MOOVARIHANA ni Matheyo 13:24-26, Yesu aahimmye wira: “Omwene wa wirimu onlikana ni mulopwana mmosa ànle epyó yorera mmatta mwawe. Vano ohiyu, atthu othene erupaka, nwanani awe ahirwa, ahàla-mo epyó yonanara, mmatta memmo mwàliwe etrigu, khurowa. Etrigu vannuwalyaya, vathapuluwalyaya, nahikhumelela-tho nthakathaka”. Anamalepa akina annivaanyiha nlikanyiho nna wira khahiyo etthu yiiraneyale, masi moovarihana ni anamalepa a khalai ooRoma, etthu eyo yaaniiraneya.

Disionaario mmosa a Biibiliya onihimya wira nlamulo na oRoma, yaari ekrime waala nthakathaka mmatta mwa mutthu mukina mwaha woomunlela ikuhu. Mwaha woopakiwa nlamulo nno, ethoonyeryo yoowi eyo yaahiiraneya tthiri. Nto Alastair Kerr, mulipa osomme nlamulo, onitthokiherya wira mwaakha wa 533 nuumala Kristu orwa, Justinian, Mukhulupale a oRoma aahilaleya eliivuru eniihaniwa Digest. Eliivuru eyo yaanitthokiherya mookwasa malamulo a oRoma ni soohimmwa sa malamulo aasomi yaakhanle iyaakha 100-250, nuumala Kristu orwa. Moovarihana ni eliivuru Digest, musomi mmosa, Ulpian, aahiromola mwaha owo eseekulu ya nenli. Nthakathaka naaliwa mmatta mwa mutthu mukina, naanihonona ipyo sa ematta eyo. Eliivuru Digest, yaanihimya wira ole ohononeliwe ipyo sawe, aahaana ehakhi ya oliviwa musurukhu ni mulipa aalale nthakathaka.

Okhala wira itthu iyo saaniiraneya khalai muttetthe wa oRoma, nto eyo enooniherya wira nlikanyiho na Yesu naahiiraneya tthiri.