1. Nihaana opaka exeeni wiira noopowe nihiku na Yehova?

 BIIBILIYA aaromolaka nuulumo noowi, “nihiku na Yehova”, oniphavela ohimya okathi yoole Yehova onrowa awe waapwetexa awanani awe ni owoopola arumeyi awe. Ikwaha sikina, Yehova aahitoko opaka eyo khalai. (Yes. 13:1, 6; Ezek. 13:5; Sof. 1:8) Mahiku ahu ala, “nihiku na Yehova” ninrowa opacerya okathi ahooleli a ipoliitika anrowa aya ompwetexa Babilonia Muulupale, nave ninrowa omala okathi wa Armagedoni. Nto wiira noopowe, nihaana wiilokiherya nihinatthi ophiya “nihiku” nno. Yesu ooniixuttiha wiira, nihaana wiilokiherya ahinatthi “maxakha maalupale”. Nto eyo, entaphulela wiira khula okathi nihaana okhala “oolikana ene”. — Math. 24:21; Luka 12:40.

2. Miruku sa Paulo siri 1 aTesaloonika, sinnikhaliherya sai olelo-va?

² Epaphelo yoopacerya Paulo aalepenle awe makristau a oTesaloonika, aahirumeela malikanyiho manceene yaakhaliherya wiilokiherya alipelelaka ophiya nihiku nuulupale na ophukela wa Yehova. Masi Paulo aanisuwela wiira nihiku na Yehova, khinaarowa ophiya okathi ene yoole. (2 aTes. 2:1-3) Hata vari siiso, aahaatumererya makristau ale wiira yaahaana wiilokiheryaka hata nihiku nno nahaarowa ophiya okathi ene yoole. Nave hiyo, nihaana wiilokiherya nittharaka miruku iyo sa Paulo. Vano nrowe niwehe moota murummwa Paulo aatthokihenrye awe: (1) Moota nihiku na Yehova ninrwa aya, (2) tani ahinrowa woopowa nihiku na Yehova ni (3) moota nikhanle ahu oowiilokiherya wiira noopowe nihiku nno.

3. Xeeni ninhimya ahu wiira nihiku na Yehova ninrowa orwa ntoko latarau, ohiyu? (Nwehe eteseenyo.)

³ “Ntoko latarau, ohiyu”. (1 aTes. 5:2) Nla naari nlikanyiho noopacerya wa malikanyiho mararu murummwa Paulo aarumeelale awe ophavelaka ohimya moota nihiku na Yehova naarowa aya orwa. Okhala wene, alatarau anirwa mootutuxerya otepexa wene  ohiyu, okathi yoole atthu yahaalipelela aya. Moolikanasa, nihiku na Yehova ninrowa orwa mootutuxerya, okathi yoowo atthu anceene ahinilipelela aya. Okathi owo, itthu sinrowa wiiraneya moowaakuveya, woonasa wene hata makristau a ekeekhai anoorowa otikinihiwa. Masi moovirikana ni atakhali, arumeyi a Yehova, khanrowa opwetexiwa.

4. Xeeni ninhimya ahu wiira nihiku na Yehova, ninlikana ntoko owereya onimphwanya muthiyana oorupala ohanle oyara?

⁴ “Siisaale ntoko owereya onimphwanya awe muthiyana oorupala ohanle oyara”. (1 aTes. 5:3) Muthiyana oorupala, khonisuwela ewoora onrowa awe oyara, masi onnikupali wiira onooyara. Nto mootutuxerya, onniphiya okathi owo wooyara, onatepa woona owereya. Moolikanasa, khaninsuwela nihiku ni ewoora, nihiku na Yehova ninrowa aya opacerya, masi ninnikupali wiira nnimoorwa. Ophukela wa Yehova onrowa okhala moowaakuveya, nto atakhali khanrowa woopowa.

5. Maxakha maalupale anlikana sai ni okhuma wa nsuwa?

⁵ Ninlikana ni okhuma wa nsuwa. Nlikanyiho nawe na neeraru, Paulo onnitthikela olavula sa alatarau aniiya ohiyu. Masi ekwaha ela, vanikhala ntoko wiira Paulo onilikanyiha nihiku na Yehova ni okhuma wa nsuwa, ohiya ntoko latarau. (1 aTes. 5:4) Ikwaha sikina alatarau pooti oxeleliwa aka ni wiiya, ahinawerya woona wiira vannooxa. Nto nsuwa ninnipacerya waarya ahisuwelaka, nuumala-vo anooniwa ni atthu akina. Eyo ti etthu enrowa owiiraneela okathi wa maxakha maalupale atthu ale anlikana ni alatarau, anipaka itthu soohiloka wiiphiini sihinimusivela Muluku. Nto moovirikana ni atthu awo, hiyo khula okathi nihaana okhootta opaka itthu sihinimusivela Yehova. Masi nihaana wiimananihaka okhala “oreera murima mwa itthu sotheene, okhala a xariya ni weettela ekeekhai”. (aEef. 5:8-12) Moottharelana, Paulo onnirumeela malikanyiho manli ophavelaka waalikanyiha atthu ale ahinrowa woopowa nihiku na Yehova.

6. Mwa enamuna xeeni atthu anceene anrupa aya? (1 aTesaloonika 5:6, 7.)

⁶ “Ale anrupa”. (Mmusome 1 aTesaloonika 5:6, 7.) Iversiikulu iya, murummwa Paulo aahaalikanyiha atthu ale ahinrowa woopowa nihiku na Yehova ntoko atthu anrupa. Maana awo khanoona wiira okathi onnivira nnakhala etthu eniiraneya. Ti nthowa naya ahinsuwela aya okathi siniiraneya aya itthu sa faita, ni ahinipaka aya etthu. Atthu anceene olelo-va, ankhala ntoko wiira anoorupa. (aRom. 11:8) Awo khanikupali wiira ninkhala “mahiku ookiserya”. Nave khanikupali wiira maxakha maalupale anoopacerya moohipisa. Masi okathi sinikhumelela aya itthu ntoko ikhotto ni iretta, vanikhala ntoko wiira awo annivenya vaarupa aya nto anapacerya osiveliwa ni ihapari sa Omwene. Mooriipiha murima, awo annitthikela-tho orupa. Nave hata atthu ale anikupali wiira nnoophiya nihiku noophukela, anoona wiira onoovira okathi munceene wiira niphiye nihiku nno. (2 Ped. 3:3, 4) Moovirikana ni atthu awo, hiyo ninnisuwela wiira khula okathi nihaana okhala oowehaweha.

7. Mwa enamuna xeeni ale ahinrowa woopowa nihiku na Yehova anlikana aya ni anamuhapaliwa?

⁷ “Ale anihapaliwa”. Murummwa Paulo aahaalikanyiha ale anrowa opwetexiwa ni Muluku, ntoko anamuhapaliwa. Namuhapaliwa onnipisa osuwela itthu sinimwiiraneela nave onnipaka itthu soohiloka. Ntoko anamuhapaliwa, atakhali khanipaka etthu okathi anilopoliwa aya. Nto mwaha wa mweettelo aya owo, atakhali awo anoorowa opwetexiwa. Masi makristau ahaana wuupuwelelaka saana, eyo piiyo, owehaweha ni opakaka itthu sooloka. (1 aTes. 5:6) Mulopwana mmosa onitokosa myaha sa mbiibiliyani ohimmye so: “Mutthu onuupuwela saana khonihiya omaaleleya, khonoova ni onnipaka itthu sooloka”. Xeeni wuupuwela saana ori aya wa faita? Wuupuwela saana onoonikhaliherya ohiirela mpantta myaha sa epoliitika ni myaha sikina sa olumwenku ola. Nihiliyaleke wiira ninnitepa waattamela nihiku na Yehova. Nto atthu anceene anootepaka onikhanyererya aka wiirela mpantta myaha iyo. Masi nihitepeke oxankiheya ni itthu iyo. Nto nikupaliki wiira munepa woowaarya wa Yehova, onoonikhaliherya okhala oomaaleleya ni opaka itthu sooloka. — Luka 12:11, 12.

8. Moovarihana ni 1 aTesaloonika 5:8, ninrowa wiilokiherya sai nihinatthi ophiya nihiku na Yehova? (Nwehe elatarato.)

⁸ Niwareke “yoowara ya eyuuma . . . [ni] ekapaseeti”. Murummwa Paulo, aahaalikanyiha makristau ntoko anakhotto aari oowehaweha ni yiilokihenrye wiira awane ekhotto. (Mmusome 1 aTesaloonika 5:8.) Okhottoni, nakhotto khula okathi ohaana okhala oolikana ene wiira owane. Nto eyo ti etthu eniwiiraneela makristau. Wiira niilokiherye nihinatthi ophiya nihiku na Yehova, nihaana owara soowara iya sinittharelana: “Waamini ni ophenta” vamosa ni “nlipelelo na woopowa, ntoko ekapaseeti”. Okhalana mikhalelo iya, sinoonikhaliherya vanceene.

9. Waamini onnikhapelela sai?

⁹ Yoowara ya yuuma yaanikhapelela murima wa nakhotto. Ntoko yoowara ya yuuma yaakhapelela aya murima wa nakhotto, waamini ni ophenta onnikhapelela murima ahu wa nthoonyeryo. Mikhalelo iya, sinninikhaliherya ohihiya omurumeela Muluku ni omutthara Yesu. Waamini onninikupaliha wiira Yehova onimwaatthuvela “ale animwaavya ni murima aya wotheene”. (aHeeb. 11:6) Nave waamini, onninikhaliherya ohihiya omuroromela muhooleli ahu Yesu, hata siniphwanyaka mixankiho. Nave-tho, niwuupuweleke axinna ahu ahinihiya ororomeleya hata ahaaxiwaka aahiiso waathowaka musurukhu. Opaka eyo, onoolipiha waamini  wahu ni onikhaliherya ovilela. Ohiya-vo, nihaana osyaka ophavelasa muhakhu. Exeeni enrowa onikhaliherya osyaka omorela muraakho owo? Nihaana waatakiha anna ni arokora yaawo aakhweihenrye okumi aya wiira aheleke Omwene wa Muluku opuro woopacerya.

10. Moota xeeni omphenta Yehova ni omphenta mukhwiihu onnikhaliherya aya ovilela?

¹⁰ Ophenta, mukhalelo mmosa onikhaliherya ohihiya wuupuwela saana ni okhala oowehaweha. (Math. 22:37-39) Omphenta Muluku, onninikhaliherya ovilela okathi ninlaleerya ahu hata siniphwanyaka mixankiho. (2 Tim. 1:7, 8) Nave ninnaaphenta ale ahinimurumeela Yehova, okhala wiira khaninhiya olaleerya muttetthe ahu hata nimurumeelaka telefoni wala ikarta. Hiyo ninnikupali wiira atthu awo muhoolo anooturuka muupuwelo aya wiira apakeke itthu sooloka sinimusivela Yehova. — Ezek. 18:27, 28.

11. Waaphenta anna ni arokora onnikhapelela sai? (1 aTesaloonika 5:11.)

¹¹ Omphenta mukhwiihu onihela muhina waaphenta anna ni arokora. Nto nnoowerya opaka eyo ‘nilipihanaka ni nikhaliheryanaka mukina ni mukhwaawe’. (Mmusome 1 aTesaloonika 5:11.) Moolikanasa ni anakhotto anikhaliheryana okhottoni, hiyo nave nihaana olipihanaka mukina ni mukhwaawe. Ekeekhai wiira ikwaha sikina nakhotto aaninvulaliha nakhotto mukwaawe okathi yaawana ya ekhotto, masi owo khaapaka eyo moolakelela. Moolikanasa, hiyo khanimphavela waanyoonyiha anna ni arokora moolakelela, aahiiso okathi annipakela aya etthu yootakhala, waattikiherya ni yootakhala. (1 aTes. 5:13, 15) Nave ninnooniherya ophenta, naattittimihaka anna anihoolela muloko. (1 aTes. 5:12) Okathi murummwa Paulo aalepenle awe epaphelo anna a oTesaloonika, muloko ole wiira ohimalinhe mwaakha nuumala opakiwa. Nto woonasa wene, anna yaathanliwe wiira ahooleleke muloko ole, khiyaasuwela itthu sinceene nto ikwaha sikina yaanipaka itthu soohiloka. Masi hata vari siiso, awo yaahaana ottittimihiwaka. Nto hiyo nihaana waaroromela axitokweene yaawo anihoolela muloko ni otthara malakiheryo aya, otepexa wene vaavo nnaattamela ahu okathi wa maxakha maalupale. Woonasa wene okathi owo, hiyo pooti ohiweryaka waakhela malakiheryo anikhuma oseedi ya olumwenku wootheene aahiiso obetheli.  Nto ti nthowa naya vanireerela ahu wuncererya waaphenta wahu ni waattittimiha wahu anna awo anihoolela muloko. Moohicikha etthu enikhumelela, hiyo nihaana wuupuwelaka saana ni ohiwehexexaka soovonya sa axitokweene awo. Tthiri, nikupaliki wiira Yehova ni Yesu, tanaavaha malakiheryo anna awo oororomeleya.

12. Nlipelelo nahu ninkhapelela sai miyuupuwelo sahu?

¹² Ntoko siisaale ekapaseeti yaakhapelela aya muru wa nakhotto, nlipelelo nahu na okumi woohimala ninnikhapelela miyuupuwelo sahu. Nave, okhala wiira nookhalana waamini woolipa, eyo enninikhaliherya ohihapuxiwa ni itthu sihirina efaita sa mulaponi. (aFil. 3:8) Nlipelelo nahu ninninikhaliherya ohihiya okhala oomaaleleya ni ohoova etthu. Eyo ti etthu yaamwiiranenle Wallace ni Laurinda yaawo anirumeela wÁfrica. Muhina mwa isumana tthaaru, Wallace aahikhweliwa namuyari awe ni Laurinda aahikhweliwa namuyari awe. Masi mwaha wa eretta ya koronaviiru, awo khiyaawenrye otthikela elapo aya wiira yakhale vamosa ni amusi aya okathi ole wooxankiha. Wallace onihimya so: “Nlipelelo na ohihimuxiwa, ninnikikhaliherya owuupuwelela aka, ohiya moota yaari aya ahinatthi okhwa, masi moota anrowa aya okhala nuumala otthikela okhala akumi elapo esya. Nto nlipelelo nno ninnikimaaliha okathi kintepaka oriipiwa murima mwaha wa itthu sootheene sikhumelenle”.

13. Exeeni nikhanle ahu oopaka wiira naakhele munepa woowaarya?

¹³ “Muhittipihe mooro wa munepa [wa Muluku]”. (1 aTes. 5:19, enoota.) Paulo aahilikanyiha munepa woowaarya ni mooro onivarela mweerutthuni mwahu. Vaavo ninkhalana ahu munepa wa Muluku, hiyo ninniphavela vanceene ovara itthu Yehova oniphavela awe. Nave ninnikhalana ikuru sinceene wiira ninvarela muteko yena. (aRom. 12:11) Masi nihaana opakaka exeeni wiira naakhele munepa woowaarya? Nihaana ovekela munepa woowaarya, omusoma Biibiliya ni wiirela mpantta miteko sa mmulokoni. Opaka itthu iyo, sinoonikhaliherya okhalana “mikhalelo sinikumiheriwa ni munepa woowaarya”. — aGal. 5:22, 23.

14. Nihaana osyaka exeeni wiira nihihiye waakhela munepa woowaarya wa Muluku? (Nwehe efootu.)

 ¹⁴ Nuumala Yehova onivaha munepa awe woowaarya, hiyo nihaana okhalana ephoole wiira ‘nihittipihe munepa’ awe. Yehova onaavaha paahi munepa awe woowaarya, ale arina muupuwelo ni mweettelo wooloka. Nto akhala wiira nnimuupuwelela aka ni opaka itthu soohiloka, Yehova khonrowa onivaha munepa awe. (1 aTes. 4:7, 8) Ohiya-vo, wiira Yehova ohihiye onivaha munepa awe woowaarya, nihaana osyakaka ‘othokoreryaka iprofesia ntoko itthu sihirina efaita’. (1 aTes. 5:20) “Iprofesia” iyo sinihela muhina muhupi Muluku onnivaha awe orumeela aka munepa awe woowaarya voohimya sa nihiku na Yehova, ni omala-maliha moohipisa itthu sootakhala sa olumwenku ola. Nto hiyo khannuupuwela wiira Armagedoni onoopisa ophiya. Ohiya-vo, ninnikupali wiira onoophiya moohipisa. Ninnooniherya eyo nikhalanaka mweettelo wooloka ni ‘nipakaka itthu sinooniherya wiira ninniroromeleya wa Muluku’ khula nihiku. —2 Ped. 3:11, 12.

15. Ninrowa osyaka sai ohapuxiwa ni soohimmwa soohiloka aahiiso soowootha sinilaleiwa ni minepa sootakhala? (1 aTesaloonika 5:21.)

¹⁵ Muhoolo, awanani a Muluku anrowa olaleyaka wiira: “Nookhalana murettele ni ovareleleya!” (1 aTes. 5:3) Nto minepa sootakhala sinrowa olaleyaka itthu soohiloka elapo yootheene, seiyo sinrowa waahapuxa atthu anceene. (Wiis. 16:13, 14) Masi ankhi hiyo? Hiyo khaninrowa ohapuxiwa akhala wiira ‘nnoovarerya itthu sootheene’. (Mmusome 1 aTesaloonika 5:21.) Nuulumo na eKereku noowi “nvareryeke”, naanirumeeliwa ephavelaka osuweliwa vakhala wiira eparatha wala eweero yaari ya ekeekhai. Mwa enamuna emosaru hiyo nihaana ovareryaka ele nniiwa ahu aahiiso ninsoma ahu wiira noone akhala wiira tthiri ti ya ekeekhai. Eyo yaahaakhaliherya makristau a oTesaloonika nave enninikhaliherya hiyo otepexa wene okathi maxakha maalupale anaattamela aya. Nto ohiya okupaliki khula etthu akina annileela aya, nihaana orumeela muupuwelo ahu wiira nilikanyihe ele ninsoma ahu, nniiwa ahu ni ele Biibiliya aahiiso mutthenkeso wa Yehova onihimya awe. Napaka eyo, khaninrowa ohapuxiwa ni soohimmwa soohiloka ni soowootha sinilaleiwa ni minepa sootakhala. — Mir. 14:15; 1 Tim. 4:1.

16. Exeeni ninkupali ahu sa muhoolo, ni etthu xeeni ninreerela ahu opaka?

¹⁶ Hiyo ninnisuwela wiira arumeyi a Yehova anoorowa woopowa okathi wa maxakha maalupale. Masi khaninsuwela enrowa omwiiraneela khula mmosa a hiyo. (Yak. 4:14) Hata nikhalaka akumi okathi wa maxakha maalupale aahiiso hata nikhwaaka maxakha awo ahinatthi ophiya, naahihiye okhala oororomeleya, Yehova onoonitthuvela onivahaka okumi woohimala. Nto makristau oothanliwa anrowa okhalaka wiirimu vamosa ni Kristu. Masi makristau makina anrowa okhalaka mparayiisu valaponi. Tthiri nihiye owehexexa nlipelelo nahu ni wiilokiherya nihinatthi ophiya nihiku na Yehova!