Yehova “Onnokhapelelani”
EXEENI enookupalihani wira masu ala teekeekhai ni wira Yehova onnookhapelelani tthiri? Nthowa nimosa ti wira Biibiliya onihimya siiso. Eliivuru ya 1 Pedru 5:7 enihimya so: “Muhelé mmatatani mwawe [Muluku] ovelavela wanyu wothene, okhala wira owo onnokhapelelani”. Itthu xeeni sinoororomelihani wira Yehova Muluku onnoothokoreryani?
MULUKU ONNINIVAHA SOOTTHUNEYA SA WERUTTHUNI
Yehova onnivaha ntakiheryo na, oorera murima ni ovaha
Muluku ookhalana mikhalelo, seiye woonasa wene muniphavela anyu wira mpatthani anyu okhalane. Apatthani aalupale annikhapelelana mooreerela murima ni annivahanana itthu. Ntoko munisuwela anyu, mahiku otheene Yehova onnaareerela murima ni waavaha itthu apinaatamu. Ntakiheryo nimosa na oreera murima wa Muluku tinla: “[Apwiya] awo annakumiherya nsuwa atthu òtakhala murima vamosá n’ale òrera murima: annarupihela epula anaxariya vamosá n’alipa-òttheka”. (Math. 5:45) Nsuwa ni epula sinikumiherya exeeni? Muluku onnirumeela nsuwa ni epula wira etthaya eweryeke oruwerya yoolya, yeeyo enaahakalaliha atthu. (Mit. 14:17) Aayo, Yehova onnirupiha epula wira yaavaheke yoolya atthu, ni waahakalaliha.
Nto nthowa xeeni atthu anceene anivoliwa aya etala? Mwaha woowi anamalamulela oopinaatamu aniphavela mireerelo saya paahi ohiya ophavela olokiherya okumi wa atthu anaalamulela aya. Yehova onoomaliha mwaha owo, vaavo vanrowa awe orantteliha iguvernu sa apinaatamu ni Omwene wa wiirimu, yoowo onrowa olamuleliwaka ni Mwanawe. Okathi owo, khuuvo onrowa ovoliwaka etala. Masi nenna-va, Yehova onnaakhaliherya arumeyi awe. (Esal. 37:25) Niireke eyo khahiyo yowooniherya yoowi Muluku onninikhapelela?
YEHOVA ONNIVAHA OKATHI AWE
Yehova onnivaha ntakiheryo na, ovaha okathi awe
Mpatthani eekeekhai onnirumeela okathi awe mmureerelo anyu. Woonasa wene mpatthani owo onniviriha iwoora sinceene olavulaka ni nyuwo, myaha sinoosivelani oowanli anyu. Nave, mpatthani eekeekhai onniwiriyana oratteene okathi onimuleela anyu mixankiho sanyu. Niireke Yehova onnoowiriyanani siiso? Aayo! Owo onniwiriyana mavekelo ahu. Tivonto Biibiliya onnitumererya awe wira ‘nlipiheryeke olompa’, ni ‘nlompeke vohihiyererya’.—aRom. 12:12; 1 aTes. 5:17.
Yehova oniviriha okathi mukavi owiriyanaka mavekelo anyu? Nookhala ntakiheryo nimosa na mBiibiliyani ninrowa waakhula nikoho nlo. Ohinatthi waathanla arummwa awe, Yesu aahirowa omwaako olompa “khuviriha ohiyu wothene amulompaka Muluku”. (Luka 6:12) Woonasa wene, okathi ole Yesu aahinvarerya khula mmosa a arummwa awe, aahithokorerya mikhalelo saya sooloka, otteettheya waya, ni aahinvekela Tiithi awe wira omukhaliherye waathanla. Okathi vaaxiiye aya nihiku nikina, Yesu aahisuwela wira ale aathanlale awe ti yaari oophwanelelaxa okhala arummwa awe. Yehova, yoowo ‘oniwìwa ale aninvekela’, onnisiveliwa vanceene owiriyana mavekelo otheene anipakiwa ni murima wotheene. (Esal. 65:3) Nnaamwi mutthu ovirihaka okathi munceene ovekelaka etthu emosaru enimuxankiha, Yehova khoniweha-weha okathi mutthu ole onivekela awe etthu emosaru.
MULUKU ONNIPHAVELA OLEVELELA
Yehova onnivaha ntakiheryo na, waakuva olevelela
Hata apatthani oolipa, ikwaha sikina khivanikhweya olevelelana. Atthu yaari apatthani okhuma khalai, opatthani aya onnimala mwaha woowi annoona ovila omulevelela mukhwaaya. Yehova khoniira siiso. Biibiliya onihimya wira atthu yaale attharunwe, pooti onvekela Muluku wira aalevelele, nto owo ‘t’òwakuva olevelela’. (Yes. 55:6, 7) Exeeni enimwiiriha Muluku waakuva olevelela ni murima wotheene?
Yehova towaakuva olevelela mwaha wa ophenta wawe wuulupale. Owo ohaaphentexa atthu mpakha waavaha Mwanawe, Yesu, wira owoopole apinaatamu mwa yoottheka ni itthu soohiloka sinikhumelela mwaha wa yoottheka eyo. (Yoh 3:16) Tthiri, okhwa wa Yesu onnikumiherya-tho mireerelo sikina. Orumeelaka mukuttho wa Yesu, Muluku onnaalevelela ale onaaphenta awe. Murummwa Yohani olempe so: “Nto nahimyaka wira: ‘nottheka’, Muluku onomaliherya sihimalyawe, ettelaka exariy’awe: eyo p’iyo, ononlevelela itampi sahu”. (1 Yoh. 1:9) Mwaha woowi Yehova toolevelela, nto apinaatamu pooti ovikaniha okhala apatthani awe, nto eyo enninihakalaliha vanceene.
YEHOVA ONIMOOKHALIHERYANI OKATHI ONIMPHAVELA ANYU
Yehova onnivaha ntakiheryo na, onikhaliherya okathi oniphavela ahu
Mpatthani eekeekhai ti yoole onaakhaliherya akina okathi oniphavela aya nikhaliheryo. Niireke Yehova onnipaka eyo? Biibiliya onihimya so: ‘Amorá [murumeyi a Muluku] khampweteya: tthiri Apwiya annavarela ntata, khuwemexa’. (Esal. 37:24) Yehova onnaakhaliherya arumeyi awe mwa inamuna soovirikana. Muthokorerye ntakiheryo nimosa ninkhuma elapo emosa eniitthaniwa St. Croix (Santa Cruz), esisiro ya oCaribe.
Mwaaruusi mmosa aakhootta wuntela ebandera mwaha wa etiini awe, aanikhanyereriwa ni anaxikola akhwaawe wuntela ebandera eyo. Nuumala onvekela Yehova nikhaliheryo, aahilakela olavula sa mwaha owo. Ekwaha aarina awe mwaha musaala, owo aahithanla olavula voohimya sa wuntela ebandera. Orumeelaka Eliivuru Aka ya Miyaha sa Biibiliya, aahitthokiherya moota yowiiraneya ya Xadraki, Mexaki ni Abedi-Nego, emukhalihenrye aya opaka yoothanla ele. Owo aahimmye so: “Yehova aahaakhapelela aHeeberi ale araru, okhala wira khiyaakokhorenle elatarato”. Nuumala-vo, aahaavaha eliivuru anaxikola otheene yaari musaala mme. Anaxikola muloko ni mmosa yaahaakhela eliivuru ele. Mwaaruusi ole aahihakalala vanceene, mwaha woowi Yehova aahinvaha ikuru ni miruku wira olavule mwaha ole wooxankiha ni ovahe onamoona.
Akhala wira munnihoverya wira Yehova onnoothokoreryani, muupuweleleke soolepa sa Biibiliya ntoko iya: Esalimo 34:18-20; 55:23; ni 145:18, 19. Mwaavekeleke anna ni arokora apacenrye omurumeela Yehova khalai wira yooleeleni moota onaakhapelela awe. Okathi oniphavela anyu nikhaliheryo na Muluku, munvekeleke. Moohipisa, munooweha moota Yehova ‘onokhapelelaweni’.