1, 2. Makoho xeeni anikhumelela mwaha wa masu a Yesu alempwe ni Matheyo 24:14?

ATTHU akina annisiveliwa ni muhupi onilaleya ahu, masi akina khansiveliwa. Hata vari siiso, anamunceene annaattittimiha Anamoona a Yehova mwaha wa muteko woolaleerya anivara aya. Ninnisuweliwa vanceene mwaha wa muteko owo woolaleerya. Ntoko ninsuwela ahu, Yesu aahihimya vahinatthi wira ihapari sooreera sa Omwene saarowa olaleiwa mulaponi motheene. (Math. 24:14) Masi ninsuwela sai wira muteko onivara ahu onooniherya wira eprofesia ya Yesu enniiraneya? Niireke nnimwiikuxererya, naahimyaka wira hiyo paahi ti ninvara muteko owo?

² Itiini sinceene sinikupali wira sinnilaleya Evangelyo, wala ihapari sooreera. Atthu akina anikupali wira waakhaliherya alipa-oohaawa wala ovara muteko ohiniliviwa aya, ntoko okhala totoro, nfurumeero wala pirisoori, ti enamuna anilaleerya aya. Niireke miteko iyo, sinnivarihana niile Yesu aarumme awe awiixutti awe?

3. Moovarihana ni Matheyo 28:19, 20, itthu xeeni xexe atthareli a Yesu anitumereriwa aya opaka?

 ³ Niireke awiixutti a Yesu yaamwiikhalela paahi, ni anaalipelela atthu waarweela? Nnaari! Nuumala ohihimuxiwa, Yesu aahaaleela awiixutti awe anceene, wira: “Murowé, mwawixuttiheke atthu a maloko othene, mwabatizaka . . . mwawixuttiheke wettela sothene sòrumalyakani”. (Math. 28:19, 20) Moovarihana ni masu ala, sookhala itthu xexe sinivekeliwa. Nohaana waapaka awiixutti, waabatiza ni owiixuttiha. Masi etthu xeeni eri yoopacerya? Yesu ohimmye wira: “Murowé”, eyo piiyo, nihaana orowa ori atthu. Mulipa onimutokosa Biibiliya, onihimya so: “Nuulumo noowi ‘murowé’ ninthoonyerya wira khula mutthu oowaamini ohaana orowa [olaleerya], okhale vakhiviru, wala ottaiwene”.​—Math. 10:7; Luka 10:3.

4. Exeeni enihela muhina okhala “atothi àtthu”?

⁴ Niireke wira Yesu aaphavela wira khula naxikola awe olaleeryeke mekhawe, wala aaphavela wira otheene aya alaleeryeke ntoko egrupu? Okhala wira mutthu mmosa khaarowa owerya olaleerya “maloko othene”, nto muteko owo waahaana otthokihiwa oratteene ni ovariwaka ni atthu anceene. Tthiri eyo ti etthu Yesu aaphavela awe ohimya, vaavo aalattunle awe atthareli awe okhala “atothi àtthu”. (Mmusome Matheyo 4:18-22.) Ototha Yesu aahimya awe, khahiyo ntoko omiserya ni coolo ni enyakwata, wira owatthule ehopa. Ohiya-vo, onihela muhina ototha orumeelaka ntthavi. Nto eyo enivekela muteko munceene, wootthokiheya ni atthu anceene avaraka vamosa.​—Luka 5:1-11.

5. Makoho xeeni maxexe anitthuneya waakhuliwa, ni nthowa xeeni?

⁵ Wira naasuwele ale anilaleya ihapari sooreera olelo-va, moovarihana ni eprofesia ya Yesu, nihaana waakhula makoho ala maxexe:

• Muhupi xeeni atthareli a Yesu anilaleya aya?

• Exeeni eniwiiriha ovara muteko owo?

• Inamuna xeeni anirumeela aya?

• Munnuwelo wa muteko owo ori sai, ni onrowa ovariwa mpakha silini?

Waakhula makoho ala onoonikhaliherya waasuwela ale anivara muteko owo wootthuneya, ni ononlipiha wira nivikaniheke ovara muteko owo.​—1 Tim. 4:16.

6. Exeeni enookupalihani wira Anamoona a Yehova tanilaleya ekeekhai?

⁶ Mmusome Luka 4:43. Yesu aanilaleya “ehapari yorera y’omwene wa Muluku”, ni onilipelela wira awiixutti awe apakeke etthu emosaru. Egrupu xeeni enilaleya ehapari eyo wa “maloko othene”? Anamoona a Yehova paahi. Hata atthu akina annilupattha annikupali eyo. Mwa ntakiheryo, paatiri mmosa aari misionaario, aahimuleela Namoona mmosa wira yena aahikhala ilapo sinceene soovirikana, nto khula elapo, aahaakoha Anamoona a Yehova muhupi xeeni yaalaleya aya. Anamoona awo yaakhula sai? Paatiri owo aahimmye so: “Otheene aya yaari alolo, maana yaakhunle moota mmosa, yiiraka: ‘Ihapari sooreera sa Omwene’”. Moolumo a paatiri ole, anooniherya wira hiyo khanihiyo “alolo”, masi nihiiraana ntoko maKristau eekeekhai. (1 aKor. 1:10) Anna awo yaalavula moovariha ni muru wa erevista ahu Owehaweha Elaleyaka Omwene wa Yehova. Erevista ela enniphwanyaneya mattaava 254, ni sinnipakiwa irevista 59 imilyau sene,  nto eyo enniiriha erevista ela okhala yootepexa okaiwa olumwenku wotheene.

7. Ninsuwela sai wira ahooleli a eKristau Yoowootha khanilaleya muhupi wookhalela?

⁷ Ahooleli a eKristau Yoowootha khanilaleya Omwene wa Muluku. Okathi anilavula aya voohimya sa Omwene, awo anihimya wira etthu eri va murimani va mutthu. (Luka 17:21) Khanaakhaliherya atthu wiiwexexa wira Omwene wa Muluku, ti eguvernu eri wiirimu, enihooleliwa ni Yesu Kristu, ni wira moohipisa tenrowa omaliha mixankiho sotheene sa apinaatamu, ohela muhina otakhala. (Wis. 19:11-21) Ohiya-vo, awo animuupuwela Yesu paahi okathi wa Natali ni Paasikha. Khanisuwela ele Yesu enrowa awe opaka, okathi onrowa awe okhala Mwene a Omwene wa Muluku. Okhala wira khanisuwela oratteene muhupi Yesu aarumme awe olaleerya, tivonto, khanisuwela nthowa naya anitthuneya aya olaleerya.

8. Moonelo xeeni woohiloka ohinreerela okhalana voohimya sa muteko woolaleerya?

⁸ Exeeni enniiriha ovara muteko woolaleerya? Atthareli a Yesu khanilaleerya wira aphwanye musurukhu wala oteka ikerexa suulupale ni sowaattiheriwa itthu. Yesu aahaahimeerya awiixutti awe oriki: “Ntoko sivahiwanyu mahala, siso-tho nvaheke mahala”. (Math. 10:8) Muteko woolaleerya khahiyo nakoso. (2 aKor. 2:17) Ale anilaleerya ihapari sa Omwene, ahiphaveleke ophwanya mureerelo aya. (Musome Miteko 20:33-35.) Nnaamwi Yesu ovahale ene malakiheryo oowiiwanyeya oratteene, ikerexa sinceene siniphavela ophwanya musurukhu paahi wira yaaliveke mapaatiri aya ni anamuteko akina. Ti nthowa naya ahooleli anceene a eKristau Yoowootha, aniithukumanyerya aya mihakhu.—Wis. 17:4, 5.

9. Anamoona a Yehova anooniherya sai wira anilaleerya ni mathowa ooreerela?

⁹ Niireke Anamoona a Yehova anniveka musurukhu? Nnaari, maana muteko aya onikhaliheriwa ni soovaha soohikhanyereriwa. (2 aKor. 9:7) Khaniveka musurukhu okathi anithukumana aya mmulokoni wala okathi wa akongresu. Nnaamwi vari siiso, mmwaisana paahi, Anamoona a Yehova yaahiviriha iwoora 1.93 ibilyau sene, alaleeryaka ihapari sooreera ni yiirihaka soosoma sa Biibiliya siniphiyerya imilyau thanu ni xexe khula mweeri. Awo khaniliviwa etthu, nave-tho annirumeela musurukhu aya wira akhaliheryeke muteko owo woolaleerya. Olavulaka sa muteko wa Anamoona a Yehova, mulipa onitokosa myaha, ohimmye so: “Muteko aya muulupale ti olaleerya ni wiixuttiha. . . . Anniwerya osuka musurukhu, maana kharina ahooleli aniliviwa”. Nto exeeni enniiriha ovara muteko ola? Hiyo ninnivara muteko ola moohikhanyereriwa, maana ninnimphenta Yehova ni apinaatamu akhwiihu. Eyo ennivarihana ni ele enihimmwa ni Esalimo 110:3. (Musome.)

10. Inamuna xeeni soolaleerya Yesu ni awiixutti awe yaarumeela aya?

¹⁰ Inamuna xeeni Yesu ni awiixutti awe yaarumeela aya wira alaleye ihapari sooreera? Awo yaanirowa waaphavelasa atthu mapuro otheene yaaweryaneya aya waaphwanya, akhale mapuro oowaatta atthu wala mmaitthokoni mwaya. (Math. 10:11; Luka 8:1; Mit. 5:42; 20:20) Olaleerya khula empa wooniherya wira khiyaathanya atthu.

11, 12. Wiimananiha wa eKristau Yoowootha onivirikana sai ni enamuna Anamoona a Yehova aniimananiha aya ovara muteko woolaleerya?

 ¹¹ Niireke ikerexa sa eKristau Yoowootha sinnilaleerya ihapari sooreera ntoko iira awe Yesu? Ikwaha sinceene, ale anirowa okerexa, anaahiyerya ahooleli aniliviwa wira akhaleke tanilaleerya. Ohiya okhala “atothi àtthu”, ahooleli a eKristau Yoowootha, aniluttuweliwa paahi wira avikaniheke okhalana “ihopa” awatthunle aya khalai. Ekeekhai wira aakhala ahooleli akina a ikerexa animananiha otumererya olaleerya Evangelyo. Mwa ntakiheryo, wanipacerya wa mwaakha 2001, Papa João Paulo II, aahimmye so: “Iyaakha sinivira, kinniimananiha waalattula atthu olaleerya evangelyo esya. Vano, kinootthikela-tho . . . Nihaana oluttuweliwa vamurimani vahu, ntoko iira awe Paulo, yoowo aahimmye wira: ‘Kootakhaliwa, kahilaleyeru Evangelyo’”. Nto paapa aahivikaniha oriki, muteko ola “khonihiyeriwa egrupu ya ‘asuweli’, masi ohaana ovariwa ni Atthu a Muluku otheene”. Masi khaavo aiwelenle moolumo awo.

¹² Ankhi Anamoona a Yehova? Awo paahi tanilaleerya wira Yesu oopacerya olamulela ntoko Mwene, okhuma mwaakha wa 1914. Annipweha muteko woolaleerya nipuro noopacerya, ntoko Yesu aalakihenrye awe. (Mar. 13:10) Eliivuru Pillars of Faith—American Congregations and Their Partners (Mathipelo a Waamini—Miloko sa wAmerica ni Apatthani Aya) enihimya so: “Anamoona a Yehova annoona muteko woolaleerya okhala wootepa otthuneya ovikana itthu sotheene”. Eromolaka moolumo a Namoona a Yehova mmosa, eliivuru eyo ennivikaniha eriki: “Yamphwanya mutthu oovoliwa, ohirina etthu, oniwereiwa, anneererya omukhaliherya, . . . masi khanliyala wira muteko aya muulupale ori waavaha ihapari soomunepani, voohimya sa omala wa elapo ni woopowa wa atthu”. Anamoona a Yehova annivikaniha olaleya muhupi owo, arumeelaka inamuna Yesu ni awiixutti awe yaarumeela aya.

13. Munnuwelo wa muteko woolaleerya waarowa okhala sai?

¹³ Yesu aahihimya munnuwelo wa muteko owo, oriki ihapari sooreera saarowa olaleiwa “mulaponi mothene”. (Math. 24:14) Nave-tho ahaana opakiwa awiixutti a “maloko othene”. (Matt. 28:19, 20) Ela enooniherya wira ihapari sooreera saahaana olaleiwa mulaponi motheene.

14, 15. Exeeni enooniherya wira Anamoona a Yehova annaakhwaniherya eprofesia ya Yesu voohimya sa munnuwelo wa muteko woolaleerya? (Nwehe elatarato yoopacerya.)

¹⁴ Anamoona a Yehova paahi tanaakhwaniherya eprofesia Yesu aalavunle awe oriki ihapari sooreera saarowa olaleiwa mulaponi motheene. WEstados Unidos, aakhala ahooleli a ikerexa aniphiyerya 600.000, ni aakhala Anamoona a Yehova oowiiraka 1.200.000. Olumwenku wotheene, Ekerexa  Katoolika ya oRoma erina mapaatiri aniphiyerya 400.000. Masi nkahaya muthokorerye nummuru na Anamoona a Yehova anilaleya ihapari sooreera. Olumwenku wotheene, aavikana imilyau 8, ni annilaleerya ilapo 240. Tthiri, miteko iyo sinnikuxa murima ni sinninvuwiha Yehova!​—Esal. 34:2; 51:17.

¹⁵ Ntoko Anamoona a Yehova, hiyo nimphavela waalaleerya atthu anceene ihapari sooreera, nihinatthi ophiya wanikisa. Wira nivare muteko owo, ninnitaphulela iliivuru sinceenexa sinimutthokiherya Biibiliya. Iyo sinihela muhina irevista, ifolyeeto, ipaphelo sinaalattula atthu omurowela kongresu ni Niira na Wuupuwelela, seiyo sinikaiwa mahala. Nookumiherya iliivuru mattaava anivikana 700. Aapakiwa aBiibiliya Tradução do Novo Mundo das Escrituras Sagradas anivikana imilyau 200, mattaava anivikana 130. Mmwaisana paahi, noopaka iliivuru sinimutthokiherya Biibiliya sinaattamela ibilyau 4.5. Websaite ahu onniphwanyaneya mattaava anivikana 750. Anamoona a Yehova paahi tanivara miteko iyo sookuxa murima!

16. Ninsuwela sai wira Anamoona a Yehova aakhalana munepa wa Muluku?

¹⁶ Muteko owo woolaleerya onrowa ovariwaka mpakha silini? Yesu aahimmye wira waarowa ovariwaka mpakha ophiya mahiku ookiserya, “mpakha elapo omala”. Egrupu xeeni enivikaniha olaleya ihapari sooreera mahiku ala ookiserya? Atthu akina anaaphwanya ahu naalaleeryaka annihimya wira: “Hiyo nookhalana munepa wootteela, masi nyuwo munnivara muteko owo”. Nto niireke wira ovikaniha wahu olaleerya, khahiyo ethoonyeryo yoowi nookhalana munepa wa Muluku? (Mit. 1:8; 1 Ped. 4:14) Ikwaha sikina, ikerexa sikina sinnimananiha olaleerya ntoko aniira aya Anamoona a Yehova, masi khasinrowa ottaiwene. Akina annikhala mamisionaario okathi vakhaani, nuumala vo, anatthikela makhalelo aya a khalai. Hata akina anniimananiha olaleerya empa ni empa, masi awo khanilaleya ihapari sa Omwene. Nto ela enooniherya wira atthu awo khanivara muteko yoole Yesu Kristu aapacenrye awe.

17, 18. (a) Exeeni ennikupaliha wira paahi Anamoona a Yehova tanilaleerya ihapari sooreera sa Omwene olelo-va? (b) Ninwerya sai ovikaniha olaleerya?

¹⁷ Nto tani anilaleya tthiri ihapari sooreera sa Omwene olelo-va? Anamoona a Yehova paahi! Exeeni enniiriha ohimya siiso? Mwaha woowi ninlaleya muhupi wookhalela, eyo piiyo, ihapari sooreera sa Omwene. Ninnirumeela inamuna sookhalela, vaavo vanrowa ahu waalaleerya atthu mmaitthokoni mwaya. Ninnivara muteko owo ni mathowa ooloka, eyo piiyo, mwaha wa omphenta Yehova ni atthu, ohiya ophavela musurukhu. Muteko owo ti wowuulaana, maana onnaaphwanya atthu a maloko ni ilavulelo sotheene. Nave nnoovikaniha ovara muteko owo moohihiyererya, mpakha ophiya wanikisa.

¹⁸ Tthiri vannihakalaliha oweha muteko arumeyi a Muluku anivara aya mahiku ala ookiserya anikhala ahu. Masi vaniweryaneya sai olaleerya olumwenku wotheene? Murummwa Paulo onnaakhula ni masu aalepenle awe aFilipi, oriki: “Muluku onnikumiherya mwa nyuwo otthuna n’umaliherya mwaha w’onirerela wawe murima”. (aFil. 2:13) Nto Yehova ovikaniheke onivaha ikuru wira nivikaniheke olaleerya ihapari sooreera.​—2 Tim. 4:5.