1, 2. Xeeni Anamoona a Yehova aniwara aya saana? (Nwehe elatarato yoopacerya.)

EJORNAALE ya elapo ya Holanda, yahooniherya moota ahooleli a ikerexa yaawanre aya arowaka omuthukumanoni waya. Eriki: “Awo yaawanre ikuwo soohireerela okathi ole, vanceenexa nihiku nooviha”. Masi ejornaale emosaru yaahihimya moota Anamoona a Yehova yaawanre aya okathi wa kongresu aya. Eriki: Alopwana yaawanre ikasako ni igravata, vano athiyana yaawanre isaaya soorakama, sooreera ni sookhalela. Ikwaha sinceene, Anamoona a Yehova annittottopeliwa mwaha woowara saana. Murummwa Paulo aahimmye wira maKristau ahaana owara ikuwo ‘sohùliha muru’ ni sinooniherya wira mutthu owo ookhalana ankhili ooloka, seiyo simphwanela owariwa ni arumeyi a Muluku. (1 Timótheyo 2:9, 10) Nnaamwi Paulo aahimya athiyana maKristau, malamulo awo annivareleya muteko wa alopwana maKristau.

² Malamulo a Muluku a moota woowara tootthuneya okhala wira na arumeyi a Yehova, nave tootthuneya wa  Muluku onimurumeela ahu. (Maphattuwelo 3:21) Biibiliya onnooniherya oratteene wira Yehova yoowo ori Mukhulupale a olumwenku wotheene, ookhalana malamulo a moota wowiitthokiha oniphavela awe wira arumeyi awe atthareke. Tivonto, nihiwareke ikuwo sinnisivela paahi, masi ti vootthuneya owara ikuwo sinrowa omusiveliha Mwene ni Pwiya ahu, Yehova.

3. Nlamulo Muluku aavanha awe aIsarayeli, ninniixuttiha exeeni?

³ Nlamulo na Moise, naahikhalana malakiheryo yaawo yaakhapelela aIsarayeli osyaka mweettelo wa orupihana woohiloka, waapakiwa ni maloko oowaattamela. Nlamulo nne nanooniherya wira Yehova khaasiveliwa ni ikuwo seiye saamwiiriha mutthu ohisuwanyeya akhala wira mulopwana aahiiso muthiyana. Mahiku ala, vannivila omusuwela mulopwana aahiiso muthiyana mwaha wa ikuwo siniwariwa. (Mmusome Otumererya 22:5.) Nlamulo nne, ninninikhaliherya woona wira Yehova khonisiveliwa ni ikuwo sinimwiiriha mulopwana okhalaka ntoko muthiyana ni muthiyana okhala ntoko mulopwana, niire so, sinivila omusuwela akhala wira mulopwana aahiiso muthiyana.

4. Exeeni enrowa waakhaliherya maKristau othanla ikuwo sooloka?

⁴ Malakiheryo a Biibiliya anninikhaliherya othanla saana ikuwo siniwara ahu. Malakiheryo awo annivareleya muteko, hata nikhalaka ilapo soovirikana aahiiso makhalelo ni soolema soovirikana. Khivanitthuneya opaka elista ya ikuwo sineemereriwa ni sihineemereriwa. Nihaana otthara malakiheryo a Biibiliya, yaawo annikhaliherya othanla ikuwo sooloka ni sinnisivela. Nrowe nthokorerye malakiheryo a Biibiliya anrowa onikhaliherya osuwela othanla etthu “yorera, enimusivela Muluku ni ya xariya”, okathi onithanla soowara.​—aRoma 12:1, 2.

5, 6. Ikuwo sahu pooti owiiriha atthu opaka exeeni?

⁵ Murummwa Paulo aahuupuxeriwa olavula malakiheryo ootthuneya aniphwanyaneya 2 aKorinto 6:4. (Mmusome.) Mawarelo ahu annihimya etthu, niire so, pooti owiiriha atthu akina okhalana moonelo wooloka aahiiso woohiloka voohimya sa hiyo. (1 Samuweli 16:7) Okhala wira na arumeyi a Muluku, nihaana ovarerya ikuwo siniwara ahu, ohiya paahi owara ikuwo sinnisivela. Otthara malakiheryo a Biibiliya,  anninikhaliherya osyaka owara ikuwo sootita, sowooneela ni sookhuveya. Eyo enitaphulela wira nihaana osyaka ikuwo sinooniherya mipantta sa erutthu sihinreerela wooniwa. Nihimwiirihe mutthu oweha mpantta mukina aahiiso wuurama mwaha woowara ikuwo sinooneela muhina.

⁶ Akhala wira ikuwo sahu ti sooloka, sookatthiwa, ni ninniwara saana ni mowiiyeviha, atthu anrowa onttittimihaka vanceene ni omuttittimiha Mwene ni Pwiya Yehova. Woonasa wene anoophavelaka omusuwela Muluku onimukokhorela ahu, ottittimiha vanceene otthokeya wahu ni ophavela owiriyana ihapari sinoopola ikumi sinlaleya ahu.

7, 8. Okathi xeeni wootepa otthuneya owara saana?

⁷ Nookhalana muritti ohoolo wa Muluku ahu oowaarya, anna ni arokora ni atthu anaalaleerya ahu. Nto mawarelo ahu ahaana onvuwiha Yehova ni ovaha onamoona okathi onilaleerya ahu. (aRoma 13:8-10) Ti vootthuneya owara saana naarowaka omuthukumanoni ni naarowaka olaleerya. Nihaana owara  mwa enamuna eniphwanelela atthu animukokhorela Muluku. (1 Timótheyo 2:10) Mwekeekhai, mawarelo annivirikana khula elapo. Tivonto, nnaamwi nikhalaka ilapo soovirikana, ntoko Anamoona a Yehova ninnisyaka mawarelo yaarowa waakhumuliha akina.

⁸ Mmusome 1 aKorinto 10:31. Okathi ninrowa ahu wa asembeleya, okongresuni ikuwo sahu sihaana okhala soophwanelela ni sinooniherya nttittimiho. Nave nihaana osyaka mawarelo aahiiso ikuwo soohiloka sihireere wuulaana olumwenku ola. Okhuma nihiku noopacerya mpakha nihiku nookiserya na kongresu nihaana owara saana. Akhala wira nimanke owateelo, nihaana osyaka owara ikuwo soohiloka okathi oniphiya ahu mpakha okhuma. Opaka eyo enoonikhaliherya ohuuliwa muru ohimya wira na Anamoona a Yehova, ni nnoowerya olaleerya khula okathi.

9, 10. Xeeni aFilipi 2:4 onnikhaliherya awe owara saana?

⁹ Mmusome aFilipi 2:4. Xeeni vanitthuneya ahu wuupuwela moota anna ni arokora anoonela aya ikuwo sahu ni mawarelo ahu? Mwaha woowi arumeyi a Muluku anniimananiha otthara miruku iya: “Vano, mpwetexe mwettelo anyu wa vathí-va: enamuttompe, oraruwa, osiveliwa n’itthu sonanara n’uphavela seiyo”. (aKolosi 3:2, 5) Anna ni arokora akina aahiya orupihana woohiloka, nto annivikaniha owanana soophavela iyo soohiloka. Akhala wira khanniivaha ephoole moota ninwara ahu, pooti waaxankiha vanceene anna awo ovikaniha otthara malakiheryo a Biibiliya ni owanana soophavela iyo soohiloka. (1 aKorinto 6:9, 10) Hiyo khanimphavela otepa waaxankiha anna awo, khahiyo siiso?

¹⁰ Okathi onikhala ahu ni annihu, ninnisyaka okhala ni atthu anitumererya orupihana woohiloka. Owara wahu saana onnikumiherya ohakalala, nakhala omithukumanoni aahiiso naatthekulaka. Nnaamwi nirineene ehakhi ya othanla mootaphuwa ikuwo sahu, nihaana owara ni wiitthokiha mwa enamuna enrowa owiiriha annihu ovikaniha okhalana muupuwelo, moolumo ni mweettelo wooloka vamaithoni va Muluku. (1 Pedru 1:15, 16) Tthiri ole oniphenta mwekeekhai “onnalemeliha akhw’awe, khamphavela mureerelo awe”.​—1 aKorinto 13:4, 5.

11, 12. Moota xeeni Musuweli 3:1, 17 onnikhaliherya awe othanla ikuwo sooreerela?

¹¹ Vaavo arumeyi a Muluku anithanla aya ikuwo soowara, annisuwela wira “khula etthu yookhalana emar’aya”. (Musuweli 3:1, 17) Mwaha wa itthu ntoko makhalelo, soolema, elapo, oviha  aahiiso oriirya, onniniiriha othanla ikuwo sinireerela owara. Masi malamulo a Yehova khanturukeya.​—Malakhiya 3:6.

¹² Ilapo sooviha vannivila othanla ikuwo sooreerela ni soottittimiheya. Anna ni arokora annisiveliwa akhala wira ninniwara ikuwo soohitita aahiiso sihinooneela muhina. (Yobi 31:1) Nave-tho, akhala wira ninkata mphareya aahiiso mpisina ikuwo sahu sihaana okhala sohuuliha muru. (Miruku 11:2, 20) Hata atthu akina mulaponi awaraka ikuwo sowooneela okathi onikata aya, hiyo nihaana othanla ikuwo sininvuwiha Muluku ahu oowaarya, Yehova.

13. Xeeni miruku siri 1 aKorinto 10:32, 33, sinnikhaliherya aya othanla ikuwo?

¹³ Aakhala malakiheryo makina anrowa onikhaliherya okathi onithanla ahu ikuwo. Nihaana ovaha ephoole wira nihaakhumulihe akina. (Mmusome 1 aKorinto 10:32, 33.) Nihaana osyaka owara ikuwo saarowa waakhumuliha annihu ni ale ahinimurumeela Yehova. Murummwa Paulo olempe so: “Khula mutthu aphaveleke omusiveliha mukhw’awe mwa itthu sorera, wira amukhomalihe wamini”. Khuncererya oriki: “Kristu mwanene khaphavenle samusivela”. (aRoma 15:2, 3) Ntoko Yesu, opaka yootthuna ya Muluku ni waakhaliherya atthu akina, itthu sootepa otthuneya ovikana soophavela sahu. Tivonto, khaninrowa owara ikuwo sinnisivela paahi, seiyo saarowa owiiriha akina ohiwiriyana ihapari sinlaleya ahu.

14. Anamuyari anrowa owiixuttiha sai anaaya onvuwiha Muluku mwa enamuna eniwara aya?

¹⁴ Anamuyari maKristau aahaana muritti wa owiixuttiha anaaya wira atthareke malakiheryo a Biibiliya. Eyo enihela muhina wiimananiha wira awo ni anaaya amuhakalaliheke Muluku, mwa enamuna eniwara aya ni wiitthokiha. (Miruku 22:6; 27:11) Anamuyari anrowa owiixuttiha sai anaaya omuttittimiha Muluku ahu oowaarya ni malamulo awe? Anamuyari ahaana waavaha anaaya ntakiheryo nooloka. Nave ahaana moophenta owiixuttiha anaaya opuro ni moota woophwanya ikuwo sooreerela. Anamwane ahithanleke ikuwo mwaha woowi sihaasivela paahi, masi etthu yootthuneya, ahaana othanla ikuwo wira anvuwiheke Yehova, Muluku animurumeela aya.

15. Exeeni enrowa onikhaliherya opaka soothanla sooloka?

¹⁵ Biibiliya, onninivaha malakiheryo ooloka aniwerya onikhaliherya opaka soothanla sooloka wira ninvuwihe Muluku. Hata vari siiso, mawarelo ahu annooniherya ele ennisivela. Mawarelo ni ikuwo sinithuma ahu sinnivirikana ni atthu akina. Masi ikuwo sahu sihaana okhala sooloka, sookatthiwa, sinooniherya wiiyeviha, sinireerela okathi owo, ni opuro aahiiso elapo ahu.

16. Xeeni vanitthuneya ahu wiimananiha wira niphwanye ikuwo sooreerela?

¹⁶ Khivanikhweya ophwanya ikuwo  sooloka ni sooreerela. Ilooxa sinceene sinitumiha ikuwo sihinreerela owara maKristau. Tivonto, onireerela aya okathi ni wiimananiha wira niphwanye ikuwo sooreerela ntoko, ikamisa, ivestido, ipulusa, afaato, aahiiso othanla ikaalasa soohitita ni sohooneela. Masi anna ni arokora anoosiveliwa ni oxukhurela wiimananiha wahu niwaraka ikuwo sooloka ni sookhalela. Ohakalala oniphwanya ahu wira ninvuwihe Tiithi ihu ori wiirimu, onnivikana wiimananiha onipaka ahu wira niphwanye ikuwo sininvuwiha Muluku.

17. Itthu xeeni sinrowa omukhaliherya munna omettha aahiiso ohuwa ereru?

¹⁷ Niireke vannireerela anna ohuwa ereru? Nlamulo na Moise naaniweemererya alopwana ohuwa ereru. Masi, maKristau khaneettihiwa ni Nlamulo na Moise aahiiso khanitthara. (Onamukuttho 19:27; 21:5; aGalasia 3:24, 25) Ilapo sikina, khivantthekeya ohiya ereru yoolokiheriwa saana ni enooniherya nttittimiho, nave anna a mapuro awo annilaleerya moohixankiheya. Tthiri, anna akina arina miritti mmulokoni anneemereriwa ohuwa ereru. Hata vari siiso, anna akina annithanla ohihuwa ereru. (1 aKorinto 8:9, 13; 10:32) Ilapo aahiiso mittetthe sikina, khahiyo yoolema atthu ohuwa ereru, nto khonooniwa okhala vooreerela maKristau ohuwa ereru. Tthiri, mittetthe iyo, akhala wira munna onoohuwa ereru khonrowa onvuwiha Muluku, ni khonrowa okhala “òttittimiheya”.​—1 Timótheyo 3:2, 7; aRoma 15:1-3.

18, 19. Mikeya 6:8 onnikhaliherya sai?

¹⁸ Ninnihakalala vanceene okhala wira Yehova, khonnivaha elista ya malamulo a ikuwo ni moota wowiitthokiha oneemererya awe. Masi oonivaha othanla mootaphuwa, onnikhaliherya opaka soothanla sooloka, moovarihana ni malakiheryo a Biibiliya. Tivonto, okathi ninthanla ahu ikuwo ni moota wowiitthokiha, nihaana wooniherya wiiyeviha okhala wira nimmurumeela Muluku.​—Mikeya 6:8.

¹⁹ Mowiiyeviha ninnisuwela wira Yehova toowaarya, ooratta ni wira malamulo awe tanireerela oneettihaka. Nakhala atthu oowiiyeviha, ninrowa ottharaka malamulo awe mookumini mwahu. Nave anoonikhaliherya ottittimiha moonelo ni muupuwelo wa atthu akina.

20. Ikuwo ni mawarelo ahu sihaana owiiriha akina opaka exeeni?

²⁰ Ikuwo sahu sihaana owiiriha atthu osuwela wira na arumeyi a Yehova. Malamulo a Yehova tooloka, nto ninnisiveliwa weettela. Okhala wene, anna ni arokora ahaana ottottopeliwa mwaha wa mawarelo ni mweettelo aya wooloka. Maana awo anniwiiriha atthu osiveliwa ihapari sa Biibiliya sinoopola ikumi, onvuwiha ni omuhakalaliha Yehova. Vaavo vanipaka ahu soothanla sooloka sa moota woowara, ninrowa ovikanihaka onvuwiha Muluku yoowo owanre “eyulupale n’uvuwa”.​—Esalimo 104:1, 2.