1, 2. (a) Mutthokiherye etthu enooniherya wira obatizo etthu yuulupale. (b) Etthu xeeni mutthu onitthuneya awe osuwela ohinatthi obatiziwa, ni mwaha wa xeeni?

NIIREKE nyuwo mwa mmiravo muniphavela obatiziwa? Akhala wira ti siiso, eyo eparakha yuulupale erina anyu. Ntoko siiwale ahu mwaha ovinre, obatiziwa yoothanla yuulupale. Enooniherya wira nyuwo muhiivahererya wa Yehova, eyo piiyo, moomuleiherya omurumeela okumi anyu wotheene ni munrowa opakaka yootthuna awe ovikana itthu sikina. Okhala wira obatizo etthu yuulupale, nto muhaana obatiziwa paahi akhala wira muhinnuwa momunepani, munniphavela tthiri obatiziwa ni munnisuwela oratteene ele enitaphulela aya wiivahererya wa Yehova.

² Sai akhala wira nlelo khamusuwelenxe mwaalikanne ene wira mbatiziwe? Aahiiso munoona wira moolikana wira mbatiziwe, masi anamuyari anyu anoona wira muhaana wunnuwa toko ni wiixutta itthu sinceene? Muhixanke! Murumeele okathi owo munilipelela anyu wira munnuwe momunepani, nto mphwanelele obatiziwa. Okathi owo munilipelela anyu, muhaana okhalana  soolukama iya tthaaru: (1) itthu sinikupali anyu, (2) miteko sanyu, ni (3) oxukhurela wanyu.

3, 4. Amiravo anrowa wiixutta exeeni ni ntakiheryo na Timootheyo?

³ Muupuwele moota mwaarowa anyu waakhula makoho ala: Exeeni enikikupaliha wira Muluku ookhala? Exeeni enikikupaliha wira Biibiliya uupuxeriwe ni Muluku? Exeeni enikiiriha wuupuwela wira fataari otthara malakiheryo anivahiwa ni Muluku ohiya otthara mweettelo wa mulaponi? Makoho ala khapakeliwe wira yaakanyerye muupuwelo anyu. Ohiya-vo, animookhaliheryani otthara miruku sa Paulo sini: “Nwerye osuwela . . . ekhanle yorera, enimusivela Muluku ni ya xariya”. (aRom. 12:2) Xeeni maKristau a oRoma yaatthuneya aya osuwelexa itthu yaakupanli aya khalai?

⁴ Nwehe ntakiheryo nimosa na mBiibiliyani. Timootheyo aanisuwela Soolempwa oratteene. Owo aahiixuttihiwa ‘okhuma enamwane awe’, ni maama awe vamosa ni piipi awe. Hata vari siiso, Paulo aahimutumererya Timootheyo wira: “Mulipiheryeke sothene sixuttalyanyu, seiyo sakhenlyanyu ni wamini wolipa”. (2 Tim. 3:14, 15) Moovarihana ni eliivuru emosa, nuulumo noowi “sakhenlyanyu ni wamini wolipa” onitaphulela “ohihoverya wira etthu eniixutta awe, ekeekhai”. Timootheyo aahaakhelela ekeekhai. Owo khahiyo aakhelenle mwaha wookhanyereriwa ni maama awe vamosa ni piipi awe, masi, mwaha woowi owo aahikupali mwaneene.​—Mmusome aRoma 12:1.

5, 6. Xeeni vanitthuneya aya opacerya waarumeela ankhili anyu nlelo muryeene mmiravo?

⁵ Ankhi nyuwo? Woonasa wene mpacenrye khalai osuwela ekeekhai. Akhala ti siiso, mutokose oratteene mathowa aniwiirihani okupali. Eyo enimoolipihani, ni enimookhaliheryani osyaka owokiwa ni apatthani anyu, olumwenku wa Satana hata muupuwelo anyu.

⁶ Wiixutta orumeela muupuwelo anyu nlelo muryeene mmiravo, onimookhaliheryani owaakhula oratteene apatthani anyu yookohakani itthu ntoko iya: ‘Exeeni enookupalihani wira Muluku ookhala? Xeeni Muluku oneemererya awe ohaawa valaponi? Vaniweryaneya sai Muluku ohikhalana ephattuwelo?’ Mwailokiherya, makoho awo khanirowa otteettheiha waamini wanyu, masi anrowa woolipiheryani ovikaniha omutokosa Biibiliya.

7-9. Mutthokiherye moota epantte ya websaite ahu eni: “O Que a Bíblia Realmente Ensina?”, enrowa aya wookhaliheryani olipiha sookupali sanyu.

⁷ Omusoma Biibiliya oratteene onimookhaliheryani waakhula makoho anyu ni olipiha sookupali sanyu. (Mit. 17:11) Nookhalana iliivuru sinceene sinrowa wookhaliheryani opaka eyo. Anceene annoona oreerela othokorerya ebroxura A Origem da Vida—Cinco Perguntas Que Merecem Respostas ni eliivuru Existe um Criador Que Se Importa com Você? Amiravo akina annisiveliwa ni annittottela mureerelo mpantta oniphwanyaneya websaite ahu jw.org, oni “O Que a Bíblia Realmente Ensina?” Mphavelase opuro oni ENSINOS BÍBLICOS. Khula mwaha wa epantte ela, epakeliwe wookhaliheryani olipiha okupali wanyu mwaha wa mBiibiliyani onithokorerya anyu.

⁸ Okhala wira munnimusoma Biibiliya, nyuwo munnisuwela waakhula makoho kamosa-kamosa anikumiheriwa epantte eyo. Masi niireke munnisuwela tthiri nthowa naya onaakhuliwa aya siiso? Epantte ela ya websaite ahu enimookhaliheryani wuupuwelela soolepa sinceene, nto khiyalepa muupuwelo anyu voohimya sa soolepa iyo. Nave  pooti wookhaliheryani ompaka palano moota munrowa anyu waatthokiherya akina sookupali sanyu. Epantte ela eniphwanyaneya websaite ahu eni “O Que a Bíblia Realmente Ensina?” ennaakhaliherya amiravo anceene olipiha sookupali saya. Vaaweryaneyaka, murumeele mpantta ola okathi onimusoma anyu Biibiliya mekhinyu.

⁹ Olipiherya itthu sinikupali anyu, enamuna emosa enooniherya wira munniphavela obatiziwa. Murokora mmosa mwali aahimmye so: “Kihinatthi olakela obatiziwa, kaahimusoma Biibiliya khuweha wira ela etiini yekeekhai. Nto khula nihiku ninvira, yookupali eyo enootepa wunnuwa”.

10. Nthowa xeeni Kristau oobatiziwa onitthuneya awe okhalana miteko sinooniherya waamini wawe?

¹⁰ Biibiliya onihimya so: “Wamini, wahikhalane miteko sorera ohòkhwa”. (Yak. 2:17) Akhala wira sookupali sanyu ti soolipa, muhaana wooniherya ni miteko. Miteko xeeni? Biibiliya onihimya wira sihaana okhala miteko ‘sowarya ni somwiwelela Muluku’.​—Mmusome 2 Pedru 3:11.

11. Mutthokiherye nuulumo noowi ‘mwettelo wowarya’.

¹¹ Wira mutthu ooniherye miteko ‘sowarya’, ohaana okhalana mweettelo wooloka. Mweettelo anyu ori sai? Mwa ntakiheryo, muupuwele myeeri 6 sivinre. Niireke ‘muhalimaleliha ankhili anyu’, khiyasuwela ohiyaniha etthu yooloka ni yoohiloka? (aHéb. 5:14) Niireke munnuupuwela ekwaha emosa mwaakhoottale anyu yooweeha wala okhanyereriwa ni apatthani? Niireke mweettelo anyu oxikola onnivarihana ni waamini wanyu? Niireke munnaakiherya waamini wanyu, wala munaatakiha anaxikola akhwiinyu wira muhiveehiweke? (1 Ped. 4:3, 4) Okhala wene hiyo naatthu oohimalela. Hata arumeyi a Yehova animurumeela okhuma khalai, ikwaha sikina annoovelela waakiherya waamini waya vari atthu. Masi, mutthu iivaherenrye wa Yehova khonuuleliwa muru okhala Namoona a Yehova, nave mweettelo awe onnooniherya eyo.

12. Sinitaphulela exeeni miteko ‘somwiwelela Muluku’, nto nyuwo munoonela sai?

¹² Sinitaphulela exeeni miteko ‘somwiwelela Muluku’? Sinihela muhina miteko sinivara anyu mmulokoni, ntoko ohicompela mithukumano ni muteko woolaleerya. Onnihela-tho muhina ovara miteko seiyo sihiniwehiwa ni atthu akina ntoko mavekelo anyu ni omusoma Biibiliya. Mutthu iivaherenrye wa Yehova khoninyoonyeriwa miteko iyo. Khula okathi onrowa okhalanaka moonelo ntoko wa Mwene Davidi, yoowo aalempe so: “Muluku aka! Wira otthuna wanyu t’unkisivela. Kinnettela ikano sanyu ni murim’aka wothene”.​—Esal. 40:9.

13, 14. Itthu xeeni sinrowa wookhaliheryani ovara miteko ‘sowarya ni somwiwelela Muluku’, nto amiravo akina attottenle sai mureerelo itthu iyo?

¹³ Wira mukhaliheriwe okhalana soolukama, yookhala epantte ya eliivuru Os Jovens Perguntam—Respostas Práticas, Volume 2 epaaxina 308 ni 309. Epantte ela ennookhaliheryani olepa waakhuliwa makoho ntoko ala: “Mavekelo anyu tooluluwanya, ni annooniherya wira munnimphenta Yehova?” “Exeeni enithokorerya anyu okathi munimusoma anyu Biibiliya?” “Niireke munnirowa olaleerya hata anamuyari anyu ahirowaka?” Epantte eyo, yookhalana opuro woolepa itthu siniphavela anyu olokiherya voohimya sa mavekelo anyu, yoosoma anyu ni muteko woolaleerya.

¹⁴ Amiravo anceene anuupuwela obatiziwa, annoona wira epantte ela ennikhaliherya vanceene. Murokora mmosa mwali oniitthaniwa Tilda onihimya so: “Kaahirumeela mpantta owo wira kilepeke soolukama saka. Vakhaani-vakhaani  kaahiwerya ophwanya soolukama iyo, nto nuuvira mwaakha mmosa kaahilikana wira kibatiziwe”. Munna mmosa mmiravo oniitthaniwa Patrick, aahittottela mureerelo epantte eyo. Owo onihimya so: “Kaanisuwela soolukama saka, masi olepa soolukama iyo waahikikhaliherya wiimananiha vanceene wira kiphwanye”.

15. Mutthokiherye nthowa naya vahinreerela aya okhanyereriwa obatiziwa.

¹⁵ Nikoho nimosa nipakiwe epantte eyo ya eliivuru nnihimya so: “Niireke mwanvikaniha omurumeela Yehova hata anamuyari wala apatthani anyu ahiyale ene?” Muupuweleke wira ntoko muKristau owiivahererya ni oobatiziwa, nyuwo mmensinyu munrowa waakhula ohoolo wa Yehova. Nto muteko oninvarela anyu Yehova khonlipa ni atthu akina nnakhala anamuyari anyu. Miteko ni mweettelo anyu wooloka, sinooniherya wira moovarexexa ekeekhai, ni wira munniimananiha wira mbatiziwe.

16, 17. (a) Exeeni enirowa omutumererya mutthu okhala muKristau? (b) Muhimye nlikanyiho nnooniherya oxukhuru.

¹⁶ Mulopwana mmosa aasuwela oratteene Nlamulo na Moise, aahimukoha Yesu oriki: “Mwa soruma sothene yulupalexa pivi?” Yesu aahimwaakhula wira: “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene”. (Math. 22:35-37) Nto Yesu aahooniherya etthu enimwiiriha mutthu okhalana miteko sooloka ni ophavela obatiziwa, eyo piiyo, omphenta Yehova ni murima wotheene. Enamuna emosa ya wunnuuherya omphenta wanyu Yehova, ori wuupuwelela yoovaha yuulupale ya Muluku, eyo piiyo, mukuttho wowoopola wa Mwanawe. (Mmusome 2 aKorinto 5:14, 15; 1 Yohani 4:9, 19.) Wuupuwelela yoovaha eyo onoowiirihani ophavela wooniherya oxukhuru wanyu.

¹⁷ Oxukhurela wanyu yoovaha pooti olikanyihiwaka so: Muupuwele vaakhanle wira mutthu mmosa oowoopolani okathi mwaasama anyu mmaasini. Niireke nuumala okumihiwa, mwaarowa owaani munaliyala etthu yiireliwe anyu? Nnaari! Mwamphavela opaka etthu wira mmuxukhurele ole owooponleni, maana mutthu owo ohoopola okumi anyu. Hiyo nohaana omuxukhurela vanceene Yehova ni Yesu Kristu. Wahaakhanle mukuttho wa Yesu, otheene ahu naamusama mutampini ni mookhwaani. Mwaha wa oniphenta wawe, khunivaha yowoopola, vano nookhalana eparakha  ya okhalana okumi ohinimala mparayiisu valaponi!

18, 19. (a) Xeeni vahinireerela aya woova omurumeela Yehova? (b) Omurumeela Yehova onikumiherya mireerelo xeeni?

¹⁸ Niireke munnixukhurela ele Yehova oniwiirelaweni? Vakhala ti siiso, weeso vannireerela ovahererya okumi anyu ni obatiziwa. Muupuweleke wira wiivahererya wa Yehova onitaphulela ommanela natiri wira munrowa omurumeelaka okumi anyu wotheene, okathi wooxankiha ni wooreerela. Niireke muhaana woovelela ommana natiri owo? Nnaari! Muhiliyaleke wira Yehova oniphavela mureerelo anyu, nave owo “onnatthuvela ale animphavela”. (aHéb. 11:6) Wiivahererya wa Yehova ni obatiziwa khonihonona okumi anyu, masi onnikumiherya mireerelo. Munna mmosa vano orina iyaakha 24, yoowo obatiziwe ohinatthi ophiyeriha iyaakha 13, onihimya so: “Woonasa wene kaarowa wiiwexexa itthu oratteene vaakhanle wira kibatiziwe kinnuwale ene, masi wiivahererya kiryeene mmiravo wookikhaliherya ohiphavela itthu sa mulaponi”.

¹⁹ Yehova toovirikana ni Satana, maana Satana nanrima! Satana khonaavaha etthu yoosuwanyeya ale animutthara. Tthiri khivaniweryaneya woovahani etthu ehirina awe. Owo mwaneene khorina ihapari sooreera ni khorina nlipelelo. Etthu Satana eniwerya awe woovahani khelonke, maana ti yeeyo yena onilipelela awe, eyo piiyo, opwetexiwa!​—Wis. 20:10.

20. Mmiravo opakeke exeeni wira olikanele wiivahererya wa Yehova ni obatiziwa? (Nwehe ekaaxa eni: “ Wira Mukhaliheriwe Wunnuwa Momunepani”.)

²⁰ Tthiri, wiivahererya wa Yehova ti etthu yooreerela opaka. Niireke moolikana wira mwiivahererye wa Yehova? Akhala wira ti siiso, weeso muhoovelele. Masi akhala wira nlelo munniphavela olipelela vakhaani, murumeele malakiheryo avahiwe mwaha ola wira mphwanye yoolukama anyu. Paulo aahaalepela maKristau a oFilipi, oriki: “Etthu p’itthu enkhumelela, vavo vaphiyalyahu, nivikaneke nettaka ephiro emosaru”. (aFil. 3:16) Mwatthara miruku iya, moohipisa munoophavela ovahererya okumi anyu wa Yehova ni obatiziwa.