1, 2. (a) Ovirikana xeeni okhanle itthu sinlipelela ahu ni iye sinlipelela aya atthu akina? (b) Ninrowa othokorerya exeeni mwaha ola?

YEHOVA oonivaha itthu sooreera sinlipelela ahu. Owo ooleiherya otteeliha nsina nawe ni wiiriha wiiraneya yoolakela awe wiirimu ni vathi-va. (Matheyo 6:9, 10) Iyo itthu sootepa otthuneya sinlipelela ahu. Nave-tho, Yehova oonileiherya onitthuvela okumi woohimala, akina anrowa okhalaka wiirimu akina valaponi. Tthiri, eyo enrowa okhala etthu yoohakalaliha! (Yohani 10:16; 2 Pedru 3:13) Nave, ninnilipelela woona moota Yehova onrowa awe ovikaniha waalakiherya ni waakhaliherya atthu awe mahiku ala ookiserya.

² Biibiliya onihimya wira waamini “t’inamuna y’okhalana” itthu sinlipelela ahu. Ela enitaphulela wira ale anaamini, annikupali tthiri wira itthu Yehova oleihenrye awe sinrowa wiiraneya. (aHéberi 11:1) Vano, atthu anceene olelo-va annilipelela ni ophavela itthu, masi awo khansuwelexa akhala wira itthu iyo sinimwiiraneya tthiri. Mwa ntakiheryo, mutthu pooti  wuupuwela wira onrowa okanyari elotaria, masi khonsuwelexa akhala wira onrowa okanyari tthiri. Mwaha ola, ninrowa woona moota nikhanle ahu oolipiha owaamini wahu anatiri a Muluku. Nave-tho, ninrowa othokorerya moota waamini woolipa onnikhaliherya aya olelo-va.

3. Xeeni nnaamini ahu wira anatiri a Muluku anrowa wiiraneya?

³ Khuuvo oniyariwa aaminiki. Wira nikhalane waamini, nihaana weemererya wira munepa wootteela wa Muluku eettiheke mirima sahu. (aGalasia 5:22) Maana munepa wootteela wa Muluku onoonikhaliherya omusuwela saana Yehova. Vaavo vanisuwela ahu wira owo toowerya ni a miruku, ninnaamini wira ookhalana owerya wowaamaliherya anatiri awe otheene. Yehova mwaneene, onnilavula sooleiherya sawe ntoko itthu siiraneyale, oriki: “Sothene somaliheriwa!” (Mmusome Wisupulula 21:3-6.) Noosuwela wira okathi wotheene Yehova onnaamaliherya anatiri awe. Owo Muluku ‘òroromeleya’. Tivonto ninkupali ahu khula etthu ennihimeerya awe ya muhoolo.​—Otumererya 7:9.

4. Arumeyi a Muluku a khalai yaamini exeeni?

⁴ AHéberi ekapitulu 11, onninleela masina 16 a alopwana ni athiyana yaawo yaawaamini anatiri a Yehova. Nave-tho, onnaalavula atthu akina anceene yaamuhakalalinhe Yehova “mwaha wo wamini waya”. (aHéberi 11:39) Otheene yaalipelela “osùlu” yoowo Yehova aaleihenrye awe. Awo yaanisuwela wira “osùlu” owo, waarowa waapwetexa awanani a Muluku ni wiiriha elapo otthikela okhala eparayiisu. (Maphattuwelo 3:15) Nto, arumeyi ala a Muluku yaahikhalana waamini woolipa wira Yehova onrowa waattikiherya okumi. Tthiri, awo khiyaalipelela ohihimuxiwa wira yakhaleke wiirimu, okhala wira nlelo Yesu iira ohipanke nivarihano noorowa wiirimu. (aGalasia 3:16) Masi, awo yaalipelela okhala mparayiisu valaponi mahiku otheene.​—Esalimo 37:11; Yesaya 26:19; Hoseya 13:14.

5, 6. Exeeni Abrahamu ni emusi awe yaalipelela aya? Yaawenrye sai ovikaniha olipiha waamini waya? (Nwehe elatarato yoopacerya.)

⁵ Olavulaka sa arumeyi ala oororomeleya a Yehova, aHéberi 11:13, onihimya wira: “Atthu ala othene akhwiye esareiyene wamini. Nto khàphwanyale itthu Muluku sàhimenryawe, masi yahona itthu seiyo sinari ottaiwene, khutteliwa murima”. Awo yaanilipelela elapo esya ni yaanuupuwela akhalaka elapo eyo. Abrahamu aari mmosa a atthu awo. Yesu aahimmye wira Abrahamu “ahitteliwa murima aroromelaka wona” okathi owo. (Yohani 8:56) Sara, Isakhi, Yakobe ni atthu akina anceene yaaniwehererya okathi yoowo Omwene “wupuweliwe ni otekiwe ni Muluku”, onrowa awe olamulela elapo yotheene.​—aHéberi 11:8-11.

⁶ Abrahamu ni emusi awe yaawenrye sai ovikaniha olipiha waamini waya? Awo yaahivikaniha wiixutta voohimya sa Yehova. Okathi mukina, Yehova aanilavulana orumeelaka malaikha, sowooniheriwa ni oloha. Woonasa wene, yaahiixutta ni arumeyi akina oowuuluvala aahiiso soolempwa sa khalai. Abrahamu ni emusi awe khiyaaliyanle anatiri a Muluku, ni yaanisiveliwa owuupuwelela. Nto eyo yaahaakhaliherya ohaaniherya wira Yehova aamwaamaliherya anatiri  awe. Tivonto, awo yaahivikaniha okhala oororomeleya hata okathi wa mixankiho aahiiso okathi yaalupatthiwa aya.

7. Yehova onivanhe exeeni wira olipihe waamini wahu, ni exeeni enireerela ahu opaka?

⁷ Exeeni enrowa onikhaliherya ovikaniha olipiha waamini wahu? Yehova oonivaha Biibiliya yoowo onniixuttiha voohimya sa muhoolo. Owo onninooniherya mBiibiliyani etthu yoopaka wira nihakalaleke. Tivonto oryaaya vooloka omusoma Biibiliya khula nihiku ni otthara malakiheryo awe. (Esalimo 1:1-3; musome Miteko 17:11.) Nave, Yehova onninivaha “yolya okathi aya”, omurumeelaka “murumeyi òroromeleya ni ànkhili”. (Matheyo 24:45) Ntoko arumeyi a Muluku a khalai, nihaana othanla nihiku wira naasomeke anatiri a Muluku ni owuupuwelela saana anatiri awo. Eyo enoonikhaliherya ovikaniha ororomeleya wa Muluku ni owehererya okathi Omwene wa Muluku onrowa aya olamulelaka elapo yotheene.

8. Moota xeeni mavekelo anlipiha aya waamini wahu?

⁸ Etthu xeeni ekina yaakhalihenrye arumeyi a Yehova a khalai ovikaniha olipiha waamini waya? Awo yaaninvekela Yehova wira aakhaliherye ni vaavo yoona aya wira mavekelo aya yanaakhuliwa, waamini waya waanilipa. (Nehemiya 1:4, 11; Esalimo 34:5, 16, 18; Daniyeli 9:19-21) Moolikanasa, vaavo vanoona ahu wira Yehova ohiiwa mavekelo ahu ni oonivaha ele eniphavela ahu okathi wooreerela, omwaamini wahu onnilipa. (Mmusome 1 Yohani 5:14, 15.) Nave-tho, nihaana ovikaniha ‘ovekela’ munepa wootteela wa Yehova wira nitepeke waamini.​—Luka 11:9, 13.

9. Itthu xeeni sikina sinireerela ahu ovekelaka?

⁹ Vaavo vaninvekela ahu Yehova, nihimakeleke onvekela itthu sinnithowa paahi. Masi nihaana omuxukhurela ni onvuwiha khula nihiku. Tthiri Yehova oopaka itthu sinceene sooreera! (Esalimo 40:6) Atthu a Yehova annaavekelela annaya a olumwenku wotheene. Mwa ntakiheryo, nihaana ovikaniha ‘owupuwela alipa-òtthukweliwa’. Nave nihaana waavekelela “aholeli” aneettiha muloko. Vaavo nnoona ahu wira Yehova onnaakhula mavekelo ahu, waamini wahu onnilipa ni ninnitepa omwaattamela.—aHéberi 13:3, 7.

10. Exeeni yaakhalihenrye atthu anceene olipa murima ni ovikaniha ororomeleya wa Muluku?

¹⁰ AHéberi ekapitulu 11, murummwa Paulo ohimmye so: “Athiyana akina yahiwakhela-tho òhihimuwene atthu aya yakhwiye. Atthu akina yahanyuliwa erutthu, ekhonttene wopoliwa vathí-va, wira ephwanye ohihimuwa wotepa orera”. (aHéberi 11:35) Arumeyi anceene yaahivilela mixankiho ni yaahivikaniha ororomeleya wa Muluku, okhala wira yaanimwaamini vanceene natiri a Muluku a waahihimuxa atthu. Awo yaanisuwela wira muhoolo, Yehova aarowa waattikiherya okumi wira akhaleke valaponi mahiku otheene. Nkahaya mmuupuwele Nabothi ni Zekariya. Otheene  aya yaahivonyiwa maluku mpakha okhwa mwaha womwiiwelela Muluku. (1 Mamwene 21:3, 15; 2 Wahala 24:20, 21) Daniyeli aahiriheliwa munlittini mwa akharamu, nave apatthani awe yaahiriheliwa nlitti na mooro. Awo yaahithanla okhwa ohiya ohimwiiwelela Yehova. Alopwana ala yaanaamini vanceene wira Yehova aarowa waavaha munepa awe wootteela ni waakhaliherya ovilela mixankiho iye.—Daniyeli 3:16-18, 20, 95; 6:14, 17, 22-24; aHéberi 11:33, 34.

11. Mixankiho xeeni maprofeta makina yaavilenle aya mwaha wa waamini waya?

¹¹ Maprofeta manceene, ntoko Mikeya ni Yeremiya, yaahiveehiwa ni oriheliwa mukhatteya. Akina, ntoko Eliya, “yanivira mutakhwani ni mmiyakoni, ekhalaka mukhukuni ni mmittuphani. Atthu a vathí-va khiyàphwanela yawo”. Otheene aya yaahivilela mixankiho ni yaahivikaniha ororomeleya wa Muluku okhala wira awo ‘yahikhalana itthu salipelelaya’.​—aHéberi 11:1, 36-38; 1 Mamwene 18:13; 22:24-27; Yeremiya 20:1, 2; 28:10, 11; 32:2.

12. Ntakiheryo xeeni nootepa oloka ninreerela ahu otthara? Exeeni yaamukhalihenrye ovilela mixankiho?

¹² Yesu Kristu aahivilela mixankiho sinceene ni aahivikaniha ororomeleya wa Yehova. Exeeni yaamukhalihenrye ovilela? Paulo ohimmye wira: ‘Mwaha wa otteeliwa murima aalipelela awe, nto aahivilela wiiviwa vamwirini wa nihaaxeryo ohithokoreryaka wuuliwa muru iwo: tivonto okilanthe awe moono woolopwana wa ehice ya Muluku’. (aHéberi 12:2, Tradução do Novo Mundo) Nuumala-vo, Paulo aahaatumererya maKristau ‘wupuwela’ ntakiheryo na Yesu. (Mmusome aHéberi 12:3.) Ntoko Yesu, maKristau manceene a eseekulu yoopacerya yaahiiviwa mwaha wa ororomeleya waya wa Yehova. Mmosa a atthu awo aari Antipa. (Wisupulula 2:13) MaKristau awo ahaakhela etthuvo aya, masi arumeyi akina a Muluku yaakhanle khalai yaalipelela okumi woohimala valaponi vaava. (aHéberi 11:35) Okathi vakhaani nuumala Yesu okhala Mwene mwaakha wa 1914, maKristau oowoottihiwa akhwiiye aahihimuxiwa avahiwa okumi ohinikhwa wiirimu nto anrowa waalamulelaka apinaatamu.​—Wisupulula 20:4.

13, 14. Mixankiho xeeni Rudolf Graichen aavilenle awe, ni exeeni yaamukhalihenrye ovikaniha okhala oororomeleya wa Muluku?

¹³ Arumeyi imilyau sinceene a Muluku, annitthara ntakiheryo na Yesu. Awo annuupuwelela sooleiherya sa Muluku ni annivikaniha ororomeleya wa yena okathi wa mixankiho. Nwehe ntakiheryo na Rudolf Graichen, yoowo oyariwe wAlemanha mwaakha wa 1925. Okathi aaryaawe mmiravo, anamuyari awe yaaniphatteya ilatarato sa myaha sa Biibiliya, vaxirini owannyeya. Owo ohimmye wira: “Elatarato emosa yamooniherya mwiici okhalaka vamosa ni epwittipwitthi, havara vamosa ni mwaapuri, mwaanyompe ni kharamu, niire so, inama  sotheene sikhalaka ni murettele, sikukhuliwaka ni olyihiwa ni mmiravo”. (Yesaya 11:6-9) Eyo yaahimukhaliherya Rudolf wuupuwelela saana eparayiisu valaponi ni olipiha waamini wawe. Nave yaahimukhaliherya ovikaniha ororomeleya wa Yehova nnaamwi aalupatthiwa vootakhala iyaakha sinceene ni Gestapo nazista, nuumala-vo, ni Stasi Comunista da Alemanha Oriental.

¹⁴ Rudolf aahivilela mixankiho sikina sinceene. Maama awe aahikhwa opuro waavariwa muteko wookhanyereriwa oRavensbrück, mwaha wa oretta oniihaniwa tifo. Tiithi awe aahilepa edukumento ohimyaka wira khaaphavela-tho okhala Namoona a Yehova. Masi Rudolf aahivikaniha olipiha waamini wawe. Nuumala okumihiwa mukhatteya, aahirumeela ntoko mutokweene a esirkwiitu. Muhoolo mwaya aahilattuliwa orowa Exikola ya oGileadi ni ahithanleliwa orowa oChile, weiwo aarumeela awe-tho ntoko mutokweene a esirkwiitu. Owo aahimuthela murokora misionaaria oniitthaniwa Patsy. Masi mooriipiha murima, mwaakha mmosa muhoolo mwaya mwanaya mwaamuthiyana aahikhwa. Muhoolo mwaya, Patsy aahikhwa orina ene iyaakha 43 paahi. Hata saamukhumelenle  mixankiho iya, Rudolf aahivikaniha omurumeela Yehova. Nuumala wuuluvala ni okhalana mixankiho sa ekumi, owo aanirumeela ntoko pioneero ookilaatheya ni mutokweene. Hiyo pooti osoma yowiiraneya ya mweekumini ya Rudolf, erevista A Sentinela 1 a Agosto a 1997, ipaaxina 20-25. ^[1] (Nwehe enoota.)

15. Nvahe matakiheryo a anna ni arokora a mahiku ala animurumeela Yehova moohakalala nnaamwi alupatthiwaka.

¹⁵ Olelo-va, anna ni arokora anceene annimurumeela Yehova moohakalala, nnaamwi alupatthiwaka vootakhala. Anna anceene aatthukweliwa wEritréia, oSingapura ni oCoreia do Sul mwaha woowi annikhootta ‘orumela ekatana’. (Matheyo 26:52) Mwa ntakiheryo, Isaac, Negede ni Paulos aaviriha iyaakha sinivikana 20 aryeene mukhatteya, wEritréia! Awo annihasuliwa vanceene. Iyaakha iya avirinhe aya, khaniwerya othela aahiiso waakhapelela anamuyari aya. Masi awo toororomeleya wa Yehova ni waamini waya ti woolipa. Nnaamwi aryeene mukhatteya, mapiliisa annaattittimiha. Ifootu sa anna awo sinniphwanyaneya va websaite ahu jw.org. Awo annihakalala nnaamwi ahaawaka.

16. Waamini woolipa, onrowa wookhaliheryani opaka exeeni?

¹⁶ Arumeyi anceene a Yehova khakhanle mukhatteya aahiiso khanilupatthiwa ntoko anna nimanle ahu waalavula. Masi atthu anceene annihaawa mwaha wa osikhini, ihasara sa ephattu ni ikhotto sa maloko a elapo emosaru. Akina annitthara ntakiheryo na Abrahamu, Isakhi, Yakobe ni Moise nto awo aahiya ophavelasa ovuwa aahiiso mihakhu wira amurumeeleke Yehova. Exeeni enaakhaliherya anna ovikaniha ohakalala amurumeelaka Yehova? Mwaha woowi annimphenta Yehova ni anniwaamini anatiri awe. Awo aasuwela wira owo onimwaatthuvela arumeyi awe oororomeleya ni okumi woohimala elapo esya, yeeyo enrowa okhala exariya.​—Musome Esalimo 37:5, 7, 9, 29.

17. Munrowa ovikaniha sai olipiha waamini wanyu, ni exeeni ninrowa ahu othokorerya mwaha onittharelana?

¹⁷ Mwaha ola, nihoona moota waamini onnikhaliherya aya okupali wira ‘nnokhalana itthu sinlipelelahu’. Wira nikhalane waamini iwo, nihaana onvekela Yehova ni owuupuwelela anatiri awe. Nto nnoowerya ovilela okathi wa mixankiho. Mwaha onittharelana, ninrowa othokorerya itthu sikina voohimya sa ele okhalana waamini ontaphulela aya.