1. Moovarihana ni 1 Pedru 5:2, eparakha xeeni axitokweene arina aya?

 YEHOVA ohaathanla axitokweene wiira akhapeleleke ipwittipwitthi sawe, seiyo sirina efaita vanceene. Alopwana awo oowiivahererya, annivaha efaita yinceene muteko owo avahiwa aya. Ti maana aya awo aniimananiha aya “olyihaka” ipwittipwitthi sa Muluku. (Yer. 23:4; mmusome 1 Pedru 5:2.) Nto hiyo ninnihakalala vanceene mwaha wookhalana axitokweene awo annihoolela mmulokoni!

2. Mixankiho xeeni axitokweene akina woonasa wene anikhalana aya?

² Axitokweene sinnaaphwanya mixankiho sinceene okathi anikhapelela aya miteko saya sa mmulokoni. Mwa ntakiheryo, awo ahaana ovara muteko munceene wiira akhapelele muloko. Tony, mutokweene a wEstados Unidos, aahaana wiiyeviha vanceene wiira oheemererye miteko sinceene. Owo onihimya so: “Nuumala opacerya eretta ya koronaviiru, miyo kaanaatteliwa miteko kitthokihaka mithukumano ni muteko woolaleerya. Hata kuupuwela wiira kaahimaliha miteko saka, kaanikhalana itthu sikina soovara. Nto kaahoona wiira nkaawerya opaka yoosoma aka ya Biibiliya, ya omwaneene ni mavekelo”. Masi mutokweene mmosa aitthaniwa Ilir a oKosovo, aahikhalana muxankiho mukina. Okathi muttetthe awe yaakhumelenle aya ekhotto, owo aanoona ovila wiiwelela malakiheryo yaakhuma mmutthenkesoni mwa Yehova. Owo onihimya so: “Miyo kaahoova okathi ebetheeli yaakivekenle aya wiira kaakhapelele anna ni arokora yaakhala opuro yaawaniwa ekhotto. Nto kaahoona wiira olipa waka murima waahikimalela, ni kaanoona ovila wiiwelela malakiheryo ale”. Nave misionaario mmosa oniitthaniwa Tim, onirumeela wÁsia, aanoona ovila ovara miteko sawe sa khula nihiku. Owo onihimya so: “Ikwaha sikina mwaha wa muteko aka kaanikhulumuwa vanceene”. Exeeni enrowa waakhaliherya axitokweene arina mixankiho simosa-ru?

3. Mukhulupale Gideyoni onivanhe ntakiheryo xeeni?

 ³ Mukhulupale Gideyoni oovaha ntakiheryo nooloka axitokweene anireerela aya otthara. (aHeeb. 6:12; 11:32) Gideyoni aanaakhaliherya ni waakhapelela arumeyi a Muluku. (Makh. 2:16; 1 Wah. 17:6) Ntoko siisaale Gideyoni, axitokweene olelo-va, aathanliwa ni Yehova wiira yaakhapeleleke arumeyi awe okathi wa mixankiho. (Mit. 20:28; 2 Tim. 3:1) Gideyoni oovaha ntakiheryo nooloka na okhala mutthu oowiiyeviha ni oowiiwelela. Nave owo aahivilela mixankiho okathi aari awe mukhulupale. Ootheene ahu nihaana ovaha efaita miteko axitokweene anivara aya, hata niri ene axitokweene aahiiso nnaari. Nave nihaana waakhaliherya anna awo anivara muteko munceene wiira akhapelele muloko. — aHeeb. 13:17.

4. Gideyoni oonihenrye sai wiira aari mutthu oowiiyeviha?

⁴ Gideyoni aari mutthu oowiiyeviha. b Okathi nlaikha na Yehova naamulenle aya Gideyoni wiira aahithanliwa wiira owoopole aisarayeli mmatatani mwa aMadiyani, moowiiyeviha owo aakhunle so: “Nloko naka ti noyevexa eriyari ya maloko a Manasé: vano miyo kòkiserya oyeva vatthokoni v’atithi aka”. (Makh. 6:15) Gideyoni khaixoona wiira aahikhalana mikhalelo saarowa omukhaliherya waaxintta awanani awe. Masi okhaliheriwaka ni Yehova, Gideyoni aahiwerya ovara saana muteko awe.

5. Okathi xeeni okhanle aya oomuxankiha mutokweene okhala oowiiyeviha?

⁵ Axitokweene aanniimananiha vanceene wiira akhale oowiiyeviha. (Mik. 6:8; Mit 20:18, 19) Awo khaniittottopa mwaha wa itthu anisuwela aya opaka aahiiso itthu apanke aya. Awo khaniixona wiira kharina efaita mwaha wa soovonya saya sa khalai aahiiso soottheka. Masi ikwaha sikina khivanikhweya mutokweene okhala oowiiyeviha. Mwa ntakiheryo, mutokweene mmosa pooti weemereryaka miteko sinceene, masi muhoolo mwaya ohinawerya ovara sootheene. Nave pooti ottottopeliwaka mwaha woovara saana muteko awe aahiiso oleeliwa wiira khovanhe saana. Nto eyo yiiraneya axitokweene anrowa otthara sai ntakiheryo na Gideyoni?

6. Axitokweene anrowa otakiha sai wiiyeviha wa Gideyoni? (Nwehe eteseenyo.)

⁶ Nvekeleke nikhaliheryo. Mutthu oowiiyeviha onnisuwela wiira sookhala miteko sikina sihinwerya awe ovara. Mwaha woowiiyeviha, Gideyoni aahaavekela atthu akina nikhaliheryo. (Makh.  6:27, 35; 7:24) Nto vaamureerela axitokweene omutakiha Gideyoni. Tony yoowo nimulavunle ahu ittima sivinre, onitthokiherya so: “Mwaha wa moota kihuuwale aka, eyo yaanikiiriha weemererya miteko sinceene ovikana iye kaawerya aka. Nto okathi naamulompa ahu Muluku vatthokoni, miyo ni mwaaraka naahithanla myaha saalavula sa wiiyeviha. Ohiya-vo, kaahimukoha mwaaraka moota aakoonela awe. Nave kaahitthikela-tho oweha eviidiyu musaitini mwahu yeeyo eni: “Nwiixuttihe, Mwaaroromele ni Mwaavaheke Miritti Akina, Ntoko Yesu Siira Awe”. Nto munna Tony aahipacerya waavaha akina miteko sa mmulokoni. Exeeni yaakhumelenle moottharelana? Owo onihimya so: “Vano muloko onnikhapeleliwa saana nave miyo kinnikhalana okathi munceene wiira kilipihe ompatthani aka ni Yehova”.

7. Axitokweene anrowa omutakiha sai Gideyoni okathi anileeliwa aya wiira yookhala etthu ahipanke aya saana? (Yakobo 3:13.)

⁷ Muhinanariweke mwaleeliwa wiira yookhala etthu muhipanke anyu saana. Etthu ekina enaaxankiha axitokweene okathi yoole anileeliwa aya wiira yookhala etthu aahivanre aya saana. Nto ntakiheryo na Gideyoni pooti waakhaliherya. Okhala wiira Gideyoni anisuwela wiira anittheka, eyo yaahimukhaliherya okhala oomaaleleya okathi aaleeliwa awe ni atthu a Efrayimi wiira yookhala etthu ahaapanke awe saana. (Makh. 8:1-3) Niireke Gideyoni aahinanariwa? Nnaari. Maana owo aahooniherya okhala mutthu oowiiyeviha, aawiriyanaka alopwana ale itthu saahimya aya ni mooreerela murima ophukaka muxankiho ole. Amutakihaka Gideyoni, axitokweene okathi anileeliwa aya wiira yookhala etthu aahipanke aya saana, awo ahaana oowiriyana n ephoole ni ophuka muxankiho owo moomaaleleya. (Mmusome Yakobo 3:13.) Yiira siiso, awo anookumiherya murettele mmulokoni.

8. Axitokweene yooneleke sai okathi anittottopeliwa aya? Nvahe ntakiheryo.

⁸ Gideyoni aahinvuwiha Yehova okathi aattottopeliwe awe ni aisarayeli mwaha woowoopola mmatatani mwa aMadiyani. (Makh. 8:22, 23) Axitokweene anrowa owerya sai omutakiha Gideyoni? Awo anoowerya omutakiha Gideyoni, okathi aninvuwiha aya Yehova mwaha wa itthu sootheene anipaka aya. (1 aKor. 4:6, 7) Mwa ntakiheryo, vakhala wiira mutokweene mmosa onnittottopeliwa mwaha woosuwela wiixuttiha, owo pooti otthokiherya ohimyaka wiira onniwerya opaka eyo maana okhaliheriwe ni Nuulumo na Muluku, Biibiliya. Nave wiixuttihiwe ni Yehova orumeelaka mutthenkeso awe. Ikwaha sikina axitokweene ahaana ovarerya vakhala wiira enamuna aniixuttiha aya khenooniherya wiira animwiivuwiha. Nrowe niwehe yoowiiraneya ya mutokweene mmosa oniitthaniwa Timothy. Owo aahithanliwa wiira okhale mutokweene ni waanimusivela olavula myaha. Owo onihimya so: “Okathi kaalokiherya aka mwaha aka kaanirumeela masu oopacerya oowaatta ni malikanyiho oovila wiiwexexa. Mwaha waivaavo, anna ni arokora anceene yaanirwa okittottopela. Masi mooriipiha murima kaahoona wiira kaamwiivuwiha ohiya onvuwiha Yehova ni Nuulumo nawe Biibiliya”. Nto nuuvira okathi, Timothy aahoona wiira aahaana olokiherya enamuna iixuttiha awe wiira ohiivuwiheke. (Mir. 27:21) Exeeni ekhumelenle? Owo onihimya so: “Vano anna ni arokora anceene annoorwa ni anakileela wiira myaha saka sihaakhaliherya ovilela mixankiho, oxintta sooweha aahiiso olipiha ompatthani aya ni Yehova. Vano miyo kinnihakalala vanceene mwaha woosuwela wiira anna ni arokora annittottopela myaha saka ohiya okittottopela miyo”.

9. Xeeni vaari aya vooxankiha wiira Gideyoni okhale oowiiwelela ni oolipa-murima? (Nwehe elatarato ya ekaapa.)

⁹ Nuumala Gideyoni okhalihiwa mukhulupale a aisarayeli, owo aahaana okhala oowiiwelela ni oolipa-murima. Masi niireke opaka eyo vaahikhweya?  Nnaari. Maana owo aahivahiwa muteko woowoopiha wa waapwexakasa altaari ootheene a Bayaali yaatekiwe ni apapawe. (Makh. 6:25, 26) Muhoolo mwaya, ikwaha piili Yehova aahimuruma Gideyoni wiira aavukule anakhotto aarina awe. (Makh. 7:2-7) Nave Yehova aahimuruma Gideyoni waatuphela awanani awe ohiyu eriyari. — Makh. 7:9-11.

10. Okathi xeeni axitokweene vanaaxankiha aya okhala oowiiwelela?

¹⁰ Khula okathi axitokweene ahaana okhala ‘oowaakuva wiiwelela’. (Yak. 3:17) Mutokweene oowaakuva wiiwelela tuule ohimpisa otthara malakiheryo anikhuma mmutthenkesoni mwa Yehova aahiiso ele Biibiliya enihimya awe. Mwaha woopaka eyo owo onnaavaha ntakiheryo nooloka makristau makina. Masi ikwaha sikina axitokweene awo annoona wiira khivanikhweya okhala oowiiwelela. Mwa ntakiheryo, ikwaha sikina axitokweene awo pooti waakhelaka malakiheryo manceene aahiiso malakiheryo awo pooti oturukiwaka moowaakuveya. Nave ikwaha sikina, awo pooti waanyiheryaka vakhala wiira malakiheryo avahiwa aya anookhaliherya muloko. Aahiiso awo pooti woonaka wiira muteko anrowa aya ovahiwa pooti otthukweliwaka mukhatteya. Akhala wiira eyo enoowiiranela axitokweene anrowa otthara sai ntakiheryo na wiiwelela wa Gideyoni?

11. Exeeni enrowa waakhaliherya axitokweene okhala oowiiwelela?

¹¹ Nwiriyaneke ni ephoole malakiheryo ni nvariheleke muteko. Yehova aahinvaha malakiheryo Gideyoni a moota aarowa awe ompwexa altaari a paapawe, opuro aarowa awe omuteka altaari musya, ni enama aarowa awe ovahaka mukuttho. Gideyoni khaakonhe nthowa naya aavahiwa awe malakiheryo, masi aarimwiiwelela paahi. Olelo-va, mutthenkeso wa Yehova onnilepa ikarta, soohimmwa ni malakiheryo anaatthokiherya axitokweene moota woowaakhapelela anna ni arokora mukhalelo wa weerutthuni ni ompatthani aya ni Yehova. Nto hiyo ninnaaphenta vanceene axitokweene okhala wiira awo annitthara moororomeleya malakiheryo awo anivahiwa aya. Nto eyo ennikhaliherya vanceene muloko. — Esal. 119:112.

12. Axitokweene anrowa otthara sai miruku siri aHeeberi 13:17, okathi anaakhela aya malakiheryo a niinaano?

¹² Mwiilimaleliheke makhalelo masya. Nkahaya muupuwele malakiheryo Yehova anvanhe awe Gideyoni. Yehova aahimuruma Gideyoni wiira aaleele anakhotto awe anceene wiira atthikeleke owaani. (Makh. 7:8) Woonasa wene Gideyoni aaniikoha so: ‘Kiireke kihaana waavukula? Niireke nnoowerya waaxintta awanani ahu?’ Hata aaikoha siiso, Gideyoni aahiiwelela yooruma ele. Olelo-va, axitokweene annimutakiha Gideyoni vaavo anivarihela muteko marukunuxo anikumiheriwa ni mutthenkeso wa Yehova. (Mmusome aHeeberi 13:17.) Mwa ntakiheryo, mwaakha wa 2014 Nikhuuru Noolamulela, naahituruka moota saatekiwa aya Ipa sa Omwene ni Isalau sa Asembeleya. (2 aKor. 8:12-14) Ohinatthi mwaakha wa 2014, okathi muloko waaphavela aya oteka Empa ya Omwene aahiiso ya Asembeleya, mutthenkeso wa Yehova waanikophiha musurukhu muhoolo mwaya anna yaahana oliva musurukhu owo. Masi olelo-va, anna ni arokora olumwenku wootheene  annivaha musurukhu aya, nto mutthenkeso wa Yehova onnirumeela musurukhu owo wiira oliverye miteko sooteka. Nto hata muloko orina ene musurukhu aahiiso nnaari vanniweryaneya otekeliwa Empa ya Omwene. Nto munna mmosa oniitthaniwa José, nuumala wiiwa marukunuxo awo, khaakupali wiira vanweryaneya. Owo uupuwela so: ‘Khivanrowa oweryaneya otekiwa nnakhala Empa emosa ya Omwene, okhala wiira khinlimalenle siiso’. Masi exeeni yaamukhalihenrye José wiilimaleliha ni okhaliherya malakiheryo awo masya? Owo onihimya so: “Moolumo ari Miruku 3:5, 6, yaahikuupuxerya woona wiira kaahaana omuroromela paahi Yehova. Nto sookhumelela itthu soohakalaliha moovirikana ni iye kuupuwela aka! Maana ninniwerya oteka Ipa sinceene sa Omwene, nave ninnikhaliherya mwa inamuna soovirikana wiira anna ni arokora akhalane Ipa saya sa Omwene hata ahirina musurukhu munceene”.

13. a) Etthu xeeni Gideyoni aakupali awe? b) Axitokweene anrowa omutakiha sai Gideyoni? (Nwehe efootu.)

¹³ Mulipeke murima ni mpakeke ele Yehova oniphavela awe. Gideyoni aahimwiiwelela Yehova nnaamwi oova aahiiso aareerela oleva okumi awe. (Makh. 9:17) Nto nuumala Yehova omulipiha Gideyoni, owo aanikupali ni murima awe wootheene wiira anwerya waakhaliherya ni waakhapelela arumeyi a Muluku. Axitokweene anikhala ilapo seiye muteko ahu onikhoottihiwa aya, annitthara ntakiheryo na Gideyoni. Awo annooniherya okhala oolipa-murima maana khanihiya ohoolela muloko atthokihaka mithukumano ni muteko woolaleerya. Nto awo khanihiya ovara miteko iyo hata yoopopihiwaka otthukweliwa, ekohakohiwaka, woomoliwa muteko aahiiso ohaaxiwa. c Nave okathi wa maxakha maalupale axitokweene anooreerelaka okhala oolipa-murima wiira yiiweleleke malakiheryo anrowa aya ovahiwaka hata varowaka oxankiha. Malakiheryo awo pooti ohelaka muhina moota woolaleya muhupi wa ophukela ni etthu arumeyi a Muluku akhanle aya oopaka wiira yoopowe okathi anrowa aya otupheliwa ni Gogi a oMagogi. — Ezek. 38:18; Wiis. 16:21.

14. Okathi xeeni Gideyoni aareerela awe wooniherya ovilela?

¹⁴ Wiira okhale mukhulupale aisarayeli, Gideyoni  aahaana okhalana ikuru sinceene. Okathi atthu a oMadiyani yaatthyanwe aya ohiyu eriyari, Gideyoni aahiwoomola okhuma elapo yoowaataleya ya oYezireyeli mpakha muro Yordani yoowo aarukureriwe ni miri vamosa ni miiwa. (Makh. 7:22) Niireke Gideyoni nuumala ophiya muro Yordani aaheemela? Nnaari! Hata yaatemmwe, awo yaahilapuwa muro Yordani ni khiyaahiyale owoomola awanani aya. Gideyoni ni anakhotto awe 300, moohakalaliha awo yaahaavara ni khwaamala-maliha awanani aya awo, eyo piiyo, yaahaaxintta aMadiyani. — Makh. 8:4-12.

15. Okathi xeeni axitokweene anireerela aya ovilela?

¹⁵ Axitokweene ahaana wooniherya ovilela wiira akhapelele muloko ni emusi aya. Maana okhalana miteko sinceene mmulokoni pooti oowiiriha axitokweene oxanka, okhulumuwa ni oriipiwa murima. Akhala wiira eyo enimwiiraneya, axitokweene anrowa omutakiha sai Gideyoni?

16-17. Exeeni yaamukhalihenrye Gideyoni ovilela, ni exeeni axitokweene anireerela aya okupaliki? (Yesaya 40:28-31.) (Nwehe efootu.)

¹⁶ Mukupaliki wiira Yehova onimoovahani ikuru. Gideyoni aanikupali wiira anvahiwa ikuru ni Yehova, tthiri Yehova aahipaka eyo. (Makh. 6:14, 34) Ekwaha emosa, Gideyoni vamosa ni anakhotto awe yaahiwoomola mamwene manli a oMadiyani. Gideyoni ni anakhotto awe yaawoomola mwentto, woonasa wene mamwene ale oMadiyani yaawenle ikamelo. (Makh. 8:12, 21) Tthiri, akhaliheriwaka ni Yehova yaahaaxintta awanani aya. Nto axitokweene ahaana omuroromelaka Yehova, yoowo ‘ohinkhulumuwa nnakhala ohinooceya’. Tthiri ahaana okupali wiira Yehova onimwaavaha ikuru anipirisari aya. — Mmusome Yesaya 40:28-31.

¹⁷ Nwehe etthu yaamwiiranenle Matthew. Owo oniirela mpantta ekurupu ya axitokweene anilavula ni ispitaali. Etthu xeeni yaamukhalihenrye ovilela? Owo onihimya so: “Moolumo ari aFilipi 4:13, yaahikikhaliherya vanceene. Ikwaha sinceene kaakhulumuwa aka ni kaatepa aka ohikhalana ikuru, kaaninvekela vanceene Yehova. Kaanimuxonttela Yehova wiira okivahe ikuru ni muupuwelo woomaaleleya wiira kiweryeke waakhaliherya anna ni arokora. Nto okathi owo, kaaniwerya ovilela okhala wiira Yehova aanirumeela munepa awe woowaarya wiira okivahe ikuru”. Ntoko Gideyoni, axitokweene olelo-va annivara muteko wooxankiha wiira yaakhapeleleke arumeyi a Yehova hata ikwaha sikina vahikhweyaka. Masi axitokweene ahaana ohiliyala wiira sookhala itthu aniwerya aya opaka ni sikina ahiniwerya aya. Nave awo ahaana okupali wiira Yehova onimwaawiriyana okathi aninvekela aya nikhaliheryo ni ikuru wiira awerye ovilela. — Esal. 116:1; aFil. 2:13.

18. Ntoko niwenha ahu mwaha ola, axitokweene anrowa otthara sai ntakiheryo na Gideyoni?

¹⁸ Ntoko niwenhe ahu mwaha ola, axitokweene anniixutta itthu sinceene ni ntakiheryo na Gideyoni. Nto axitokweene ahaana okhala oowiiyeviha, okathi anithanla aya miteko sa mmulokoni aneemererya aya ovara, okathi anileeliwa aya wiira yookhala etthu ahinvanre aya saana aahiiso okathi aanittottopeliwa aya. Nave axitokweene ahaana okhala oowiiwelela ni oolipa-murima otepexa wene mahiku ala ookiserya ninkhala ahu. Nave-tho awo ahaana omuroromelaka Muluku wiira onimwaavaha ikuru, moohicikha mixankiho sinrowa okhumelela. Ntoko Biibiliya onihimya awe, nihaana ‘atthu siisa waattittimihaka’, ni ovaha efaita khula etthu anipaka aya. — aFil. 2:29.