1. Malamulo xeeni a Biibiliya ahimmwale ettima ela, ni moota xeeni wiiwelela annikhaliherya aya?

MBIIBILIYANI, Yehova ookhalana malamulo anihimya mooluluwanya yootthuna awe. Mwa ntakiheryo, onnikhoottiha orupiha woohiloka, waakokhorela amuluku eethiru, wiiya, ni ohapaliwa. (1 aKor. 6:9, 10) Nave Yesu Kristu, Mwaana a Muluku, aahaavaha atthareli awe yooruma yooxankiha masi yoohakalaliha, oriki: “Murowé, mwawixuttiheke atthu a maloko othene, mwabatizaka ni nsina n’Atithi ni na Mwana ni n’Eroho Yowarya [“munepa wootteela”, Tradução do Novo Mundo]. Mwawixuttiheke wettela sothene sòrumalyakani. Vano miyo kinokhala ni nyuwo mahiku othene, mpakha elapo omala”. (Math. 28:19, 20) Tthiri malamulo ni sooruma sa Muluku anninikhaliherya vanci! Wiiwelela malamulo awo annikumiherya mireerelo iya: wiivaha efaita, ekumi yooloka, ni emusi yoohakalala. Yootepa otthuneya okhala wira wiiwelela moororomeleya sooruma sa Yehova, ohela muhina olaleya ihapari sooreera, onniiriha weemereriwa ni oreelihiwa ni yena.

2, 3. (a) Xeeni Biibiliya ohinnivaha awe malamulo a khula mwaha? (b) Makoho xeeni ninrowa ahu othokorerya muru ola? (Nwehe elatarato yoopacerya.)

² Masi sookhala myaha sinceene Biibiliya ohinvaha awe  malamulo ooluluwanya. Mwa ntakiheryo, Biibiliya khorina malamulo anitthokiherya inamuna sa ikuwo sinireerela owariwa ni maKristau. Eyo enooniherya sai miruku sa Yehova? Mwaha woowi moota atthu aniwara aya onnivirikana khula elapo olumwenku wotheene, ni moota saawariwa aya khalai khahiyo moota oniwariwa aya olelo-va. Nto vaakhanle wira Biibiliya oovaha elista ya ikuwo soowara ni moota woowiitthokiha, vano vaamuxankiha otthara inamuna isya sa mawarelo sineemereriwa. Vamosaru, Biibiliya khonivaha malamulo ooluluwanya anaahimeerya maKristau muteko woovara, okhapelela ekumi, ni matthekulelo. Khula mutthu aahiiso muhooleli a etthoko ohaana opaka soothanla voohimya sa myaha iya.

³ Tivonto, akhala wira nimphavela opaka yoothanla yuulupale mookumini mwahu masi nihinaphwanya nlamulo mBiibiliyani ninlavula mwaha owo, nihaana wiikoha so: Kiireke Yehova onnisiveliwa ni yoothanla aka? Kiireke onoosiveliwa ni yoothanla aka hata nihikhanle nlamulo na Biibiliya ninkhoottiha? Akhala wira khakhanle malamulo ooluluwanya, kinrowa osuwela sai wira yoothanla aka ennimuhakalaliha Yehova?

4, 5. Soothanla sinrowa onikumiherya exeeni hiyo ni atthu akina?

⁴ Atthu akina anuupuwela wira pooti opaka soothanla attharaka murima aya. Opaka soothanla mwa miruku onnimuhakalaliha Yehova, masi nihaana othokorerya malamulo ni malakiheryo aniphwanyaneya mBiibiliyani voohimya sa myaha iyo. Mwa ntakiheryo, wira neemereriwe ni Muluku, nihaana weettela nlamulo nawe voohimya sa ephome. (Maph. 9:4; Mit. 15:28, 29) Ovekela onoonikhaliherya opaka soothanla sinivarihana ni malamulo ni malakiheryo a Biibiliya.

⁵ Nto soothanla sahu pooti onikhaliherya aahiiso onihaaxa momunepani. Nave soothanla sinipaka ahu pooti oniiriha omwaattamela aahiiso omurakamela Yehova. Soothanla sooloka pooti olipiha wataana wahu ni Muluku, masi soothanla soohiloka pooti ohonona. Soothanla soohiloka pooti waakwattuliha aahiiso waaxankiha annihu wala ohonona wiiraana mmulokoni. Tivonto, soothanla sahu ti sootthuneya vanceene.​—Mmusome aRoma 14:19; aGalasia 6:7.

6. Nuupuweleke exeeni nihinatthi opaka soothanla sahu?

⁶ Ninrowa opaka exeeni myaha seiye nihikhanle aya nlamulo nooluluwanya mBiibiliyani? Ohiya othanla ele ennisivela, nihaana wuupuwela saana wira soothanla sahu simuhakalalihe Yehova. Niira siiso, nikupaliki wira onrowa onikhaliherya wira nikhumele saana.​—Musome Esalimo 37:5.

7. Akhala wira khanikhanle nlamulo nooluluwanya mBiibiliyani, ninrowa osuwela sai yootthuna ya Yehova mmwaha owo?

⁷ Woonasa wene hiyo pooti wiikoha so: ‘Ninrowa osuwela sai yootthuna ya Yehova akhala wira khanikhanle nlamulo nooluluwanya voohimya sa mwaha owo?’ Eliivuru ya aÉfeso 5:17, enihimya so: “Mphaveleke osuwela sintthunawe Muluku”. Akhala wira khanikhanle nlamulo nooluluwanya mBiibiliyani, ninrowa osuwela sai yootthuna ya Muluku? Ninvekelaka ni weemererya malakiheryo onivaha awe orumeelaka munepa wootteela.

8. Moota xeeni Yesu aaphavenle awe osuwela moonelo wa Yehova? Nvahe ntakiheryo.

⁸ Nrowe nthokorerye moota Yesu aaphavela  awe osuwela moonelo wa Tiithi awe wa khula mwaha. Mwa ntakiheryo ikwaha piili, vaavo muttitthi wa atthu waavoliwa aya etala, Yesu aahivekela aalyihaka mwa mwiiriirya atthu ale. (Math. 14:17-20; 15:34-37) Hata vari siiso, Yesu aahikhootta otatuxa maluku wira akhale ephaawu okathi eehereriwa awe ni Diabo moothakoni. (Mmusome Matheyo 4:2-4.) Okhala wira aanimusuwela saana Tiithi awe, Yesu aanisuwela wira khivaaloka orumeela munepa wootteela voohiloka. Nave, Yesu aanikupali wira Tiithi awe aarowa omukhaliherya ni onvaha yoolya okathi wooreerela. Mwaha woopaka eyo, Yesu aahooniherya wira aamuroromela Yehova ni malakiheryo awe.

9, 10. Exeeni enrowa onikhaliherya opaka soothanla mwa miruku? Nvahe ntakiheryo.

⁹ Wira nipake soothanla mwa miruku ntoko Yesu, nihaana ororomela malakiheryo a Yehova. Nihaana otthara moolumo ala ootthuneya oowi: “Mwaroromeleke Apwiya ni murim’anyu wothene: muhiroromelé osuwela wanyu pahi! Nwupuwele Apwiya mothene munettanyu: awo anolokiha iphiro sanyu. Muhisinnuwihé vamaithoni vanyu: mwattittimiheke Apwiya, mutthyaweke sotakhala”. (Mir. 3:5-7) Osuwela muupuwelo wa Yehova nimusomaka Biibiliya, onoonikhaliherya ophavela ele Muluku ennivekela awe wira nipake. Vaavo vanitepa ahu osuwela muupuwelo wa Yehova, nnootepaka ophavela otthara malakiheryo awe.​—Ezek. 11:19.

¹⁰ Mwa ntakiheryo: Nkahaya mmuupuwele muthiyana ootheliwa onrowa olooxa. Owo onniweha ixapattho sooreera onaphavela othuma, masi sinitumihiwa musurukhu munceene. Vano onniikoha wira: ‘Kiireke iyaka onoosiveliwa akhala wira kinoothuma ixapattho iye?’ Masi, nnaamwi ohikhanle ni iyawe, muthiyana owo onnisuwela waakhula nikoho nna. Moota xeeni? Okhala wira athelanne khalai, onnisuwela musurukhu orina aya ni moota anirumeela aya. Nto onnisuwela musurukhu onireerela awe orumeela. Mwa enamuna emosaru, akhala wira ninrowa otepaka osuwela muupuwelo ni iphiro sa Yehova, ninrowa ovikanihaka olokiherya ophavela wahu osuwela ele Tiithi ihu a wiirimu ennivekela awe opaka wa khula mwaha.

11. Makoho xeeni anireerela ahu wiikoha vaavo vanimusoma ahu aahiiso omwiixutta Biibiliya? (Nwehe ekaaxa eni: “ Okathi Onisoma Anyu Nuulumo na Muluku, Mwiikoheke So”.)

¹¹ Wira nisuwele muupuwelo wa Yehova, nihaana opweha nipuro noopacerya yoosoma ahu ya Biibiliya. Vaavo vanisoma ahu nuulumo na Muluku niikoheke so: ‘Ela enisoma aka enkiixuttiha exeeni voohimya sa iphiro sa xariya sa Yehova ni moonelo awe?’ Nihaana okhalana mooneelo ntoko wa nasaalimo Davidi, yoowo iipale so: “Apwiya! Mukixuttihe iphiro sanyu: mukòniherye miphito sanyu. Mukixuttihe wettela ekekhai anyu. Muluku, mòpoli aka, kinnororomelani mahiku othene”. (Esal. 25:4, 5) Wira nuupuwelele ele enisoma ahu mBiibiliyani, nihaana othokorerya makoho ala: ‘Kinrowa ovarihela sai muteko vatthokoni vaka, omutekoni, oxikola, aahiiso okathi onilaleerya aka?’ Vaavo vanuupuwelela ahu saana moota woovarihela muteko ele enniixuttiha awe, nnoosuwela moota woorumeela.

12. Iliivuru sahu ni mithukumano sinnikhaliherya sai osuwela muupuwelo wa Yehova mmikhalelo sinceene?

¹² Enamuna ekina wira nisuwele muupuwelo wa Yehova ovaha ephoole yuulupale malakiheryo a Biibiliya anivahiwa ni otthokeya  wawe. Mwa ntakiheryo, Índice das Publicações da Torre de Vigia ni Guia de Pesquisa para Testemunhas de Jeová, sookumiheriwa wira sinikhaliheryeke osuwela muupuwelo wa Yehova okathi onipaka ahu soothanla. Nave-tho, ninnittottela mureerelo muulupale vaavo vaniwiriyana ahu saana mithukumano sa eKristau ni okomentari. Wuupuwelela ele eniixutta ahu onoonikhaliherya osuwela muupuwelo wa Yehova ni otthara. Akhala wira nnoorumeela yoolya yomunepani Yehova onnivaha awe, ninrowa otepaka osuwela iphiro sawe. Nto eyo enrowa onikhaliherya opaka soothanla sooloka ni ophwanya mareeliho a Muluku.

13. Nvahe ntakiheryo nnooniherya moota osuwela muupuwelo wa Yehova onnikhaliherya aya opaka soothanla sooloka.

¹³ Nkahaya nthokorerye ntakiheryo nimosa nnooniherya moota osuwela muupuwelo wa Yehova onnikhaliherya aya opaka soothanla sooloka. Waaniheryasa hiyo pooti ophavela okhala pioneero ookilaatheya. Wira niwerye okhala pioneero, ninnipacerya okhweiherya okumi ahu. Nave, waaniheryasa ninnuupuwela akhala wira nnoowerya ohakalala ni itthu vakhaani sa werutthuni. Tthiri khinikhanle nlamulo na Biibiliya nnihimya wira nikhale pioneero; hiyo pooti ovikaniha omurumeela Yehova moororomeleya hata nihikhanle pioneero. Masi, Yesu aahihimya wira ale aniivahererya mwaha wa Omwene, anrowa waakhela mareeliho manceene. (Mmusome Luka 18:29, 30.) Ohiya-vo, Biibiliya onnooniherya wira Yehova onnisiveliwa vaavo ‘vaninvaha ahu murima onittelalene’ ni okhaliherya okokhorela wekeekhai ni murima ahu wotheene. (Esal. 119:108; 2 aKor. 9:7) Niireke vanniweryaneya ophavela osuwela muupuwelo wa Yehova nimurumeelaka Biibiliya ni mavekelo? Omurumeela Biibiliya ni mavekelo onoonikhaliherya opaka soothanla sookhalela nreelihiwaka ni Tiithi ihu a wiirimu.

14. Munrowa osuwela sai akhala wira enamuna emosa ya owara ni wiitthokiha ennimusivela Yehova?

¹⁴ Niwehe ntakiheryo nikina: Waaniheryasa yookhala enamuna yoowara ni wiitthokiha enoosivelani masi enrowa waaxankiha aahiiso waakhumula anna akina mmulokoni. Masi khanikhanle nlamulo na Biibiliya ninkhoottiha mooluluwanya mawarelo awo. Munrowa osuwela sai moonelo wa Yehova? Murummwa Paulo aahivaha miruku iya soovareleya  muteko, oriki: “Siso-tho, athiyana ewareke ikuwo sinaphwanela, yireriheke vohùliha muru ni vohìsona: ehìreriheké n’utthava ikharari vottakala, nnákhala ni maniya àwero, walá ni mukhova worika hatá n’ikuwo sorikexa: nto yìreriheke ni miteko sorera, ntoko sinaphwanela athiyana amphavela omuttittimiha Muluku”. (1 Tim. 2:9, 10) Nave miruku iya sinnaahimya-tho alopwana maKristau. Tthiri wuupuwelela miruku iya sa Yehova, sinninikhaliherya owara ni wiitthokiha mwa enamuna ehinrowa waakhumuliha annihu. Mweettelo wooloka ni ophenta onniniiriha owuupuwela annihu wira nihipake etthu yaarowa waakhumuliha. (1 aKor. 10:23, 24; aFil. 3:17) Wuupuwelela miruku sa Biibiliya, sinoonikhaliherya ophavela osuwela moota Yehova onoonela awe mwaha ola ni oniiriha opaka soothanla sinimuhakalaliha.

15, 16. (a) Yehova onoonela sai akhala wira ninnivikaniha wuupuwelela itthu sa orupihana woohiloka? (b) Okathi onithanla ahu matthekulelo ninrowa osuwela sai ele enimusivela Yehova? (c) Ninrowa opaka sai soothanla suulupale?

¹⁵ Biibiliya onnooniherya wira Yehova aahiriipiwa murima vaavo atthu yaatthara aya mweettelo woohiloka, tthiri “mùpuwelo aya wothene n’otthuna waya wari opaka sonarara mahiku othene”. (Musome Maphattuwelo 6:5, 6.) Yehova khoniphavela wira nuupuweleleke orupihana woohiloka maana ovikaniha wuupuwelela etthu eyo, waamuniiriha opaka yoottheka yuulupale. Murummwa Yakobo aalempe so: “Vano, ankhili ankhuma wa Muluku t’òrera, annivaha murettele, t’òmàla, t’àxariya, t’òsareya othunku ni miteko sorera, khanathanla atthu, kharina mirima mili”. (Yak. 3:17) Osuwela ela enninikhaliherya osyaka matthekulelo ni muupuwelo woohiloka. MaKristau oolipa momunepani annisuwela matthekulelo, iliivuru, ifilme wala axooku ahineemereriwa ni Yehova. Maana annisuwela saana ele Biibiliya enihimya awe sa myaha iyo.

¹⁶ Sookhala myaha siniwerya ahu opaka soothanla sahu mwa inamuna soovirikana, nlelo khimuhakalaliha Yehova. Masi myaha suulupale, ti vooloka waakoha axitokweene a mmulokoni aahiiso maKristau oolipa momunepani. (Tito 2:3-5; Yak. 5:13-15) Hata vari siiso, hiyo nrina muritti woopaka soothanla sahu. MaKristau ahaana olimalela waarumeela ankhili aya. (aHéb. 5:14) Otheene ahu nihaana otthara moolumo yuupuxeriwe murummwa Paulo, wira: “Khula mutthu onokohiwa mwaha wa mwettelo awe”.​—aGal. 6:5.

17. Mareeliho xeeni aniphwanya ahu vaavo vanipaka ahu soothanla sinimusivela Yehova?

¹⁷ Vaavo soothanla sahu sinivarihana aya ni muupuwelo wa Yehova, ninrowa omwaattamelaka. (Yak. 4:8) Nave Yehova onrowa oneemererya ni onivaha mareeliho. Eyo ennilipiha omwaamini wahu Tiithi ihu a wiirimu. Tivonto, nitthareke malamulo ni malakiheryo a Biibiliya, maana annooniherya muupuwelo wa Muluku. Tthiri okathi wotheene ninrowa wiixuttaka itthu isya voohimya sa Yehova. (Yobi 26:14) Nto, naimananiha nnoophwanya miruku, osuwela ni ankhili ooloka anrowa onikhaliherya opaka soothanla sooloka. (Mir. 2:1-5) Apalano ni miyuupuwelo sa apinaatamu sinniturukeya, masi nasaalimo onninuupuxerya moolumo ookhalela oriki: “Otthuna wa Muluku onnìraneya mahiku othene: sinùpuwelawe ni nlema nawe sinnarwela atthu othene”. (Esal. 33:11) Mwekeekhai, nnoowerya opaka soothanla sooloka, akhala wira muupuwelo ahu ni miteko sahu sinnivarihana ni muupuwelo wa Yehova, Muluku oosuwela sotheene.