1, 2. (a) Etthu xeeni enaahakalaliha arumeyi a Muluku olelo-va? (b) Anamuyari maKristau ni axitokweene, anrowa waakhaliherya sai amiravo osuwela ele enitaphulela aya obatiziwa?

MUTOKWEENE mmosa a mmulokoni aahimuleela mmiravo mmosa muKristau a iyaakha 12, oniihaniwa Christopher wira: “Kinnoosuwelani okhuma enamwane anyu, ni kinnihakalala osuwela wira muniphavela obatiziwa. Masi kaaphavela wookohani etthu emosa: ‘Exeeni eniwiirihani ophavela opaka eyo?’” Nikoho nle naari nootthuneya. Tthiri ninnihakalala waaweha khula mwaakha, amiravo anceene abatiziwaka olumwenku wotheene. (Mus. 12:1) Masi anamuyari ni axitokweene anniphavela osuwelexa akhala wira amiravo awo athanlale mmensaya wala annisuwela ele enitaphulela aya obatiziwa.

 ² Nuulumo na Muluku ninnooniherya wira wiivahererya ni obatiziwa, ti mavalo oopacerya wira mutthu okhale muKristau, nto okhuma vaavo, mutthu owo onnipacerya waakhela mareeliho manceene a Yehova ni olupatthiwa ni Satana. (Mir. 10:22; 1 Ped. 5:8) Tivonto, maKristau arina anamwane anniwiixuttiha anaaya osuwela saana ele enitaphulela aya okhala mwiixutti a Kristu. Ale ahirina anamuyari maKristau, nto axitokweene a mmulokoni anrowa waakhaliheryaka wira yiiwexexe ele enitaphulela aya wiivahererya ni obatiziwa. (Mmusome Luka 14:27-30.) Ntoko sisaale vanitthuneya aya wiilokiherya wira mutthu oteke empa, nave-tho vanitthuneya wiilokiherya wira mutthu owerye omurumeela Yehova moororomeleya mpakha “womaliheryani”. (Math. 24:13) Masi exeeni enirowa waakhaliherya amiravo owerya omurumeela Yehova okumi aya wotheene? Nrowe niwehe.

3. (a) Moolumo a Yesu ni Pedru anooniherya sai wira obatizo etthu yootthuneya? (Math. 28:19, 20; 1 Ped. 3:21) (b) Makoho xeeni anirowa ahu othokorerya, ni nthowa xeeni?

³ Niireke nyuwo mwa mmiravo onuupuwelela obatiziwa? Akhala wira ti siiso, ninnoottottopelani! Eparakha yuulupale mutthu obatiziwa ntoko Namoona a Yehova. Ohiya vo, maKristau otheene ahaana obatiziwa, maana eyo etthu emosa enivekeliwa wira mutthu oopowe? (Math. 28:19, 20; 1 Ped. 3:21) Okhala wira moolakela omurumeela Yehova ni murima anyu wotheene, nto muhaana wiilokiherya oratteene muhinatthi obatiziwa. Vaamureerela othokorerya makoho mararu, wira moone mwaalikanne ene wira mbatiziwe. Makoho awo taala: (1) Tthiri koolikana wira kibatiziwe? (2) Kiireke kinniphavela tthiri? (3) Kinnisuwela ele enitaphulela aya wiivahererya wa Yehova? Nrowe nithokorerye makoho awo.

4, 5. (a) Xeeni obatizo ohikhanle aya wa atthu aalupale paahi? (b) Onitaphulela exeeni muKristau wunnuwa momunepani?

⁴ Biibiliya khonihimya wira aniphwanela obatiziwa ti yaale yinnuwale wala arina iyaakha sinireerela obatiziwa. Miruku 20:11, ninsoma so: “Mwanamwane onsuwanyeya ni sowira  sawe, mwettelo awe wakhalá worera ni wa xariya”. Hata mwaana pooti osuwela etthu eri yooloka ni osuwela ele enitaphulela aya wiivahererya wa Mpattuxa awe. Tivonto, mmiravo onooniherya wira ohinnuwa momunepani ni iivaherenrye wa Yehova, onnoona wira obatizo etthu yootthuneya.​—Mir. 20:7.

⁵ Onitaphulela exeeni wunnuwa momunepani? Khonitaphulela wunnuwa erutthu paahi. Biibiliya onihimya wira atthu oowunnuwa momunepani “ahalimaleliha ankhili aya osuwela n’uthanla sorera ni sotakhala”. (aHéb. 5:14) Nto, atthu oowunnuwa momunepani annisuwela ele Yehova enoona awe okhala yooloka, ni annilakela ovara yeeyo ni murima wotheene. Tivonto, khanaakuva ohapuxiwa wira apakeke itthu soohiloka; hata khanimakela otumereriwa opaka itthu sooloka. Atthu annilipelela wira mmiravo oniphavela obatiziwa ohaana wiiwelela malamulo a Muluku, hata anamuyari awe wala atthu akina ahikhanle vakhiviru.​—Mulikanyihe ni aFilipi 2:12.

6, 7. (a) Muhimye mixankiho Daniyeli aarina awe oBabilonia. (b) Daniyeli oonihenrye sai wunnuwa momunepani?

⁶ Niireke mmiravo onoowerya wooniherya wunnuwa momunepani moota owo? Nrowe nithokorerye ntakiheryo na mBiibiliyani voohimya sa Daniyeli. Woonasa wene aari mmiravo okathi aakuxiwe awe arowaniwaka weepotthani oBabilonia. Mootutuxerya, Daniyeli aahipacerya okhala ni atthu yahiiwelela malamulo a Yehova. Etthu ekina yaamwiiranenle Daniyeli tiila: owo aahipacerya othokoreriwa ntoko mutthu a vameekhaawe. Owo aari egrupu ya amiravo vakhaani yaathanleliwe wira amurumeeleke mwene! (Dan. 1:3-5, 13) Woonasa wene, Daniyeli aahikhalana iparakha sinceene oBabilonia seiyo sahaawerya awe okhalana wIsarayeli.

⁷ Daniyeli oonela sai itthu iyo? Niireke aahikuxeya murima mwaha woothaaciri ni mihakhu sa oBabilonia? Niireke aaheemererya wira makhalelo a elapo ele ahonone omutthu awe wooloka ni waamini wawe? Nnaari! Biibiliya onihimya wira oBabilonia, Daniyeli “khatthunne orava mwikho mwaha wa yolya ni w’evinyu ya mwené”, eyo piiyo, aahisyaka khula etthu yaavarihana ni okokhorela woohiloka. (Dan. 1:8) Tthiri Daniyeli aahooniherya wunnuwa momunepani!

8. Nniixutta exeeni ni ntakiheryo na Daniyeli?

⁸ Nniixutta exeeni ni ntakiheryo na Daniyeli? Nniixutta wira mmiravo oowunnuwa momunepani, onnivarexexa ele enikupali awe, hata okathi wooxankiha. Owo khonikhala ntoko namanriya, yoole onituruka ekoore moovarihana ni opuro oryaawe. Khonikhala ntoko mpatthani a Muluku omuthukumanoni, masi khiyakhala mpatthani a mulaponi oxikola. Ohiya omakela okuxeya, owo onnivikaniha ororomeleya hata okathi wa mixankiho.​—Mmusome aÉfeso 4:14, 15.

9, 10. (a) Wuupuwelela etthu yaapanke awe okathi eehereriwa awe, onrowa omukhaliherya sai mmiravo? (b) Onitaphulela exeeni obatiziwa?

⁹ Ekeekhai wira khuuvo omalenle; amiravo ni atthu aalupale ikwaha sikina annivonya. (Mus. 7:20) Hata vari siiso, akhala wira munnuupuwelela obatiziwa, vaamuloka wiivarerya wira nwehe etthu enrowa anyu opaka wira nvikanihe weettela malamulo a Yehova. Mwaarowa ovarerya sai? Mwiikoheke so: ‘Kiireke kinnimwiiwelela Muluku okhuma khalai’? Muupuwelele etthu yaapanke anyu okathi mweehereriwa anyu. Niireke mwaahiwerya othanla etthu yooloka? Ntoko Daniyeli, niireke atthu a mulaponi annootumereryani orumeela osuwela wanyu wira mukhaliherye olumwenku ola wa Satana?  Niireke munniwerya “osuwela sintthunawe Muluku” hata mweehereriwaka opaka etthu yoovirikana ni ele enitthuna Muluku?​—aÉf. 5:17.

¹⁰ Xeeni vanireerela aya waakhula makoho ala? Waakhuliwa iwo, onoomukhaliherya ole oniphavela obatiziwa, osuwela wira eyo etthu yootepa otthuneya. Ntoko sithokorenrye ahu, obatiziwa ethoonyeryo yoowi moovahererya okumi anyu wa Yehova. Moomuleiherya ni murima wotheene, omphenta ni omurumeela okumi anyu wotheene. (Mar. 12:30) Otheene yaale anibatiziwa, aahaana olakela ovara ele aleihenrye aya.​—Mmusome Musuweli 5:3, 4.

11, 12. (a) Mutthu onuupuwelela obatiziwa ohaana osuwelexa exeeni? (b) Exeeni enrowa wookhaliheryani okhalana moonelo wooloka voohimya sa obatizo?

¹¹ Biibiliya onihimya wira arumeyi otheene a Yehova, waahela muhina amiravo, anrowa wiivahereryaka “votthuna waya”, wira amurumeeleke Yehova. (Esal. 110:3) Nto mutthu onuupuwelela obatiziwa, ohaana osuwela tthiri wira eyo ti etthu mwaneene eniphavela awe. Eyo enooniherya wira mutthu ohaana wiitokosa. Mwaha wa xeeni? Ntoko mmiravo, woonasa wene makhalelo anyu ta vameekhaaya, vanceenexa akhala wira muhuuwale etthoko ya Anamoona a Yehova.

¹² Nuuvira okathi, woonasa wene munnaaweha atthu anceene abatiziwaka, waahela muhina apatthani anyu wala axihima anyu aahiiso axuulupale anyu. Vakhala wira ti siiso, muhaana okhalana ephoole. Maana pooti opaceryaka wuupuwela wira okhala wira moophiyeriha iyaakha wala atthu otheene anoomala obatiziwa, ni nyuwo-tho muhaana obatiziwa. Exeeni ekhanle anyu oopaka wira mukhalane moonelo mmosaru wa Yehova voohimya sa obatizo? Okathi ti okathi, muupuweleleke nthowa naya obatizo oryaaya wootthuneya. Mwaha ola, ni onittharelana, munoophwanya mathowa manceene.

13. Munrowa osuwela sai akhala wira yoolakela anyu ya obatiziwa enikhuma vamurimani?

¹³ Sookhala inamuna sinceene sinikhaliherya osuwela akhala wira yoolakela anyu ya obatiziwa enikhuma vamurimani. Mwa ntakiheryo, eyo enimooneya okathi munivekela anyu. Mavekelo anyu ooluluwanya, pooti wooniherya wira muhaataana ni Yehova wala nnaari. (Esal. 25:4) Yehova onnaakhula mavekelo ahu omurumeelaka Biibiliya. Tivonto wiimananiha wahu omusoma Biibiliya, onnooniherya wira ninniphavela tthiri wataana ni Yehova ni omurumeela ni murima wotheene. (Yox. 1:8) Nto mwiikoheke so: ‘Mavekelo aka tooluluwanya? Kiireke nkinicompela yoosoma aka ya Biibiliya?’ Nto akhala wira emusi anyu yookhalana eprograma ya Omulompa Muluku Vatthokoni, mwiikoheke so: ‘Kinnisiveliwa wiirela mpantta eprograma eyo?’ Waakhula wanyu makoho ala, onimookhaliheryani oweha akhala wira yoolakela anyu ya obatiziwa enikhuma vamurimani.

14. Muhimye ovirikana okhanle wiivahererya ni obatiziwa.

¹⁴ Akina pooti ohisuwela ovirikana okhanle eriyari ya wiivahererya ni obatiziwa. Mwa ntakiheryo, amiravo akina annihimya wira ahiivahererya wa Yehova, masi nlelo khalikanne wira abatiziwe. Niireke eyo enniweryaneya? Wiivahererya wa Yehova onitaphulela omuleela yena wira nimphavela omurumeelaka okumi ahu wotheene. Nihiku mutthu onibatiziwa awe, oniwooniherya  atthu otheene wira ohiivahererya wa Yehova. Tivonto muhinatthi obatiziwa, muhaana osuwelexa enitaphulela aya wiivahererya.

15. Wiivahererya onitaphulela exeeni?

¹⁵ Ohimya mookwasa, vaavo muniivahererya anyu wa Yehova, nyuwo munimwiikhootta. Nyuwo munimuleiherya Yehova wira etthu yootepexa otthuneya mookumini mwanyu, ti omurumeela Yehova. (Mmusome Matheyo 16:24.) Yooleiherya eyo, etthu yuulupale! (Math. 5:33) Ninrowa wooniherya sai wira nihiikhootta ni wira Yehova tori mwaneene okumi ahu vano?​—aRom. 14:8.

16, 17. (a) Wiikhootta onitaphulela exeeni? Nvahe ntakiheryo. (b) Mutthu oniivahererya wa Yehova onileiherya opaka exeeni?

¹⁶ Mwa ntakiheryo, nkahaya muupuwele vaakhanle wira mpatthani anyu ohoovahani ekaaro. Onnoovahereryani idukumento sa kaaro, khwiira: “Vano ekaaro ti yawinyu”. Nuumala-vo, onoohimeeryani so: “Masi miyo kinoohalana ixaavi. Ti miyo kinrowa weettihaka ekaaro ela, ohiya nyuwo”. Nto mwaarowa woonela sai “yoovaha” eyo? Mwaarowa omoonela sai mpatthani anyu owo?

¹⁷ Vaavo mutthu oniivahererya awe wa Yehova mutthu owo onimuleela Muluku wira: “Kinnoovahani okumi aka. Miyo kaawinyu”. Yehova onilipelela wira mutthu owo ohaana ovara ele oleihenrye awe. Nto vaarowa okhala sai vaakhanle wira mutthu owo onnihiya omwiiwelela Yehova nto khiyamuurya mutthu ohikhanle Namoona a Yehova? Vaarowa okhala sai vaakhanle wira mutthu owo onneemererya muteko ohinimukhaliherya orowa olaleerya ni orowela mithukumano sotheene? Tthiri vaarowa olikanaka ni mpatthani ahaavaherenrye ixaavi sa kaaro. Mutthu oniivahererya wa Yehova, onimuleela Yehova wira: “Okumi aka ti wawinyu, ohiya wawaka. Akhala wira yootthuna anyu ennivirikana ni yootthuna aka, nto kihaana opaka yootthuna anyu okathi wotheene”. Opaka eyo, ninrowa omutakihaka Yesu yoowo aahimmye so: “Miyo nkikhurunwe wirimu wira kìreke otthuna waka: kikhuruwenlé wira kìreke otthuna wawe Ole okirumme”.​—Yoh. 6:38.

18, 19. (a) Moolumo a Rose ni Christopher anooniherya sai wira obatizo onnikumiherya mareeliho? (b) Munoonela sai eparakha ya obatiziwa?

¹⁸ Tthiri obatizo etthu yuulupale, khahiyo etthu yoothweeliha. Hata vari siiso, eyo eparakha yuulupale wiivahererya ni obatiziwa. Amiravo animphenta Yehova, ni anisuwela ele enitaphulela aya obatiziwa, khanoovelela wiivahererya wa Yehova ni obatiziwa. Hata khanithanana mwaha wa yoothanla epanke aya. Mwali mmosa oobatiziwa oniitthaniwa Rose, onihimya so: “Kinnimphenta Yehova vanceene, khiivo etthu yaarowa okihakalaliha ohiya owo. Okathi kaalakenle aka obatiziwa, nkaahoverya akhala wira yaari yoothanla yooloka yaapanke aka”.

¹⁹ Etthu xeeni ehimmye awe Christopher, yoowo oromoliwe wanipacerya wa mwaha ola? Vano onoonela sai yoothanla yaapanke awe orineene iyaakha 12? Okhala wene owo onnihakalala mwaha wa yoothanla yaapanke awe. Aahipacerya orumeela ntoko pioneero ookilaatheya orineene iyaakha 17, ni aahithanliwa okhala murummwa oorumeela nuumala wiiriha iyaakha 18. Vano onirumeela oBetheli. Owo onihimya so: “Obatiziwa, yaari yoothanla yooloka. Kinnihakalala vanceene muteko kininvarela aka Yehova ni otthokeya wawe”. Akhala wira munuupuwela obatiziwa, nto munrowa wiilokiherya sai? Mwaha onittharelana, ninrowa waakhula nikoho nla.