eli, aahikhalana anaawe anli yahaattittimiha nlamulo na Yehova. Biibiliya onihimya so: “Àna Èli yari òtakhala murima, khiyàthokorerya Apwiya”. (1 Sam. 2:12) Eli aanisuwela wira anaawe yaanipaka itthu soohiloka. Hata vari siiso, owo khaattaruxa. Nuuvira okathi, Yehova aahimpwapwela Eli ni anaawe ale anli. Nto muhoolo mwaya, Yehova kheemerenrye-tho wira nloko na Eli nikhale alipa a mukuttho. (1 Sam. 3:10-14) Vaakhanle wira mwaakhala mahiku ale a Eli, ni mwaanisuwela wira Eli aaneemererya wira anaawe apakeke itthu soohiloka, niireke mwaamukhumuwa? Niireke eyo yanvukula omwaamini wanyu Yehova, mpakha ohiya omurumeela?
7. Itampi xeeni suulupale Davidi aapanke awe, nto Yehova aapanke exeeni?
7 Davidi aahikhalana mikhalelo sooreera, ti nthowa naya Yehova amphenta awe vanceene. (1 Sam. 13:13, 14; Mit. 13:22) Hata vari siiso, Davidi aahiraruwa ni Bathi-Xeba, nto muthiyana owo khurupala. Eyo yiiraneyale okathi iyawe Bathi-Xeba, Uriya, aari awe okhottoni. Nuumala Uriya otthikela owaani mahiku vakhaani, Davidi aaheererya wira yena orupe ni mwaarawe, wira atthu yuupuweleke wira erukulu ele ti ya Uriya. Masi Uriya khaaphavenle orupa ni mwaarawe, tivonto, Davidi aahimpaka palano wira Uriya iiviwe okhottoni. Mwaha wa soottheka iyo, Davidi ni emusi awe yaahihaawa vanceene. (2 Sam. 12:9-12) Nnaamwi vari siiso, Muluku aahimulevelela Davidi. Aanisuwela wira okathi munceene wa okumi awe, Davidi aahimurumeela Yehova “ni murima worera ni woloka”. (1 Mam. 9:4) Vaakhanle wira mwaakhala mahiku ale, mwaarowa woonela sai? Niireke soottheka sa Davidi samookhumulihani?
8. (a) Exeeni Pedru aahimmye awe Yesu ohinatthi ovariwa? (b) Xeeni Yehova aamurumenle awe Pedru nnaamwi aavonya?
8 Ntakiheryo nikina ti na murummwa Pedru. Yesu aahimuthanla wira okhale murummwa awe. Hata vari siiso, ikwaha sikina Pedru aahilavula wala opaka itthu, seiyo muhoolo aathananne awe. Mwa ntakiheryo, awiixutti otheene yaahimutthyawa Yesu okathi wootepa oxankiha. Masi ohinatthi ophiya okathi ole, Pedru aahihimya wira khaarowa omuhiya Yesu, hata arummwa akina amuhiyaka. (Mar. 14:27-31, 50) Masi okathi Yesu aavariwe awe, arummwa otheene, omuhela muhina Pedru, yaahimutthyawa. Ikwaha tthaaru, Pedru aahikhootta wira aanimusuwela Yesu. (Mar. 14:53, 54, 66-72) Pedru aahiriipiwa murima vanceene ni aahithanana ele aapanke awe. Yehova aahimulevelela ni aahivikaniha omurumeela. Nto Vaakhanle wira nyuwo mwaari mwiixutti okathi ole, ni mwaahisuwela ele Pedru aapanke awe, niireke mwanvikaniha okhala oororomeleya wa Yehova?
9. Exeeni eniwiirihani ororomela wira Muluku onoopaka exariya?
9 Matakiheryo vakhaani athokorenrye ahu annooniherya wira aakhala arumeyi a Muluku apanke itthu soohiloka, seiyo saawereyale
atthu akina. Akhala wira eyo enimwiiraneya ni nyuwo, munrowa opaka exeeni? Niireke mwaarowa ohiya orowela mithukumano, ni mwaamuhiya omurumeela Yehova? Wala waarowa wuupuwela wira Yehova toomoriwa ikharari ni woonasa wene oninvaha okathi mutthu ole wira ottharuwe? Ikwaha sikina, woonasa wene ole otthenke khoniphavela ottharuwa yoottheka epanke awe. Niireke munoovikaniha ororomela wira Yehova oosuwela etthu eyo ni onoopaka etthu okathi wooreerela? Yehova aphavela, mutthu owo pooti okumihiwa mmulokoni. Niireke munnikupali wira Yehova onoopaka exariya?NVIKANIHEKE OKHALA OOROROMELEYA
10. Exeeni Yesu iixuntte awe ni soottheka sa Yuda Isikaryoti ni Pedru?
10 Biibiliya ookhalana matakiheryo a arumeyi a Muluku yaavikanihale ororomeleya wa Yehova, nnaamwi atthu akina yaapaka itampi suulupale. Mwa ntakiheryo, nuumala oviriha ohiyu wotheene ovekelaka, Yesu aahaathanla arummwa awe 12. Murummwa mmosa aari Yuda Isikaryoti. Nuumala Yuda onvariha Kristu, nto Yesu owo kheemerenrye wira yoottheka ele enanarihe wataana wawe ni Yehova. Nnakhala nuumala Pedru omukhootta, Yesu kheemerenrye wira omphenta wawe Tiithi awe ovukuwe. (Luka 6:12-16; 22:2-6, 31, 32) Yesu aanisuwela wira Yehova khaarina nthowa mwaha wa soovonya sa atthu ale, nnakhala arumeyi akina khiyaarina nthowa. Yesu aahivikaniha onvarela muteko Yehova, nnaamwi awiixutti awe akina yaapaka itthu sanwereya. Nto Yehova aahimutthuvela Yesu, khimuhihimuxa mookhwaani, ni muhoolo mwaha khimukhaliha Mwene a Omwene wa wirimu.—Math. 28:7, 18-20.
11. Exeeni Yehova aahimmye awe vahinatthi wira yaarowa wiiraneya ni arumeyi awe mahiku ala ookiserya?
11 Ntakiheryo na Yesu ninniixuttiha wira nihaana ororomeleya wa Yehova ni atthu awe. Nookhalana mathowa wira niireke siiso. Ninnoona wira Yehova onniweettiha arumeyi awe mahiku ala ookiserya anikhala ahu. Onnaakhaliherya olaleya ekeekhai olumwenku wotheene ni awo paahi tanivara muteko owo. Yehova aahihimya vahinatthi ele yaarowa wiiraneya ni arumeyi awe, oriki: “awo anotthapa votteliwa murima”.
12. Nooneleke sai soottheka sa annihu mmulokoni?
12 Hiyo ninnihakalala vanceene mwaha woowi Yehova onnineettiha ni onninikhaliherya opaka itthu sinceene sooloka. Mwa mpantta mukina, atthu aneettihiwa ni olumwenku ola wa Satana annihaawa ni khanlipelela etthu muhoolo. Khivaarowa okhala wooloka ni wa xariya omunyanyala Yehova ni atthu awe mwaha wa mutthu mmosa mmulokoni opanke wala olavunle etthu eniwereyale. Ohiya-vo, nihaana ovikaniha ororomeleya wa Yehova ni otthara malakiheryo annivaha awe. Nave-tho nihaana wiixutta etthu enireerela opaka akhala wira munnihu oonitthekela.
NIPAKEKE EXEENI NATTHEKELIWA?
13, 14.(a) Xeeni vanitthuneya aya ovilelanaka? (b) Masu xeeni anireerela ahu wuupuwelelaka?
13 Nipakeke exeeni akhala wira munna wala murokora oopaka aahiiso olavula etthu enniwereya. Nohaana otthara miruku sa Biibiliya sini: “Mphaveleke opixa murima: òwakuva onanariwa muloló”. (Mus. 7:9) Nihaana wuupuwela wira soovira iyaakha 6.000, okhuma vaavale apinaatamu apacenrye aya okhala anamattheka. Nto otheene ahu khanimalenle ni ninnipaka itthu soohiloka. Tivonto nihilipeleleke wira annihu anrowa opakaka itthu sooloka okathi wotheene. Ni khivaareerela omakela wuupuwelela itthu anitthekenle aya, okhala wira eyo yanvukula ohakalala wahu. Nave-tho opaka eyo pooti ovukula omwaamini wahu Yehova ni ohiya omurumeela. Nto naarowa wooceela okhala arumeyi a Yehova ni khinaarowa ophwanya okumi woohimala, mparayiisu.
14 Etthu enrowa onikhaliherya ovikaniha ohakalala ni okhalana nroromelo noolipa, ori wuupuwelelaka masu oolipiha a Yehova ani: “Musuwelexe: miyo kinrowa opattuxa irimu isyá n’ilapo esyá: itthu sa khalai khasinupuweliwa-tho, itthu sivinre sinoliyaliwa khuluwi”. (Yes. 65:17; 2 Ped. 3:13) Muheemererye wira soovonya sa akina siwooceeliheni ophwanya mareeliho awo.
15. Yesu aahimmye wira nipakeke exeeni okathi akina annitthekela aya?
15 Ekeekhai wira hiyo nlelo khanikenle mparayiisu. Tivonto, munna wala murokora anitthekela, nohaana wuupuwelela ele Yehova oniphavela awe wira nipakeke. Mwa ntakiheryo, Yesu aahimmye so: “Mwalevelelaka akhw’inyu sottheka saya, nave Atith’inyu ari wirimu animolevelelani nyuwo. Nto nyuwo mwahaleveleleke akhw’inyu, nave Atith’inyu khanolevelelani sottheka sanyu”. Nave, okathi Pedru aamukohale awe Yesu akhala wira nohaana omulevelela mukhwiihu “mpakha vathanu na venli”, Yesu aakhunle so: “Mmuleveleleke imara sothene!” Tthiri, Yesu ooniixuttiha wira nihaana waalevelela akhwiihu imaara sotheene.—Math. 6:14, 15; 18:21, 22.
16. Ntakiheryo xeeni nooloka Yosefe onnivaha awe?
16 Ntakiheryo na Yosefe ninniniixuttiha etthu yooreerela opaka okathi nintthekeliwa ahu. Yosefe ni muhima awe, Beniyamini, yaari anamwane anli Rakheli aamuyarenle awe Yakobe. Masi Yakobe aahikhalana anamwane aathiyana akina, masi amphentexa Yosefe, nto annawe awo yaahipacerya omunyokha vanceene. Yaahimutumiha Yosefe wira akhale epottha. Nuuvira iyaakha sinceene wEjiitu, Yosefe aahivara muteko wooreera, nto namalamulela a elapo ele aahimuttittimiha vanceene Yosefe, khimukhaliha mutthu a nenli ootepexa otthuneya elapo ele. Muttetthe waakhala axinnawe waahikhumelela etala yuulupale, nto annawe yaahirowa wEjiitu othuma yoolya. Nuumala ophiya wEjiitu, awo khiyaamusuwenle Yosefe, masi owo aahaasuwela. Yosefe anwerya ottottela mureerelo okathi ole wira owunlele ikuhu. Masi khaapanke eyo, ohiya-vo aahiweehererya wira aawehe akhala wira aarukunuxa mukhalelo aya. Nuumala oweha wira yaahirukunuxa mukhalelo aya, owo aahiisuweliha. Muhoolo mwaha owo ahaahimeerya so: “Muhòvé etthu: kinimokhapelelani nyuwo vamosá n’amus’inyu”. Biibiliya onnincererya oriki: “Yosefe ahakurunuxa murima axinn’awe ni molumo òvara murima”.—Maph. 50:21.
17. Nipakeke exeeni akina yanitthekela?
17 Nihaana wuupuwelaka wira mwaha woohimalela, ni hiyo-tho ninnaatthekela akina. Akhala wira noomutthekela mutthu, nihaana otthara miruku sa Biibiliya. Nihaana orowa onvekela musammaha ole omutthekenle ahu. (Mmusome Matheyo 5:23, 24.) Ninnihakalala vanceene naaleveleliwaka soovonya sahu. Ni hiyo-tho nihaana waalevelela ale annitthekela. AKolosi 3:13 onintumererya so: “Nvilelaneke, mulevelelaneke imara sothene muntthekelananyu. Ntoko Muluku òlevelenlyaweni nyuwo, siso-tho nyuwo mwaleveleleke akhw’inyu”. Eliivuru ya 1 aKorinto 13:5 enihimya wira ole oniphenta “khanùpuwela sotakhala sìreliwawe”. Nalimalela waalevelela akina, nave-tho Yehova onoonilevelelaka. Nto akhala wira akina anninitthekela, nohaana waalevelela ni murima wotheene, ntoko Tiithi ahu oomoriwa ikharari, Yehova, yoowo onnilevelela soottheka sahu.—Musome Esalimo 103:12-14.