1. Okhuma woopaceryani, miteko sa Muluku sinooniherya exeeni?

OKHUMA woopaceryani, Yehova ni Yesu toowiiraana. Biibiliya onihimya wira oryeene wiirimu, ohinatthi orwa elapo ya vathi, Yesu ‘ari ni Yehova onvarelaka miteko iye sothene: animusiveliha nihiku ti nihiku’. (Mir. 8:30) Yehova ni Mwanawe yaanivara muteko mowiiraana, okathi yaapattuxa aya itthu sotheene sinoona ahu. Arumeyi a Muluku anniiwanana miteko saya sotheene aninvarela aya Muluku. Mwa ntakiheryo, ninnoona eyo okathi Nowe aarummwale awe oteka ekalawa; nave okathi yoole aIsarayeli yeemexa aya, okwanyula ni othaamiha etabernaakulu. Mpaani mwa Muluku, atthu yaaniipa isipo ni woopa ikaruma sa masipo, anvuwihaka Yehova. Miteko sotheene iya, sahaana ovariwa mowiiraana.​—Maph. 6:14-16, 22; Moth. 4:4-32; 1 Wah. 25:1-8.

2. (a) Etthu xeeni yooreera yiiraneya muloko wa maKristau eseekulu yoopacerya? (b) Makoho xeeni anirowa ahu othokorerya mwaha ola?

² MaKristau a eseekulu yoopacerya yaanivara muteko mowiiraana, ahooleliwaka ni Yesu Kristu. Murummwa Paulo  aahitthokiherya wira nnaamwi yaarina miteko ni iparakha soovirikana, otheene aya yaari “erutthu emosá pahi”. (Mmusome 1 aKorinto 12:4-6, 12.) Vano, ninrowa wooniherya sai wiiraana okathi onilaleerya ahu ihapari sooreera olelo-va? Ankhi mmulokoni ni vatthokoni vahu?

3. Etthu xeeni murummwa Yohani ooniheriwe awe?

³ Waattamela wanikisa wa eseekulu yoopacerya EC, murummwa Yohani aahooniheriwa moolohani, malaikha 7, yaawo yoopa malope. Okathi nlaikha na neethanu noopale aya nlope, Yohani aahiweha “etheneri” emorelaka vathi. Etheneeri eyo yaahikhalana muhulelo mmatatani wira yahule mukhora wa nlitti nowiixa ni nooriipela. Mulittini mmo waahikhuma mwiixi wooriipa ni nasope. Nto nasope ole khaahononne malaxi wala ipyo, masi, onaatuphela ‘atthu yale pahi ahitthittiwe vayuji nlepa na Muluku”. (Wis. 9:1-4) Yohani aanisuwela wira nasope aaniwerya ohonona itthu sinceene, maana okathi wa Moise, nasope aahikumiherya ehasara yuulupale wEjiitu. (Okhum. 10:12-15) Nasope Yohani anwehale awe onithoonyerya maKristau oowoottihiwa, yaawo anilaleya ihapari soophukela sa Yehova. Vano annikhaliheriwa ni atthu anceene arina nlipelelo na okhala mparayiisu valaponi. Tthiri muteko owo onivariwa mowiiraana, onnaakhaliherya atthu anceene okhuma etiini yoowoka ni otaphuwa mmatatani mwa Satana!

4. Muteko xeeni arumeyi a Muluku arina aya, nto anrowa owerya sai muteko owo?

⁴ Arumeyi a Yehova ahaana olaleya ‘ihapari sorera’, olumwenku ola wa Satana ohinatthi omala. (Math. 24:14; 28:19, 20) Muteko owo onihela muhina omulattula khuta mutthu ‘ovoliwe ntthona’ wira awurye “màsi èkumi” mahala. (Wis. 22:17) Masi ninrowa owerya sai opaka eyo? Vanooweryaneya akhala wira ninrowa ovaraka muteko owo mowiiraana ntoko ipantte “s’erutthu sikhomanyiwe ni silutteleliwe orattene”.​—aÉf. 4:16.

5, 6. Nniiraana sai okathi onilaleya ahu ihapari sooreera?

⁵ Wira niwerye waalaleerya atthu anceene ihapari sooreera sa Omwene, nohaana wiiraana. Tivonto ninvahiwa ahu malakiheryo. Malakiheryo awo anivahiwa miloko sotheene, anninikhaliherya ovara mowiiraana. Nuumala othukumana wira nalaleerye, nto ninnirowa olaleya ihapari sooreera sa Omwene. Nave-tho ninnikawa iliivuru sinceene sinimutthokiherya Biibiliya. Niireke munniimananiha otthara malakiheryo, okathi onilattuliwa ahu wiirela mpantta ikampaanya sa vameekhaaya? Opaka eyo, ninnivara muteko mowiiraana ni annihu olumwenku wotheene, nave-tho ninnivara vamosa ni malaikha, yaawo aniromoliwa eliivuru ya Wisupulula 14:6.

⁶ Ninnihakalala vanceene naamusomaka Anuário, yoowo onihimya sookhumelela sa muteko ahu woolaleerya ilapo sotheene. Nkahaya muupuwele moota oniiraana ahu, okathi onaalattula ahu atthu waarowela akongresu ahu. Mapuro awo, otheene ahu ninniwiriyana myaha soolipiha sinikhuma mBiibiliyani, ninniweha ni owiriyana idrama ni sowooniherya. Ikwaha sinceene, ipantte iyo sinnitumererya wira nimurumeeleke Muluku ni murima wotheene. Niira na Wuupuwelela Okhwa wa Yesu ninninikhaliherya wiiraana. Khula mwaakha ninnithukumana nihiku 14 a Nisani, nuumala nsuwa okela,  wira nooniherye omuxukhuru wahu Yehova mwaha wa yoovaha awe, ni wira nimwiiwelele Yesu. (1 aKor. 11:23-26) Atthu otheene annilattuliwa orowela Niira nla. Isumana vakhaani nihinatthi ophiya Niira nlo, ninniimananiha waalattula atthu otheene a muttetthe ahu wira arweele niira nlo nootthuneya.

7. Exeeni eniweryaneya opaka, naavaraka muteko mowiiraana?

⁷ Esoope emosa kheniwerya ohonona itthu sinceene. Vamosaru, hiyo mekhihu-ru khaninwerya waalaleerya atthu anceene. Masi ovara muteko mowiiraana onninikhaliherya owiixuttiha atthu anceene omusuwela Yehova ni waakhaliherya akina onvuwiha yena. Masi yookhala etthu ekina enaakhaliherya arumeyi a Muluku wiiraana.

8, 9. (a) Paulo aarumenle ntakiheryo xeeni wira owiixuttihe maKristau okhala oowiiraana? (b) Ninrowa owerya sai wiiwanana mmulokoni?

⁸ Epaphelo Paulo aalepenle awe maKristau aEefeso, aahihimya moota muloko onitthokiheya aya ni aahaatumererya ‘wunnuwa mwa inamuna sothene’. (Mmusome aÉfeso 4:15, 16.) Exeeni enirowa omukhaliherya khula mmosa a hiyo ophiya vaavo? Paulo aahirumeela nlikanyiho na erutthu, ophavelaka otthokiherya wira khula muKristau pooti okhaliherya wiiraana mmulokoni, nimuttharaka muhooleli a muloko, Yesu Kristu. Owo onnilavula sa ovara muteko mowiiraana, sisaale ntoko mapuro ‘anikhomanyiha’ ipantte sa erutthu ahu. Khula mmosa a hiyo, akhale amiravo, atthu atokweene, atthu aniwerya naale ahiniiwerya-werya, ninrowa okhaliherya sai muloko okhala wowiiraana?

⁹ Wira nisyake ohonona murettele mmulokoni, nihaana owiiwelela ni waattittimiha ale Yesu aathanlale awe wira ahooleleke muloko. (aHéb. 13:7, 17) Ikwaha sikina pooti ohikhweya opaka eyo. Masi, pooti ovekela nikhaliheryo na Muluku. Munepa awe wootteela onoowerya onikhaliherya wiiwelela ni murima wotheene malakiheryo anivahiwa ahu mmulokoni. Nto ikwaha seiyo sinoona ahu wira vannivila otthara malakiheryo, nohaana wuupuwelaka wira wiiwelela ni murima wotheene onookhaliherya wiiraana mmulokoni. Ohiya vo, wiiwanana moota owo onoolipiha ophentana wahu.

10. Arummwa oorumeela anikhaliherya sai muloko wiiraana? (Nwehe elatarato yoopacerya.)

¹⁰ Arummwa oorumeela annikhaliherya vanceene wira muloko wiiraaneke. Anna awo, amiravo ni oowunnuwa, annikhaliherya vanceene miteko sinikumiherya mireerelo muloko wotheene. Mwa ntakiheryo, awo annaakhaliherya axitokweene miteko ntoko othokorerya iliivuru sinrowa okaiwaka muteko woolaleerya. Nave-tho, annikhaliherya orattela ni olokiha Empa ya Omwene, ni anniwaakhela atthu anirwa omuthukumanoni. Vaavo vanivara ahu moowiirana ni anna ala, ninnikhaliherya wira muloko weetteke saana.​—Mulikanyihe ni Miteko 6:3-6.

11. Exeeni amiravo ekhanle aya oopaka wira akhaliherye muloko wiiraana?

¹¹ Anna anceene oolipa omunepani aakhalana miritti mmulokoni mwa iyaakha sinceene. Mwaha wa wuuluvala, vano pooti ohiwerya okhapelela miritti saya, tivonto annoona otthuneya waya atthu akina wira avikaniheke ovara miteko iyo. Nto amiravo pooti waakhaliherya. Nnaamwi nlelo ahirina sookumanana sinceene, amiravo awo anoowerya okuxa miritti suulupale, yakhaliheriwa vale. Tivonto varyaaya vooreerela arummwa oorumeela ophavela ophwanelela wira akhale axitokweene. (1 Tim. 3:1, 10)  Anna akina yaari axitokweene nlelo aryeene amiravo, anniimananiha vanceene mpakha ophwanelela okhala axitokweene a esirkwitu, yaawo vano anaalipiha anna ni arokora miloko sinci anixukurya aya. Tthiri ninnaaxukhurela amiravo mmulokoni mwahu anikhaliherya ni murima wotheene.​—Musome Esalimo 110:3; Musuweli 12:1.

12, 13. Exeeni enrowa okhaliherya etthoko wiiraana?

¹² Ninrowa okhaliherya sai itthoko sahu wiiraana? Imusi sinceene sinnoona wira okhalana eprograma yootthokihiwa saana ya Omulompa Muluku Vatthokoni khula esumana, onnikhaliherya olipiha ophentana ni wiiraana wa etthoko. Okathi owo, etthoko yotheene ennithokorerya itthu somunepani, nto iyo sinnikhaliherya emusi. Olokiherya inamuna saya sa olaleerya, onnikhaliherya okhumela saana mmuteko woolaleerya. Vaavo vaninwiriyana aya khula mmosa ohimyaka itthu sa mBiibiliyani sinimusivela, ni oweha wira otheene aya annimphenta Yehova, eyo enimwiiriha etthoko yotheene wiiraana.

¹³ Yehova oniphavela wira mulopwana ni mwaarawe yiiwananeke ni yiiraaneke. Akhala wira oowanli aya annimphenta Yehova, awo anoohakalala ni wiiraana vatthokoni vaya. Anamathelana ahaana wooniheryana ophentana waya, ntoko yiira aya Abrahamu ni Sara, Isakhi ni Rebeka, Elikana ni Hanna. (Maph. 26:8; 1 Sam. 1:5, 8; 1 Ped. 3:5, 6) Wira siiso, ninrowa wiiraana ni ole othelanne ahu, ni ninrowa otepaka wiiraana ni Yehova.​—Mmusome Musuweli 4:12.

14. Akhala wira ole othelanne anyu khonimurumeela Yehova, exeeni enrowa anyu opaka wira mulipihe etthoko anyu?

¹⁴ MaKristau eekeekhai ahaana osyaka othelana ni mutthu ohinimurumeela Yehova. (2 aKor. 6:14) Ankhi annihu wala arokorihu yaale athelanne ni mutthu ohinimurumeela Yehova? Akina a yaawo yiixuntte ekeekhai nuumala othelana, masi ole othelanne aya kheemerenrye okhala Namoona. Hata vari siiso, ovarihela muteko malakiheryo a Biibiliya pooti okhaliherya etthoko okhala yowiiraana. Eyo enihela muhina wiimananiha olipiha ekasamento aya, masi ahitthekelaka malakiheryo a Biibiliya. Nnaamwi ikwaha sikina vaxankihaka opaka eyo, masi muhaana wuupuwelaka mareeliho anikhumelela. Muxankiho mukina onnikhumelela akhala wira ole othelanne ahu onnihiya omurumeela Yehova. Eyo yaahiiraneya ni murokora mmosa oniitthaniwa Maria. Owo ni iyawe, Davidi, yaanimurumeela Yehova hoothe, masi Davidi aahihiya orowela mithukumano. Maria aahivikaniha orowela mithukumano sa mmulokoni ni suulupale, nave aaniimananiha otthara malakiheryo a Biibiliya vatthokoni vawe, ohela muhina owiixuttiha anaawe 6. Okathi anaawe yannuwale aya akhuma vate, Maria waahimphwanya omeekha. Nto Davidi aahipacerya osoma irevista Maria aamuhiyerya awe. Muhoolo mwaya, owo aahipacerya orowela mithukumano Empa ya Omwene. Musulwaawe Davidi, yoowo aarina iyaakha 6, aanimusukerya opuro omithukumanoni, nto akhala wira Davidi aamucompa nihiku nlo, mwaana ole aanihimya so: “Taata, olelo nkoowehaleni omithukumanoni”. Vano, sivinre ene iyaakha 25, Davidi ootthikela omurumeela Yehova moohakalala, vamosa ni mwaarawe.

15. Ale athelanne khalai anrowa waakhaliherya sai ale athelanne ninaano?

¹⁵ Okhala wira Satana onnilupattha imusi olelo-va, nto vannitthuneya wira arumeyi otheene a Yehova avikaniheke wiiraana  vatthokoni vaya. Hata muthelanne ene khalai wala ninaano, muhaana wuupuwelaka ele ekhanle anyu oopaka wala olavula wira mulipihe etthoko anyu. Ale athelanne khalai mmulokoni pooti waakhaliherya ale athelanne ninaano. Pooti waalattula vatthokoni vanyu anna athelanne ninaano wira yiirele mpantta omulompa Muluku vatthokoni. Okathi owo, animoonaka wira munniphentana vanceene, hata muthelanne khalai.​—Tito 2:3-7.

16, 17. Exeeni arumeyi a Muluku anilipelela aya?

¹⁶ Nkahaya nwuupuwele aIsarayeli khuta ekwaha yaarowela aya niira empa ya Muluku oYerusalemu. Awo yahaana olokiherya mukwaha, okhapelelana okathi yeetta aya mukwaha owo, ni yaphiya vale, yahaana omukhokhorela Yehova mowiiraana. Itthu sotheene iya saavekela wira atthu yiiwananeke ni yiiraaneke. (Luka 2:41-44) Vaavo vaneetta ahu nrowaka elapo esya, nohaana wiiwanana ni wiiraana. Nto eyo enivekela wiimananiha vanceene, moohihiyererya. Niireke yookhala etthu eniwerya anyu opaka wira nivikaniheke wiiraana?

¹⁷ Hiyo ninnilipelela mareeliho manceene muhoolo. Noohiya ovara itthu sa mulaponi sinikumiherya ohiiwanana. Vano ninnoona yiiraneyaka ele profeta Yesaya ni Mikeya yaahimyale aya vahinatthi, wira arumeyi a Muluku anrowa ‘owelaka mwako w’Apwiya’ mowiiraana. (Yes. 2:2-4; mmusome Mikeya 4:2-4.) Tthiri, mahiku ala ookiserya, okokhorela wahu onootepa oloka. Muhoolo ninrowa otepa ohakalala, vaavo apinaatamu otheene anrowa aya okhala oowiiraana ni wiiwanana.