Biibiliya khonihimya mathowa ene. Masi onnooniherya itthu vakhaani saamwiirinhe Yosefe ni Maria ohikhuma oBethelehemu.

Nlaikha nimosa naahimuhimeerya Maria wiira aamurupala ni ammuyara mwaana. Okathi Maria aaleeliwe awe muhupi ole, owo ni Yosefe yiira akhalaka oNazarethi, eyo piiyo, oGalileya elapo aayariwe awe Yosefe. (Luka 1:26-31; 2:4) Muhoolo mwaya, nuumala awo otthika wExiitu, yaahitthikela oNazarethi. Nto oNazarethi weiwo Yesu annuwale awe ni oniitthaniwa okhala munazarethi. (Math. 2:19-23) Ti nthowa naya okathi nniiwa ahu sa oNazarethi, hiyo nimmuupuwela Yesu, Yosefe ni Maria.

Maria aahikhalana mmusi awe aakhala oYuda, iitthaniwa Elizabeti. Elizabeti aari mwaarawe Zakariya ni maama awe Yohani Mpatisa. (Luka 1:5, 9, 13, 36) Nto Maria aahirowa oYuda omuxukurya Elizabeti ni aahiviriha myeeri miraru ari ene hoothe. Nuumala-vo, owo aahitthikela oNazarethi. (Luka 1:39, 40, 56) Mwaha waivaavo, Maria taasuwenle awe oYuda.

Muhoolo mwaya, Yosefe aahitthikela oBethelehemu okhala wiira nlamulo na aroma, naahimya wiira ‘atthu ootheene yaahaana orepeliwa’ elapo aya. Nave ntoko yaahimya aya eprofesia, Mesiya aarowa oyariwa “epooma ya Davidi”, oBethelehemu. Nto Yosefe aahikhuma oNazarethi orowaka oBethelehemu, weiwo yaari “epooma ya Davidi”. Maana ntoko eprofesia yaahimya aya, Mesiya aarowa oyariwa oBethelehemu. (Luka 2:3, 4; 1 Sam. 17:15; 20:6; Mik. 5:2) Nuumala Maria omuyara Yesu, Yosefe khaaphavela wiira Maria eette mukwaha woorakama arowaka oNazarethi. Nto awo yaahithanla okhala oBethelehemu, maana waahikhuveela oYerusalemu okhala wiira saari ikiloomo 9 paahi. Nave, okhala wiira nlamulo naahimya wiira mutthu aahaana ovaha mukuttho omuyarakaru mwaana, nto okhala oYerusalemu yaamoona aka okhweya orowa mutemplo wiira yavahe mukuttho. — Onam. 12:2, 6-8; Luka 2:22-24.

Nave nlaikha naahimuleela Maria wiira mwaana owo anvahiwa “ehice ya Davidi” ni aarowa ‘olamulela aka ntoko Mwene’. Nto niireke Yosefe ni Maria yaahoona okhala etthu ya faita Yesu oyariwa epooma ya Davidi? (Luka 1:32, 33; 2:11, 17) Woonasa wene awo yaahoona okhala wa faita ohikhuma oYerusalemu mpakha Yehova waavaha malakiheryo makina.

Biibiliya khonihimya okathi Yosefe ni Maria yaavirihale aya ari ene oBethelehemu, ahinatthi oxukuriwa ni asomi a itheneeri. Masi Biibiliya onihimya wiira okathi owo, awo yaahikhalanasa empa ni ‘mwanaya’ iira innunwe ene vakhaani. (Math. 2:11) Woonasa wene, awo yaahithanla ohitthikela oNazarethi, maana yaaphavela wiira oBethelehemu, okhale owannyeya.

Herodi, aahaaruma “atthu awe orowa oBethelehemu . . . wira yawiivakase anamwane axilopwana otheene, okhuma iyaakha piili orowa vathi”. (Math. 2:16) Nto nlaikha na Yehova, naahimuleela Yosefe ni Maria etthu Herodi aaphavela awe opaka, nto awo yaahirowa wExiitu vamosa ni Yesu mpakha Herodi okhwa. Nto Yosefe aahiiwelela okuxaka emusi awe onarowa oNazarethi. Masi xeeni awo yahaatthikenle aya oBethelehemu? Mwaha woowi okathi ole, Arikilawo mwaana a Herodi taalamulela oYudeya ni owo aari mutthu ootakhala murima. Ohiya-vo, nlaikha na Yehova naahimuleela Yosefe wiira ohitthikele muttetthe ole. Nto Yosefe aahithaamela oNazarethi okhala wiira waari opuro wooreerela wiira owerye omuhuwa Yesu. — Math. 2:19-22; 13:55; Luka 2:39, 52.

Yosefe okhwiiye apinaatamu ahinatthi ovahiwa eparakha ya orowa okhalaka wiirimu. Ti nthowa naya Yosefe onrowa awe ohihimuxiwa wiira akhaleke valaponi. Nto atthu anceene anoorowa omusuwela ni anoorowa omukohaka itthu sikina saamwiirinhe Yosefe ni Maria othipelela okhala oBethelehemu, nuumala Yesu oyariwa.