Mukhalelo Wootepa Otthuneya Ovikana Idiamante
Okhuma khalai, idiamante sinnithokoreriwa okhala muhakhu wa faita yuulupale. Idiamante sikina sinnitumihiwa idoolare sinceene sa wAmerica. Masi, niireke yookhala etthu ekina Muluku onoona awe otepa okhala ya faita ovikana idiamante wala mihakhu sikina?
Haykanush, namalaleerya oohibatiziwa onikhala wArmênia, aahimuttotta pasaporti waattamela owannyawe. Muhina mwa pasaporti saahikhala ikartau sa obanko ni musurukhu munceene. Aahimuhimeerya iyawe, yoowo-tho ori namalaleerya oohibatiziwa.
Anamathelana ale yaahikhalana muxankiho woothoiwa musurukhu ni yaahikopha. Nuumala ottotta musurukhu ole yaahipacerya oligarela mammaru yaaphwanyaneya mpasaportini. Mwaneene pasaporti ole aahitikinihiwa vanceene ni emusi ele. Haykanush ni iyawe yaahimutthokiherya mulopwana ole wira yaari atthu oororomeleya okhala wira yaahiixutta ele Biibiliya enihimya awe. Awo yaahirumeela eparakha eyo wira elavule voohimya sa Anamoona a Yehova ni yaahinvaha mulopwana ole iliivuru sinimutthokiherya Biibiliya.
Emusi ele yaamoriwe, yaaniphavela omuxukhurela Haykanush anvahaka musurukhu, masi owo aahikhootta. Mmeeloni mwaya, mwaarawe mulopwana ole aahirowa omuxukurya Haykanush ni iyawe wira aaxukhurele ni aahimukhanyererya wira omukuxe munela a ediamante.
Ntoko emusi ele, atthu anceene yaamutikinihiwa mwaha wa ororomeleya wa Haykanush ni iyawe. Masi niireke Yehova onnitikinihiwa? Oonenle sai ororomeleya waya? Niireke wiimananiha waya okhala oororomeleya waahikumiherya mireerelo?
MIKHALELO SOOTEPA OTTHUNEYA OVIKANA MIREERELO SA WEERUTTHUNI
Waakhuliwa wa makoho awo khahiyo woovila. Moota xeeni? Okhala wira arumeyi a Muluku annisuwela wira otakiha mikhalelo sa Yehova ti wootepa otthuneya ovikana ediamante, eweero ni mihakhu sikina sa werutthuni. Tthiri itthu Yehova onoona awe okhala sa faita sinnivirikana ni itthu anamunceene anoona aya okhala sa faita. (Yes. 55:8, 9) Arumeyi a Yehova annoona wira otakiha mikhalelo sawe etthu ya faita yuulupale.
Hiyo pooti woona ele Biibiliya enihimya awe sa ankhili ni miruku wala osuwela. Eliivuru ya Miruku 3:13-15 eni: “Òreriwa mutth’ule àphwannye ankhili: tthiri òphwanya wakuva osuwela. Waphwanya ankhili ti worera ovikana ophwanya mihakhu: wakuva osuwela ti muhakhu mulupale ovikana ewero. Ankhili t’òrikexa ovikana maluku òwarya: khivo etthu yophaveleya enlikananaya”. Moohaaniherya Yehova onnivaha efaita mikhalelo iya ovikana mihakhu sa werutthuni.
Ankhi ororomeleya?
Yehova toororomeleya. Owo ‘khonotha’. (Tito 1:2) Yehova aahimuupuxerya murummwa Paulo waalepela maKristau a muloko wa aHeeberi a eseekulu yoopacerya, masu ani: “Munivekeleleke hiyo. Ninnona wira murim’ahu ti worera, okhala wira nimphavela wetta n’ixariya [moororomeleya, NM] mwa sothene”.—aHéb. 13:18.
Yesu Kristu oovaha ntakiheryo nooloka na ororomeleya. Okathi omosa, Mukhulupale Aanamukuttho Kaifa aahimmye so: “Kinolipelihani ni nsina na Muluku mukumi, wira munlèle mwàri Kristu Mwana a Muluku.” Moororomeleya, Yesu aahiihimya okhala Mesiya. Owo aalavula ekeekhai vaavo aakohiwa awe oSineedrio nnaamwi aasuwela wira aamootheriwa onveeha Muluku ni wiiviwa.—Math. 26:63-67.
Ankhi hiyo? Niireke nnoovikaniha ororomeleya hata okathi yoole onoona ahu wira nnoophwanya mureerelo mwaha woovitha ekeekhai?
MUXANKIHO WA OKHALA OOROROMELEYA
Mahiku ala ookiserya ti voovila okhala oororomeleya okhala wira atthu anceene 2 Tim. 3:2) Okathi woothowa musurukhu ni muteko, atthu anceene annootha, wiiya ni annipaka khuta enamuna ya ohiroromeleya. Mukhalelo owo khoreere wuulaana, tivonto atthu anceene yasuwela wira anoophura etthu, awo khanicalela okhala oororomeleya. Hata maKristau makina, mwaha woopaka soothanla “vohixariya”, aananariha nsina naya mmulokoni.—1 Tim. 3:8; Tito 1:7.
‘anisupuwela mmansaya pahi’, ni aniphenta musurukhu. (Masi maKristau manceene olelo-va annimutakiha Yesu. Awo annoona wira okhalana mikhalelo sa Muluku etthu ya faita ovikana mihakhu. Eyo teniwiiriha amiravo maKristau anisoma oxikola ohiphavela okopiyari wira aphwanye ivalore sinceene okathi anipaka aya eporova. (Mir. 20:23) Khahiyo wira okathi wotheene mutthu oororomeleya onootthuveliwa, ntoko yiiraneyale aya ni Haykanush. Muluku onnoona oororomeleya okhala etthu yooloka, ni onninikhaliherya okhalana yowuupuxerya ya murima yooloka, yeeyo eri etthu ya faita yuulupale.
Ntakiheryo na Gagik ninnooniherya eyo. Owo onihimya so: “Kihinatthi okhala muKristau kaanivara muteko empereesa yuulupale, mwaaneene empereesa khaaphavela oliva mpoosito munceene, oothereryaka wira empresa yaaphwannye eluukuru vakhaani. Okhala wira kaari muhooleli a empereesa, kaanilipeleliwa wira ‘kiphuke’ mwaha ole, kinvahaka makhwankwa mulipa-oniliviha mpoosito wira ohitthare malamulo yaarowa wiiriha empresa oliva musurukhu munceene. Mwaha wa yeeyo, nto kaahisuweliwa okhala mutthu oohiroromeleya. Nuumala wiixutta ekeekhai, kaahihiya ovara muteko ole, nnaamwi waaliva musurukhu munceene. Nuumala-vo khaahimpacerya nakoso aka. Okhuma nihiku noopacerya, kaahilepiha empereesa aka ni kaaniliva mpoosito wotheene saavekeliwa”.—2 aKor. 8:21.
Gagik onihimya so: “Vano vannikivila olyiha emusi aka okhala wira musurukhu oniphwanya aka khonlikana ni ole waakhela aka khalai. Hata vari siiso, kinnihakalala vanceene. Vano kookhalana yowuupuxerya ya murima yooloka vamaithoni va Yehova. Kinnaavaha ntakiheryo nooloka anaaka amiravo anli, nave kinniphwanelela okhalana iparakha mmulokoni. Vano kookhalana nsina nooloka ohoolo wa atthu anivarana aka muteko ni alipa-aniliviha mpoosito mwaha wookhala mutthu oororomeleya”.
YEHOVA ONNINIKHALIHERYA
Yehova onnaaphenta ale aninvuwiha atakihaka mikhalelo sawe sootepa oreera, ohela muhina ororomeleya. (Tito 2:10) Yehova aahimuupuxerya Mwene Davidi ohimya so: “Okhuma omiravo aka mpakha vano kùluvanlyaka, nkinamone naxariya onyanyaliwe ni Muluku, nkinawone amusi awe elolaka yolya”.—Esal. 37:25.
Ntakiheryo na ororomeleya na Ruthi ninnooniherya eyo. Owo aahooniherya ororomeleya wa maathi awe, Nowemi, yoowo aari oowuuluvala. Ruthi aahithaamela wIsarayeli, weiwo aarowa awe omukokhorelaka Muluku eekeekhai. (Ruth. 1:16, 17) Owo moororomeleya aahirowa ottottela ipyo mmatta, ottharaka Nlamulo Muluku aavahale awe atthu oohaawa. Moolikanasa ni ele yaamwiiranenle Davidi, Yehova khaamuhiyale Ruthi ni Nowemi ahirina yoolya. (Ruth. 2:2-18) Owo aahipaka itthu sinceene ohiya paahi omukhaliherya ni mireerelo sa werutthuni. Muluku aahimuthanla Ruthi wira iirele mpantta nloko na Mwene Davidi, nenlo naarowa awe oyariwa Mesiya!—Ruth. 4:13-17; Math. 1:5, 16.
Arumeyi akina a Yehova vannaaxankiha ophwanya musurukhu oniphiyerya wira alyiheke emusi aya. Masi ohiya okhala oohiroromeleya wira aphwanye etthu yoolya, awo anniimananiha ovara muteko mooluttuweliwa wira aphwanye yoolya. Mwaha woopaka eyo, annooniherya mikhalelo sooreera sa Muluku, ohela muhina ororomeleya, mukhalelo yoowo ori wa faita yuulupale ovikana khula mureerelo wa werutthuni.—Ntoko Ruthi, maKristau olumwenku wotheene annaamini wira Yehova onimwaakhaliherya. Awo annimuroromela Ole oleihenrye so: “Miyo nkinonyanyalani-tho: kinimojalani mahiku othene”. (aHéb. 13:5) Okathi ti okathi, Yehova onnooniherya wira owo onrowa waakhaliheryaka ale aniroromeleya okathi wotheene. Yehova ohooniherya wira okathi wotheene onnaakhwaniherya yoolaiherya awe ya waavaha arumeyi awe itthu sinaathowa.—Math. 6:33.
Tthiri, olelo-va atthu anceene annivaha efaita yuulupale idiamante ni mihakhu sikina sa faita. Masi nikupaliki wira Tiithi ihu a wiirimu onnivaha efaita yuulupale ororomeleya wahu ni mikhalelo sikina sooloka, ovikana mihakhu aahiiso maluku a faita yuulupale.
Okhala oororomeleya onnimwiiriha mutthu okhalana yowuupuxerya ya murima yooloka ni onnilavula mootaphuwa okathi onilaleerya awe.