1-3. Exeeni waaniheryasa yiiraneyale ni Evodia ni Sintikhe? Mixankiho ntoko iyo sinrowa osyakiwa sai? (Nwehe elatarato yoopacerya.)

HIYO ninnisiveliwa Biibiliya maana noosuwela wira Eliivuru ya mwaneene Muluku. Biibiliya ookhalana miruku sinwerya onikhaliherya osyaka mixankiho ni onittaruxa okathi ninvonya ahu. Nto nnoonela sai miruku iyo? Nkahaya nwuupuwele athiyana anli oowoottihiwa a eseekulu yoopacerya, Evodia ni Sintikhe. Biibiliya onihimya wira athiyana ala yaahinyakulihana, masi khonihimya nthowa naya. Nrowe nuupuwelele ele yaakhumelenle.

² Waaniheryasa Evodia aahaalattula owannyawe anna ni arokora wira yalye. Masi khaamulattunle Sintikhe. Muhoolo mwaya, Sintikhe aahiwiiwa atthu akina ahimyaka wira khiyaareere opuha, nto eyo yaahimunyoonya Sintikhe. Woonasa wene Sintikhe uupuwenle so: ‘Nkinikupali wira Evodia ohaalattula anna ni arokora khuhikilattula! Kuupuwela wira naapatthani aalupale’. Nto Sintikhe oona wira Evodia khaasiveliwa ni yena ni aanimunyokha. Tivonto, Sintikhe aahaalattula anna  ni arokora owannyawe masi khuhimulattula Evodia! Etthu ela yaahaanyoonya atthu akina mmulokoni. Biibiliya onnooniherya wira Paulo aahaakhaliherya arokora ale anli ni aahaatumererya wira avaanele mwa murettele. Pooti wira arokora ale yaahinwiriyana Paulo nto yaahivikaniha omurumeela Yehova moohakalala.​—aFilipi 4:2, 3.

³ Olelo-va, mmulokoni pooti okhumelela mixankiho eriyari ya anna aahiiso arokora. Masi akhala wira ninnitthara miruku sa Biibiliya, nnoowerya ophuka mixankiho sahu. Nave-tho, nnoowerya osyaka mixankiho iyo. Nto vaavo vaniiwelela ahu ele Biibiliya enihimya awe, eyo enooniherya wira ninnisiveliwa ni Eliivuru ya mwaneene Yehova.​—Esalimo 27:11.

4, 5. Miruku xeeni Nuulumo na Muluku ninnivaha aya wira nikasoopeke murima ahu?

⁴ Khivanikhweya okathi wotheene okasoopa murima ahu. Maana hiyo pooti oriipiwa murima aahiiso onanariwa vaavo ninruwaniwa ahu aahiiso othokoreriwa moohixariya, woonasa wene mwaha wa soolema sahu, ekoore ya erutthu ahu aahiiso mawarelo ahu. Nave vannitepa owereya akhala wira mutthu onniruwana aahiiso onnithokorerya moohixariya munna aahiiso murokora. Moota xeeni miruku siniphwanyaneya muNuulumoni na Muluku sinnikhaliherya aya?

⁵ Yehova onnisuwela ele ekhanle ookhumelela akhala wira apinaatamu khanikasoopa murima aya. Okathi ninnanariwa ahu aahiiso onyoonyiheya, hiyo pooti ohimya aahiiso opaka etthu enrowa oniiriha muhoolo mwaya othanana. MBiibiliyani, Yehova onniniixuttiha moota wookasoopa murima ahu. Owo onihimya so: “Òwakuva onanariwa muloló”. Nkahaya muupuwele mixankiho saarowa ahu osyaka vaakhanle wira ninniiwelela miruku iyo ni ohaakuva onanariwa! (Mmusome Musuweli 7:9; Miruku 16:32.) Biibiliya onnintumererya waalevelela atthu akina. Tthiri, Yesu aahimmye wira, akhala wira khinnaalevelela atthu akina, Yehova khonrowa onilevelela. (Matheyo 6:14, 15) Niireke munnoona otthuneya waya opixa murima ni ophavela waalevelela atthu akina?

6. Exeeni ekhanle ookhumelela akhala wira khannikasoopa murima ahu?

⁶ Naahikasoope murima ahu, nnoovikanihaka onanariwa ni opacerya omunyokha mutthu. Aahiiso hiyo pooti owiiriha atthu akina mmulokoni otthara moonelo ahu. Hata neereryaka ovitha onanariwa wahu aahiiso onyoonyiheya wahu, muhoolo mwaya atthu akina anoosuwela. Nto anna ni arokora pooti opacerya onihuluwa. (Miruku 26:24-26) Axitokweene anrowa omurumeela Biibiliya wira anikhaliherye omaliha onanariwa ni onyokha wira naaleveleleke atthu akina. (Onamukuttho 19:17, 18; aRoma 3:11-18) Okathi anipaka aya eyo, niireke nnootthara malakiheryo a Eliivuru ya mwaneene Yehova?

7, 8. (a) Yehova onaalakiherya sai atthu awe? (b) Malakiheryo xeeni makina aniphwanya ahu mBiibiliyani, ni xeeni vanitthuneya ahu wiiwelela?

⁷ Olelo-va, Yehova onniweettiha ni owiixuttiha atthu awe ari valaponi aniirela mpantta otthokeya wawe. Moota xeeni? Owo oomuthanla Kristu okhala “murima  [muru, Tradução do Novo Mundo] w’Ekereja”, nave Kristu oomuthanla “murumeyi òroromeleya ni ànkhili” wira owiixuttiheke ni waalakiherya atthu awe. (aÉfeso 5:23; Matheyo 24:45-47) Ntoko siisaale nikhuuru noolamulela na eseekulu yoopacerya, murumeyi ola onninvaha efaita Biibiliya okhala wira Nuulumo na Muluku. (Mmusome 1 aTesalonika 2:13.) Malakiheryo xeeni aniphwanya ahu mBiibiliyani?

⁸ Biibiliya onnileela wira nihicompeleke mithukumano. (aHéberi 10:24, 25) Tthiri Biibiliya onnintumererya otheene ahu okupali sowiixuttiha sawe. (1 aKorinto 1:10) Nave-tho, onninleela wira nihaana ovikaniha opacerya “ophavela Omwene wa Muluku”. (Matheyo 6:33) Biibiliya onninivaha malakiheryo a moota woolaleerya empa ni empa, mapuro oowaatta atthu ni khula opuro nnaaphwanya ahu atthu. (Matheyo 28:19, 20; Miteko 5:42; 17:17; 20:20) Malakiheryo a Biibiliya annaakhaliherya axitokweene wiiriha muloko ovikaniha okhala wooloka. (1 aKorinto 5:1-5, 13; 1 Timótheyo 5:19-21) Nave Biibiliya onninleela wira nihaana ovikaniha orapiha soonanara sa erutthu ahu ni osyaka miyuupuwelo ni soolema soohiloka seiyo Yehova oninyokha awe.​—2 aKorinto 7:1.

9. Ti pani Yesu omuthanlale awe wira onikhaliheryeke wiiwexexa Nuulumo na Muluku?

⁹ Atthu akina pooti wuupuwela wira khivanitthuneya otthokiheriwa myaha sa Biibiliya. Masi, okhuma 1919, Yesu onnimurumeela “murumeyi òroromeleya ni ànkhili” wira aakhaliheryeke atthu a Muluku omwiiwexexa Biibiliya ni otthara ele onihimya awe. Weettela sowiixuttiha sa Biibiliya, onookhaliherya muloko ovikaniha okhala wooloka, wa murettele ni wowiiraana. Mwiikoheke so: ‘Kinniroromeleya wa Yesu ni kinnitthara malakiheryo a murumeyi oororomeleya?’

10. Eliivuru ya Ezekiyeli enitthokiherya sai mpantta wa wiirimu wa otthokeya wa Yehova?

¹⁰ Biibiliya onninikhaliherya osuwela wira arumeyi a Yehova ari wiirimu tootthokiheya. Mwa ntakiheryo, Ezekiyeli aahimoona Yehova moolohani owenle ene ekaaro awe yeeyo yeetta mowaakuveya erowaka khula opuro Yehova oniphavela awe. (Ezekiyeli 1:4-28) Ekaaro eyo enithoonyerya mpantta wa wiirimu wa otthokeya wa Muluku, yoowo onitthara malakiheryo awe. Nto yookhumelela aya, ennivara mpantta wa valaponi wa otthokeya wawe. Nkahaya muupuwele marukunuxo manceene apakiwe ni otthokeya wa Muluku iyaakha muloko sivinre. Muupuweleke wira Yehova toniiriha opakiwa marukunuxo awo. Moohipisa, Kristu ni malaikha awe anrowa opwetexa olumwenku ola wootakhala. Okathi owo khuuvo onrowa-tho omunyoholaka Yehova ni nsina nawe aahiiso ovaanyiha enamuna ya olamulela awe!

11, 12. Otthokeya wa Yehova owenrye opaka exeeni mahiku ala ookiserya?

¹¹ Nkahaya muupuwele ele otthokeya wa Yehova owenrye aya opaka mahiku ala ookiserya. Oteka. Anna ni arokora anceene  anniimananiha okhaliherya muteko wooteka eseedi esya ya Anamoona a Yehova oWarwick, oNova York, wEstados Unidos ya wAmerica. Anamakhaliherya anceene a olumwenku wotheene anniteka Ipa sa Omwene ni ifiliyaali. Anna ala oowiivahererya annilakiheriwa ni Edepartamento Empaka Eplanta ni Oteka ya Olumwenku Wotheene. Tthiri, ninnaaxukhurela vanceene anna awo aniimananiha okhaliherya muteko wooteka! Nave arumeyi a Yehova olumwenku wotheene annivaha musurukhu aya wira akhaliherye oliviwa mapuro awo. Yehova onnaareeliha atthu awe mwaha wa wiiyeviha ni ororomeleya waya.​—Luka 21:1-4.

¹² Wiixuttiha. Yehova onnisiveliwa owiixuttiha atthu awe. (Yesaya 2:2, 3) Nkahaya muupuwelele ixikola sirina ahu, ntoko iya: Exikola ya Mapioneero, Exikola ya Anamalaleerya a Omwene, Exikola ya oGileadi, Exikola ya Anna Anamphiyaru oBetheli, Exikola ya Axitokweene a Esirkwiitu ni Axaaraya, Exikola ya Axitokweene a Mmulokoni, Exikola ya Orummwa wa Omwene ni Exikola ya Anna a Ekomisau ya eFiliyaali ni Axaaraya. Nave websaite ahu jw.org, onniphwanyaneya Biibiliya ni iliivuru sa mattaava manceene. Websaite owo ookhalana mpantta wa anamwane, imusi ni mpantta sinikumiheriwa itthu sa niinano.  Niireke munnimurumeela jw.org mwaalaleeryaka ni okathi onimulompa anyu Muluku vatthokoni?

13. Muritti xeeni atthu a Yehova arina aya?

¹³ Tthiri eparakha yuulupale wiirela mpantta otthokeya wa Yehova ni osuwela ele ennivekela awe! Nto, okhala wira ninnisuwela ele enimusivela Muluku, nookhalana muritti womwiiwelela ni opaka itthu sooloka. Nave hata atthu anceene asiveliwaka opaka itthu soohiloka, hiyo nihaana ‘okhotta sotakhala’ ntoko Yehova oninyokha awe. (Esalimo 97:10) Nihikhala-khale naatakihaka atthu yaale ‘anona sorera khwìhana sotakhala: anìra sotakhala, khwìhana sorera’. (Yesaya 5:20) Okhala wira nimphavela omuhakalaliha Yehova, noolakela okhala ooloka mmikhalelo sotheene. (1 aKorinto 6:9-11) Ele Yehova onnileela awe mBiibiliyani ti ya mureerelo ahu. Hiyo ninnimphenta, nave nimphavela okhala oororomeleya wa yena. Tivonto nintthara ahu malakiheryo awe owaani, mmulokoni, omutekoni, oxikola aahiiso khula opuro oryaahu. (Miruku 15:3) Nrowe nthokorerye inamuna vakhaani sinireerela ahu okhala oororomeleya wa Muluku.

14. Anamuyari anrowa oororomeleya sai wa Yehova?

¹⁴ Owiixuttiha aniihu. MBiibiliyani, Yehova onnaavaha anamuyari malakiheryo a moota wowiixuttiha anaaya. MaKristau ahaana ovaha ephoole wira ahuupuweleke ntoko anuupuwela aya atthu a elapo ela. (aÉfeso 2:2) Mwa ntakiheryo, mapuro makina tiithi pooti ohimya wira: ‘Muttetthe ahu, muthiyana toniwiixuttiha anamwane’. Masi Biibiliya onaaruma axitiithi wira ahaana owiixuttiha anaaya voohimya sa Yehova. (aÉfeso 6:4) Axitiithi ni aximai animphenta Yehova, anniphavela wira anaaya akhalane wataana wooloka ni Yehova, ntoko Samuweli aarina awe okathi aaryaawe mmiravo.​—1 Samuweli 3:19.

15. Ninrowa ororomeleya sai wa Yehova okathi nimpaka ahu soothanla suulupale?

¹⁵ Opaka soothanla. Nihinatthi opaka soothanla suulupale mookumini, nihaana ophavela osuwela ele Yehova enuupuwela awe wira niroromeleyeke wa yena. Biibiliya ni otthokeya wa Yehova pooti onikhaliherya. Mwa ntakiheryo, olelo-va, anamuyari akina yaawo anikhala elapo ekina annithanla waaroiha anaaya elapo aya wira yakhaleke ni amusi aya. Annipaka eyo aphavelaka wira avikaniheke ovara muteko ni ophwanya musurukhu. Ekeekhai wira eyo yoothanla ya mutthu mwaneene, masi anamathelana ahaana wiikoha so: ‘Yehova onrowa woonela sai yoothanla ahu?’ (Mmusome aRoma 14:12.) Ti vamiruku opacerya wuupuwelela ele Biibiliya enihimya awe, nihinatthi opaka soothanla suulupale sa emusi ahu ni muteko ahu. Nihaana okhaliheriwa ni Tiithi ahu maana khaninwerya weettiha mavalo ahu.​—Yeremiya 10:23.

16. Nuumala omuyara mwanawe, yoothanla xeeni mai mmosa aapanke awe? Exeeni yaamukhalihenrye opaka yoothanla yooloka?

 ¹⁶ Nuumala anamathelana amosa yaakhala elapo ekina omuyara mwanaya mwaamulopwana, yaaphavela omuroiha mwanaya ole wira akhaleke ni anamuyari aya. Masi okathi ole, amwaarawe yaahipacerya omusoma Biibiliya ni Namoona a Yehova. Owo aahiixutta wira torina muritti woomwiixuttiha mwanawe voohimya sa Yehova. (Esalimo 127:3; Miruku 22:6) Maama mmosa aahinvekela Yehova, ntoko Biibiliya onnileela awe, ni aahimuxonttela Yehova wira omukhaliherye opaka etthu yooloka. (Esalimo 62:8, 9) Maama ole aahimuleela muxankiho awe murokora aamusomiha Biibiliya ni atthu akina a mmulokoni. Nnaamwi amusi ni apatthani awe yaamutumererya wira omuroihe mwanawe ole wa anamuyari awe, owo aahoona wira khahiyo vooloka opaka eyo. Iyawe aahoona moota anna ni arokora yaamukhaliherya aya mwaarawe ni mwanawe. Owo aahitikinihiwa ni aahipacerya omusoma Biibiliya ni orowela mithukumano ni emusi awe. Nkahaya muupuwele moota maama ola aahakalanle awe nuumala woona wira Yehova aahaakhula nivekelo nawe!

17. Vaavo vanimusomiha ahu mutthu Biibiliya, nihaana otthara malakiheryo xeeni?

¹⁷ Otthara malakiheryo. Akhala wira ninniroromeleya wa Muluku, ninrowa ottharaka malakiheryo nnaakhela ahu ni otthokeya wawe. Mwa ntakiheryo, nkahaya nthokorerye ele enitthuneya ahu opaka nuumala opacerya omusomiha mutthu eliivuru eni: Biibiliya Oniixuttiha Exeeni Tthiri? Nave noovahiwa malakiheryo wira nuumala yoosoma nihaana oviriha minutu vakhaani, nimukhaliheryaka ole onimusomiha ahu Biibiliya osuwela itthu sikina sa otthokeya wa Yehova. Hiyo pooti orumeela eviidiyu eni: Exeeni Eniiraneya Empa ya Omwene? ni ebroxura eni: Tani Anipaka Yootthuna ya Yehova Olelo-va? Namaliha vale osoma eliivuru Biibiliya Oniixuttiha Exeeni, nihaana omukhaliherya ole onimusomiha ahu otepa olipa “mowaminini”, nimusomihaka eliivuru eni: “Mukhaleke Mophentani Mwa Muluku”, hata obatiziwe ene. (aKolosi 2:7) Niireke munnitthara malakiheryo ala anivahiwa ahu ni otthokeya wa Yehova?

18, 19. Mathowa xeeni makina anniiriha omuxukhurela Yehova?

¹⁸ Tthiri, nookhalana mathowa manceene wira nimuxukhureleke Yehova! Okhala wira “hiyo nokhalana ekumi mwa yowo, ninnetta mwa yowo, nokhala mwa yowo”. (Miteko 17:27, 28) Nave oonivaha Eliivuru awe, eyo piiyo, Biibiliya. Ntoko maKristau a oTesalonika, ninnisiveliwa yoovaha ela, okhala wira enikhuma wa Muluku.​—1 aTesalonika 2:13.

¹⁹ Biibiliya oonikhaliherya omwaattamela Yehova, nave Yehova onninaattamela. (Yakobo 4:8) Nto, ninnimuxukhurela vanceene Tiithi ihu, okhala wira oonilattula wiirela mpantta otthokeya wawe! Ninnoona ntoko nasaalimo yoowo aalempe wira: “Mwattottopele Apwiya, mana t’òrera murima: oniphenta waya ti wohimala”. (Esalimo 136:1) Iversiikulu sotheene sa esaalimo ela, nasaalimo onimaliha ni masu oowi: “oniphenta waya ti wohimala”. Mwekeekhai, akhala wira ninniroromeleya wa Yehova ni otthara malakiheryo onnivaha awe orumeelaka otthokeya wawe, Yehova onrowa onivaha okumi woohimala ni onrowa okhalaka oororomeleya wa hiyo mahiku otheene!